Lu-ka 1:37

1Ơi taai bơk manưih ơi tabhlơng xaraq taruuih leq nôôq tarnêêng bâân têêng paxong dhiq kalóóng nôôq he, 2pakơi nôôq manưih tââq xók tââp val xar nôôq manưih đu lêi ting truuih đuui lơq dhơn ratơơq ưng paraaq Chuôq ơi truuih lóóiq leq nôôq he, 3hayơq xók ơi chamet lêi dyóp tarnêêng tââq tââp kơi chagơn, aku lêi alua liêm leq aku đóng xaraq lóóiq matââq tââq leq amei, nhan móón parjơơk Thê-ô-phi-lơ bhi chap, 4hơq đóng amei ve chóóm n'nal leq rau lalua ưng nôôq taruuih đu ađêi ơi bâân pachóóm.

5Xók đơơi Hê-rôôt, bhua xưưq Ju-đê, ve mưi takóh kadhâng bhanuôih tôôh achak Xa-cha-ri, tââq kabhuh A-bi-ja. Kađiêl ađó, tââq dhong nooi nôôq akóón pađiil A-rôôn, lơq achak amooq nek Ê-li-sa-beet. 6Miq bơơr kayiik kađiêl maar bhơt liêm dhiq toom mat Yaang Pleng, ơi mamông yươq dhiq chóóm xuôq kalóóng dyóp paraaq pachóóm palơq nôôq gani ưng Chuôq. 7Nhiđó kah ve akóón taai Ê-li-sa-beet kah pabhaq, lơq miq nhiđó maar ơi yaal tuôi.

8Tarnêêng ơi vaaih tơk gral ưng ađó têêng tarnêêng pabhuôih dhiq toom mat Yaang Pleng ting kơi matââq tââq ưng kabhuh ađêi, 9ting kơi kaxu ưng kabhuh kadhâng bhanuôih, ađó ơi bâân tachââih mót leq hót kalóóng đong bhanuôih ưng Yaang Pleng đóng boh dhaak. 10Tabhơt ganơr manưih dhanuôr tơơt hót nguôi nhan gavơh xók boh dhaak. 11Xók achêk, mưi dhơn pleng ưng Chuôq tabhral palơq ađó, dyương hót atươm baang bhanuôih boh dhaak. 12Xa-cha-ri bâân nhok karnóq xók lêi dhơn pleng, lơq rau kakhin dhuum dhiq m'piing ađó. 13Bơơi dhơn pleng praaq palơq ađó: “Xa-cha-ri, óóq kakhin, taai paraaq nhan gavơh ưng amei ơi bâân xâng, lơq kađiêl amei, Ê-li-sa-beet, e n'niên đóng amei mưi akóón padruuih, lơq amei e đóók achak akóón nek Jang. 14Ađek e nek rau bhuui marhaal, sương si leq amei, lơq bơk ngaai e yayar ơi rau n'niên ưng akóón paniên. 15Ơi ađó e bâân bhi chap dhiq toom mat Yaang Pleng, ađó kah mơ ve ơm buôh môôiq rau đu chóóm têêng taból, lơq ađó e bâân bing bhlaai Chuôq Yaang Liêm patơk mơ tââq kalóóng luônh ưng amêêq ađêi. 16Ađó e têêng đóng bơk akóón anaaq I-sơ-ra-êên val chô leq Chuôq nek Yaang Pleng ưng piđêi. 17Chênh ađó e vôôiq toom mat Chuôq palơq lóóm kanóq lơq mataai raman ưng Ê-li, đóng têêng lóóm ama val chô palơq akóón, lơq manưih kah huuiq tơk leq rau tarbech ưng manưih bhơt liêm — đóng ravang leq Chuôq mưi dhanuôr ơi bâân ravang lơơi.”

