Sheshi Kham
यहुन्ना 13
येशुले आसिइयाङलं खङ आहुरौ
निस्तार-पर्बल हादेए ईका सङ्सारलन बिदा ताइस्यु बौल्योङ हिनन्या ङा बेला तापरादा ऐलेन्या येशुले आसनौ, ओटन सङ्सारलं आमि भरियाङजन मया ढास्यु परमेस्वरले नकाङजन आखिरी समन मया आढोवाङ।
ओईका बेला येशु सनर आ सिइयाङ ज्याऔ बेला दियाबलसले सिमोनल आज़ा यहूदा इस्करियोतलं आयिङल कोलोकौ परिङन्या बिचार हादेएज आझोअस्यौ। बौले सोगलै ओलं कुईत यांस्यु लेया, ओटन ओलं परमेस्वरङन रांऔ हो, ओटन परमेस्वर लेऊदेए ङाहिनज्याङु ऐलेन्या छेन येशुले सनस्युलेऊ। ओटन येशु ज्यास्यु सोव, ओटन बाहेऱ्या क्वा तपोईदेए नाएस्यु, तोलोअ ताऊल्या आकम्बरल आमलिङौ। तब ओले पराटल री आटुहौ, ओटन आसिइयाङलं खङ हुरस्याऔ तअसिऊ, ओलं आमलिङसिन्या ताऊल्याले नकाङल खङ सिटौ तअसिऊ। जब ओलं सिमोन पत्रुस ल्योङ रांऔ, नकाले ओलजन ऐआढोव, “औ प्रभु, नङ नैति ङा खङ हुरस्याङना?”
येशुले नकाजन जबाक आयोव, “ङा नैति ङाढाज्याङु नङ आकअ मासनन्दी तचिइ छिन्ट बुजिना।” पत्रुसले ओलजन ऐआढोव, “नङ ङा खङ खकै हुरन्यामालेन्दी।” येशुले नकाजन जबाक आयोव, “ङा माहुरनकन नङ ङासिइ माताइदुन्दी।” सिमोन पत्रुसले ओलजन ऐआढोव, “औ प्रभु, ङाखङ याएज माङडी, तर ङाकुई सनर ङए समेत हुरस्याङते।” येशुले नकाजन ऐआढोव, “हुरसिन्या रुजन आखङ बाहेक अपुर नैज हुरस्यान्या माताइदी, ना चोखाइ लेया। ओटन जे चोखा लेच्या, तर सोगलै ता माङडी।” दानाङभन्या येशुले बिस्वासघाट ढान्याजन शईस्युआनाटौ। नैताइस्यु ओले ऐलेऊ, “जे सोगलै चोखा माल्चिदी।” येशुले नकाङल खङ हुरस्यौरा पाइना बाहेऱ्या क्वा क्वाएसिस्यु चुङौ, ओटन नकाङजन ऐआढोवाङ, “ङा जे नाल्ट नैङाढोङु नैति जे जेसन्चिऊ?1 जे ङाजन ‘गुरु सनर प्रभु’ ऐढाङच्या, आका जे ठिकै जेल्चिऊ, दानाङभन्या ङा ओइ ज्या। जोमनलेस्यु ङा जे प्रभु सनर जे गुरु ताइस्यु बै ङा जे खङ ङाहूरस्याचिऊ आब जे बै तोलोअले-छुट्टैल खङ हुरौपरिया, दानाङभन्या ङा जेजन तोलोअ उदाहरन ङायाचिऊ, ओटन जो ङा जे नाल्ट ङाढोङु, जे बै नाइज ढोचिते। ङा जेजन मछ्यु ऐढाच्या, सेवाऱ्या आ साहूतन घिन्या माताइदी, ओटन थाई लाङन्या थाई परिङन्यातन घिन्या माताइदी।2 यदि जे सत्य छेन सनच्योकन सनर ना ढोच्योकन जे बअचान्या ताइच्या।”
“ङा जे सोगलैल बारेल ङापानज्याङु माङडी, ङा जोजन ङाछेल्ङु नाजन ङा ऐशईङा। तर पबित्रशास्त्र पुरा ग्याताइत्या लेस्यु ईका ताहौ, कि ‘ङामिइज भरेई कैन्याले ङाजन लाट्ट आराहौ।’”3 “ऐआताहौ हादेए आकैज ङा जेजन ऐढाच्या, ताकि जब नैताइरा, ङा ओइ जै ज्या ऐलेस्यु जेजन बिस्वास ग्याताइत्या।4 मछ्यु ङा जेजन ऐढाच्या, ‘जोजन ङा परिङ्ङ, ओजन ग्रहन ढान्याले ङाजन ग्रहन ढाङवा, ओटन ङाजन ग्रहन ढान्याले ङाजन परिङन्याजन ग्रहन ढोवा’।”5
येशुजन बिस्वासघाट ढान्याल बारेल भबिस्यबानी
मत्ती २६:२०-२५; मर्कुस १४:१७-२१; लूका २२:२१-२३
