Skip to content
BibleKenya

Sheshi Kham

प्रेरित 20:35

Verse 35 is marked below, with the whole chapter around it. Read from the start

पावल माकेडोनिया सनर ग्रीसलं

आका खैलाबैला शान्त ताहापाइना पावलले सिइयाङजन तचोएकै खुल्स्यु उत्साह आयोवाङ, ओटन ओलं बिदाई ताइस्यु माकेडोनियादेए हिनौ। नला इलाकाङल हिनस्यु बिस्वासीयाङजन भ्याई उत्साह यांस्यु नका ग्रीस देसलं हिनौ। जोङ तिन मैना चुङस्यु आबिताहौ, सिरियादेए री जाहसलन हिनन्या ठिक्कै आताइज्याऔक, यहूदीयाङै आबिरोदल जाल राढाज्यान्या सनस्यु पावलले माकेडोनिया ताइस्युई वलन्या पक्का आजाटौ। तब बेरियाल चुङन्या पुरसलं ल्हेपाज़ा सोपात्रोस, थेसलोनिकेङन अरिस्तार्खस सनर सिकन्दस, डर्बीला गायस, सनर तिमोथी ओटन एशियाला तुखिकस सनर त्रोफिमस बोलोङ एशिया प्रदेसलं हिन्वाङ। नकाङ हादेए हिनस्यु गेजन त्रोआसल वुइज्यावाङ। तब गे सोडामालन्या भरेईल पर्बल छिन्ट फिलिप्पीलन री जाहसतं चरिस्यु पास दिनक त्रोआसल नकाङल्योङ गेरांयिउ, ओटन नङ साट दिन समन गेलिज्यायिउ।

पावल आसापट त्रोआसल आहिनन्या

हप्ताल पैला दिन जब गे भरेई कलाएन्या गेदुउसियिउ, तब पावलले छिन्काछिम हिनन्या इच्छ्या आढाऔकाले, नकाङसं आधारिउ समन छ्योङज्यावाङ। गे गेदुउसिन्या टङटाल्ला कोठाल नल तबर गोटा बत्तियाङ भलाङज्यावाङ। नल युटिकस मिनला तोलोअ धापा झिमल झरकित चुङज्याऊ। पावलले भ्याई छिन्ङ समन छेन रांछ्योङौक, नका बअजोरला मिऊरुइल परिऊ ओटन मिऊरुइले उङ्गिस्यु ना तिन ताललन वान्ल तेहौ, ओटन नाजन नकाङै सिन्या अबस्थालं रासोचटौ। तब पावल वान्ल लाहौ, ओटन नकाजन गोम लेस्यु हमोअस्यु ऐलेऊ, “ताछ्याएच्यो दानाङभन्या ईका जिङदाइ लिज्याया।”1 तब नका टङटाल कोठाल हिनौ, ओटन भरेई कलाएस्यु कैरापाइना छकाल्या नम आमारनौ समन तबर छ्योङस्यु चुङवाङ। ओटन भाअसिवाङ। ओटन ओयाङ नका धापाजन जिङदा अबस्थालै झिमल राहोनौ ओटन भ्याई सानत्वना रांडोटौ।

त्रोआसङन मिलेटस समनका बए

गे री जाहसलं चरिस्यु हादेए सरिस्यु अस्सोस गेहिन्यिउ। गे पावलजन नङ जाहसलं चराहौ गेरोअयिउ। पावलले ऐटाइन्या बन्दबस्त ढास्यु नका अस्सोस समन पाइदलज हिनस्यु लेऊ।

जब नकाले गेजन अस्सोसलं आडोएयिउ, गे नकाजन री जहासलं गेसचुन्यिउ, ओटन मितिलेनेल गेरांयिउ। नङंन री जहासलं राराज्याऔक नेंयोअक खियस टापुल गेतापरायिउ, ओटन नेंयोअ छिम्क सामोस टापुल गेतापरायिउ। नकाल नेंयोअक मिलेटस सहरल गेरांयिउ, एशियाल समाय बिताइन्या यिङ आमालेऊकाले पावल एफिससलं मापसिस्यु हिनन्या निर्नय आढोव। दानाङभन्या सम्भब ताहकन पेन्तिकोसलं दिन यरुशलेमङ तापङा लेस्यु टेकाटेक लिज्याऔ।

एफिससला सेरयाङजन पावलल बिदाईल प्रचार

पावलले मिलेटसजन एफिससलं परिङस्यु मन्डलीला बिस्वासी सेरयाङजन खुलौआपरिङौ। जब नकाङ पावल ल्योङ रांवाङ, नकाले ओयाङजन ऐआढोवाङ, “जे ऐसनच्या जब ङा पैला दिन एशिया प्रदेसलं ङातापराङु, ङा लगातार जे सकाए कैलेस्यु ङालज्याङु। पुराई नम्रता सकाए मिऊकलि राइस्यु-राइस्यु, यहूदीयाङल सड्यन्त्रल सटावटत बै ङा प्रभुल सेवा ङाढोङु। ङा जेमि फाइदा ताइन्या छेन जे लेऊक मुइन्याङन सनर झिम-झिमल सोगलैल लेऊक जेजन सिक्छ्या यांन्यातन ङा खकै छिन्देए माहाएसिदुङा। यहूदीयाङजन ओटन ग्रीकयाङजन पस्चाताप ढास्यु परमेस्वर देए वलन्या सनर गे प्रभु येशु ख्रीस्टजन बिस्वास ढोचिते, ऐलेन्या छेनल साची ङा यांस्युई लेङा।”