18Xa-cha-ri móón palơq dhơn pleng: “Ng'kơi têêng hơq aku e chóóm đơơp rau ađek? Taai aku ơi takóh, lơq kađiêl aku ơi yaal tuôi.” 19Đóng ââi bóóp, dhơn pleng praaq palơq ađó: “Aku nek Gaap-ri-êên, nek aku dyương dhiq toom mat Yaang Pleng, aku ơi bâân kayua tơk móón palơq amei lơq đââng taruuih đu bhuui ađô leq amei. 20Nek chamet xâng ađôk, amei e bâân bơq lơq kah chóóm praaq patơk tangêi nôôq tarnêêng achêk yuur vaaih, ơi taai amei kah huuiq paraaq aku, nek nôôq paraaq e bâân tajaap dhalam leq bhêêl ađek ưng piđó.” 21Dhanuôr maar xók đương Xa-cha-ri, lơq piđó lêi chrih xók ađó tơơt đươnh kalóóng đong bhanuôih. 22Bơơi xók gluh, ađó kah chóóm papraaq palơq piđó, hayơq piđó n'nal kơi ađó ơi lêi rau tapalêi kalóóng đong bhanuôih, dyơq ađó bhiêk paveq têi đóng piđó hơq dyơq bâân bơq. 23Tarnêêng ơi vaaih xók nôôq tangêi têêng tarnêêng yaauq pabhuôih ưng ađó ơi xong, ađó val chô leq đong ađêi.

24Bơơi xong nôôq tangêi achêk, kađiêl ađó, Ê-li-sa-beet, đađââng, lơq ađó palââp ađêi kalóóng xââng kaxe, móón 25kơi ađô: “Chuôq ơi têêng kơi ađôk leq aku, kalóóng nôôq tangêi đu Ađó kayô ka-er aku, đóng ha-ơu tabil đu kachiit ưng aku dhiq m'pơng dyóp ngaai.”

26Tơk kaxe đu chapat, dhơn pleng Gaap-ri-êên bâân Yaang Pleng kayua tơk leq mưi kanóón ưng xưưq Ga-li-lê, achak ưng kanóón nek Na-xa-reet, 27lum mưi pađiil kamór ơi hươq nhan palơq mưi padruuih ve achak nek Jô-seep, mađó dhong nooi Đa-viit, dyơq achak ưng pađiil kamór nek Ma-ri. 28Xók tơk lum ađó, dhơn pleng praaq: “Chap yayar đóng amei ơi bâân phươk liêm! Chuôq tơơt palơq amei.” 29Bơơi ađó bâân nhok karnóq taai nôôq paraaq achêk lơq kanóq xâng paraaq chap yayar ađô ve hau kiêng móón. 30Hayơq dhơn pleng praaq palơq ađó: “Ma-ri, nhan óóq kakhin, taai amei ơi bâân ơơn toom mat Yaang Pleng. 31Xâng ađô, amei e đađââng dhiq luônh ađêi hayơq n'niên mưi akóón padruuih, lơq amei e đóók achak ưng akóón paniên nek Jê-su. 32Akóón padruuih achêk e bâân bhi chap lơq e bâân đóók nek Akóón ưng Yaang Bhơt Yaal, lơq Chuôq nek Yaang Pleng e đóng leq Ađó tanơơt Đa-viit, abhươp avuôq Ađó. 33Ađó e têêng kala dhiq đong Ja-kôôp tơk leq nh'chró, lơq katiêk ưng Ađó e nek taluôn luôn.” 34Ma-ri móón palơq dhơn pleng: “Ng'kơi tarnêêng achêk e ve chóóm vaaih, xók aku kah glêh tơơt cha palơq mưi manưih padruuih?” 35Ââi lóóiq, dhơn pleng praaq palơq ađó: “Chuôq Yaang Liêm e tơk dhiq amei lơq mataai raman ưng Yaang Bhơt Yaal e dhuum amei. Kơi ađek, Akóón Tabah ơi n'niên e bâân đóók nek Akóón Yaang Pleng. 36Nek lêi tôôh, Ê-li-sa-beet, bhuh xóng ưng amei — ađó kung ơi đađââng mưi akóón padruuih xók ađó yaal tuôi, lơq bhanaq achêk xók bâân chapat kaxe kalóóng ađó, nek ađó ơi bâân đóók kah pabhaq. 37Taai kah rau paraaq ơi praaq e xar kah chóóm têêng palơq Yaang Pleng.” 38Xók achêk, Ma-ri ââi: “Aku ađôk, dhơn ratơơq ưng Chuôq. Nhan tarnêêng vaaih leq aku ting kơi paraaq ưng Amei.” Hayơq dhơn pleng xooq tââq ađó.

