Skip to content
BibleKenya

Sheshi Kham

यहुन्ना 6

येशुले पास हजारजन आयांइन्या

मत्ती १४:१३-२१; मर्कुस ६:३०-४४; लूका ९:१०-१७

आका छेनल छिन्ट येशु गालील लेऊका तिबेरियास समुन्दरल हुदिफन हिनौ। ओटन तोलोअ घिन्या हुल येशुल छिन्ट लागिऊ, दानाङभन्या येशुले रोगियाङलयर्त आढान्या अचम्मला कामयाङ नकाङै रांरङौ। येशु डान्डाल हिनौ, ओटन आसिइयाङसं ओङ चुङौ। यहूदीयाङल निस्तार-पर्बल बेला नेरा लेऊ। तब येशुले आमि चारवरदेए आखिमौक तोलोअ घिन्या हुल आलेऊदेए राराज्यान्या रङस्यु फिलिपजन ऐआढोव, “इकाङजन यांहौ नाल्ट गे भरेई काङ लङई?” येशुले नाजन बिचारस्यु ऐआढोव, दानाङभन्या ओलं जो ढोङा लिज्याऔ, ना ओलजन थाह लेऊ।

फिलिपले ओलजन जबाक आयोव, “सोगलैजन तचिचिइ यांसिरकन बै नें सय चान्दील सिक्काल भरेईले नकाङजन योअन्यामाल्दी।” येशुल सिइयाङ्ङन तोलोअ, सिमोन पत्रुसलं भाई अन्द्रियासले ऐलेऊ, “आल तोलोअ केटा लिज्याऔ, नासकाए तामल पास गोटा भरेई सनर नेंलोअ ङा:स्या लिज्याऔ। तर आवाए पुरैल नाल्ट नवाएले नै योक का?” येशुले नकाङजन ऐआढोवाङ, “रुयाङजन चुङौ परिङरचिते।” ना पोल भ्याई छी लेऊ। ओटन ओलं छ्योअ पास हजार ल्हेपाङ चुङवाङ। तब येशुले भरेई आहोनौ, ओटन परमेस्वरजन धन्याबाद आयोव ओटन चुङन्याङजन राभाअस्योवाङ, ओटन नैलेस्युई ङा:स्या बै राभाअस्योवाङ नकाङै राचाहिन्या याए रांकयौ। ओटन जब नकाङै भन्दिउ भरि वाङस्यु रांकयौ, येशुले आसिइयाङजन ऐआढोवाङ, यलन्या “आकलाए दुउचिते, ओटन नैज खेर ताटाइत्या।” नकाङ कैस्यु रा:सयलन्या ना तामल पास गोटा भरेईल टुक्राङ रादुकौक बारं घोन फाङताहौ। ऐताइस्यु येशुले आढान्या आका अचम्मला काम रङस्यु नका रुयाङै ऐलेवाङ, “सङ्सारलं रांन्या अगमबक्ता मछ्यु आकाई ज्या रैस।”1 नकाङ रा:स्यु ङाजन जबरजस्ति लाङस्यु रय जाटौ रोअज्यावाङ, ऐलेन्या सनस्यु येशु फरि आबाठए डान्डाल हिनौ।

येशु रील यर्त आबान्या

मत्ती १४:२२-३३; मर्कुस ६:४५-५२

ओई ताहापाइना येशुल सिइयाङ समुन्दर ल्योङ हिन्वाङ। ओटन डोङ्गात चरिस्यु नकाङ समुन्दरल हुदिफन कफर्नहुम देए हिन्ङा लेवाङ। नवाए बेला नमचिउस्यु लेऊ, ओटन येशु अझ समन नकाङल्योङ रा:स्यु मालेऊ। ओटन घिन्या आन्ढी आढाऔकाले, समुन्दरल छाल उर्लिऊ तअसिऊ। पास-छ किलोमिटर डोङ्गा हादेए आहिनौ छिन्ट नकाङै येशुजन समुन्दरलयर्त बास्यु डोङ्गाल नेरा आरांज्यान्या रांरङौ, ओटन नकाङ छ्याएवाङ। तर येशुले नकाङजन ऐआढोवाङ, “ङा दी, ताछ्याएच्यो।” नकाङै ओलजन हेसाङस्यु डोङ्गाल रासचुनौ, ओटन नकाङ राहिनज्यान्या पोल डोङ्गा ओचोएटै ताप्‌रा:औ।

