प्रेरित 13

बारनाबास सनर शाऊलजन सेवाकाईल नाल्ट छेल्स्यु परिङसिऊ

1एन्टिओखियाल मन्डलीला अगमबक्ताङ सनर गुरयाङ, अथाबा बारनाबास, मोलौ ऐढासिन्या शिमियोन, कुरेनीला लुकियस, प्रदेसला शासक हेरोदस हुर्किन्या मनेन सनर शाऊल लेऊने। 2नकाङले प्रभुल आराधना राढाज्यान्या सनर बर्त राचुङज्यान्या बेलाक पबित्र आत्माले ऐलेऊ, “ङा नाल्ट बारनाबास सनर शाऊलजन नका कामल नाल्ट छुटाइचिते, जो कामल नाल्ट ङा नकाङजन खुल्स्यु लेङा।” 3तब बर्त चुङन्या सनर प्रार्थना ढास्यु नकाङै ओयाङयर्त राकुई नाएस्यु ओयाङजन बिदा रांयोवाङ।

साइप्रसल सेवाकाई

4तब पबित्र आत्माङन परिङसिन्या ताइस्यु नकाङ सिलुकियाल हिन्वाङ ओटन नङंन जहासलं चरिस्यु साइप्रसदेए हिन्वाङ। 5सलामिसल ताप्‌रा:रा पाइना नकाङै यहूदीयाङल आराधना झिमल परमेस्वरलं चान्याथाई प्रचार रांढोव। नकाङजन सेबकल नाल्ट मर्कुसं यहुन्ना नकाङसं लिज्याऔ।

6जब नकाङ सोगल टापुल बारिन्या ढाऔयन पाफोस समन ताप्‌रावाङ, तब नल नकाङै तोलोअ यहूदी ग्वारवा अगमबक्ता बार येशु ऐढासिन्या तोलोअ जादुगर सकाए डोएसिवाङ। 7नका जादुगर तोलोअ प्रदेसला शासक सर्गियस पौलस सकाए चुङा। सर्गियस पौलस बुद्दिमान रु लेऊ। नकाले शाऊल सनर बारनाबासजन खुल्स्यु परमेस्वरलं बचन थएन्या इच्छ्या आढोव। 8तर एलुमास जादुगरले (दानाङभन्या ग्रीक छेनल नका मिनल अर्थ ईकाइ ज्या) सर्गियस पौलसजन एलुमासले येशुजन बिस्वास ढान्यातन रुकिऊ आरोकौ। 9तर शाऊलले, जोजन पावल बै ऐढासिया, जो पबित्र आत्माले भरिस्यु जादुगर लेऊदेए चान्यासं आखिमौ, 10“नङ दियाबलसलं ज्या, सोगलै धार्मिकताल शत्तुर, सोगलै ग्वारन्या सनर कपटले भरिसिन्या! नैति नङ प्रभुल सोझा यमजन सग्यालन्या नमाराइनु?1 11आब खिम्ते, प्रभुल कुई नयर्त परीस्यु लेया, ओटन नङ आब तचियाए दिन समन नम्युउल प्रकाश रङन्या मालेन्दी नङ काना ताइना।”

ओटन ओचोएटै अन्ढमुन्द सनर काईकाई च्युऊन्याले नङजन कपन्‌वा, ओटन काङ्काङै नकुई कोलोअस्यु राडोऱ्याहौ सन् ऐलेस्यु नङ हुदेएअदेए बाऔ रोअना। 12तब प्रदेसला नका शासकले ऐआटाईन्या रङस्यु बिस्वास आढोव, दानाङभन्या प्रभुल सिक्छ्यात नका छक्कै परीस्यु लेऊ।

पिसिदियाल एन्टिओखियाला सेवाकाई

13पावल सनर नकाल आन्हाएयाङ पाफोसलन जहास चरिस्यु पामफिलियाला सहर पर्गाल तापवाङ, ओटन यहुन्नाचाय नकाङल्योङन भाअसिस्यु यरुशलेम वलौ। 14तर नकाङ पर्गालन पलिईस्यु पिसिदियाल एन्टिओखियाल रांवाङ, ओटन शबाथल आराधना झिम भितरलं हिनस्यु चुङवाङ। 15आब ब्यबस्था सनर अगमबक्ताङ किटापल पाठ परिरापाइना आराधना झिमला शासकयाङै नकाङल्योङ ऐढास्यु रांपरिङौ, “ऐ भाई, झेनसकाए रुयाङ नाल्ट उत्साहलं अर्थल बचन कोबाअ लेकन पान्चिते।”

