Skip to content
BibleKenya

Sheshi Kham

यहुन्ना 12

बेथानियाल येशुल अबिसेक

मत्ती २६:६-१३; मर्कुस १४:३-९

येशु निस्तार-पर्बल छ दिनहादेए बेथानियाल रांऔ। लाजरसलं आझिमलै लिज्याऔ, जोजन येशुले सिन्यातन जिङदा आजाटौ। नकाङै येशुल नाल्ट नङ ओईका ज्यान्या तयार रांजाटौ। मार्थाले सेवा-ब्याएबिई आढोव, ओटन लाजरसकने ओलसैज ज्योङा लेस्यु चुङन्याङ मध्य तोलोअ लेऊ। तब मरियमले आधा लितर याए करन्या जटामसीलं आस्युउनमन्या अत्तर हिनस्यु येशुल खङल आठिइस्यौ, ओटन ओलं खङ आचेमले आसिइस्यौ, ओटन अत्तर झिमभरि आस्युउनमौ।1

तर येशुल तोलोअ सिइ यहूदा जो बिस्वासघाटी इस्करियोतले ऐलेऊ, “ईका अत्तर तिन सय चान्दील सिक्काल यएस्यु नकाल रकम गरिबयाङजन यांसिरकन माताहौ?” तर नकाले गरिबयाङल मछ्यु यिङस्यु ऐलेऊ माङडी, कि ना गोए हो, दानाङभन्या पैसालं हुइ नकालेई नाएवा, ओटन नलन्जै कुन्या आढोव।

तब येशुले ऐलेऊ, “इकाजन कैज ताढोच्यो, ङाजन रींनन्या-दिनल नाल्ट आकाजन ना नाएस्युनाटौ योंचिते। दानाङभन्या गरिबयाङ सदाई जेसकाए लिज्यारा, तर ङा ता सदाई जेसकाए मालिज्याङदी।”2

लाजरसलं बिरोदत सड्यन्त्र

यहूदीयाङल तोलोअ घिन्या हुलले येशु नङ लिज्याऔ ऐलेन्या आसनौ, ओटन येशुल नाल्ट याएज माङडी, तर ओले सिन्यातन जिङदा आजाएन्या लाजरसजन बै खिमन्या लेस्यु नकाङ रा:स्यु लेवाङ। ओटन मुख्या पुजाउरोयाङै लाजरसजन बै सएन्या योजना रांजाटौ। दानाङभन्या नाले गर्दा यहूदीयाङ मध्य तबर जना भाअसिस्यु येशुजन बिस्वास ढाऔ तअसिवाङ।

येशु यरुशलेमल पसिऊ

मत्ती २१:१-११; मर्कुस ११:१-११; लूका १९:२८-४०

तयोअका छिम्क निस्तार पर्बल रांन्या घिन्या हुलयाङै येशु यरुशलेमल रांज्याऔ ऐलेन्या राथटौ, ओटन रुयाङ खजुरल हाङ्गाङ हिनस्यु येशुजन स्वागत ढान्या जयजयकार लेस्यु पलिइवाङ, “होसन्ना! बअचान्या परमप्रभुल मिनत रांन्या इस्राएलला रय!”3

ओटन पबित्रशास्त्रलं आसरस्याऔमन तोलोअ गडाहाल पुङ डोएस्यु येशु नका यर्त चरीउ, जोमनताइन्या सरसिज्याऔ, “सियोनल मेएमा ज़ा, ताछ्यातन। खिम्ते न रय गडाहाल पुङ त सवार ताइस्यु रांज्याया।”4

पबित्रशास्त्रलं सरसिन्या आका छेनयाङ येशुल सिइयाङै हादेए माबुजिदुरा। तर येशुल महिमा ताहापाइना ईका छेन ओलं बारेल सरसिस्यु लेऊ, ओटन आका काम ओलं नाल्ट नकाङै रांढोव हो, ऐलेन्या नकाङै रायिङौ।

येशुले लाजरसजन ऊईलन खुल्स्यु सिइतन जिङदा आजाटौक ओलसं लिज्यान्या हुलला रुयाङै आबयन यांऔवन्जै रांढोव। ओले ऐटाइन्या अचम्मला कामयाङ आढोव ऐलेन्या राथटौकाले हुलले ओलजन डोएनास्यु लेवाङ। तब फरिसीयाङै तोलोअले-तोलोअजन ऐढाऔ तअसिवाङ, “खिम्चिते, जेङन नैज ताइन्या माङडी। मारङच्या, सङ्सारज नकाल छिन्ट लागिदा!”