रुयाङै येशुजन रारोअन्या

समुन्दरल हुदिफन लिज्यान्या रुयाङ हुलले छिन्का छिम्क ओलं तोलोअ याएज डोङ्गा रांरङौ। ओटन येशु नका डोङ्गाल चरिस्यु माहिन्दा, तर आ सिइयाङ याएज हिनस्युलेवाङ। तब तिबेरियासङन अपुर डोङ्गाङ ना पोल नेरा रांवाङ, जोङ प्रभुले धन्याबाद आचराहौ ओटन नकाङै भरेई रांकयौ। येशु सनर आ सिइयाङ ओलं रामालन्या सनस्यु ना रुयाङ येशुजन रोंकौयन डोङ्गाल चरिस्यु कफर्नहुमलं हिन्वाङ।

येशु जिबनल भरेई

रुयाङै येशुजन समुन्दरल हुदिफन्ट डोएस्यु ओलजन रांगिनौ, “रब्बी, नङ खक नरानु?” येशुले नकाङजन जबाक यांस्यु ऐआढोवाङ, “मछ्यु ङा जेजन ऐढाच्या जे अचम्मला कामयाङ ङाढान्या रङस्यु माङडी, तर भरेई वाङस्यु जेकयौकाले ङाजन जेरोकङचिऊ। नस्ट ताइन्या जेएल नाल्ट परिस्रम ताढोच्यो, तर अनन्त जिबन समन लिज्यान्या ज्यान्या जन्तुल नाल्ट परिस्रम ढोचिते, जो रुल ज़ाले जेजन यांचिवा। दानाङभन्या परमेस्वर बौले येशुल यर्त छाप लाइस्यु नाएवा।”

ओयाङै येशुजन ऐराढोव, परमेस्वरले आचाहिन्या काम ढाऔ नाल्ट गे नै धोई। येशुले नकाङजन ऐआढोवाङ, “परमेस्वरलं काम ईकाइ ज्या जोझन ओले आपरिङौ ओजन बिस्वास ढोचिते।” नैताइस्यु नकाङै ओलजन ऐराढोव, “नङ नै अचम्मला काम थनन्, गे नका ब्याएया, ओटन नङजन बिस्वास ढासिना? नङ नै ढोन? गे शाखापुर्खाङै हरहर ताइन्या पोल मन्न रांज्योव, जोमनलेस्यु पबित्रशास्त्रलं सरसिज्याऔ, ‘ओले नकाङजन ज्याऔ नाल्ट स्वर्गङन भरेई आयोवाङ’।”2

