प्रेरित 7

स्तिफनसल भासन

1तब मुख्या पुजाउरोले स्तिफनसजन आगिनौ, “नैति ईका छेन मछ्यु रों?” 2नकाले ऐलेऊ “ऐ दाज्यूभाई दिदीबैनाङ सनर बौ बाज्याङ, थएचिते। महिमाला परमेस्वरले गेमि पितामह अब्राहामजन नका हारानल आचुङौ हादेए मेसोपोटामियाल आलिज्याऔक दर्शन आयोव, 3ओटन अब्राहामजन ऐआढोव, ‘नङ न देस सनर न जाहानयाङ्ङन पलिईस्यु, जो देस ङा नङजन ठन्स्यान, नङै हिनन्ते।’”1 4“तब अब्राहाम कल्दीयाङल देसलन पलिईस्यु हारानल रा:स्यु चुङौ, ओटन नकाल आबौ आसिऊ छिन्ट परमेस्वरले ओलजन नङंन आका मलुउलं आसराहौ, जोङ आकअ जे जेचुङज्याचिऊ। 5नकाजन ना पोल धनसम्पत ता हुदेएज ग्याहिनत्या, सील नाएन्या पो समन बै मायोडा। तर नकाल सन्तानयाङ मालरकन बै नका धनसम्पत परमेस्वरले नकाल सन्तानजन आपेवाला सम्पतल हिसापत यांन्या बाचा आढोव।2 6परमेस्वरले ऐआढोव, ‘न सन्तान छुट्टै देसलं हिनस्यु चारसय बर्स समन चुङौ परिन्या लेया, ओटन ओयाङै इकाङजन कमारा जाएस्यु चारसय बर्स समन दमन ढास्यु नाएन्या लेरा।’3 7परमेस्वरले ऐलेऊ ‘तर नकाङ जो जातिल सेवाऱ्या ताइस्यु चुङर ना जातिल निया ङा ढान्यालेङा। ओलं छिन्ट नकाङ पलिईस्यु रा:स्यु ईकाइ पोल ङामि आराधना ढान्यालेरा।’4 8परमेस्वरले अब्राहामस खटनाल बाचा आढोव, ओटन अब्राहाम इसहाकलं बौ आताहौल छिन्क आट दिन छिम्क इसहाकलं खटना5 आढोव। इसहाक याकूबल बौ ताहौ, ओटन याकूब बारैं गोटा कुलल बौ ताहौ।”6

9“याकूबल ज़ायाङै रांभाई योसेफजन खिई ढास्यु ओलजन मिस्र देसलं रायेटौ। तर परमेस्वर ओलसं लेऊ।7 10परमेस्वरले नकाल सोगल कस्टङन छुताइस्यु मिस्र देसला रय फारोल सामन्दी नकाजन दया आढोव, ओटन बुद्दि आयोव, ओटन फारोले नकाजन मिस्र देस सनर आमि सोगल झिमला हाकिम आजाटौ।”8

11नालछिन्ट सोगल मिस्र देस सनर कनानल अनिकाल परीस्यु घिन्या दुख ताहौ, ओटन गे पुर्खाङै अन माडोएदुरा।9 12तर याकूबले मिस्र देसलं अन लेऊ ऐलेन्या छेन थएस्यु गे पुर्खाङजन पहेलाचोए नङ आपरिङवाङ।10 13नेंपालाका डोएसिइ त योसेफले आदाज्यू भाईयाङजन आपरिचय आयोवाङ, ओटन योसेफल जाहानयाङ बै फारो ल्योङ आशई ताइवाङ।11 14योसेफले आबौ याकूबजन सनर आमि सोगलै शाखासन्तानयाङजन, जो पचहत्तर परानी लेवाङ, आल्योङ खुलौ आपरिङवाङ।12 15याकूब मिस्र देसलं हिनौ, ओटन नङै सिऊ, ओटन गे शाखापुर्खाङ बै ओलै सिवाङ।13 16ओलं छिन्ट नकाङल सिन्या बुल शकेमल रालाङौ, ओटन अब्राहामले शकेमल हमोरल ज़ायाङ ल्योङन चान्दील पैसा फोअस्यु आलङन्या ऊईल रानाएवाङ।14

