Katu Bible Literal Text
Maak 11:24
Verse 24 is marked below, with the whole chapter around it. Read from the start
Xók piđó vôôiq đan tơk Jê-ru-sa-leem, tơk Bê-pha-jê lơq Bê-tha-ni, malóóm leq bôôl Ô-liiu, Ađó kayua bơơr môôn-đô ưng ađêi vôôiq, lơq praaq palơq nhiđó: “Phaai vôôiq mót leq bhươl toom mat adhi anó, dhalam xók mót tơk ađek, adhi anó e lêi mưi axeh akóón bâân tachoq, kah glêh ve ngaai dhââng dhiq ađó. Phaai lêh tarlêi choq đóng ađó lơq đââng ađó chô leq ađô. La ngaai ađek tamóh adhi anó: ‘Hau anhưa têêng kơi ađek?’ nek phaai ââi kơi ađô: ‘Chuôq ve kiêng đươi ađó lơq Chuôq e pachô taval ađó lóóiq.’” Nhiđó yuur vôôiq lơq lêi mưi axeh akóón bâân tachoq dhalam palóng nguôi hót kalơng, hayơq nhiđó lêh tarlêi đóng ađó. Masôôq manưih dyương dhiq ađek móón palơq nhiđó: “Bơơr anhưa hau têêng hơq lêh tarlêi choq axeh akóón ađek?” Nhiđó ââi lóóiq nôôq manưih ađek kơi Chuôq Jê-su ơi pató, lơq nôôq manưih ađek lơơi đóng nhiđó vôôiq. Nhiđó đââng axeh akóón chô đóng Chuôq Jê-su hayơq bhalêêp aau chaguôk ađêi dhiq axeh, lơq Chuôq tơơt leq ađek. Bơk manưih yuur bhalêêp aau piđó dhiq kalơng, hayơq palơq nôôq lââng, nek bhalêêp nôôq đóóng n'lóóng ơi têch tââq klung. Tabhơt nôôq manưih vôôiq laloom palơq nôôq manưih ting tapun driêu karơ:
“Hô-sa-na! Đaang bhi haanh Yaang vơn dhanóók Chuôq jaq bhral.
Phươk đóng katiêk e tơk ưng abhươp avuôq Đa-viit nôôq he! Hô-sa-na kalóóng dhiq bhơt yaal!”
Ađó ơi vôôiq mót kanóón Jê-ru-sa-leem, mót kalóóng đong bhanuôih, lơq xók ơi lêi praang xirvir dyóp rau, taai xók achêk kung gling kanam hayơq, Ađó yuur vôôiq tơk Bê-tha-ni palơq majêt bơơr sưưq-đô. Tangêi rayiiu, xók piđó ơi yuur vôôiq tââq Bê-tha-ni, nek Ađó ha-ul. Xók chalaang lêi mưi tââm tarung ve bơk axơq tââq changaai, Ađó tơk, kah machưng Ađó e bâân lêi ve n'đó pale dhiq n'lóóng nh'jau. Hơq xók ơi tơk dham n'lóóng achêk, Ađó kah lêi ve rau chapiên axơq, ơi eh rau nek nil tarung. Lơơi lóóiq chiên ađô, Ađó praaq palơq n'lóóng ađek: “E kah ve mơ dyơq ngaai cha pale tââq dham ưng amei dyơq.” Nôôq môôn-đô Ađó xâng paraaq ađek.
Xók vôôiq tơk Jê-ru-sa-leem, lơq mót kalóóng đong bhanuôih, Ađó tââp tanââp viêng manưih baan manưih kơl kalóóng đong bhanuôih gluh leq nguôi, Ađó talâh n'toh baang ưng nôôq manưih raxal jêên lơq tanơơt ưng nôôq manưih baan paraap. Ađó kah đóng pheep dhơ dhangaai đââng đô-đaak vôôiq val dhiq đong bhanuôih. Hayơq Ađó pachóóm piđó lơq praaq: “Eh alua ve paraaq xaraq kơi ađô:
‘Đong aku e bâân đóók nek đong nhan gavơh đóng dyóp dhanuôr’ hơ?
