Skip to content
BibleKenya

Katu Bible Literal Text

Lu-ka 15

Xók achêk, tabhơt nôôq manưih pagoop jêên lơq manưih matu lơt maar pơh leq Ađó đóng xâng Ađó. Lơq hayơq, luch manưih Pha-ri-si lơq nôôq takóh pachóóm gani maar m'bhoonh, móón kơi ađô: “Ađó ađô yaauq nôôq manưih matu lơt, lơq cha madhiq palơq piđó.”

Kơi ađek nek Ađó truuih babi ađô đóng piđó, kơi ađô: “Ngaai đu kalóóng nôôq pe ve mưi hariêng akóón trưưu, lơq xók bâân xraang bil mưi panong kalóóng sôôq ađek, nek kah lơơi lóóiq takiêh jêt takiêh panong tôôh dhiq kruung vơng lơq vôôiq chik chêk panong trưưu xraang đóng tơk xók bâân lêi ađó? Xók ơi bâân lêi, ađó achêk bhuui marhaal đuôl trưưu dhiq chalaang ađêi. Chô tơk đong, ađó achêk dhaloong parjơơk lơq dharing tapóóng ađêi krong lóóiq, móón palơq piđó: ‘Nek ting tabhuui palơq aku, taai aku ơi bâân lêi akóón trưưu đu bil ưng aku.’ Aku móón palơq nôôq pe kung mưi kơi achêk, e ve bhuui marhaal dhiq pleng leq mưi manưih matu klôôq lóóm, lơh nek leq takiêh jêt takiêh manưih bhơt liêm hơq kah ve kơng klôôq lóóm.

Môôiq n'đó manưih pađiil ve majêt đông jêên, la ađó têêng bil mưi đông, nek kah bat dhơu, piih đong lơq tabhlơng chik chêk patơk xók bâân lêi? Xók ơi bâân lêi, ađó đóng kayua nôôq parjơơk lơq dharing tapóóng krong lóóiq, móón kơi ađô: ‘Nek ting tabhuui palơq aku, taai aku ơi bâân lêi jêên baak đu aku têêng bil.’ Kung kơi ađek, aku praaq palơq nôôq pe, ve rau bhuui marhaal dhiq toom mat nôôq dhơn pleng ưng Yaang Pleng leq mưi manưih matu klôôq lóóm.”

Tatun ađek, Ađó truuih: “Mưi nak achêk ve bơơr panong akóón padruuih, đu tadhi móón palơq akonh: ‘Ama ơơi, nhan đóng aku phơn karvaan chô leq aku.’ Lơq ađó blah karvaan ađêi leq nhiđó. Tatun ađek, kah ve đươnh tangêi, xók ơi karong tabhơt dyóp rau, manưih akóón talóch yuur vôôiq leq xưưq changaai, dhiq ađek ađó ađek kơl cha jêên baak ađêi xók mamông kơi rahư. Xók ađó ơi kơl sek dyóp rau, nek mưi garluh ha-ul cha gamak bhlơng yuur vaaih plok xưưq ađek, lơq ađó tââp bâân tabhuch ha-ul. Hayơq ađó vôôiq têêng makông đóng mưi nak dhanuôr xưưq ađek, lơq kala kayua ađó gluh leq klung ưng ađó achêk đóng ban dhââk. Ađó marlóóch kiêng cha tââq n'đoh tơơq, nek rau kabhuh dhââk xók cha, hơq kah ngaai đóng ađó. Bơơi xók kanóq leq ađêi, ađó móón: ‘N'nal mơ manưih têêng makông ưng ama aku ve tarmông xưa raai, bơơi aku ravang chêt króól dhiq ađô! Xong xók yuur dyương, aku e vôôiq chô leq ama ưng aku, lơq aku e móón palơq ama kơi ađô: “Ama ơơi, akóón ơi matu lơt palơq pleng lơq toom mat ama. Akóón kah ađaang chóóm đóók nek akóón ưng ama dyơq. Nhan lêi akóón kơi mưi nak têêng makông ưng ama.”’ Lơq xók ơi yuur dyương, ađó val chô leq ama ađêi. Bơơi xók ađó dyơq dhiq changaai, ama ưng ađó ơi chalaang lêi ađó lơq vaaih lóóm kayô ka-er, hayơq mut pađan, akonh pei kuôr tuôr ađó lơq chum ađó. Xók achêk, manưih akóón móón palơq ama: ‘Ama ơơi, akóón ơi matu lơt palơq pleng lơq toom mat ama. Akóón kah ađaang chóóm đóók nek akóón ưng ama dyơq.’ Bơơi akonh móón palơq nôôq dhơn ratơơq ađêi: ‘Nek pađâh đââng aau chaguôk liêm tââm paxơp đóng ađó, tapóón panóón leq têi ađó, lơq paxruk jêi leq dyung. Nek kóóp karók akóón ramaq, leng paxêêt ađó, lơq nôôq he têêng bhiêk bhuui marhaal. Taai akóón padruuih ađô ưng aku biêh ơi chêt hơq ơi mamông lóóiq, biêh ơi bil hơq ơi bâân chik lêi.’ Hayơq piđó têêng bhiêk bhuui yayar. Bơơi akóón padruuih taha ưng ađó dyơq tơơt dhiq klung, lơq xók chô, ađó chô đan tơk đong, xâng dhariêng tambhreh babóóch chaxuul, tantung yayaq. Dhaloong mưi dhơn ratơơq tơk, ađó tamóh chiên ađô nek hau. Manưih dhơn ratơơq móón palơq ađó kơi ađô: ‘Adhi padruuih amei ơi val chô lơq ama amei kayua leng paxêêt karók akóón ramaq ơi taai abhươp ơi kêch ađó achêk chô leq đong yươq rauha.’ Dhơ kơi ađek, akóón taha pagrâ, ađó kah kiêng mót leq kalóóng, lơq akonh ađó gluh bhơơl pahêêl ađó. Bơơi xók ââi lóóiq, ađó móón palơq ama ađêi: ‘Ama lêi, akóón têêng dhơn đóng ama bhluuch n'nal n'đơq kamó, lơq akóón yươq glêh kađiq praaq xêi ưng ama, hơq ama kah glêh đóng akóón mưi akóón beeq akóón đóng akóón ve chóóm cha đah palơq parjơơk akóón, Bơơi xók tadhươm akóón tôôh ưng ama val chô, nek panong ơi têêng pahư jêên karvaan ưng ama palơq kabhuh pađiil ban achak, nek ama ơi đóng leng paxêêt karók akóón ramaq leq ađó.’ Kơi ađek hayơq akonh móón palơq ađó ađô: ‘Akóón ơơi, akóón taluôn tơơt palơq ama, lơq tabhơt rau dhơơm ưng ama nek ưng akóón. Bơơi lalua kre pâng đóng têêng bhiêk lơq bhuui marhaal, ơi adhi padruuih ưng akóón ađô biêh ơi chêt hơq vil mamông, glêh xraang bil hơq ơi bâân lêi.’”

Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.