येशुले नकाङजन ऐआढोवाङ, “ङा जेजन मछ्यु ऐढाच्या, स्वर्गङन भरेई यांन्या मोशा माङडी,” तर “जेजन स्वर्गङन मछ्युका भरेई यांन्या ङा बौ हो। दानाङभन्या परमेस्वरलं भरेई नकाई ज्या, जो स्वर्गङन लांइस्यु रांया, ओटन सङ्सारजन जिबन योंवा।” ओयाङै येशुजन ऐराढोव, “प्रभु, गेजन सदाई ईका भरेई यांसिन्ते।” येशुले नकाङजन ऐआढोवाङ, “जिबनल भरेई ङाई ज्या। ङाल्योङ रांन्या करेन्या माल्दी ओटन ङाजन बिस्वास ढान्या खकै री ओइन्या माल्दी। तर ङा जेजन ऐढास्युई लेङा, ङाजन जे रङस्युई नाटङच्या, ओटन फरि बै बिस्वास माढाङचिदी। बौले ङाजन आयांन्याङ सोगलै ङाल्योङ रारां, ओटन ङाल्योङ रांन्याङजन ङा कैलेस्यु बै माराहङरदी। ङामिइ इच्छ्या पुरा ढान्याल नाल्ट ङा स्वर्गलन ङालाइराङु माङडी, तर ङाजन परिङन्याल इच्छ्या पुरा ढाऔ नाल्टै ङारांङु। ओटन ङाजन परिङन्याल इच्छ्या ईकाइ ज्या, कि ओले ङाजन आयांन्याङ मध्य काङ्काईजन बै तागवाहङरत्या, तर नकाङजन आखिरी दिनल जिङदा ग्याजाटङत्या। दानाङभन्या ङा बौल इच्छ्या ईकाइ ज्या, कि ज़ाजन खिमन्या सनर ओजन बिस्वास ढान्या सोगलैले अनन्त जिबन ग्याडोटौत्या ओटन ङा नकाङजन आखिरी दिनल जिङदा जाएन्यालेङा।”

यहूदीयाङ येशुल बिरोदत गनगन लेऊ तअसिवाङ, दानाङभन्या येशुले ऐआढोवाङ, “स्वर्गङन लांइस्युरांन्या भरेई ङाई ज्या।” नकाङै ऐलेवाङ, “नैति ईका योसेफल आज़ा, येशु माङडी का? इकाल बौ सनर आअमाजन गे गेमासंईयिउ का? आकअ इकाले कढाई ‘ङा स्वर्गलन लांइस्यु ङारांङु’ ऐलिज्याऔ?”

येशुले नकाङजन जबाक आयोवाङ, “जेजेलं तागनगनाइच्यो। ङाजन परिङन्या बौले माच्योङौरकन काङ्काई ङाल्योङ रांऔ माढुदुरदी, ओटन ङा नकाङजन आखिरी दिनल जिङदा जातङरा। ‘ओटन नकाङ सोगलैजन परमेस्वरङन ह्युउसिरा’ ऐलेस्यु अगमबक्ताङल किटापल सरसिस्यु लेया। जोले बौङन थटौ सनर ह्युउसी ना ङाल्योङ रांया।3 बौजन काङ्काई रुले रङस्यु माल्दी, ओले याएजै रङस्यु लेया, जो परमेस्वरङन रा:स्यु ले ओलेई बौजन रङस्यु लेया। मछ्यु ङा जेजन ऐढाच्या, जोले बिस्वास ढोव, नासकाए अनन्त जिबन लेया। ङा जिबनल भरेई हो। जे शाखापुर्खाङै हरहर ताइन्या पोल मन्न रांज्योव ओटन बै नकाङ सिस्यु हिन्वाङ। तर स्वर्गङन लांइस्यु रांन्या भरेई आकाई ज्या, जोले कयौ ना मासिदी। स्वर्गङन लांइस्युरांन्या जिङदा भरेई ङाईज ज्या। काङ्काङै आका भरेई कैदुराभन्या नकाङ सदाई बान्चिन्या लेरा। ओटन जो भरेई ङा सङ्सारला रुयाङल जिबनल नाल्ट योंङा, ना ङा बुल हो।”

