Ma-thi-ơ 12

1Kalóóng mơ ganah ađek, Chuôq Jê-su vôôiq hót nôôq hare aviq mót tangêi Sa-baat, hơq nôôq môôn-đô ưng Ađó ha-ul hayơq piđó tââp xruôt kanuung aviq lơq mók. 2Bơơi xong xók lêi rau ađek, nôôq manưih Pha-ri-si móón palơq Ađó: “Lêi tôôh, nôôq môôn-đô ưng thêi têêng chiên kah chóóm pheep têêng kalóóng tangêi Sa-baat.” 3Dhơ kơi ađek, Ađó praaq palơq piđó: “Nôôq pe ơi kah đok lêi chiên Đa-viit ơi têêng xók bhêêl bhua lơq nôôq manưih vôôiq palơq ađêi bâân ha-ul nek ng'kơi? 4N'đó kơi bhua ơi mót kalóóng đong ưng Yaang Pleng lơq cha beng bhanuôih, hơq beng achêk nek kah đóng pheep bhua lơq nôôq manưih vôôiq palơq bhua buôn cha, chapiên mưi đóng leq takóh kadhâng bhanuôih? 5Môôiq nôôq pe ơi kah đok lêi kalóóng gani kơi mót tangêi Sa-baat, nôôq takóh kadhâng bhanuôih kalóóng đong bhanuôih têêng lơt tangêi Sa-baat hơq piđó nek yươq matu alua? 6Bơơi aku praaq palơq nôôq pe kơi mưi Yaang gamak lơh đong bhanuôih tơơt dhiq ađôk. 7Bơơi la nôôq pe biêh ơi n'nal kiêng móón xayar ađô nek hau: ‘Aku kiêng lóóm kayô ka-er hơq eh rau adhah bhanuôih,’ nek alua nek nôôq pe ơi yươq xêi lơt nôôq manưih yươq lơt. 8Ơi Akóón Manưih nek Chuôq ưng tangêi Sa-baat.”

9Lơq xók ơi yuur vôôiq tââq ađek, Ađó mót kalóóng đong gươl ưng piđó. 10Lêi tôôh, mưi chanak ve têi bâân dyóói, lơq piđó tamóh pajal Chuôq Jê-su kơi ađô: “Ve alua chóóm pheep payươh ka-ai kalóóng tangêi Sa-baat?” hơq đóng piđó ve chóóm patu Ađó. 11Bơơi Ađó praaq palơq piđó: “Ve ngaai manưih kalóóng nôôq pe, hơq manưih achêk ve mưi panong trưưu, lơq la ađó n'tôq leq trôông xók tangêi Sa-baat, nek manưih achêk e kah dyuôch kadhâng tamưng ađó lơq galôôi padyók kơq? 12Lơq hayơq akóón manưih nek kiiq liêm lơh akóón trưưu n'nal mơ! Hayơq kơi achêk, ve pheep têêng tarnêêng liêm xók tangêi Sa-baat.” 13Xong ađek, Ađó praaq palơq manưih achêk: “Nek hayuur têi ưng amei.” Manưih achêk hayuur têi lơq ađó bâân yươh khe karơ, i kơi tapaang têi tôôh. 14Bơơi xong xók vôôiq gluh, nôôq manưih Pha-ri-si tabâân mangê jaklâk Ađó ng'kơi đóng piđó ve chóóm leng Ađó.

15Bơơi taai ơi n'nal kơi achêk, Chuôq Jê-su yuur xooq tââq dhiq ađek. Bơk manưih ơi vôôiq ting Ađó, hayơq Ađó payươh đóng tabhơt piđó, 16lơq Ađó móón lơơi piđó buôn piđó óóq têêng đóng Ađó pakah mat, 17hơq đóng paraaq ơi bâân praaq dhiq Ê-saai manưih đââng taruuih bâân tajaap, kơi ađô:

18“Lêi nô, dhơn ratơơq Aku, Manưih hơq Aku ơi chââih;

Manưih nh'nhơr tââm ưng Aku, hơq dhiq Ađó, ravaai Aku tabhơt iêm lóóm.

Aku e patơơt Yaang Aku dhiq Ađó,

lơq Ađó e truuih karơ rau bhơt liêm đóng nôôq dhanuôr manưih nguôi.