16तब च्याङस्यु पावलले कुईल सयान ढास्यु ऐलेऊ, “ऐ इस्राएलला रु सनर गैरयहूदीयाङ ओटन परमेस्वरलं छ्याइ मानिन्याङ, थएचिते, 17इस्राएल जातिला परमेस्वरले गे बौ बाज्याङजन छेल्स्यु मिस्र देसलं रालज्याऔक नकाङजन महान आठहराइवाङ, ओटन ओलं सक्तिल बल बर्गतले नकाङजन ना देसलन पलिईस्यु आहोन्वाङ।2 18जङ्गलला पोल छ्योअ चालिस बर्स समन ओले नकाङजन आखिम्वाङ।3 19तब ओले कनान देसला साट वटा जातियाङजन नस्ट आजाटौ ओटन ओयाङजन नका पोला खसम आजाएवाङ।”4

20“ईका सोगलै छ्योअ चारसय पचास बर्स लागिऊ, ओलं छिन्ट शमुएल अगमबक्ताल पालासमन ओले नियादिसयाङ आयोवाङ।5 21नालछिन्ट नकाङै रय नीवाङ, ओटन परमेस्वरले बेन्यामीन कुलला किशल आज़ा शाऊलजन चालिस बर्स समन नकाङयर्त राज्य ढाऔ आयोव।6 22परमेस्वरले ईका बारेल बयन यांस्यु ऐलेऊ, ‘ङा यिशैल ज़ा दाऊदजन ङायिङ्कामन्ताइन्या रु डोएस्युङाल्ङु, नैताइस्यु पावलजन रयतन हताइस्यु दाऊदजन नकाङल रय ताहौनाल्ट सच्यान्ङा, जोले ङा इच्छ्याला सोगल काम पुरा ढान्यालेया।’”7

23“ईका रुल भाबी सन्तानङन, ओलं बाचा अनुसार, परमेस्वरले इस्राएललं नाल्ट तोलोअ मुक्तिदाता, येशुजन आहोनौ।8 24ओ आरांऔ हादेए बप्तिस्मा यांन्या यहुन्नाले इस्राएलला सोगलै रुयाङजन पापल पस्चाताप सनर बप्तिस्मालं प्रचार आढोव। 25बप्तिस्मा यांन्या यहुन्नाले आकाम खिम्ङा आलेऊक आपानौ, ‘जे नै जेयिङचिऊ, ङा काङ्का? ङा ओ माङडी। तर ङाछिन्ट तोलोअ रांन्या लेया, जोल आखङला जुता समन बै फिरन्या लायकला ङा मालेङदी।’”

26“ऐ, अब्राहामल बङशल सन्तान, सनर जे तन परमेस्वरलं छ्याइ मानिन्या ऐ भाईयाङ, गेल्योङ बै ईका मुक्तिल थाई परिङस्यास्यु लेया। 27दानाङभन्या यरुशलेमला चुङन्याङ सनर नकाङल शासकयाङै येशुजन माशईस्यु सनर सोगल शबाथल परिन्या अगमबक्ताल बचनयाङ माबुजिस्यु ओजन सजायल आग्या यांस्यु ना बचन पुरा रांढोव। 28ज्याहान सजायल नैज कारन माडोएरकन बै नकाङै ओजन सएन्यालेस्यु पिलातस सकाए बिन्ति रांढोव, 29ओटन नकाल बारेल सरसिन्या सोगल छेन नकाङै पुरा ढोरा पाइनाई नकाङै ओजन क्रूसतन ल्हाएस्यु ऊईल रारीनौ। 30तर परमेस्वरले नकाजन सिन्यातन जिङदा आजाटौ। 31ओलसं गालीलङन यरुशलेमङ रांन्याङ ल्योङ ओ तबर दिन समन ठन्सिस्युलेऊ, ओटन नकाङै आकअ समन जनताल ओलं साची लिज्याऔज लिज्यारा।”

32“परमेस्वरले बौ-बाज्याङ सकाए आढान्या बाचाल चान्याथाई गे जेल्योङ होन्‌या। 33अथाबा, कढाई परमेस्वरले येशुजन जिङदा आसचोटौ नका छेन गे, नकाङल सन्तानल नाल्ट बाचा पुरा आढोव, जो भजनसङग्रह नें अध्यायल साट पदल बै सरसिन्या लेया,