तब यहूदीयाङ रारां छ्योङौ लागिवाङ, “ईका रुले गेजन कढाई आबुल कयौ यांऔ ढुदुऊ?” येशुले नकाङजन ऐआढोवाङ, “मछ्यु, ङा जेजन ऐढाच्या, जे रुल ज़ाल बुल माकैच्योकन सनर आजी माओच्योकन, जेस जिबन माताइदी। ङा बुल कैन्या सनर ङा जी ओन्यास अनन्त जिबन लेया, ओटन आखिरी दिनल ङा नकाङजन जिङदा जातङरा। दानाङभन्या ङा बुल मछ्यु कैन्या जन्तु हो, ओटन ङाजी बै मछ्युजै ओन्या जन्तु हो। ङा बुल कैन्या, सनर ङा जी ओन्या ङासकाए लिज्याया, ओटन ङा नकासं लिज्याङा। जोमनलेस्यु जिङदा बौले ङाजन आपरिङ्ङु, ओटन ङा बौल कारनले बान्चिङा, नैलेस्युई ङाजन कैन्या बै ङागर्दाले बान्चिया। जो भरेई स्वर्गङन लांइस्यु रांऔ, ओ नैताइन्या माङडी, जो पुर्खाङै रांकयौ ओटन बै ओयाङ सिस्यु हिन्वाङ। आका भरेई कैन्या सदाईज बान्चिन्यालेया।” येशुले ईका छेन कफर्नहुमला यहूदीयाङ आराधना झिमल सिक्छ्या आयांऔक आपानौ।

अनन्त जिबनल बचन

येशुल सिइयाङै ईका राथटौछिन्ट भ्याउयाएले ऐलेवाङ, “ईका बचन कडाई लेया, काङ्काले थटौ ढुदुऊ का?” तर सिइयाङ ईका बारेल गनगन लिज्यावाङ ऐलेन्या सनस्यु येशुले नकाङजन ऐआढोवाङ, “नैति ईका छेन जे नाल्ट ठोकरल कारन ताइज्याऔ? जे रुल ज़ा हादेए जोङ लिज्याऔ, ओ हर्देए आहिनज्यान्या रङच्योकन कैताह वन? जिबन यांन्या परमेस्वरलं आत्मा हो, बुलङन नैज फाइदा माताइदी। जो बचन ङा जेसकाए ङाछ्योङ्ङु, ना आत्मा सनर जिबन हो। तर जे मध्यङन ख्वाए जेल्चिऊ, जोले ङाजन बिस्वास माढाङरदी।” दानाङभन्या बिस्वास माढान्या नैयाङ सनर ओलजन धोखा यांन्या काङ्का ताइन्या लेऊ, ऐलेस्यु येशुजन सुरुकन्ज थाह लेऊ। ओटन ओले ऐलेऊ, “नैताइस्यु जब समन बौले अनुमति मायोव तब समन काङ्काई रु ङाल्योङ रांऔ माढुदुऊदी।”

नैताइस्यु येशुल सिइयाङ मध्य तबर जना छिन्देए हाएसिवाङ, ओटन ओलसं बान्या राराहौ। येशुले बारं सिइयाङजन ऐआढोवाङ, “नैति जे ङाजन राइस्यु हिनौ जेरोअचिऊ?” सिमोन पत्रुसले जबाक आयोव, “औ प्रभु, नल्योङ अनन्त जिबनल बचन लेया ओटन गे नङजन राइस्यु काङ्का ल्योङ हिनई? 4 ओटन गे बिस्वास ढास्यु लेया, ओटन सनस्युई लेया, कि नङ जिङदा परमेस्वरलं पबित्र ज़ा येशु ज्या।” येशुले नकाङजन जबाक आयोवाङ, “नैति ङा ङाईज जे बारं गोटाङजन ङाछेलन्या माङडी का? ओटन जे मध्यङन तोलोअ दियाबलस हो।” येशुले सिमोन इस्करियोतलं ज़ा यहूदाल बारेल आपानौ, दानाङभन्या बारं गोटा मध्यलन तोलोअ याएज ताइस्यु बै नकाले येशुजन धोखा योंङालिज्याऔ।

Source notes (4)
  1. Cross-reference मत्ती २१:११
  2. Cross-reference प्रस्थान १६:४-१५; भजनसङ्ग्रह ७८:२४
  3. Cross-reference यशैया ५४:१३
  4. Cross-reference मत्ती १६:१६; मर्कुस ८:२९; लूका ९:२०

Sheshi Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.