“आब खिम्चिते, ङा पबित्र आत्माल करपरिस्यु यरुशलेम देए ङाहिनज्याङु, नङ ङाजन कैताइन्या परिरान्या हो ना ङा नैज मासनङदी। ङा इवाएजाई सन्ङा, कि कैदी ताइन्या सनर कस्ट डोएन्या ङायर्त परिराया, ऐलेन्या पबित्र आत्माले ङाजन सोगल पोल चेताउनी यांस्यु ऐलेऊ। तर ङा ङा परानजन नैज मया माढोङदी सनर ङा नैज येएला मालेङदी, आवाए याएज चाहिङा कि ङाजिबनल परमेस्वरलं अनुग्रहङन चान्याथाईल बयन यांऔ नाल्ट प्रभु येशु ङन ङासेवाकाई पुरा ढाऔ ग्याडोटङत्या।”2

“आब खिम्चिते, ङा ऐसन्ङा कि जे तन सोगलै, जो-जोजन ङा परमेस्वरलं राज्यल प्रचार ढाऔयन बाङ, जे फरि ङाजन खकै रङन्या माल्चिदी। नैताइस्यु आछिमका दिन ङा जेजन साची यांच्या, कि ङा काङ्काईल जील दोसी मालेङदी। दानाङभन्या परमेस्वरलं सोगल इच्छ्या जेजन पानस्याऔ नाल्ट ङा खकै छिन्देए माहाएसिदुङा। जे जेनाल्ट सनर जे सोगल बगालजन जोगाइसिस्यु लेच्यो। पबित्र आत्माले जेजन बगालल ग्वाला आजाएचिऊकाले ओले आमिई जीले आलङन्या परमेस्वरलं मन्डलीलं ब्याएबिई ढोचिते।3 दानाङभन्या ङाजन थाह लेया, कि ङा ङाहिनौ छिन्ट जेल्यौल भ्याई फ्याऊ पसिन्या लेरा, जोले बगालजन बाङ्की मानाएरदी। नका बेला रांन्यालेया जे खार्लन्जै ग्वारवा रुयाङ च्याङन्या लेरा, ओटन बगालजन ग्वारस्यु छ्योङस्यु, नकाङै सिइयाङजन छुट्टै यमदेए लाङन्यालेरा। नैताइस्यु ईका यिङसिस्यु सजक ताइचिते, कि तिन बर्स समन छकाल्या ओईक मिऊकलि बगाइस्यु सोगलै रुजन ङा सिक्छ्या ङाह्युउचिऊ।”

“ओटन आब ङा जेजन परमेस्वरलं सनर ओलं अनुग्रहल बचनत सुम्पिस्योङा, जोले जेजन सुढारौ ढुदुऊ, सनर पबित्र ताइन्या रुयाङजन उत्तराधिकार यांऔ ढुदुन्यालेया। ङा काङ्काई रुयाङल सुन, चान्दी, या क्वाल लोब ङामाढोङु।4 जेजन थाहैलेया कि ईकाइ ङाकुईले ङा न्हाएयाङ सनर ङाजन चाहिन्या आबस्यकताङजन ङा पुरा ढास्यु लेङा। ङा जेजन सोगलै छेनल उदाहरन यांस्युई नाएच्या, कि जे बै ऐलेस्युईज बअ परिस्रम ढास्यु गरिबयाङजन व्एचिर। प्रभु येशुल बचन यांका नाएचिते, कैलेस्यु ओले ओलजै ऐलेऊ, कि ‘होनन्यातन यांन्या अझै बअचान्या हो।’” आवाए ऐलेस्यु नकाले घुन्डा आटिकिउ ओटन नकाङ सोगलैस बोलोङ प्रार्थना आढोव। ओयाङ सोगलै व्‌रवाङ, ओटन पावलजन हमोअस्यु रांम्वाहौ। ओटन बिदा रांढोव। नकाङै फरि खकै नकाल हां रङन्या मालरदी ऐलेस्यु पावलले आपानन्या छेनल नकाङै भ्याई दुखी ताइवाङ। ओटन नकाङले ओजन रीजाहसल रासटापौ।

Source notes (4)
  1. Cross-reference १राजा १७:२१
  2. Cross-reference २तिमोथी ४:७
  3. Cross-reference भजनसङ्ग्रह ७४:२
  4. Cross-reference १शमूयल १२:३

Sheshi Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.