Maak 9:23

1Ađó praaq palơq piđó: “Lalua, thêi praaq palơq adhi anó kơi ve masôôq manưih xók dyương dhiq ađôk nek nôôq manưih dhơ dhakơi yươq glêh xâng akan chêt laloom xók piđó móng lêi katiêk ưng Yaang Pleng tơk palơq mataai raman.” 2Chapat tangêi tatun, Chuôq Jê-su đââng Phi-e-rơ, Ja-kơ lơq Jang hayơq đââng panlei chapiên piđó vôôiq đơk leq mưi pabhung bôôl yaal, lơq Ađó bâân paxar achak toom mat piđó. 3Aau Ađó vil xar brương braang bhlơng, bhóók chadhah, tơk mơ kah ngaai manưih thơơq kathel dhiq hóng katiêk ve đuôh têêng đóng bhóók chóóm kơi achêk. 4Ê-li palơq Môôi-se bâân piđó ve lêi, lơq bơơr nhiđó achêk xók praaq chiên palơq Chuôq Jê-su. 5Xók lóng paraaq, Phi-e-rơ móón palơq Chuôq Jê-su: “Ra-bi, lalua nek liêm đóng nôôq he tơơt dhiq ađôk, nôôq yi ve chóóm kadhơng pe beq pơơq, mưi đóng thêi, mưi đóng Môôi-se lơq mưi đóng Ê-li.” 6(Ơi ađó kah n'nal ađó chóóm lóng bóóp praaq harau, taai piđó maar kakhin kapơn.) 7Hayơq mưi garboq dhaluk bhral tơk dhuum piđó, lơq dhariêng praaq gluh tââq garboq dhaluk: “Ađô nek Akóón nh'nhơr bhlơng ưng Aku. Phaai xâng paraaq Akóón ađek.” 8N'drươh, xók lêi praang, piđó kah dyơq lêi mak ngaai lââng tơơt palơq ađêi, chapiên mưi Chuôq Jê-su.

9Xók piđó vôôiq tââq piing bôôl dhuônh, Ađó pató piđó kơi piđó óóq truuih lóóiq palơq ngaai leq nôôq rau piđó ơi lêi, la kah ơi tơk bhêêl Akóón Manưih tââq akan chêt mamông lóóiq. 10Piđó jư lââp paraaq ađek kalóóng m'pơng piđó, tapraaq xóng piđó lêi “tââq akan chêt mamông lóóiq” nek n'đó kơi. 11Piđó tamóh palơq Chuôq, móón kơi ađô: “Hau nôôq thêi pachóóm gani praaq nek Ê-li phaai tơk loom?” 12Hayơq Ađó praaq palơq piđó: “Ê-li pâng nek tơk loom buôn hayuur lóóiq dyóp tarnêêng. Kơi achêk nek paraaq bâân xaraq leq Akóón Manưih kơi Ađó phaai đơơp bơk rau janah lơq bâân takađiq nek ng'kơi? 13Dhơ kơi ađek, thêi praaq palơq adhi anó kơi Ê-li ơi tơk lalua aq, lơq palââng ơi têêng n'nal đơq rau piđó kiêng palơq ađó, i-kơi paraaq ơi bâân xaraq leq ađó.”