19Ađó e yươq tarkaai tarlak môôiq lalơu lalaang;

kung yươq ngaai e xâng dhariêng Ađó dhiq kalơng bhlơng.

20Ađó e kah veh tââm karbho ơi bâân bhrươm;

Ađó e kah tapat tiim dhơu róh rariq,

đóng patơk xók bhêêl Ađó đóng rau bhơt liêm tơk bhuui yayar, 21lơq nôôq dhanuôr manưih nguôi e rââm dhiq dhanóók Ađó.”

22Xong ađek, mưi chanak kabaang lơq abơq pâng abhưi bóq bâân đââng tơk đóng Ađó, hayơq Ađó payươh đóng manưih ađek, tơk mơ manưih abơq ađô chóóm praaq lơq chóóm lêi. 23Tabhơt tanóói dhanuôr maar hêq lêi lơq móón: “Ve kơq manưih ađô nek Akóón ưng Đa-viit?” 24Hayơq nôôq manưih Pha-ri-si, xong xók xâng chiên ađô, ơi móón: “Ađó ađô kah đuôh chóóm đuôi abhưi la eh alua nek tââq Bê-êên-xê-buun, hơq nek takóh abhưi.” 25Bơơi biêh ơi n'nal lóóm karnóq ưng piđó, Ađó praaq palơq piđó: “Dyóp katiêk bâân tablah tarjơl lóóiq chênh ađêi nek bâân bhahi bhatoong, lơq dyóp kanóón môôiq đong bâân tablah tarvei palơq chênh ađó nek e kah đuôh dyương mưng. 26La Sa-taan pagluh Sa-taan, nek ađó bâân tablah tajơl lóóiq chênh ađó. Kơi achêk nek, ng'kơi chóóm têêng katiêk ađó e dyương mưng? 27Lơq la Aku tââq Bê-êên-xê-buun pagluh nôôq abhưi, nek akóón nôôq pe tââq ngaai pagluh piđó? Ơi taai rau ađô, piđó e nek nôôq manưih xêi xanêi nôôq pe. 28Bơơi la aku pagluh nôôq abhưi tââq Yaang Liêm ưng Yaang Pleng, kơi achêk nek katiêk Yaang Pleng ơi tơk dhiq nôôq pe. 29Môôiq ng'kơi têêng hơq ngaai ngiq ađek ve chóóm mót kalóóng đong ưng manưih karơ praan lơq tatông đô-đaak ưng ađó la laloom kơ manưih ađek kah klooiq manưih karơ praan achêk kơ, hayơq xong ađek, manưih ađô e pei tabhơt drươp đong ađó ađek? 30Ngaai kah tơơt palơq aku nek jơl lóóiq aku, lơq ngaai kah nhoom karong madhiq palơq aku nek tachêh tavươk. 31Ơi taai rau ađô, aku praaq palơq nôôq pe, dyóp matu lơt lơq paraaq praaq chôlô e bâân lơơi lơt đóng palââng, bơơi paraaq lơt tơk Yaang Liêm nek e kah bâân lơơi matu. 32La ngaai praaq paraaq jơl huông Akóón Manưih, nek manưih achêk e bâân lơơi lơt. Bơơi ngaai đu praaq huông palơq Chuôq Yaang Liêm, nek manưih ađek e kah bâân lơơi lơt, tabhơt kalóóng đơơi ađô môôiq kalóóng đơơi ravang tơk. 33Môôiq nek, ngaam n'lóóng liêm nek pale ađó liêm, môôiq ngaam n'lóóng môôp, nek pale ađó môôp, ơi n'lóóng bâân ngi n'nal đươi pale ưng ađó. 34Dhong nooi kaxênh karviêng tôôh, taai nek aak, nôôq pe ng'kơi têêng ve chóóm praaq rau liêm? Ơi bóóp gluh paraaq tââq rau bing bhlaai kalóóng lóóm. 35Manưih liêm, vaaih gluh tââq rau koom ha-ơu liêm kre ưng ađêi, yuur vaaih rau liêm, hơq manưih aak, yuur vaaih tââq rau koom ha-ơu lơt aak ưng ađêi, yuur vaaih rau aak. 36Bơơi Aku praaq palơq nôôq pe kơi dyóp paraaq kah malơơi malaai hơq palââng praaq, piđó e đââng pagluh paraaq truuih pakah leq ađó kalóóng tangêi xêi xanêi. 37Ơi tââq dhiq nôôq gluh paraaq ưng ađêi, nôôq pe e bâân đóók bhơt liêm, lơq tââq dhiq nôôq gluh paraaq ưng ađêi, nôôq pe e bâân patu.”

