Jang 12

1Xong ađek, chapat tangêi kah ơi Bhiêk Jalơh, Chuôq Jê-su vôôiq tơk Bê-tha-ni, dhiq La-xa-rơ tơơt, ađôk nek manưih đu Chuôq Jê-su ơi têêng mamông lóóiq tââq kan chêt. 2Kơi achêk nek piđó dhoon yaauq Ađó vaar blót dhiq ađek, lơq Ma-thê nek têêng yaauq, dyơq La-xa-rơ nek mưi kalóóng nôôq manưih tơơt madhiq baang cha palơq Ađó. 3Tââq ađek, xong xók pei mưi kanơng dhơu thum kaam tung yươq taklaai lóng kiiq bhlơng, Ma-ri xut dyung Chuôq Jê-su, lơq dyuut dyung Ađó palơq xok ưng ađêi. Xók achêk, dhanong đong bâân bhrưi bhrai palơq n'naq thum ưng dhơu achêk. 4Bơơi Ju-đa Ich-ka-ri-ôôt, mưi kalóóng nôôq môôn-đô Ađó, đu ravang têêng tamôôp Ađó, móón kơi ađô: 5“Ađó kơi klóng dhơu thum ađô kah chóóm đââng baan raxal pei pe hariêng đơ-ni-ê, hayơq đóng nh'xóóng leq manưih ngeeo?” 6(Xók achêk, ađó ađek praaq kơi ađek kah alua taai rau karaang kanóq palơq ađó nek leq manưih ngeeo, bơơi taai ađó nek têi tatông papei, lơq xók jư chadhung jêên, ađó pei tông jêên bâân tapôông đóng leq ađek.) 7Taai kơi ađek, Chuôq Jê-su praaq: “Phaai lơơi ađó bâân ra-iên, đóng ađó ve chóóm jư dhơu đóng tangêi tơp buur ưng thêi. 8Taai adhi anó taluôn ve manưih ngeeo tóór ađêi, bơơi adhi anó kah taluôn luôn ve thêi.”

9Kơi achêk hayơq mưi kabhuh ganơr bơk tââq nôôq manưih Jo Thaaiq ơi bâân n'nal kơi Ađó dyơq tơơt dhiq ađek, hơq piđó pajươk pơh, eh rau taai chapiên Chuôq Jê-su, hơq kung đóng piđó ve chóóm bâân lêi La-xa-rơ, nek manưih đu Ađó ơi têêng mamông lóóiq tââq kan chêt. 10Bơơi nôôq takóh kadhâng bhanuôih bhơt liêm ơi mangê kanóq, ng'kơi đóng piđó kung ve chóóm leng luôn lơq La-xa-rơ; 11ơi taai ađó, bơk manưih Jo Thaaiq ơi xooq lơơi hơq huuiq dhiq Chuôq Jê-su.

12Tangêi tatun, tanóói dhanuôr lóng bơk, nek nôôq manưih tơk tơơt bhiêk, Xók xâng kơi Chuôq Jê-su dyơq vôôiq tơk Jê-ru-sa-leem, 13ơi pei nôôq xơq chalón, hayơq piđó vôôiq gluh đóng kêch Ađó lơq driêu karơ: “Hô-sa-na! Bhi haanh Yaang bhral kalóóng dhanóók Chuôq, nek Bhua I-sơ-ra-êên!” 14Xók achêk, xók ơi tating bâân mưi panong axeh kamór, Chuôq Jê-su tơơt dhââng dhiq ađó, kơi paraaq bâân xaraq: 15“Nô akóón pađiil Si-ôôn, óóq kakhin. Lêi tôôh, Bhua ưng akóón dyơq bhral, dhââng dhiq axeh akóón.” 16Bhêêl tarnââp, nôôq môôn-đô ưng Ađó kah n'nal nôôq tarnêêng ađek; bơơi xók Chuôq Jê-su ơi bâân cha-iil tabah, nek piđó hei lóóiq kơi nôôq paraaq achêk ơi bâân xaraq leq Ađó, palââng kung ơi têêng kơi ađek leq Ađó. 17Xong ađek, kabhuh ganơr maar truuih đuui leq Ađó, piđó nek nôôq manưih ve mat palơq Ađó xók Ađó dhaloong La-xa-rơ gluh tââq bóng ping lơq têêng ađó mamông lóóiq tââq kan chêt. 18Ơi taai ađek, tanóói dhanuôr kung vôôiq gluh kêch Ađó, taai piđó xâng kơi Ađó ơi têêng mưi kanal chrih kơi ađek. 19Kơi ađek hơq, manưih Pha-ri-si móón palơq xóng piđó: “Nôôq pe lêi nek nôôq pe kah têêng vaaih rau matich mataang? Lêi tôôh, bhơt manưih hóng katiêk ơi vôôiq ting Ađó ađek.”

