Lu-ka 5

1Tarnêêng vaaih xók tanóói dhanuôr kaxiêq xirvir Ađó đóng tameng xâng paraaq Yaang Pleng, lơq Ađó xók dyương hót tóór atông Gê-nê-xa-rêêt, 2Ađó lêi bơơr beq bhuông xók tachauq dhiq jrơm hót tóór atông, dyơq nôôq manưih bâân kadhóóng, xók achêk ơi dhaluônh tââq bhuông, piđó xók pươh laaiq. 3Ađó dyók mưi kalóóng bơơr m'beq bhuông, hơq bhuông ađek nek ưng Si-môôn, Ađó kayua Si-môôn chông leq changaai tââq tóór m'bưưiq. Xong xók tơơt parngau, Ađó truuih pachóóm đóng tanóói dhanuôr tââq dhiq bhuông. 4Xók Ađó pachóóm xong, Ađó praaq palơq Si-môôn: “Nek đââng bhuông leq đơơk dhơuq hayơq pachaang laaiq ưng amei chok leq đóng kóóp bing kadhóóng.” 5Xók ââi bóóp, Si-môôn praaq: “Thêi ơơi, dhơ ơi matêêng bhluuch tóóng hayum, nôôq yi ơi kah rau bâân panong panâ, bơơi ganơơm ting paraaq thêi, aku e pachaang laaiq.” 6Xong xók têêng tarnêêng ađek, piđó bâân kóóp bơk kadhóóng bhlơng, dyơq laaiq ưng piđó nek kiêng taheek. 7Piđó kavah đóng nôôq parjơơk đu tabâân kadhóóng tơơt dhiq bhuông lââng tơk proong ađêi, nôôq manưih ađek tơk lơq ting garuiq padyók kadhóóng bing bơơr m'beq bhuông tơk mơ bhuông kanóq klêch. 8Dhơ kơi ađek, xók lêi kơi achêk, Si-môôn Phi-e-rơ kóp achak chok leq dhiq takól Chuôq Jê-su, móón: “Kakoh Chuôq, nhan xooq tââq aku, ơi aku nek manưih matu lơt.” 9Ơi rau kakhin kapơn dhuum ađó lơq tabhơt nôôq manưih tơơt palơq ađó ơi taai malaaiq kadhóóng đu piđó ơi bâân kóóp, 10Kung makơi kơi ađek palơq Ja-kơ lơq Jang, nek nôôq akóón padruuih ưng Xê-bê-đê, piđó nek nôôq parjơơk ting tabâân kadhóóng ưng Si-môôn. Chuôq Jê-su praaq palơq Si-môôn: “Óóq rau kakhin! Tââq ađôk leq tabhêêl amei e nek têi lalaaiq manưih.” 11Xong xók đââng bhuông leq tóór, lơq m'peq lơơi dyóp rau, piđó vôôiq ting Ađó.

12Tarnêêng val vaaih bhêêl Ađó xók tơơt dhiq mưi kanóón tôôh, lơq lêi tôôh, mưi nak achak bing ka-ai tơơt bhơơi. Xók lêi Chuôq Jê-su, ađó kóp mat leq katiêk nhan gavơh Chuôq, kơi ađô: “Kakoh Chuôq, la Amei kiêng, Amei ve chóóm têêng đóng aku bâân sek.” 13Chuôq jarơ têi kadhâng leq ađó, praaq: “Aku kiêng, nek sek aq.” N'drươh, ka-ai tơơt bhơơi yươh bil tââq ađó ađek. 14Hayơq Chuôq praaq pató ađó óóq móón palơq ngaai, palâh lóóiq: “Phaai vôôiq pakah ađêi kala leq takóh kadhâng bhanuôih lơq tapôông bhanuôih leq tarnêêng bâân sek ưng amei ting kơi Môôi-se truuih pachóóm, đóng truuih đuui leq piđó.” 15Dhơ kơi ađek, tanđôôr leq Ađó nek dyơq đââr lơh dyơq, kơi achêk nek tanóói dhanuôr manưih bơk taruiq tơk xâng Ađó truuih pachóóm lơq bâân yươh tââq nôôq ka-ai dreh ưng ađêi. 16Bơơi Ađó buôn klôôn leq đu ranguôq rabaang lơq nhan gavơh.

