Lu-ka 16

1Ađó kung móón palơq nôôq môôn-đô: “Ve mưi nak kavaan tôôh nek manưih ve mưi nak jư lêi lơq ađó ađek bâân takaauq leq kala taai pahư jêên baak ưng kala. 2Xók ơi dhaloong ađó ađek tơk, kala tamóh ađó ađek: ‘Chiên aku xâng leq amei nek ng'kơi dhơq? Phaai đóng paraaq pakah leq tarnêêng jư lêi ưng amei, ơi amei kah ve chóóm têêng jư lêi dyơq.’ 3Kơi ađek hayơq manưih jư lêi tư tapraaq palơq ađêi kala: ‘Aku phaai têêng hau rau ađôk, taai kala aku xók ađôk tabil luch tarnêêng jư lêi tââq aku? Pók katiêk nek aku kah ve praan, chêk nhanhan nek kachiit mat bhlơng. 4Aku n'nal rau aku phaai têêng đóng xók bâân tađuôi tââq tarnêêng jư lêi ađôk, palââng e yaauq aku mót leq đong ưng piđó.’ 5Hayơq xong xók kayua dhaloong ting chanak mưi kalóóng nôôq manưih manơơq ưng kala ađêi, ađó ađek praaq palơq manưih đu laloom: ‘Amei manơơq kala aku n'đơq?’ 6Manưih achêk ââi: ‘Mưi hariêng thung dhơu ô-liiu.’ Kơi ađek nek ađó ađek móón palơq manưih achêk: ‘Pei kadhâng bha-aar manơơq ưng amei, tơơt chok leq, pađâh xaraq xââng jêt!’ 7Xong ađek, ađó ađek móón mưi nak lââng: ‘Dyơq amei manơơq mơ?’ Ađó ađô ââi: ‘Mưi hariêng baao aviq mi.’ Ađó ađek móón manưih achêk: ‘Kadhâng bha-aar manơơq ưng amei, lơq xaraq takóól jêt.’ 8Manưih kala haanh manưih đu jư lêi kah liêm achêk, ơi taai ađó ađek ơi têêng tabech bhriêl bhlơng. Taai akóón anaaq ưng đơơi ađôk tabech bhriêl lơh machơng palơq akóón anaaq ưng brương kalóóng klaang đơơi ưng piđó. 9Dyơq thêi móón palơq adhi anó, phaai têêng parjơơk đóng ađêi palơq jêên karvaan kah liêm, đóng xók karvaan achêk bhơt aq, piđó ve chóóm yaauq adhi anó mót leq đong nh'chró. 10Ngaai đu bhơt lóóm kalóóng tarnêêng katưưiq bhlơng nek kung bhơt lóóm kalóóng tarnêêng gamak lơq ngaai kah liêm kalóóng tarnêêng katưưiq bhlơng nek kung kah liêm kalóóng tarnêêng gamak. 11Taai kơi ađek, la adhi anó kah xar vaaih ađaang huuiq kalóóng karvaan kah liêm, ngaai e pajaau đóng adhi anó karvaan lalua? 12Lơq la adhi anó kah xar vaaih ađaang huuiq kalóóng nôôq rau ưng manưih lââng, ngaai e pajaau đóng adhi anó nôôq rau chô leq chênh adhi anó? 13Kah n'đó dhơn ratơơq ve chóóm têêng yaauq bơơr kala, ơi dhơn ratơơq achêk e geet manưih ađô hơq nh'nhơr manưih tôôh, môôiq ađó e bhơt lóóm palơq manưih ađô hơq kađiq manưih tôôh. Adhi anó kah chóóm têêng yaauq Yaang Pleng lơq jêên baak karvaan kabhôôq chóóm.”

14Bhêêl ađek, nôôq manưih Pha-ri-si, nek nôôq manưih nh'nhơr jêên baak, xâng luch nôôq paraaq achêk, lơq piđó kachang jóóch Ađó. 15Ađó móón palơq piđó: “Nôôq pe nek manưih tư đóók ađêi bhơt liêm toom mat palââng, bơơi Yaang Pleng n'nal lóóm nôôq pe. Taai rau bhi chap m'pơng akóón manưih hayơq nek rau xrơơm toom mat Yaang Pleng. 16Gani lơq nôôq paraaq đââng taruuih nek patơk đơơi ưng Jang. Tââq ađek leq tôôh, katiêk Yaang Pleng bâân truuih đuui, lơq dyóp manưih tabhlơng bhadyaang vôôiq mót leq ađek. 17Bơơi alua nek dhê lơh đóng pleng lơq katiêk val xar bil, dyơq lơh nek mưi kaliêng chư kalóóng gani val xar kah machak maraang.

