Sheshi Kham
प्रेरित 6
साट वटा व्एन्याङ
नका दिनल जब सिइयाङल बगाल बदिऊयन हिनज्याऔ, तब हिब्रूयाङल बिरोदल ग्रीक-यहूदीयाङ गनगन लेवाङ, दानाङभन्या दिनकाई अन राभाकौक ओला बिदवाङ राचाहिन्या याए ज्यान्या रांमाडोटौ। तब बारं गोटाई सिइयाङल बगालजन खुल्स्यु ऐराढोव, “परमेस्वरलं बचन प्रचार ढान्या राइस्यु यांईन्या-ओएन्याल सेवा गे ढान्या ईका ठिक माङडी। नैताइस्यु दाज्यूभाई दिदीबैनाङ, जेमध्य पबित्र आत्मा सनर बुद्दिले भरिसिन्याङ सनर सोगलैले ग्रहन राढान्या साट वटा रुयाङ छेल्चिरते जोजन गे ईका कामत खटाहौ ग्याढुदुयित्या। तर गे प्रार्थना सनर बचनल सेवाकाईत सोगल समाय यांन्या लेया।”
आका छेनत बगालला सोगल रुयाङल रायिङहुकौ, ओटन दुउसिन्या सोगलैजन चान्या लागिऊ, ओटन नकाङै पबित्र आत्मा सनर बिस्वासले भरपुरी ताइन्या स्तिफनस, फिलिप, प्रखरस, निकनोर, तीमोन, पर्मिनास सनर एन्टिओखियाला यहूदी परम्परा मानिन्या निकोलाउसजन रांछेलौ। नकाङै ईका रुयाङजन प्रेरितयाङल सामन्दी राहोनौ, ओटन प्रेरितयाङै राकुई नाएस्यु नकाङल नाल्ट प्रार्थना रांढोव।
परमेस्वरलं बचन बदिऊयन हिनौ, ओटन सिइयाङल बगाल यरुशलेमल भ्याईजै बदिऊ। पुजाउरोयाङ मध्य तबर गोटाले ईका बिस्वासजन ग्रहन रांढोव।
स्तिफनसजन राकोलोकौ
स्तिफनस परमेस्वरलं अनुग्रह सनर सक्तिले भरपुर ताइस्यु, रुयाङल खार्ल घिन्या-घिन्या अचम्मला काम सनर रंनन्या काम आढोव। तर काङ्का-काङ्काङ जो स्वतन्त्र-बगालला यहूदीयाङल आराधना झिमयाङ (इकाङल मिन ईकाइ लेऊ), ओटन कुरेनी, अलेक्जेन्ड्रिया, किलिकिया सनर एशियाला रुयाङ लेवाङ, नकाङै च्याङस्यु स्तिफनस सकाए छलफल ढाऔलागिवाङ। स्तिफनस जब बुद्दि सनर पबित्र आत्माङन छ्योङौ, तब नकाङै नकाल बिरोदत टनौ रांमाढुदुऊ। तब नकाङै गोप्यल रुयाङजन मच्चाईस्यु ऐलेऊ रापरिङवाङ, “मोशा सनर परमेस्वरलं बिरोदल इकाले गिलल्याइस्यु आछ्योङन्या छेन गे गेथएयिउ।” तब नकाङै जनताङल अगवा सेरयाङ सनर शास्त्रीयाङजन घूस या:स्यु, ओटन नकाङजन हमला रांढोव, ओटन कोलोअस्यु महासभालं राहोन्वाङ। नकाङै ऐटाइन्या छ्योङन्या ग्वारवा साचीयाङजन हादेए रापरिङवाङ, “ईका रुले पबित्र पो सनर ब्यबस्थालं बिरोदत छेन छ्योङन्या माराइज्यादी।1 दानाङभन्या इकाले ऐआलन्या गे गेथएयिउ, ‘नासरतला येशुले ईका पोजन नास जाएन्यालेया, ओटन मोशाले गेजन आयांन्या रीतिथिति बै फिरिन्यालेया।’” महासभालं चुङज्यान्याङ सोगलैले इस्तिफनसजन दवलसै रांखिमौ, ओटन नकाल अनवार स्वर्गदुतल अनवार मनताइन्याई रांरङौ।
Source notes (1)
- Cross-reference यर्मिया २६:११
Sheshi Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.