‘नङ ङा ज़ा हो,

आछिमका दिन ङा नङजन ङा जर्म ङायानु।9

34ओले ख्रीस्टजन खकै माचिन्या जाएस्यु सिन्यातन जिङदा आजाएन्या बारेल ऐलेस्यु पानस्यु लेऊ, ङा जेजन दाऊदजन ङायान्या पबित्र सनर अटल आशिर्बाद यांच्या।10

35दानाङभन्या छुट्टै खन्डल बै ऐलेसिज्याया,

कि नङ नमी पबित्र जनल बुल चिऊन्या मालेन्दी।’”

36“दानाङभन्या दाऊद आमिई पुस्तालं परमेस्वरलं उदश्य अनुसार सेवा ढास्यु सिऊ ओटन आबौ आबाज्याङमन री:नसिऊ तर नकाल बुलबै चिस्यु हिन्दा। 37तर परमेस्वरले जोजन सिन्यातन जिङदा आजाटौ ओलं बुल माचिडा।”

38“नैताइस्यु भाईयाङ जेजन थाह ग्याताइत्या, कि ईकाइ रुङन याएज रुयाङल पाप छेमा ताहा ऐलेस्यु जेजन प्रचार ढास्युई लेया। 39जे बिस्वास ढान्या भरिले नकातन्जै सोगल छिन्ङन छुटकारा डोएस्यु लेच्या, जो छुटकारा मोशाल ब्यबस्थाङन जे नाल्ट सम्भब माल्दी। 40ऐताइस्यु होसस लिज्याच्यो, मानकन ता अगमबक्ताङल किटापल पान्सिन्या आका छेन जेयर्त रांया

41‘ऐ बाएढान्याङ, खिम्चिते ओटन अचम्म ताइच्या,

ओटन नस्ट ताइच्या,

दानाङभन्या जे बेलाक ङा तोलोअ काम ढोङा,

ऐटाइन्या काम जोल बारेल काङ्काङै पानरकन बै

जे सिटीमिटी बिस्वास ढान्या माल्चिदी।’”11

42पावल सनर बारनाबास आराधना झिमलन पलिईस्यु हिन्ङा नेंलेऊक रांन्या शबाथल बै ईकाइ छेन सथएसिन लेस्यु रुयाङै नकानेजन बिन्ति रांढोव। 43आराधना खेमापाइना तबर यहूदीयाङ सनर यहूदीमत मानिन्या भक्तयाङ पावल सनर बारनाबासलं छिन्ट लागिवाङ, ओटन नकाङै ओनेस छ्योङौयन, नकाङजन परमेस्वरलं अनुग्रहत लिज्याचिते ऐलेस्यु ऐराढोवने।

44छुट्टै शबाथ छिम्क छ्योअ सोगलै सहरला रुयाङ परमेस्वरलं बचन ठटौनाल्ट उर्लिस्यु रांवाङ। 45हुलजन रङस्यु, यहूदीयाङ खिई ढास्युकने ओटन पावलले आछ्योङन्या छेन राकोटत्याहौ, ओटन ओलं मेहोनो रांढोव। 46तर पावल सनर बारनाबासले साहस ढास्यु नेंपानौ, “परमेस्वरलं बचन सोगलैहादेए जेझन्जै सथएन्या आबस्यक लेया। जे ईका निर्नय मामानिस्यु जे जेईजन अनन्त जिबनल अयोग्य जेठहराहौकाले गे आब गैरयहूदीयाङ ल्योङ हिन्‌या। 47दानाङभन्या प्रभुले गेजन ऐटाइन्या आग्या आयांयिउ, कि ‘पिरथ्बील हुङावङ समन मुक्ति सतापन्या ङा जेजन गैरयहूदीयाङ नाल्ट ज्योति ताइन्या परिङन्या लेङा।’”12

48जब गैरयहूदीयाङै ईका छेन राथटौ, नकाङ हेसाङवाङ, ओटन परमेस्वरलं बचनल प्रसम्सा रांढोव, ओटन अनन्त जिबनल नाल्ट नियुक्त ताइन्याङ सोगलैले बिस्वास रांढोव।

49प्रभुल बचन सोगलै पोभरिल फैलिऊ। 50तर पावल सनर बारनाबासलं बिरोदत यहूदीयाङै भक्त सनर मिनथइन्या मेएमाङ सनर सहरला खास-खास रुयाङजन रामच्चाहौ, ओटन ओयाङजन रां सान्ढ सिमाना बाहेर देए रांकताहौ। 51तर ओयाङ रांखङला धुलो नकाङल बिरोदत हरस्यु, आइकोनियनल रांवाङ। 52सिइयाङ आनन्द सनर पबित्र आत्माले भरिपुरी ताइवाङ।