18Tabhơt ngaai đu talơơi kađiêl ađêi lơq nhan kađiêl lââng nek matu têêng tapiing, ngaai nhan manưih pađiil ơi bâân tarlơơi palơq kayiik nek kung matu têêng tapiing.

19Ve mưi nak karvaan tôôh xơp n'đóh kun aau bhrôông pabhrơuq lơq kun aau palơq bhaai ramaanh liêm, dyóp tangêi, ơm cha bhuui kachang sương si. 20Dyơq mưi nak ngeeo achêk achak La-xa-rơ, achak araang bing bhih m'peh, bâân đââng patơơt dhiq palóng kariing đong manưih karvaan, 21lơq rââm ve bâân cha tââq nôôq rau dhơơm ruuh tââq baang manưih karvaan. Dhơ kơi ađek, chapiên ve kabhuh anuq tơk liêh m'peh ưng ađó. 22Hayơq tarnêêng vaaih ađek nek manưih ngeeo chêt, lơq ađó bâân dhơn pleng đââng tơk lóóm Ap-ra-haam. Tatun ađek, manưih karvaan kung chêt lơq ađó ađek bâân đââng vôôiq tơp. 23Dhiq maraaih, xók tơơt dhiq kalóóng ka-ai karuôq, xók chaling mat ađêi, ađó ađek lêi Ap-ra-haam tââq changaai, palơq La-xa-rơ kalóóng lóóm ưng ađó. 24Yuur karơ dhariêng lalơu, ađó ađek móón: ‘Abhươp avuôq Ap-ra-haam ơơi, nhan kayô ka-er akóón lơq nhan nek kayua La-xa-rơ đóng ađó ađek tuq chabô kabró têi ađêi leq đơơk lơq têêng đóng rangóói n'taak akóón, ơi akóón kuôq jarnah kalóóng óih ađô.’ 25Bơơi Ap-ra-haam ââi: ‘Akóón ơơi, nek hei lóóiq kơi xók dyơq mamông ưng akóón, akóón ơi bâân đơơp phơn đu liêm ưng ađêi, lơq makơi kơi ađek, La-xa-rơ nek đơơp phơn jarnah. Bơơi xók ađôk ađó ađek bâân tabhơơl dhiq ađô, dyơq akóón phaai đơơp xâng ka-ai karuôq. 26Lơq palơq tabhơt nôôq rau achêk, dhiq m'pơng nôôq yi lơq akóón ơi bâân tablah mưi harlaang dhơuq gamak bhlơng, đóng hơq ngaai đu kiêng vôôiq tââq ađôk tơk leq akóón nek kah chóóm, kung kah chóóm tââq ađek vôôiq tơk leq dham nôôq yi chóóm.’ 27Kơi ađek nek manưih karvaan móón: ‘Abhươp avuôq ơơi, nek kơi achêk akóón nhan gavơh amei kơi amei ve chóóm kayua ađó ađek vôôiq leq đong ama ưng akóón — 28ơi akóón ve xââng adhi anó — đóng ađó ađek trêh piđó, đóng kơi piđó kung óóq bâân ting dhaluônh leq dham jarnah ađô.’ 29Bơơi Ap-ra-haam ââi: ‘Piđó ve Môôi-se lơq nôôq manưih đââng taruuih; piđó phaai ting xâng nôôq manưih achêk!’ 30Dhơ kơi achêk, manưih karvaan ââi: ‘Eh rau kơi achêk, abhươp avuôq Ap-ra-haam ơơi, palâh lóóiq, la ve ngaai ađek tââq akan chêt tơk palơq piđó, nek piđó e klôôq lóóm.’ 31Bơơi Ap-ra-haam móón palơq ađó ađek: ‘La piđó kah xâng Môôi-se lơq nôôq manưih đââng taruuih, nek dhơ ve ngaai ađek tââq kan chêt mamông lóóiq, piđó kung e kah huuiq.’”