आका छेन आपानौ छिन्ट येशुल यिङ छटपट ताहौ ओटन ओले बयन यांस्यु ऐलेऊ, “मछ्यु ङा जेजन ऐढाच्या, जेमध्यलन तोलोअले ङाजन शत्तुरयाङजन कोलोकौ परिङौरा।” येशुले काङ्काल बारेल छ्योङज्याऔ ऐलेस्यु रामाखटाइदुऊ ओटन सिइयाङै तोलोअले छुट्टैजन खिम्सिवाङ। ओलं आ सिइयाङ मध्य येशुले प्रेम आढान्या सिइआ लेऊदेए घेएसिज्याऔ। तब सिमोन पत्रुसले यहुन्नाजन सयान ढास्यु आगिनौ, “येशुले ईका काङ्काल बारेल छ्योङज्याऔ नाजन गिन्ते वन?” यहुन्नाले आघेएसिज्याऔकै येशुजन आगिनौ, “प्रभु, ना काङ्का?” येशुले जबाक आयोव, “जोजन ङा भरेईल कलाए छोएस्यु योंङ, ना नकाई ज्या।” तब ओले भरेईल कलाए आछोटौ, ओटन हाएस्यु ना सिमोनल ज़ा यहूदा इस्करियोतजन आयोव। भरेईल कलाए आचिनौ छिन्ट सैतान नालं भितरलं पसिऊ। तब येशुले ऐआढोव, “नङजन जो ढान्या ताइज्याऔ, ना परेए ढोते।” तर येशुले दानाङ नाजन ऐढोव लेस्यु, ज्योङा लेस्यु चुङज्यान्याङ काङ्काईले बै माबुजिदुरा। दानाङभन्या काङ्का काङ्काङै ईका रायिङौ, कि यहूदास पैसालं हुइ लिज्याऔ, ओटन येशुले नाजन पर्बल नाल्ट चाहिन्या समान ग्यालङौत्या, अथाबा नकाले गरिबयाङजन कोबाअ ग्यायौरत्या ऐलेऊ। तब भरेईल कलाए चिन्वापाइनाई यहूदा इस्करियोत ओचोएटै पाखादेए पलिहौ नवाए बेला रिउ ताइस्यु लेऊ।
येशु पत्रुस आमाभनन्या बारेल भबिस्यबानी
मत्ती २६:३१-३५; मर्कुस १४:२७-३१; लूका २२:३१-३४
छार आग्या
जब यहूदा पाखादेए हिनौ तब येशुले ऐलेऊ, आब ङा रुल ज़ा महिमित ताइस्यु लेङा, ओटन परमेस्वर ङात महिमित ताइस्यु लेया। यदि परमेस्वर ज़ात महिमित ताइस्यु लेकन परमेस्वरले ओलझन्जै महिमित जाएवा, ओटन ओचोएटै रुल ज़ात थन्वा। “ऐ ङा लुलल्याङ, ङा तचिइ बेला समन जेसै लिज्याङा! ओटन जोमनलेस्यु ङा यहूदी अढिकारीयाङजन ङापानस्योङवाङ, आब ङा जेजन बै पानस्याच्या, ‘जोङ ङा हिनङ, नङ जे रांऔ माढुदुचिदी नैताइस्यु जे ङाजन रोंकङच्या।’”6 “नैताइस्यु ङा जेजन तोलोअ छार आग्या यांच्या जे तोलोअले-तोलोअजन प्रेम ढोचिते। जेजन ङा जोमनलेस्यु प्रेम ङाढाचिऊ, जे बै तोलोअले-छुट्टैजन नैलेस्युई प्रेम ढोचिते।7 यदि जे तोलोअले-छुट्टैजन प्रेम ढोच्योकन, इकातन्जै सोगलै रुयाङै जेजन ङा सिइयाङ लेस्यु शईन्यालेचिरा।”
पत्रुसले आमामानिन्या बारेल येशुल भबिस्यबानी
सिमोन पत्रुसले येशुजन ऐआढोव, “औ प्रभु नङ कान्देए नहिनज्यानु?” येशुले जबाक आयोव, “ङा जोदेए ङाहिनज्याङु, जे आकअ ङाजन पछ्याहौ माढुदुचिदी, तर छिन्ट जे ङाजन पछ्याइन्या लेच्या।” पत्रुसले ओलजन ऐआढोव, “औ प्रभु, ङा दानाङ नङजन पछ्याहौ माढुदुङ? न नाल्ट ङा ङा परान बै योंङा।” येशुले जबाक आयोव, “नैति नङ नपरान ङा नाल्ट योंना? मछ्यु ङा नङजन ऐढाना, नङ ङाजन तिन पाला इन्कार नमाढाऔ समन भाल्या कोन्यामाल्दी।”
Source notes (7)
- Cross-reference लूका २२:२७
- Cross-reference मत्ती १०:२४; लूका ६:४०; यहुन्ना १५:२०
- Cross-reference भजनसङ्ग्रह ४१:९
- Cross-reference यहुन्ना १४:२९
- Cross-reference मत्ती १०:४०; मर्कुस ९:३७; लूका ९:४८; १०:१६
- Cross-reference यहुन्ना ७:३४
- Cross-reference यहुन्ना १५:१२-१७; १यहुन्ना ३:२३; २यहुन्ना ५
Sheshi Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.