17“तर जब परमेस्वरले अब्राहाम सकाए आढान्या बाचा पुरा ताइन्या बेला नेरा रांऔ, तब मिस्र देसलं नका रुयाङ बदिऊ लागिवाङ, ओटन नकाङल बगाल भ्याईजै ताइवाङ। 18तब मिस्र देसलं योसेफजन माशईन्या छुट्टै रय च्याङौ।15 19ओ रयले गे जातियाङसं क्याइसिन्या बानी बेहोरा आढोव, ओटन गे पुर्खाङजन रांमि लुलल्याङ पाखाल हिनस्यु नाएन्या कर आलाइवाङ, ओटन ऐलेस्यु भाबाअ जर्मिन्या सोगलै लुलल्याङजन रासएवाङ।”16

20“नवाए बेलाई मोशाल जन्म ताहौ। मोशा परमेस्वरलं नजरत चान्या लेऊ। नका तिन मैना समन आबौल झिमल ङासिऊ।17 21नका पाखाल क्याइसियापाइना फारोल मेएमाज़ाले नाजन छेन्स्यु आलाङौ, ओटन आमिई ज़ामन जाएस्यु आमोव।18 22मोशाजन मिस्रीयाङल सोगल पाठशालाल सिक्छ्या यांसिऊ, ओटन मोशा आमि बचन सनर कामत सक्तिशाली ताहौ।”

23“जब मोशा चालिस बर्सका ताहौ, तब नकाले इस्राएली दाज्यूभाई दिदीबैनाङजन कैताइन्या ब्यबहार ढाज्यावाङ ऐलेस्यु नकाङसं डोएसिन्या यिङ आढोव।19 24आमि जातला भाई मध्य तोलोअल यर्त अनिया आताइज्यान्या रङस्यु, नकाले ओजन आजोगाहौ, ओटन नका अनिया ढान्या मिस्रजन सएस्यु आभाईजन आताइन्या अत्याचारल पालो आहोलौ।20 25परमेस्वरले ङा कुईतन नकाङल उद्दार ढोवा ऐलेन्या ङा भाईबन्दयाङै ऐबुझिरा लेस्यु नाले बिचार ढाज्याऔ। तर नकाङै ईका माबुजिदुरा। 26तयोअ इस्राएलीयाङ रारां रा:यिसिज्याऔ बेलाक मोशा रांऔ, ओटन नकाङजन मिलाइङा लेस्यु ऐआढोवाङ, ‘ऐ भाईयाङ, जे ता दाज्यू भाईयाङ दी, तब दानाङ तोलोअले छुट्टैजन अनिया ढाज्याच्यो?’”

27“तर आदेराला रु यर्त अनिया ढान्याले मोशाजन ऐढास्यु आठुहौ, ‘गे यर्त शासन चलाइन्या सनर नियाकर्ता ताइन्या नङजन काङ्काले आठहराइनु? 28ज्योलाअ ना मिस्रजन नसटौमन नङ ङाजन बै सटौ नरोअनु?’21 29ऐटाइन्या जबाक थएस्यु मोशा ढोङस्यु मिद्यान देसलं हिनस्यु प्रदेसी ताहौ। नङ मोशाल नेंलोअ आज़ाने जर्मिऊने।”22

30“चालिस बर्स आबितिऊ छिन्ट सिनै पर्बतल हरहर तांन्या पोल भलाङज्यान्या पथरक्यांल भुबरात तोलोअ स्वर्गदुत नका ल्योङ रंनौ।23 31जब मोशाले ईका आरङौ तब नका अचम्मै ताहौ, ओटन नकाले चान्यासं खिमन्यालेस्यु नेराक आहिनौक परमप्रभुल ऐटाइन्या ग़ा आठटौ,24 32‘ङा न पुर्खाङल परमेस्वर हो अब्राहाम, इसहाक, सनर याकूबल, परमेस्वर।’ मोशा वुकौ तअसिऊ, ओटन नकाले नदेए ब्याएन्या आमाआन्टिदुउ।”