17Tarnêêng val vaaih xók mưi tangêi tôôh, xók bhêêl Ađó dyơq truuih pachóóm, nek ve nôôq manưih Pha-ri-si lơq manưih pachóóm gani tơơt dhiq ađek, nek nôôq manưih ơi bhral tââq dyóp nôôq bhươl kanóón dhiq kalóóng xưưq Ga-li-lê lơq Ju-đê, kung kơi tââq kanóón Jê-ru-sa-leem, lơq mataai raman ưng Chuôq tơơt dhiq Ađó payươh ka-ai dreh. 18Lêi tôôh, masôôq manưih glâk mưi manưih padruuih bêch dhiq chong, ađek nek manưih bâân rabóót dyung têi, piđó xók tabâân đââng ađó achêk leq hót kalóóng đóng patơơt toom mat Ađó. 19Xók kah n'nal kơi ve chóóm đââng ađó achêk mót taai ganơr manưih, nek dyók leq pabhung đong, ting tââq jarpơơq ngooiq, piđó ơi xua ađó ađek bêch dhiq chong chok leq m'pơng dyóp ngaai, toom mat Chuôq Jê-su. 20Xók lêi lóóm huuiq ưng piđó, Ađó móón: “Akóón ơơi, matu lơt amei ơi bâân lơơi.” 21Nôôq takóh pachóóm gani lơq manưih Pha-ri-si tââp vaaih tarkaai, kơi ađô: “Ađó ađô nek ngaai hayơq praaq paraaq chôlô kơi ađek? Ngaai ve mataai lơơi matu chapiên mơ mưi ađó Yaang Pleng?” 22Bơơi Chuôq Jê-su n'nal karnóq ưng piđó, hayơq đóng ââi lóóiq, Ađó móón palơq piđó: “Hau nôôq pe chóóm kanóq kalóóng lóóm ađêi kơi achêk? 23N'đó paraaq nek khe praaq lơh: ‘Matu lơt amei ơi bâân lơơi’ môôiq praaq: ‘Phaai yuur dyương lơq bhadyaang vôôiq?’ 24Bơơi đóng nôôq pe n'nal nek Akóón Manưih dhiq hóng katiêk ve mataai chóóm lơơi matu,” — Ađó praaq palơq manưih rabóót dyung têi — “Aku kayua amei, nek yuur dyương, dhoon chong amei lơq chô leq đong ưng amei.” 25N'drươh ađek, ađó ađek yuur dyương toom mat piđó, xong xók dhoon chong đu ađó biêh bêch dhiq ađek, nek ađó vôôiq chô leq đong ađêi, têêng cha-iil tabah đóng Yaang Pleng. 26Rau chrih lêi dhuum dyóp ngaai, lơq piđó bhi haanh Yaang Pleng, lóóm bing kakhin kapơn, praaq kơi ađô: “Tangêi mađôk nôôq he ơi lêi nôôq tarnêêng đu chrih.”

27Tatun nôôq tarnêêng achêk, Ađó xooq tââq ađek lơq lêi li mrang mưi nak pagoop jêên achak Lê-vi xók tơơt dhiq đong pagoop jêên, hayơq Ađó móón palơq akonh ađek: “Hêq ting aku!” 28Kơi achêk nek xong xók yuur dyương, m'peq lơơi dyóp rau, akonh ađek vôôiq ting Ađó.

29Lê-vi dhoon mưi vaar cha gamak đóng leq Ađó dhiq đong ađêi, lơq ve mưi kabhuh bơk manưih pagoop jêên lơq nôôq manưih lââng xók tơơt dhiq baang chacha palơq piđó. 30Dyơq nôôq manưih Pha-ri-si lơq takóh pachóóm gani ưng piđó m'bhoonh palơq nôôq môôn-đô ưng Chuôq, kơi ađô: “Ơi taai ng'kơi hơq nôôq pe vil cha ơm madhiq palơq kabhuh đu pagoop jêên lơq nôôq manưih matu lơt?” 31Đóng ââi bóóp, Chuôq Jê-su praaq palơq piđó: “Manưih khe karơ kah ve đươi leq manưih payươh, bơơi manưih ka-ai nek đươi. 32Aku kah tơk đóng dhaloong manưih bhơt liêm, bơơi nek manưih ve matu tơk leq rau klôôq lóóm.”

33Bơơi hayơq, piđó ađek móón palơq Ađó: “Nôôq môôn-đô ưng Jang buôn điêng cha lơq tapôông nôôq paraaq nhan gavơh, môôn-đô ưng manưih Pha-ri-si kung kơi achêk. Bơơi manưih ưng nôôq pe bhiêk cha palơq ơm.” 34Ađó ââi palơq piđó ađek: “Nôôq pe tââq ve chóóm kayua tamóói tơơt cha đaam bhiêk điêng cha xók bhêêl chaxaau dyơq tơơt palơq piđó, pâng kah? 35Bơơi lalua e tơk tangêi xók hơq chaxaau bâân đââng vôôiq lơh tââq piđó. Xók ađek, leq nôôq tangêi achêk, piđó e điêng cha.” 36Hayơq Ađó kung truuih đóng piđó mưi babi kơi ađô: “Kah ngaai bươl leq aau ti paleh bhaai n'teek tââq aau tame. Bơơi la têêng kơi achêk, nek e têêng tanteek aau tame, lơq paleh bhaai đu pei tââq aau tame e kung kah liêm palơq aau ti. 37Kung kah ngaai kađôôq buôh tame kalóóng aluui ng'kar ti. Bơơi la têêng kơi ađek, nek buôh tame e têêng bhriq aluui ng'kar, buôh e hóói leq nguôi, aluui e kung bâân hư. 38Palâh lóóiq, phaai kađôôq buôh tame kalóóng aluui ng'kar tame. 39Xong xók ơm buôh ti, kah ngaai kiêng buôh tame, ơi manưih achêk móón kơi ađô: ‘Buôh ti nek iêm lơh.’”