Rô-ma 8

1Kơi achêk hayơq, xók ađôk yươq ve patu janah rauriq đóng nôôq ngaai tơơt kalóóng Jê-su Chuôq Paq Manưih. 2Taai gani Yaang Liêm ưng parmông kalóóng Jê-su Chuôq Paq Manưih ơi tabâân paloh aku lơh tââq gani ưng matu lơt lơq akan chêt. 3Taai ting kơi palơq tarnêêng kah chóóm đuôh ưng gani, hơq nek kalóóng tarnêêng ađó biêh dhur n'dhương taai achak araang, nek Yaang Pleng, xong xók kayua chênh Akóón Ađó bhral kalóóng dyaang achak thê kơi achak araang matu lơt lơq ơi taai matu lơt, Ađó ơi patu matu lơt kalóóng achak araang, 4buôn nôôq tarnêêng bhơt liêm ưng gani bâân têêng paxong kalóóng nôôq he, nek nôôq manưih yươq jađaang vôôiq ting manưih ti bơơi ting Yaang Liêm. 5Taai nôôq manưih mamông ting manưih ti nek chamet leq nôôq rau mađó leq manưih ti, hayơq nôôq manưih ting Yaang Liêm nek chamet leq nôôq rau mađó leq Yaang Liêm. 6Ơi lóóm karnóq ưng manưih ti nek akan chêt, hayơq lóóm karnóq ưng Yaang Liêm nek parmông lơq yươq rauha; 7achêk nek taai lóóm karnóq ưng manưih ti nek tarjơl makhich palơq Yaang Pleng, ơi ađó kah đơơp xâng dhiq gani ưng Yaang Pleng, taai ađó kah ve chóóm đuôh buôn têêng kơi achêk. 8Hayơq ngaai nôôq mamông ting manưih ti nek kah ve đuôh têêng bhuui lóóm Yaang Pleng. 9Dhơ kơi ađek, adhi anó yươq tơơt kalóóng manưih ti, hơq nek kalóóng Yaang Liêm, la Yaang Liêm ưng Yaang Pleng alua dhalam tơơt jaq kalóóng adhi anó. Dyơq la ngaai kah ve Yaang Liêm ưng Chuôq Paq Manưih, nek manưih ađek kah mađó leq Ađó. 10Palâh lóóiq la Chuôq Paq Manưih tơơt kalóóng adhi anó, nek dhơ achak araang nek akan chêt ơi taai matu lơt, bơơi Yaang Liêm nek parmông ơi taai rau bhơt liêm. 11Dyơq la Yaang Liêm ưng Yaang ơi payuur Chuôq Jê-su mamông lóóiq tââq akan chêt dyơq tơơt jaq kalóóng adhi anó, nek Yaang ơi payuur Jê-su Chuôq Paq Manưih mamông lóóiq tââq akan chêt kung e đóng parmông leq achak araang huuiq ting dhiq akan chêt ưng adhi anó, tââq Yaang Liêm Ađó tơơt jaq kalóóng adhi anó.

12Kơi achêk hayơq, adhi anó ơơi, nôôq he eh rau nek manưih manơơq manưih ti buôn mamông ting manưih ti. 13Ơi la adhi anó mamông ting manưih ti, adhi anó e phaai chêt, dyơq la đươi Yaang Liêm, adhi anó têêng chêt nôôq tarnêêng têêng ưng achak araang, nek adhi anó e mamông. 14Ơi la ngaai bâân chơơng đââng tââq Yaang Liêm ưng Yaang Pleng, nôôq manưih ađek nek akóón ưng Yaang Pleng. 15Taai adhi anó ơi yươq pei đơơp yaang ưng rau tarlum têêng xól buôn val malóóm tơk rau kakhin kapơn, bơơi adhi anó ơi pei đơơp Yaang Liêm ưng dhiq dham akóón partơơt, đươi ađek nôôq he yuur đóók: “A-ba, Ama!” 16Chênh Yaang Liêm truuih đuui nek palơq yaang lóóm nôôq he kơi nôôq he nek akóón anaaq ưng Yaang Pleng. 17Hơq la nek akóón anaaq, hơq kung nek manưih bâân đơơp: mưi hót nek nôôq manưih bâân đơơp ưng Yaang Pleng, mat lââng nek nôôq manưih mađó bâân đơơp palơq Chuôq Paq Manưih la nôôq he alua dhalam đơơp jarnah palơq Ađó buôn nôôq he kung bâân cha-iil tabah palơq Ađó.