14Xók tơk dham nôôq môôn-đô đu dyơq, piđó lêi mưi tanóói dhanuôr lóng bơk praang xirvir piđó lơq nôôq thêi pachóóm gani xók tarkaai palơq nôôq môôn-đô achêk. 15N'drươh, xók ơi lêi Ađó, luch tanóói dhanuôr hêq lêi, lơq xong xók mut tơk palơq Ađó, piđó chap yayar Ađó. 16Ađó tamóh nôôq môôn-đô: “Adhi anó xók tarkaai palơq piđó leq tarnêêng hau?” 17Mưi nak kalóóng manưih ganơr ââi Ađó: “Thêi ơơi, aku đââng tơk đóng thêi chanak akóón padruuih ưng aku, bâân mưi yaang a-ơp mót bóq. 18Hơq n'đó dhiq ađó ve chóóm têêng kala akóón aku, nek ađó dhalươq akóón paniên leq katiêk, hayơq akóón paniên tapô havi tââq bóóp, kakreet kaniêng, lơq próng likrô, aku ơi nhan nôôq môôn-đô thêi buôn piđó viêng pagluh abhưi, hơq piđó kah dyóp karơ.” 19Xók achêk, xók ââi lóóiq piđó, Ađó praaq: “Dhong nooi kah huuiq tôôh, aku e tơơt palơq nôôq pe đóng tơk n'đó mơ? Aku e đơơp jruôn nôôq pe đóng tơk n'đó mơ? Phaai đââng akóón paniên tơk đóng aku.” 20Piđó đââng akóón paniên tơk đóng Ađó, lơq xók lêi Ađó, yaang môôp n'drươh têêng paniên yuur tatrươih vaveq, hayơq xók kalơm leq katiêk, paniên pơl-naal, tapô havi bóóp. 21Chuôq tamóh ama ưng paniên: “Ơi n'đơq chu tââq xók chiên ađô yuur vaaih palơq ađó?” Akonh ââi: “Tââq xók dyơq paniên. 22Abhưi bhiêk đóók dhalươq ađó, xók nek leq óih, xók nek leq đơơk, buôn leng chêt ađó, bơơi la thêi ve đuôh rau chóóm têêng, taai lóóm kayô nôôq yi, nhan thêi jóói nôôq yi.” 23Xók achêk, Chuôq Jê-su praaq palơq ađó: “‘La Thêi ve chóóm’ hơ? Dyóp tarnêêng nek ve chóóm nek palơq manưih huuiq.” 24N'drươh, xong xók yuur lalơu, akonh ưng akóón paniên ââi: “Aku huuiq! Nhan thêi paq jóói talum kah huuiq ưng aku!” 25Hayơq xók lêi manưih ganơr xók mut tơk dham piđó, Chuôq Jê-su trêh yaang môôp, kayua đóng ađó: “Abhưi a-ơp lơq tung tôôh, aku kayua đóng amei phaai gluh tââq akóón paniên lơq kah ve mơ chóóm bóq leq ađó dyơq.” 26Xong xók lalơu karơ lơq têêng đóng akóón paniên tatrươih karơ bhlơng, ađó gluh xooq lơq akóón paniên val xar thê kơi manưih chêt, tơk mơ bơk ngaai móón kơi ađô: “Akóón paniên chêt aq.” 27Bơơi xók pei kadhâng têi paniên, Chuôq Jê-su hayuur paniên yuur, lơq akóón paniên yuur dyương. 28Xong xók Ađó ơi vôôiq mót leq đong hayơq, nôôq môôn-đô Ađó tamóh panlei Ađó kơi ađô: “Hau nôôq yi kah đuôh viêng pagluh chóóm abhưi achêk?” 29Ađó ââi palơq piđó: “Rau abhưi ađô, kah ngaai ve chóóm viêng pagluh đuôh la kah tââq rau nhan gavơh lơq rau điêng cha.”

30Lơq tââq dhiq ađek xooq vôôiq, piđó pagan leq parah Ga-li-lê, hơq Ađó kah kiêng buôn ngaai n'nal, 31ơi Ađó xók pachóóm nôôq môôn-đô ađêi, lơq praaq palơq piđó kơi ađô: “Akóón Manưih ravang bâân pajaau leq têi palââng, piđó e leng chêt Ađó. Xók ơi bâân leng, Ađó e mamông lóóiq tatun pe tangêi.” 32Bơơi piđó kah n'nal paraaq ađô, lơq kakhin phaai tamóh Ađó.