ख्वाए यूनानीयाङै येशुजन रारोकौ

पर्बल आराधना ढानान्याङ मध्य काङ्का-काङ्काङ ग्रीकयाङ बै लेवाङ। नकाङ गालीलला बेथसेदालं चुङन्या फिलिप ल्योङ रा:स्यु ऐलेस्यु बिन्ति रांढोव, “औ, गे येशुल दर्शन ढान्या गेलेयिउ।”

फिलिपले हिनस्यु अन्द्रियासजन ऐआढोव, ओटन अन्द्रियास सनर फिलिपने हिनस्यु येशुजन नेपानस्योव। येशुले नकानेजन जबाक आयोवने, “रुल ज़ा महिमित ताइन्या समाय तापरादा। ङा झेनजन मछ्यु ऐढाचिना, पलीमाल गेडा व्मल परीस्यु मासिकन ना तोलोअजै लिज्याया। तर नका सिकन नाले तबर शई शशैवा। आपरानल मोह ढान्याले ना गवाइवा, तर आपरानजन ईका सङ्सारलं तुच्छ ठहऱ्याइन्याले अनन्त जिबनल नाल्ट ना सम्भारस्यु नाएवा।5 जोले ङा सेवा ढोव, नकाले ङाजन ग्यापछ्याइङुत्या ओटन ङा जोङ लेङ, ङा सेबक बै नङै ताहा। काङ्काङै ङा सेवा धोरकन बौले नकाल कदर ढोवा।”

येशुले आसिन्या बारेल आपानन्या

“आब ङा परान आतिइले छटपटी ज्याया, ओटन ङा नै पानङ? ‘औ बौ, ङाजन ईका बेलाकन जोगाहङते?’ माङडी, ईकाइ कारनले आका समाय ङायर्त तारांत्या। औ बौ, नमीई मिनल महिमा ढोते।” तब स्वर्गङन ऐटाइन्या तोलोअ ग़ा रांऔ, “ङा न महिमा ढास्युई लेङा, ओटन फरि बै ढोङा।” नल च्याङज्यान्या हुलले आका थएस्यु ऐलेवाङ, “ईका बादल आगर्जिन्या दी!” अपुऱ्याङै ऐलेवाङ, “स्वर्गदुत ओलसं छ्योङज्याऔ दी!”

येशुले नकाङजन जबाक आयोवाङ, “ईका बचन ङा नाल्ट माङडी, तर जे नाल्ट हो। आब ईका सङ्सारलं निया ताहा। ईका सङ्सारला शासक पाखाल क्याइसिया। ओटन जब ङा पिरथ्बीलन छेन्सिङ, ङा सोगलै रुजन ङाल्यौदेए च्योङ्ङरा।” नका कैताइस्यु सिन्या हो, ना सङ्केट थनन्यालेङा लेस्यु ओले ऐआढोवाङ। हुलले ओलजन रांगिनौ, “येशु, सदाईजै लिजिया ऐलेन्या ब्यबस्था नियाम अनुसार गे थएस्यु गेलेयिउ। नङ कैलेस्यु पानौ नढुदुनु, रुल ज़ा छेन्सिऊजै परिया लेस्यु? ईका रुल ज़ा ऐढासिन्या काङ्का?”6

येशुले नकाङजन ऐआढोवाङ, “अझै तचिइ बेला समन ज्योति जेसकाए ऐलिजिया। जेसकाए ज्योति आलिज्याऔ समन बारिचिते, ताकि जे चिऊन्याल तापरिच्यो। काङ्काङ चिऊन्याल बारिरकन, नकाङै गे काङ गेहिनज्यायिउ लेस्यु मासनरदी। जैकसमन ज्योति जेसकाए ले, ऐक समन ज्योतित बिस्वास ढोचिते, ओटन जे ज्योतिल सन्तान ताइचिते।” ईका बचन पान्वापाइना, येशु नङंन हिनौ, ओटन नकाङतन मोअसिऊ।