Bơơi nôôq pe ơi paxar ađó xar bóng gơơp ưng kabhuh tatông.”
Nôôq takóh kadhâng bhanuôih lơq thêi pachóóm gani xâng kơi achêk, nek piđó tabâân kơi piđó ve chóóm leng Ađó, taai piđó kakhin Ađó, ơi luch tanóói dhanuôr maar chrih xâng leq rau pachóóm ưng Ađó. Tơk xók habu blót, piđó xooq tââq kanóón.
Leq vaar yayóng, xók vôôiq lalơh, piđó lêi n'lóóng tarung ơi rang xeu tââq tââm riêh. Xong xók hei lóóiq, Phi-e-rơ móón palơq Ađó: “Ra-bi, lêi tôôh! N'lóóng tarung hơq thêi tóh ơi rang xeu aq.” Xók ââi lóóiq, Chuôq Jê-su praaq palơq piđó: “Phaai ve lóóm huuiq dhiq Yaang Pleng. Alua, thêi praaq palơq adhi anó, kơi ngaai manưih praaq palơq bôôl ađô: ‘Phaai tandrôôq lơq choh leq taxiiq,’ hơq yươq paang-ra kalóóng lóóm ađêi, bơơi huuiq kơi rau ađêi praaq ravang vaaih, nek tarnêêng e vaaih đóng manưih ađek. Taai kơi achêk, thêi praaq palơq adhi anó, tabhơt dyóp rau adhi anó gavơh nhan lơq mââl nhan, phaai huuiq kơi adhi anó ơi bâân đơơp, nek rau ađek e vaaih đóng adhi anó. Xók adhi anó dyương gavơh nhan, la adhi anó ve chiên tajơl palơq ngaai ađek, nek phaai lơơi lơt, buôn Ama ưng adhi anó nek Yaang tơơt dhiq pleng kung lơơi lơt adhi anó leq nôôq têêng lơt ưng adhi anó.” (Bơơi la adhi anó kah lơơi lơt, nek Ama ưng adhi anó nek Yaang tơơt dhiq pleng kung e kah lơơi lơt nôôq têêng lơt ưng adhi anó)
Hayơq piđó vil vôôiq tơk Jê-ru-sa-leem lơq xók Ađó xók vôôiq kalóóng đong bhanuôih, nôôq takóh kala kadhâng bhanuôih, nôôq thêi pachóóm gani, lơq nôôq takóh bhươl tơk palơq Ađó. Piđó praaq palơq Ađó: “N'đó tââq mataai karơ hơq amei têêng nôôq tarnêêng achêk lơq ngaai ơi pajaau đóng amei mataai karơ ađô buôn amei ve chóóm têêng nôôq rau ađek?” Bơơi Chuôq Jê-su praaq palơq piđó: “Aku kung e tamóh nôôq pe mưi xayar, lơq phaai ââi aku, hayơq aku e móón đóng nôôq pe n'đó tââq mataai karơ hơq aku têêng nôôq tarnêêng ađek. Pheep bap-teem ưng Jang nek tââq pleng môôiq tââq akóón manưih? Phaai ââi aku.” Piđó tapraaq palơq xóng piđó kơi ađô: “Nôôq he móón ng'kơi? La nôôq he móón: ‘Tââq pleng’ manưih ađô e praaq: ‘kơi achêk nek, ơi taai hau hơq nôôq pe kah huuiq Jang?’ Palâh lóóiq, la nôôq he móón: ‘Tââq akóón manưih’, …?” (Nôôq piđó kakhin manưih dhanuôr, ơi dyóp ngaai kung lêi kơi Jang lalua nek mưi manưih đââng paraaq Yaang Pleng.) Hayơq xók ââi Chuôq Jê-su, piđó ââi: “Nôôq yi kah n'nal.” Chuôq Jê-su praaq palơq piđó: “Aku kung kah móón palơq nôôq pe n'đó tââq mataai karơ hơq aku têêng nôôq tarnêêng achêk.”
Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.