33Piđó vôôiq tơk kanóón Ka-bê-na-um, lơq xók ơi mót kalóóng đong, Ađó tamóh piđó: “Adhi anó biêh tapraaq hau chiên dhiq kalơng vôôiq?” 34Bơơi piđó parngau, taai piđó ơi tarkaai xóng piđó dhiq kalơng vôôiq lêi ngaai nek gamak tââm. 35Lơq xong xók tơơt, Ađó dhaloong majêt bơơr sưưq-đô karong lóóiq lơq praaq palơq piđó: “La ngaai kiêng têêng akoq, manưih ađek phaai nek manưih xariêq kalóóng paluch lơq nek dhơn ratơơq đóng dyóp ngaai.” 36Pei hayôk mưi akóón paniên, Ađó lơơi akóón paniên tơơt nham m'pơng piđó, hayơq xong xók hayôk akóón paniên dhiq têi, Ađó praaq palơq piđó: 37“Manưih đu vơn achak thêi yaauq mưi kalóóng nôôq akóón paniên kơi ađô nek manưih achêk yaauq thêi, lơq la ngaai yaauq thêi nek manưih achêk eh chapiên yaauq thêi, hơq dyơq yaauq Yaang kayua thêi.” 38Jang praaq palơq Ađó: “Thêi ơơi, nôôq yi ơi lêi mưi manưih tôôh vơn dhanóók thêi viêng abhưi lơq nôôq yi ơi kajơq manưih achêk lóóiq, ơi manưih achêk kah ting nôôq he.” 39Bơơi Chuôq Jê-su ââi: “Óóq kajơq manưih achêk, ơi kah ve ngaai nek manưih vơn dhanóók thêi têêng mataai chrih hayơq ve chóóm dhalam tatun ađek tóh-đua thêi. 40Ơi ngaai eh rau nek jơl palơq nôôq he chênh nek makơi lóóm palơq nôôq he. 41Ơi manưih đu vơn dhanóók thêi đóng adhi anó mưi choom đơơk taai adhi anó mađó leq Chuôq Paq Manưih, lalua thêi praaq palơq adhi anó kơi manưih ađek dhakơi yươq bil kaliim haanh ađêi. 42Hayơq manưih đu têêng lơt matu đóng mưi kalóóng nôôq akóón paniên ađô nek nôôq manưih đu huuiq leq thêi, nek nh'jang palơq manưih achêk, rau liêm lơh nek ađó bâân choq mưi tapal dhơl gamak praang tuôr ađó, hayơq bâân m'peq leq taxiiq. 43La tapaang têi adhi anó ve chóóm têêng đóng adhi anó lơt matu, phaai kut ađó m'peq. Rau liêm lơh đóng adhi anó nek palơq bhrê khuch hơq mót leq đu parmông, dyơq lơh nek ve bơơr tapaang têi hơq phaai vôôiq mót leq bóng óih, kalóóng óih kah ve pat 44(dhiq bharui bharan piđó ađek kah chêt, lơq óih kah mơ chóóm tapat). 45La tapaang dyung adhi anó ve chóóm têêng đóng adhi anó lơt matu, phaai kut ađó aq. Rau liêm lơh đóng adhi anó nek palơq dyung khuch hơq mót kalóóng leq parmông, dyơq lơh nek ve bơơr dyung hơq bâân m'peq leq bóng óih 46(dhiq bharui bharan piđó ađek kah chêt, lơq óih kah mơ chóóm tapat). 47La mat adhi anó ve chóóm têêng đóng adhi anó lơt matu, phaai bhalok ađó gluh. Rau liêm lơh đóng adhi anó nek palơq mưi mat hơq mót kalóóng katiêk ưng Yaang Pleng, dyơq lơh nek ve bơơr mat hơq bâân m'peq leq bóng óih, 48dhiq bharui bharan piđó ađek kah chêt lơq óih kah mơ chóóm tapat. 49Ơi dyóp ngaai e bâân tamuôiq palơq óih. 50Abhóh nek liêm kre, bơơi la abhóh val xar bil kariêq, adhi anó e marói leq ađó palơq harau jarma jarmat? Adhi anó phaai ve abhóh kalóóng ađêi, lơq mamông liêm kre palơq xóng ađêi.”