Jang 14:6

1“Lóóm adhi anó óóq pâng nhok nhói. Adhi anó huuiq leq Yaang Pleng, nek adhi anó kung huuiq leq thêi. 2Kalóóng đong Ama aku ve bơk dhiq tơơt. Hơq la kah ve, nek aku dhakơi ve praaq palơq adhi anó ơi, taai aku xók vôôiq đóng ravang ravưa leq adhi anó mưi dhiq. 3La thêi vôôiq lơq ravang ravưa đóng adhi anó mưi dhiq, thêi e tơk machu dyơq lơq kêch adhi anó ting palơq thêi, đóng n'dhiq thêi tơơt nek adhi anó kung tơơt dhiq ađek. 4Adhi anó ơi n'nal kalơng tơk leq đu Aku dyơq vôôiq.” 5Thô-ma tamóh Ađó: “Chuôq ơơi, nôôq yi kah n'nal Amei dyơq vôôiq ađó leq, nek ng'kơi nôôq yi ve chóóm n'nal kalơng đuôh?” 6Chuôq Jê-su praaq palơq ađó: “Thêi nek kalơng vôôiq, dhalam lơq parmông; kah ngaai chóóm tơk palơq Ama la kah đươi thêi. 7La adhi anó n'nal thêi, nek adhi anó kung n'nal Ama thêi. Tââq ađôk, adhi anó n'nal Ađó lơq ơi lêi Ađó.” 8Phi-liip móón palơq Ađó: “Chuôq ơơi, nhan chaleq Ama đóng nôôq yi, kơi ađek nek dyóp đóng nôôq yi aq.” 9Chuôq Jê-su praaq palơq ađó: “Aku ơi tơơt palơq adhi anó mưi ganah đươnh kơi chêk hơq amei kah n'nal aku lua, Phi-liip? Ngaai đu ơi lêi aku nek ơi lêi Ama. Hau amei móón: ‘Nhan chaleq Ama leq nôôq yi’? 10Amei kah huuiq kơi thêi tơơt kalóóng Ama, lơq Ama tơơt kalóóng thêi kơi? Nôôq paraaq đu thêi praaq palơq adhi anó nek eh tââq tư thêi yuur praaq, bơơi Ama taluôn mamông kalóóng thêi dyơq têêng tarnêêng ưng Ađó. 11Phaai huuiq thêi, kơi thêi tơơt kalóóng Ama, lơq Ama tơơt kalóóng thêi; dyơq la kah, nek phaai huuiq ơi taai chênh nôôq tarnêêng ưng thêi. 12Alua, alua, thêi praaq palơq adhi anó, ngaai đu huuiq leq thêi, nek manưih achêk kung e têêng nôôq tarnêêng đu thêi têêng; lơq e têêng nôôq tarnêêng gamak lơh kơi achêk, taai thêi ravang chô palơq Ama. 13Tabhơt dhơ dharau hơq adhi anó vơn dhanóók thêi nhan gavơh, thêi e têêng rau ađek đóng, buôn Ama bâân bhi haanh tââq Akóón. 14La adhi anó vơn dhanóók thêi nhan thêi hau rau, thêi e têêng rau ađek. 15La adhi anó nh'nhơr aku, nek adhi anó e jư nôôq gani pachóóm ưng aku. 16Thêi kung e nhan gavơh Ama, lơq Ađó e đóng leq adhi anó Yaang Bhơơl Lóóm lââng đóng Yaang achêk tơơt palơq adhi anó patơk nh'chró chró, 17hơq nek Yaang Paraaq Dhalam, nek Yaang đu hóng katiêk kah chóóm đơơp đuôh, ơi taai hóng katiêk kah đơơp lêi Ađó, kung kah n'nal Ađó. Adhi anó nek n'nal Ađó, taai Ađó taluôn tơơt palơq adhi anó lơq e tơơt kalóóng adhi anó. 18Thêi e kah lơơi adhi anó dharit mơ; Thêi tơk palơq adhi anó. 19Dyơq m'bưưiq đươnh dyơq, hóng katiêk kah dyơq lêi thêi; bơơi adhi anó nek lêi thêi, taai thêi mamông, adhi anó kung e mamông. 20Kalóóng tangêi ađek, adhi anó e n'nal kơi thêi tơơt kalóóng Ama thêi, adhi anó tơơt kalóóng thêi, lơq thêi kung tơơt kalóóng adhi anó. 21Ngaai đu ve nôôq gani pachóóm ưng thêi lơq huuiq jư piđó, ađek nek manưih nh'nhơr thêi; lơq manưih nh'nhơr thêi e bâân Ama thêi nh'nhơr; thêi kung e nh'nhơr manưih ađek lơq pakah chênh thêi đóng manưih ađek.” 22Ju-đa (eh rau nek Ich-ka-ri-ôôt) móón palơq Ađó: “Chuôq ơơi, harau chiên ơi vaaih đu Amei kanóq pakah leq Amei đóng nôôq yi hơq kah đóng manưih hóng katiêk?” 23Chuôq Jê-su ââi bóóp lơq Chuôq praaq palơq ađó: “La ngaai đu nh'nhơr thêi, nek manưih achêk e xâng jư paraaq thêi. Ama thêi e nh'nhơr manưih ađek; lơq Nôôq He e tơk palơq manưih ađek, hayơq têêng vaaih mưi dhiq tơơt jaq kalóóng manưih ađek. 24Manưih kah nh'nhơr thêi nek kah huuiq jư paraaq thêi. Paraaq đu adhi anó xâng eh rau nek ưng thêi, hơq nek ưng Ama, Yaang đu kayua thêi.

25Xók bhêêl biêh dyơq tơơt palơq adhi anó, thêi ơi praaq palơq adhi anó nôôq rau ađô. 26Dhơ kơi ađek, Yaang Bhơơl Lóóm — nek Chuôq Yaang Liêm đu Ama e vơn dhanóók thêi kayua tơk — Yaang achêk e pachóóm kayua adhi anó dyóp tarnêêng lơq pahei lóóiq đóng adhi anó dyóp rau đu thêi ơi praaq palơq adhi anó. 27Thêi lơơi lóóiq leq adhi anó yươq rau ha; thêi đóng yươq rau ha ưng thêi leq adhi anó, thêi đóng leq adhi anó kah kơi manưih hóng katiêk đóng. Lóóm adhi anó óóq rau nhok nhói, kung óóq kakhin kapơn. 28Adhi anó biêh xâng kơi thêi ơi praaq palơq adhi anó: ‘Thêi yuur vôôiq, hayơq thêi e val palơq adhi anó.’ La adhi anó nh'nhơr thêi, adhi anó alua dhakơi bâân bhuui marhaal xók thêi yuur chô paleq Ama, taai Ama dyơq bhi chap lơh thêi. 29Xók ađôk, thêi ơi praaq loom tarnêêng vaaih tơk leq adhi anó, đóng xók tarnêêng vaaih tơk nek adhi anó ve lóóm huuiq. 30Thêi e kah praaq kơơq bơk rau palơq adhi anó dyơq, taai đu kadhâng akoq manưih hóng katiêk ađô dyơq bhral. Lơq ađó kah ve rau phơn dhiq thêi, 31bơơi đóng manưih hóng katiêk bâân n'nal kơi thêi nh'nhơr Ama, lơq Ama ơi truuih pachóóm leq thêi ng'kơi, nek thêi yuur têêng i kơi achêk. Phaai yuur dyương, nôôq he kơng vôôiq lơh tââq ađôk.”