38Xong ađek, masôôq manưih pachóóm gani lơq manưih Pha-ri-si ơi ââi bóóp palơq Ađó, kơi ađô: “Thêi ơơi, nôôq yi kiêng lêi dhiq Thêi mưi karnal chrih.” 39Bơơi buôn ââi lóóiq, Ađó praaq palơq piđó: “Mưi klaang đơơi lơt aak lơq têêng tapiing chêk tabâân mưi karnal chrih, Bơơi kah ve ađó karnal chrih e bâân đóng leq piđó, chapiên karnal chrih ưng Jô-na manưih đââng taruuih. 40Ơi Jô-na glêh tơơt kalóóng luônh kadhóóng gamak pe tangêi lơq pe hayum n'đó kơi, nek Akóón Manưih e tơơt pe tangêi lơq pe hayum kalóóng bóng katiêk kơi achêk. 41Kalóóng tangêi xêi xanêi, dhanuôr Ni-ni-ve e yuur dyương nek palơq klaang đơơi ađô lơq e yuur kaauq ađó. Ơi piđó ơi klôôq lóóm toom paraaq truuih pachóóm ưng Jô-na, hơq lêi nô, Yaang bhi chap lơh Jô-na tơơt dhiq ađô. 42Kalóóng tangêi xêi xanêi, bhua pađiil charhóóng hót hóng e yuur dyương nek palơq klaang đơơi ađô lơq e yuur kaauq ađó, ơi tââq nôôq dhiq tơk luch ưng katiêk, ađó ơi tơk buôn xâng rau tarbech galang ưng Sa-lô-môôn, hơq lêi nô, Yaang bhi chap lơh Sa-lô-môôn tơơt dhiq ađô. 43Lơh tââq ađek, xók yaang anhuq ơi xooq tââq mưi chanak, ađó vôôiq hót nôôq dhiq góh xâât, tabâân dhiq dhêi hơq kah lêi. 44Bhêêl ađek, ađó móón: ‘Aku e val lóóiq dhiq đong aku hơq aku ơi yuur vôôiq tââq dhiq achêk.’ Xong xók tơk, ađó nek lêi dhanong đong kagóh kagóói, ơi bâân piih dhoon sek se lơq rapaq ralap tapat liêm. 45Xong ađek, ađó vôôiq lơq đââng chô madhiq palơq ađó tapól abhưi lââng dyơq lơt aak lơh ađó, lơq xók ơi mót kalóóng, tabhơt kabhuh mamông dhiq ađek. Hayơq xariêq ưng manưih achêk val xar môôp lơh xók tarnââp. Chiên kung e nek kơi achêk nek palơq dhong nooi lơt aak ađô.”

46Xók bhêêl Ađó bhiêk dyơq xók praaq palơq manưih ganơr, lêi tôôh, amêêq lơq nôôq adhi ưng Ađó biêh ơi dyương hót nguôi, tabâân kơi buôn praaq chiên palơq Ađó. 47Xók achêk, mưi chanak achêk móón palơq Ađó: “Lêi tôôh, amêêq thêi lơq nôôq adhi ưng thêi ơi dyương hót nguôi, tabâân kơi buôn praaq chiên palơq thêi.” 48Bơơi xók ââi paraaq, Ađó praaq palơq manưih đu móón palơq ađêi: “Ngaai nek amêêq aku lơq ngaai nek nôôq adhi ưng aku?” 49Hayơq xong xók charó têi ađêi malóóm leq nôôq môôn-đô ưng ađêi, Ađó praaq: “Lêi tôôh, amêêq aku lơq nôôq adhi ưng aku ađô! 50Ơi hơq ngaai đu ting têêng karnóq kaniêng ưng Ama aku dhiq pleng, manưih ađek nek adhi padruuih, adhi pađiil lơq amêêq ưng aku.”