Skip to content
BibleKenya

Sheshi Kham

प्रेरित 14

पावल सनर बारनाबास आइकोनियाल सेवाकाई

जब पावल सनर बारनाबास आइकोनियन राढान्या पोला यहूदीयाङल आराधना झिमल हिनस्यु ऐटाइन्या किसिमले छ्योङौने, कि यहूदीयाङ सनर ग्रीकयाङल घिन्या बगालले प्रभुत बिस्वास रांढोव। तर बिस्वास माढान्या यहूदीयाङै गैरयहूदीयाङजन बिस्काइस्यु बिस्वासी भाईयाङल बिरोदत ओयाङल यिङ रा:सग्यालस्योवाङ। प्रभुल भर त साहस सकाए छ्योङौयन तबर समाय समन पावल सनर बारनाबास नलै लिज्याऔने। प्रभुले नकानेल कुईतन अचम्मला कामयाङ सनर अचम्मला कामयाङ ढाऔपरिङस्युकने आमि अनुग्रहल बचनल बयन आयोव। तर सहरला रुयाङल भाअसिइ ताइनाऔ, ओटन काङ्काङ यहूदीयाङ लेऊदेए सनर काङ्काङ प्रेरितयाङ लेऊदेए लागिवाङ।

गैरयहूदीयाङ सनर यहूदीयाङ नेपक्छेलेई रांमि शासकयाङसं मिलिस्यु ना नेंलोअ प्रेरितनेजन सताइन्या सनर लुङले टुपन्या जोर रांढोव। नकानेले ईका छेन नेसनौ, नैताइस्यु लुकोनियाला सहरयाङ लुस्त्रा, डर्बी सनर आनावङला छेत्रलन ताइस्यु ढोङस्यु हिनौने, ओटन नल नकानेले चान्याथाई प्रचार ढाऔयन्जै नेंढोव।

लुस्त्रा सनर डर्बील सेवाकाई

ओटन लुस्त्रा सहरल तोलोअ आखङ माचलाइदुन्या रु लेऊ, ना आजर्मिऊ कन्ज लुला आटाहौकाले खकै बास्यु मालेऊ। पावलले आछ्योङज्यान्या नकाले थएज्याऔ। ओटन पावलले नकाजन एखौऱ्या आखिमौक, ङा ऐबेल्ङा ऐलेन्या नकाल बिस्वास रङस्युकने। बअ जोरसै कलिऊस्यु ऐआढोव, “न खङले सोझा च्याङनते।” नका जरू च्याङौ ओटन उफ्रिस्यु बाऔ तअसिऊ। जब पावलले आढान्या ऐटाइन्या काम हुलले आरङौ, तब नकाङै लुकोनिया भासाङन बअघिन्या ग़ाले ऐलेवाङ, “देबनें रुल भेसतं गेल्योङ लांइस्यु रांऔने रैस।” नकाङै बारनाबासजन जिउस देउता सनर पावलजन हर्मेस देउता ऐढाऔ तअसिवाङ, दानाङभन्या इकाने मुख्या बक्ता लेऊने। सहरल हाङन लेन्या जिउसलं मन्दिरला पुजाउरोले मुल झलाप जिऊल यीङयाङ सनर वोईल डोअ होनस्यु नला रुयाङस मिलिस्यु बलि-पुजा ढान्या बिचार रांढोव।

जब प्रेरित बारनाबास सनर पावलले ईका छेन नेंथटौ, तब नकानेले नेंक्वा चेईस्यु ऐलेस्यु कलिऊस्यु चोएस्यु रुयाङल खार्ल हिनौने ओटन ऐनेढोवाङ, “ऐ रुयाङ, जे दानाङ ऐटाइन्या काम ढोच्यो? घोन बै ता जेमन्ताइन्याई दुखसुख भोघिन्या रुनें ज्याअसा, ओटन घोन जेजन आका बिकामला छेनयाङ्ङन जिङदा परमेस्वर ल्यौदेए होलौ नाल्ट चान्याथाई सथएज्याच्या, जो परमेस्वरले स्वर्ग, पिरथ्बी, समुन्दर सनर नकाङल लेन्या वाली वालीला जन्तु आजाटौ।1 ओले हादेए ताइस्युखेमन्या पुस्ताला सोगलै जातियाङजन रांमि-रांमि चलन अनुसारला रांयमल बाऔ आयोवाङ। तब बै ओले ओलजन बिना साची माराइदा, दानाङभन्या ओले दयाढास्यु जेजन नमतन रील झरि सनर शईन्या रितु अनुसारला ज्यान्या यांस्यु जे यिङजन आनन्दले शान्त आजाएचिऊ।”2 प्रेरितनेले ईका छेनयाङ पानस्यास्यु धौधौ नका रुयाङजन बलि-चराइन्यातन नेंरुकिवाङ।

तर ख्वाए यहूदीयाङ एन्टिओखिया सनर आइकोनियनङन नल ताप्‌रावाङ, ओटन रुयाङजन मच्चाईस्यु पावलजन लुङले टुपौ रांपरिङौ, ओटन ईका सिदा ऐलेस्यु सहरलन घिसारस्यु बाहेर रालाङौ। तर जब सिइयाङ चारवरङन दुउसिवाङ, तब नका सोव ओटन सहर भितरलं हिनौ, ओटन तयोअका छिम्क बारनाबास सकाए पलिईस्यु डर्बील हिनौने।

सिरियाला एन्टिओखियाल रावलन्या

पावल सनर बारनाबासनेले ना दर्बिया सहरल चान्याथाई प्रचार ढास्यु तबर सिइयाङ नेंजाएवाङ, ओटन नकाने लुस्त्रा, आइकोनियन सनर एन्टिओखियाला पिसिदियाल वलौने, सिइयाङजन बिस्वासतं तोलोअ यिङला जाएस्यु, ज्वाए दुख भुगिन्या ताहकन्बै सहिस्यु, गे परमेस्वरलं राज्यल पसिन्याई ताहा, ऐलेस्यु ओयाङजन हौसला नयोन्वाङ। जब नकानेले ओयाङल सोगल मन्डलीलं सेर अगवा तयार नेंजाएवाङ, तब प्रार्थना सनर बर्तसका ओयाङै राढान्या बिस्वास अनुसार प्रभुल जिम्मात नकाङजन रा:सुम्पिवाङ।

ओलं छिन्ट नकाने पिसिदिया छेत्रङन ताइस्यु पामफिलियाल रांऔने। पर्गाल बचन प्रचार ढास्यु नकाने अतालियाल रांऔने।

ओटन नलन नकाने समुन्दरल बास्यु एन्टिओखिया हिनौने, जोल नकानेले पुरा नेंढोन्या कामल नाल्ट परमेस्वरलं अनुग्रहत नकाङजन अर्पन ढास्युवाङ। जब नकाने एन्टिओखियाल ताप्‌राऔने, तब मन्डलीजन नेंदुउवाङ, ओटन परमेस्वरले नकानेङन आढान्या सोगलै कामल चर्चा नेंढोव, ओटन कैलेस्यु ओले गैरयहूदीयाङ नाल्ट बिस्वासलं झलाप आफएस्योवाङ नका नेसठएवाङ। बारनाबास सनर पावलने एन्टिओखियाला सिइयाङस तबर दिन चुङौने।

Source notes (2)
  1. Cross-reference प्रस्थान २०:११; भजनसङ्ग्रह १४६:६
  2. Cross-reference भजनसङ्ग्रह १४७:८; यर्मिया ५:२४

Sheshi Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.