18Taai aku kanóq kơi nôôq jarnah ka-ai dhiq ganah xók đôk kah chóóm đaang marchơng palơq cha-iil tabah kanóq bâân tapakah đóng nôôq he. 19Tââq rau bhơt lóóm rââm đương ưng rau ơi tavaaih xók puih lóóm rââm đương rau gluh pakah ưng akóón anaaq Yaang Pleng. 20Taai dyóp rau ơi bâân têêng huuiq dhiq tarlum kah machak maraang, eh rau kanóq kaniêng, bơơi nek taai Yaang ơi têêng piđó phaai xâng bóóp, ganơơm leq rau đương rââm 21Kơi chênh rau ơi tavaaih kung e bâân đââng paloh gluh tââq achak têêng xól ưng rau chêt bil buôn mót leq rau rathaai kalóóng cha-iil tabah ưng akóón anaaq Yaang Pleng. 22Taai nôôq he n'nal kơi tabhơt rau ơi tavaaih maar chaxih kagôh lơq tatrươih vaveq kalóóng ka-ai karuôq patơk tangêi ađôk. 23Dhơ kơi ađek, eh mưi kơi achêk, hơq nôôq he kung kơi achêk, dhơ ve bâân pale tââp bóóng ưng Yaang Liêm — chênh nôôq he kung chaxih kagôh kalóóng ađêi, dyơq xók puih lóóm đương rââm dham tanơơt akóón partơơt, hơq nek rau paq pók achak araang ưng nôôq he. 24Taai nôôq he ơi bâân paq kalóóng đương rââm mưng bhlơng. Hơq đương rââm la bâân dhamơn lêi nek eh rau nek đương rââm. Taai ve ngaai đương rââm leq rau hơq ađêi bâân lêi? 25Dyơq la nôôq he đương rââm leq rau ađêi kah ơi lêi, nek nôôq he xók puih lóóm rââm đương palơq rau đuôh jruôn.

26Bơơi ting kơi tarvaai ađek, Yaang Liêm kung ting poor kalóóng rau dhur lóóm ưng nôôq he. Taai nôôq he kah n'nal rau hơq nôôq he chóóm phaai gavơh nhan kơi ađêi đaang phaai têêng, bơơi chênh Yaang Liêm bhơt lóóm gavơh nhan palơq nôôq dhariêng ta-uih taxung kah chóóm truuih đuui palơq paraaq 27Dyơq Yaang chamet lêi lóóm manưih nek n'nal lóóm karnóq ưng Yaang Liêm nek ng'kơi, taai Ađó gavơh nhan dhalam pâng karnóq kiêng Yaang Pleng đóng nôôq manưih huuiq. 28Mat lââng, nôôq he n'nal kơi Yaang Pleng têêng tavaaih dyóp rau nek palơq xóng piđó buôn kađââng tơk rau liêm kre pakoom đóng nôôq manưih nh'nhơr Yaang Pleng, hơq nek đóng nôôq manưih ve bâân rau dhaloong ting karnóq lơơi ưng Ađó. 29Taai nôôq manưih hơq Ađó ơi n'nal loom, nek Ađó kung ơi kanóq lơơi buôn thê kơi dyaang a-ô ưng Akóón Ađó, hơq đóng Akóón achêk val xar Akóón taha dhiq m'pơng bơk adhi anó. 30Mat lââng, nôôq ngaai hơq Ađó ơi kanóq lơơi, nek nôôq manưih ađek Ađó kung ơi dhaloong. Lơq nôôq ngaai hơq Ađó ơi dhaloong nek nôôq manưih ađek Ađó kung ơi đóók bhơt liêm. Dyơq nôôq ngaai hơq Ađó ơi đóók bhơt liêm, nek nôôq manưih ađek Ađó kung ơi têêng đóng cha-iil tabah.

31Kơi achêk nek, nôôq he e praaq ng'kơi leq nôôq rau ađô? La Yaang Pleng xal mat đóng nôôq he, nek ngaai jơl makhich nôôq he? 32Ađó alua dhalam nek Yaang ơi yươq châq chênh Akóón ađêi, bơơi ơi pajaau Akóón achêk klóóih đóng tabhơt nôôq he, nek haurau hơq Ađó e kah đóng kliim dyóp rau nek palơq Akóón achêk đóng nôôq he? 33Ngaai e kaauq matu lơt makhich lóóiq nôôq manưih bâân chââih ưng Yaang Pleng? Yaang Pleng nek Yaang đóók bhơt liêm. 34Ngaai nek manưih móón matu lơt? Jê-su Chuôq Paq Manưih nek Yaang ơi chêt, bơơi lơh achêk dyơq, xong xók bâân têêng mamông lóóiq, Yaang achêk patơk mơ tơơt hót têi atươm Yaang Pleng, lơq Ađó xók nhan klóóih đóng nôôq he. 35Ngaai e têêng tablah nôôq he lơh tââq lóóm nh'nhơr ưng Chuôq Paq Manưih? Kah alua chêt đok, jarnah xarngaat, tarvei tarleng, ha-ul rahaal, lalôh lalut, tamenh chêt, môôiq kóóih bhươt? 36Kơi paraaq bâân xaraq kơi ađô:

“Ơi taai Ađó, nôôq akóón đơơp patu chêt tóóng tangêi.

Nôôq akóón bâân lêi kơi trưưu đââng leq tarnêêng leng paxêêt.”

37Dhơ kơi ađek, kalóóng dyóp rau achêk, nôôq he đươk lơh bhuui yayar đươi Yaang nh'nhơr ađêi. 38Taai aku bâân ting xâng kơi kah ve akan chêt, môôiq parmông, kah ve nôôq dhơn pleng, môôiq nôôq kadhâng akoq, môôiq nôôq tarnêêng xók ađôk, môôiq nôôq rau e bhral, kah ve kataai karơ, 39môôiq paryaal, môôiq pardhơuq, kung kah ve dhơ dharau têêng tavaaih rau n'đó lââng, e ve n'jau đuôh têêng tablah nôôq he gluh lơh tââq lóóm nh'nhơr ưng Yaang Pleng, nek rau tơơt kalóóng Jê-su Chuôq Paq Manưih, Chuôq nôôq he.