Rô-ma 7

1Adhi anó ơơi (taai aku dyơq praaq palơq nôôq manưih n'nal gani), môôiq nek adhi anó kah n'nal kơi gani ve mataai karơ dhiq mưi nak dhiq nek mơ đươnh manưih ađek dyơq mamông kah lua? 2Taai manưih pađiil ve kayiik ơi bâân gani dyuôch tamưng palơq manưih kayiik ưng ađêi dyơq mamông; bơơi la kayiik chêt, nek ađó bâân talơơi lơh tââq gani leq manưih kayiik achêk. 3Kơi achêk hayơq, hơq xók kayiik dyơq mamông, la ađó bêch tơơt palơq mưi chanak padruuih lââng, nek ađó e đóng pakah mađó palơq dhanóók đóók manưih têêng tapiing. Bơơi la kayiik chêt, nek ađó bâân rathaai lơh tââq gani, ađó eh rau nek manưih têêng tapiing dhơ bêch tơơt palơq manưih kayiik lââng. 4Kung kơi achêk, adhi anó ưng aku ơơi, chênh adhi anó kung ơi bâân têêng đóng chêt ting kơi palơq gani đươi achak araang ưng Chuôq Paq Manưih, buôn đóng adhi anó bâân pajum nek palơq manưih lââng, hơq nek palơq Yaang ơi bâân têêng mamông lóóiq tââq akan chêt, buôn đóng nôôq he ve chóóm bóóng pale đóng Yaang Pleng. 5Taai bhêêl nôôq he dyơq tơơt kalóóng manưih ti, nôôq n'thaam kiêng matu lơt tapâng dhiq gani biêh vôôiq veq kalóóng nôôq achak araang ưng nôôq he, buôn bóóng pale đóng akan chêt. 6Bơơi ađôk nôôq he ơi bâân bhlêh m'peq tââq gani, taai ơi chêt ting kơi palơq rau hơq nôôq he biêh bâân kađaai tamưng, kơi achêk hayơq nôôq he ve chóóm têêng yaauq ting kơi liêm tame ưng Yaang Liêm hơq eh rau kơi ti hanua ưng bha-aar xaraq.

7Kơi achêk, nôôq he e praaq harau? Gani nek matu lơt alua? Chiên ađek kah mơ chóóm vaaih. Dhơ kơi ađek, aku ơi kah đơơp n'nal matu lơt la kah đươi leq gani. Taai aku ơi kah đơơp n'nal matu n'thaam la gani kah móón: “Amei óóq n'thaam.” 8Bơơi matu lơt, xong xók ting pei kapươk dhiq gani pachóóm, ơi đââng lóóiq dyóp n'thaam malóóch kalóóng aku. Taai kah ve gani nek matu lơt chêt. 9Kơi lââng, n'loom ahei, aku biêh mamông kah ve gani, bơơi xong xók gani pachóóm bhral, nek matu lơt ơi yuur mamông, 10dyơq aku nek chêt. Lơq gani pachóóm nek rau kađââng tơk parmông, nek ađó ơi bâân lêi kơi nek akan chêt ting kơi palơq aku. 11Taai xong xók pei kapươk đươi dhiq gani pachóóm, matu lơt ơi galơơk chachââr aku, lơq tapâng dhiq ađek, ơi leng chêt aku. 12Kơi achêk, gani nek liêm, gani pachóóm kung nek liêm, bhơt liêm, lơq liêm kre.

13Kơi achêk, rau liêm ơi val xar akan chêt đóng aku môôiq alua? Chiên ađek kah mơ chóóm vaaih. Palâh lóóiq, buôn ting tapâng rau liêm kre, matu lơt ve nh'jau bâân tapakah nek matu lơt, hơq nek rau đââng lóóiq akan chêt kalóóng aku, hơq đóng dhiq gani pachóóm, matu lơt dhaang val kơi môôp aak bơk lơh. 14Taai nôôq he n'nal kơi gani nek liêm kre, hayơq chênh achak aku nek manưih ti ơi bâân baan têêng xól dhiq matu lơt. 15Taai aku kah n'nal tarnêêng ađêi yuur têêng. Taai eh rau aku yuur têêng rau hơq aku kiêng. Bơơi aku yuur têêng rau hơq aku dyââng lêi. 16Bơơi la aku têêng rau hơq ađêi kah kiêng, nek aku markơi karnóq palơq gani kơi gani nek liêm kre. 17Bơơi bhêêl ađôk chênh aku kah dyơq têêng tarnêêng ađek dyơq, hơq nek matu lơt xók dyơq tơơt kalóóng aku. 18Taai aku n'nal kơi rau liêm kah đơơp tơơt kalóóng aku, hơq nek kalóóng manưih ti aku. Taai rââm kiêng rau liêm nek bhiêk tơơt kađơu kalóóng aku, bơơi yuur têêng rau liêm nek kah. 19Taai rau liêm hơq aku kiêng nek aku kah têêng, bơơi rau môôp hơq aku kah kiêng, nek aku yuur têêng ađó. 20Dyơq la aku têêng rau hơq ađêi kah kiêng, nek eh rau chênh aku têêng rau achêk dyơq, bơơi nek matu lơt tơơt kađơu kalóóng aku. 21Kơi achêk hayơq, aku bâân n'nal gani ađô kalóóng aku, hơq nek kalóóng akóón manưih rââm kiêng têêng rau liêm ađô, ađek nek rau aak bhiêk dyơq tơơt at kalóóng aku. 22Taai aku bhuui kiêng leq gani ưng Yaang Pleng ting akóón manưih hót kalóóng. 23Bơơi aku bâân lêi mưi gani lââng kalóóng nôôq achak araang ađêi, tarjơl jaklâk lóóiq gani ưng lóóm karnóq aku lơq pa-eep aku palơq gani ưng matu lơt, nek gani dyơq tơơt dhiq kalóóng nôôq achak araang ưng aku. 24Aku nek mưi chanak jarnah xarngaat! Ngaai e paq jóói aku lơh tââq achak araang ưng akan chêt ađô? 25Ma-ơơn Yaang Pleng đươi Jê-su Chuôq Paq Manưih, Chuôq nôôq he! Taai kơi achêk nek hayơq, dhơ palơq lóóm karnóq, chênh aku têêng yaauq gani ưng Yaang Pleng, bơơi palơq manưih ti nek pakoom đóng gani ưng matu lơt.