39Kalóóng nôôq tangêi achêk, Ma-ri yuur dyương palơq lóóm tahươk tahââm, ađó vôôiq leq parah booiq, tơk leq mưi kanóón mađó xưưq Ju-đa, 40hayơq ađó mót leq kalóóng đong Xa-cha-ri lơq tamóh tham Ê-li-sa-beet. 41Tarnêêng val vaaih xók Ê-li-sa-beet xâng dhariêng chap yayar ưng Ma-ri, akóón paniên dhiq kalóóng luônh ađó yuur chadhơp bhuui marhaal, dyơq Ê-li-sa-beet bâân bing bhlaai Chuôq Yaang Liêm. 42Ađó praaq karơ dhariêng hơq móón: “Amei bâân phươk lơh dhiq kalóóng kabhuh manưih pađiil, akóón paniên kalóóng luônh amei kung bâân phươk. 43N'tââq hơq rau ađô tơk leq aku, nek amêêq ưng Chuôq aku ơi tơk palơq aku? 44Ơi lêi ađô, dhalam xók dhariêng chap yayar ưng amei tơk leq katór aku, akóón paniên kalóóng luônh aku ơi yuur chadhơp kalóóng bhuui marhaal. 45Phươk đóng amei huuiq kơi nôôq paraaq tââq Chuôq ơi bâân praaq palơq ađêi e tajaap.” 46Hayơq Ma-ri praaq:

“Ravaai aku bhi haanh Chuôq,

47lóóm ravaai aku pabhlơng bhuui marhaal dhiq Yaang Pleng nek Yaang Paq ưng aku.

48Taai Ađó ơi chamet lêi tơk manưih xaryô xangaat ưng dhơn pađiil Ađó.

Ơi lêi tôôh, tââq ađôk leq ng'ki, dyóp n'đó klaang e haanh aku ve phươk,

49ơi Yaang Bhơt Mataai ơi têêng nôôq tarnêêng gamak đóng aku,

dhanóók Ađó nek tabah,

50lóóm kayô ka-er ưng Ađó tââq klaang đơơi ađô tơk leq klaang đơơi tôôh palơq nôôq ngaai bhi kakhin Ađó.

51Ađó ơi têêng nôôq tarnêêng mataai raman palơq têi ưng Ađó;

Ađó ơi têêng leq nôôq manưih parlaach tachêh tavươk ting nôôq karnóq dhiq lóóm piđó.

52Ađó bhlêh nôôq bhua chuôq tââq tanơơt piđó,

lơq hayuur nôôq manưih xaryô xangaat leq yaal.

53Ađó têêng manưih ha-ul kabhôôq bing rau đu liêm,

lơq đuôi manưih kavaan chô têi kagóh.

54Ađó ơi paq jóói I-sơ-ra-êên, dhơn ratơơq Ađó,

đóng bâân pahei lóóiq lóóm kayô ka-er,

55dhalam kơi Ađó ơi praaq palơq nôôq abhươp avuôq nôôq yi — palơq Ap-ra-haam nek palơq dhong nooi ađó tơk nh'chró.”

56Ma-ri tơơt palơq ađó kalóóng pe kaxe, hayơq ađó val chô leq đong ađêi.

57Ganah bhêêl ưng Ê-li-sa-beet đóng ađó phaai n'niên akóón ơi tơk, lơq ađó n'niên mưi akóón padruuih. 58Dharing tapóóng lơq xóng anó ưng ađó xâng n'nal kơi ađô Chuôq ơi pakah lóóm kayô ka-er ưng Ađó gamak leq ađó, nek piđó ting tabhuui palơq ađó.