33“तब परमप्रभुले नाजन ऐआढोव, ‘नखङला जुता फिरते, दानाङभन्या जो पोल नङ च्याङज्यान, नका पबित्र पो हो।25 34मिस्रल लिज्यान्या ङा जनताङ दुर्दशा ङारङ्ङु, ओटन नकाङ राआतिइले राव्‌रन्या बै ङा थएङु। नैताइस्यु नकाङजन छुटकारा यांऔ नाल्ट ङा लांइस्यु ङारांङु हो। आब रांन्ते, ङा नङजन मिस्र देसलं परिङना।’”26

35“ईकाइ मोशा हो, जोजन इस्राएलला रुयाङै ऐलेस्यु रांगिनौ, नङजन काङ्काले गेयर्त शासक सनर नियाकर्ता आजाएनु। ऐलेस्यु नकाङै रामाभनस्योव, नकाजन परमेस्वरले पथरक्यांत रंनन्या स्वर्गदुतङन हाकिम सनर सङ्कटतन बचाइन्या जाएस्यु आपरिङौ।27 36ईकाइ रुले मिस्र देसला, लाल समुन्दरल सनर चालिस बर्स भरि जङ्गलला पोल मारंनन्या काम सनर अचम्मला कामयाङ ढास्युकने नकाङजन बाहेर आहोन्वाङ।”28

37“ना ओइ मोशा ज्या, जोले इस्राएलीयाङजन ऐढास्यु आनाएवाङ, ‘परमेस्वरले ङाजन आसच्यानौमन्जै जे नाल्ट तोलोअ अगमबक्ता सच्यानवा।’29 38ओ नाइ मोशा ज्या, जो जङ्गलला पोल लिज्यान्या समुदायल स्वर्गदुतस लेऊ, जो स्वर्गदुतले सिनै पर्बतल सनर गे पुर्खा सकाए छ्योङस्यु लेऊ, ओटन नकाले गेजन यांऔ नाल्ट जिङदा बचनयाङ डोएस्यु आनाटौ।”30

39“गे पुर्खाङै मोशाल आग्या मानिन्या माभन्वाङ। नकाङै ओजन बनाएस्यु मिस्र देसदेए वलस्यु हिनन्या यिङ रांढोव।31 40नकाङै हारुनजन ऐराढोव, ‘गे नाल्ट गेहाहां बान्या कोबाअ देउताङ जाएस्यासिन्ते, दानाङभन्या गेजन मिस्र देसङन पलिईस्यु होनन्या ईका मोशाजन नैति ताहौ गे मासनैदी।’32 41नका दिनल नकाङै तोलोअ बाछालं सुरुप रांजाटौ, ओटन नकात बलि बै रांचराहौ, ओटन राकुईले राढान्या कामत हेसाङवाङ।33 42नैताइस्यु परमेस्वर नकाङल्योङन ह्याऔ, ओटन नकाङजन नमता हरवएयाङल पुजा ढान्या आराइवाङ, जोमनलेस्यु अगमबक्ताङल किटापल सरसिज्याया, ‘इस्राएलला रुयाङ! चालिस बर्स समन हरहर ताइन्या पोल जे पशु सएस्यु जेचराइन्या बलि ङा नाल्ट माङडी?34 43जे मोलोखल तिरपाल सनर रेफन देउताल हरवए ओटन पुजिऊ नाल्ट जेजाएन्या मुर्तियाङ छेन्स्यु जेलाङचिऊ। आब ङा जेजन बेबिलोनतन हूत सराइच्या।’”35