रुयाङल अबिस्वास

येशुले नकाङल लेऊक आवाए अचम्मला कामयाङ आढोव, ओटन बै नकाङै ओलजन बिस्वास माढोदुरा। ईका आबस्यक लेया, कि यशैया भबिस्यबक्तालं बचन पुरा ग्याताइत्या “औ परमप्रभु, गे थाईत काङ्काले बिस्वास आढोव? ओटन परमप्रभुल बाहुबल काङ्काजन थनसिऊ?”7 नैताइस्यु नकाङै बिस्वास ढाऔ रांमाढुदुऊ, दानाङभन्या यशैयाले फरि ऐलेऊ, “परमेस्वरले नकाङल म्युउ बन्द जाएस्यु आनाएस्योवाङ, ओटन नकाङल यिङ कठोर जाएस्यु आनाएस्योवाङ, नैलेस्युजै नकाङ राम्युउले तारङरत्या, ओटन रायिङले ताबुजिरत्या, मानकन्ता नकाङ वल्‌रा ओटन ङा नकाङजन सबेलन्या ताहा।”8

यशैयाले ईका छेन आपानौ, दानाङभन्या नकाले प्रभुल महिमा आरङौ, ओटन ओलं बारेल आपानौ।

तर फरि बै यहूदी अढिकारी मध्यलन तबरले येशुजन बिस्वास रांढोव, तर फरिसीयाङ छ्याइले गर्दा, सनर नकाङै यहूदीयाङ आराधना झिम पलिइरा ऐलेन्या छ्याइले ना सुइकार माढोदुरा। दानाङभन्या नकाङ परमेस्वरलं प्रसम्सालं भन्या रुल प्रसम्सा भ्या रांनिजिऊ।

येशुल बचनङन निया

येशुले घिन्या ग़ाले ऐलेऊ, “ङाजन बिस्वास ढान्याले ङाजन माङडी, तर ङाजन परिङन्या परमेस्वरजन बिस्वास ढोवा। जोले ङाजन रङ्ङु, नकाले ङाजन परिङन्याजन रङवा। ङा सङ्सारलं ज्योति ताइस्यु ङारांङु, जोले ङाजन बिस्वास ढाङु नका चिऊन्याल मालिज्यादी।” “काङ्काङै ङा छेन थएस्यु, ओटन ना पालन माढोरकन, ङा नकाल निया माढोङदी दानाङभन्या ङा सङ्सारलं निया ढान्या ङारांङु माङडी, तर सङ्सारजन जोगाइन्या ङारांङु हो। ङाजन माकोनन्या सनर ङा थाई थएस्यु ग्रहन माढान्याल नाल्ट तोलोअ नियादिस लेया। जो बचन ङा ङाछ्योङ्ङु नकालेई आसापटा दिनल नकाले निया ढोवा। दानाङभन्या ङा ङा तरफङन्ज माछ्योङ्ङडी, तर ङा नै पानौ परिन्या हो, सनर नै छ्योङौ मापरिन्या हो, ङाजन परिङन्या बौले ओलजै ङाजन आग्या यांस्युनाटङवा। ङा ऐसन्ङा, कि ओलं आग्या अनन्त जिबन हो। नैताइस्यु ङा जो छ्योङ्ङ, बौले ङाजन आपानस्यान्या अनुसार छ्योङ्ङा।”

Source notes (8)
  1. Cross-reference लूका ७:३७-३८
  2. Cross-reference ब्यबस्था १५:११; मर्कुस १४:७
  3. Cross-reference भजनसङ्ग्रह ११८:२५-२६
  4. Cross-reference जकरिया ९:९
  5. Cross-reference मत्ती १०:३९; १६:२५; मर्कुस ८:३५; लूका ९:२४; १७:३३
  6. Cross-reference भजनसङ्ग्रह ११०:४; यशैया ९:७; इजकिएल ३७:२५; दानियल ७:१४
  7. Cross-reference यशैया ५३:१
  8. Cross-reference यशैया ६:१०

Sheshi Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.