59Tarnêêng ơi vaaih leq tangêi takóól, piđó tơk đóng iêt ng'kar leq akóón paniên, lơq piđó kiêng đóók achak đóng akóón paniên ađek ting kơi achak akonh ưng ađó, nek Xa-cha-ri. 60Ââi lóóiq tarnêêng chêk, amêêq ađó vil móón: “Kah, bơơi paniên e đóók nek Jang.” 61Piđó móón palơq ađó kơi ađô: “Kah ve ngaai kalóóng xóng anó ưng amei hơq bâân đóók achak kơi ađek.” 62Piđó paveq têi đóng akonh ađó, lêi konh kiêng đóók achak leq ađó nek hau. 63Xong xók kayua đââng mưi tala bhaan, ađó xaraq kơi ađô: “Achak ađó nek Jang.” Dyóp ngaai maar hêq lêi bhlơng. 64Hayơq n'drươh ađek, bóóp lơq n'taak ađó tarlóng, hayơq ađó yuur papraaq bhi haanh Yaang Pleng. 65Rau kakhin kapơn tơk dhiq tabhơt nôôq manưih mamông xirvir piđó, lơq dyóp rau chiên ađek bâân taxêi plok kalóóng đu tơơt parah bôôl bang ưng Ju-đê. 66Dyóp ngaai xâng nek katiêu leq lóóm ađêi, tamóh ađêi kala: “Tatun ki, akóón n'niên ađô e val xar ng'kơi dhơq?” Ơi lalua têi Chuôq tơơt palơq ađó.

67Xa-cha-ri, ama akóón paniên, bâân bing bhlaai Chuôq Yaang Liêm, lơq praaq đââng taruuih, kơi ađô:

68“Bhi haanh Chuôq nek Yaang Pleng ưng I-sơ-ra-êên,

taai Ađó ơi mót tham lơq têêng tarnêêng paq jóói leq dhanuôr Ađó.

69Ađó ơi hayuur đóng nôôq yi mưi beq tagê paq jóói

kalóóng đong ưng Đa-viit, dhơn ratơơq Ađó

70(kơi Ađó ơi praaq tââq hanua hana tââq bóóp nôôq manưih đââng taruuih liêm ưng Ađó),

71nek rau paq jóói tââq brau ưng nôôq yi,

lơq tââq têi ưng dyóp nak dyââng lêi nôôq yi;

72đóng pakah lóóm kayô ka-er palơq abhươp avuôq nôôq yi,

lơq đóng bâân pahei lóóiq raket liêm ưng Ađó,

73chênh nek paraaq raket đu Ađó ơi ng'kóh palơq Ap-ra-haam, abhươp avuôq nôôq yi, đóng leq nôôq yi

74xók ơi bâân tapaq lơh tââq têi brau ađêi,

hơq đóng têêng yaauq Ađó kơi yươq rau kakhin kapơn,

75kalóóng đu sek tabah lơq bhơt liêm dhiq toom mat Ađó, dyóp nôôq tangêi ưng nôôq yi.

76Dyơq akóón, akóón paniên ơơi, akóón e bâân đóók nek manưih đââng taruuih ưng Yaang Yaal bhơt Yaal,

ơi akóón e vôôiq toom mat Chuôq đóng dhoon kalơng ưng Ađó,

77đóng đââng rau bâân n'nal ơơn paq jóói leq dhanuôr Ađó kalóóng rau lơơi nôôq matu lơt ưng piđó,

78ganơơm lóóm kayô ka-er lơơi lơt ưng Yaang Pleng nôôq he,

taai ađek, mat blo tââq đu yaal e vôôiq tham nôôq he,

79đóng dyóól brương ngaai dhơơm đu tơơt dhiq a-ô kanam lơq dhiq a-ô ưng kan chêt,

đóng kađââng tapaang dyung nôôq he mót leq kalơng đu yươq rauha.”

80Akóón paniên taha gamak lơq bâân khe karơ yaang lóóm, ađó tơơt kalóóng kruung vơng đóng patơk tangêi pakah tabhral ưng ađó dhiq toom mat dhanuôr I-sơ-ra-êên.