44“गे पुर्खाङस हरहर ताइन्या पोल परमेस्वरलं साचील तिरपाल लेऊ, मोशाले आरङन्या नक्कल अनुसार परमेस्वरले ओलजन जाएते ऐआढोव।36 45ओलं छिन्ट गेमि पुर्खाङै जोले नकाङल पुर्खाङ्ङन यहोशू सकाए तिरपाल हिनस्यु हादेए बदिस्यु रांहिनौक परमेस्वरले आढपाइन्या गैरयहूदीयाङल देसला रनबन रांमी अधिकारत राहोनौ। ना दाऊदल पालासमन नङै लिज्याऔ।”37 46नकाले परमेस्वरलं अनुग्रह आडोटौ, ओटन याकूबल परमेस्वरलं नाल्ट तोलोअ चुङन्या पो जाएन्या अनुमति नीऊ।38 47तर परमेस्वरलं नाल्ट झिम सोलोमनले आजाटौ।39

48तर कुईले जाएसिन्या झिमजिऊल परमेस्वर माचुङडी, जोमनलेस्यु अगमबक्ताङै ऐलेस्यु लेवाङ,

49ङामि सिहासन स्वर्ग ज्या,

ओटन पिरथ्बी ङा खङबाङ,

जे ङा नाल्ट कैताइन्या झिम जाएन्या हो?

परमप्रभुले ऐलेया, ङा नानसिन्या पो काङ हो?

50ईका सोगल जन्तु ङा कुईलेई ङाजाएन्या माङडी का?40

51“ऐ चिमत्या रुयाङ, जरन्या यिङ सनर भैरा ना लेन्याङ, जे सदाई पबित्र आत्माल बिरोद ढाज्याच्या। जे पुर्खाङै जोमन लेवाङ जे बै नैज लिज्याच्या।41 52जे पुर्खाङै अगमबक्ताङ मध्य काङ्काजन रामासटाहौ का? गैरयहूदीयाङै सच्चा रुल आगमन आताहौ हादेए प्रचार ढान्या सोगलैल हत्या रांढोव। ओलं हत्या जेढोचिऊ। नकाङ सोगलैजन रासएवाङ, जोयाङै ना धर्मि रु रांन्या बाए हाकन्जै रा:सथएचिऊ। आब जे ओलै बिस्वासघाटी सनर साइढवा ताइस्युलेच्या।42 53स्वर्गदुतयाङै रा:सुम्पिन्या ब्यबस्था जे डोएदुच्या, तर नकाल पालन जेमाढोचिऊ।”

स्तिफनसजन लुङले ताप्स्यु रासएन्या

54जब माहासभाहाला सदस्याङै ईका छेन राथटौ तब नकाङ चिरिऊ ताइवाङ ओटन रिईले रांह्वा ग्रिबग्रीब कयौ लागिवाङ।43 55तर स्तिफनसले पबित्र आत्माङन भरिपुरी ताइस्युकने नमदेए ध्यानसं आखिमौ, ओटन परमेस्वरलं महिमा सनर येशुजन परमेस्वरलं दाइन्याङन आच्याङज्यान्या आरङौ। 56नकाले ऐलेऊ खिम्चिते, “ङा स्वर्ग आफएसिन्या ङारङ्ङु, ओटन रुल ज़ाजन परमेस्वरलं दाइन्याङन आच्याङज्यान्या ङा ङारङ्ङु।”

57तर नकाङ घिन्या ग़ाले कलिऊस्यु च्याङवाङ, ओटन अपङ्गी रां नां रासुटौ, ओटन नकाङ तचोएकै नकाल यर्त परिवाङ। 58नकाङै ओलजन बजार बाहेर देए पलिईस्यु रालाङौ, ओटन नकाल यर्त लुङले भराबर राआपौ। ओटन साचीयाङै रांक्वायाङ फिरस्यु शाऊल मिनला तोलोअ धापाल खङ ल्यौल रांनाटौ। 59जोमनलेस्यु नकाङै स्तिफनसजन लुङले टुपज्यावाङ, नकाले आपुकारिउ, “औ, प्रभु येशु, ङामि आत्माजन ग्रहन ढोते।”44 60नकाले घुन्डा तिकिस्यु घिन्या ग़ाले कलिऊस्यु ऐलेऊ, “औ, प्रभु ईका पापल दोस इकाङजन तालागित्या।” आवाए पानस्यु नकाले आपरान आराहौ।