20Xók achêk, ve bơơr pe chanak manưih Hi-laap achêk kalóóng sôôq nôôq manưih vôôiq đơk đóng piđó ve chóóm bhuôih haanh mót ganah bhiêk. 21Kơi achêk hayơq, nôôq manưih ađô tơk lum Phi-liip, manưih ađó gluh tââq Bêêt-saai-đa, xưưq Ga-li-lê, lơq palââng đươi ađó, kơi ađô: “Abhươp ơơi, nôôq yi kiêng lum Thêi Jê-su.” 22Phi-liip vôôiq lơq móón palơq En-rê; En-rê palơq Phi-liip vôôiq hayơq móón palơq Chuôq Jê-su. 23Bhêêl achêk, Chuôq Jê-su ââi lóóiq piđó, kơi ađô: “Jơ ơi tơk hơq đóng Akóón Manưih bâân bhi haanh. 24Alua, alua, Aku praaq palơq adhi anó, la kaliêng aviq mi, xong xók bâân tachóói leq katiêk, kah chêt aq, nek ađó bhiêk parngau mưi ađêi; bơơi la ađó chêt aq, nek ađó e bóóng pale bơk. 25Ngaai manưih nh'nhơr parmông ađêi nek e bil ađó; bơơi ngaai geet parmông ađêi kalóóng đơơi đôk e bâân jư ađó đóng parmông taluôn luôn. 26La ngaai đu têêng yaauq thêi, manưih achêk phaai ting thêi; lơq dhiq thêi tơơt, manưih đu têêng yaauq thêi e kung tơơt dhiq ađek. La ngaai đu têêng yaauq thêi, nek Ama e bhi chap manưih achêk. 27Xók ađôk, ravaai thêi dyơq nhok karnóq, lơq thêi hơq praaq harau? ‘Ama ơơi, nhan paq akóón tââq xók ađôk?’ Dhơ kơi ađek, chênh taai tarnêêng achêk hơq thêi ơi tơk kalóóng xók ađôk. 28Ama ơơi, nhan bhi haanh dhanóók Ama.” Kơi chêk hayơq, mưi dhariêng praaq tơk tââq pleng: “Aku ơi bâân bhi haanh lơq Aku e dyơq bhi haanh.” 29Xong tơk, taai biêh ơi dyương dhiq ađek lơq xâng lêi, kabhuh ganơr móón kơi dhariêng grơm kamlaaq tame xuul vaaih. Masôôq lââng móón: “Mưi dhơn Pleng ơi praaq palơq Ađó achêk.” 30Chuôq Jê-su ââi lóóiq lơq Ađó móón: “Dhariêng praaq ađô kah tar-auq taai Aku, bơơi nek taai nôôq pe. 31Xók ađôk nek rau xêi xanêi ưng hóng katiêk ađô: xók ađôk, manưih têêng kala hóng katiêk ađô e bâân m'peq leq nguôi. 32Dyơq Aku, mưi xók Aku bâân yuur tayông tââq katiêk, Aku e đââng dyóp ngaai tơk palơq aku.” 33Xók achêk, Ađó xók praaq rau ađô đóng chaleq leq n'đó kơi chêt hơq Ađó ravang đơơp. 34Kơi achêk hayơq tanóói dhanuôr tamóh lóóiq palơq Ađó: “Nôôq yi ve xâng tââq gani kơi Chuôq Paq Manưih e dyơq tơk taluôn luôn. Kơi Amei móón kơi ađô: ‘Rau pa-eep nek palơq Akóón Manưih nek yuur bâân tayông’? Ngaai nek Akóón Manưih achêk?” 35Kơi achêk hayơq, Chuôq Jê-su praaq palơq piđó: “Rau brương dyơq tơơt palơq nôôq pe mưi ganah gađóq dyơq. Phaai jađaang vôôiq xók bhêêl nôôq pe ve rau brương, đóng bóng kanam yươq kóóp jư nôôq pe. Manưih jađaang vôôiq kalóóng bóng kanam kah n'nal ađêi vôôiq n'leq. 36Xók bhêêl nôôq pe ve rau brương, phaai huuiq leq rau brương đóng nôôq pe bâân val xar akóón ưng đu brương.” Chuôq Jê-su praaq nôôq paraaq ađek hayơq yuur vôôiq, Ađó kadrêi ađêi tââq piđó. 37Dhơ ve Ađó ơi têêng lóng bơk kanal chrih toom mat piđó, bơơi piđó biêh kah huuiq leq Ađó, 38đóng paraaq Ê-saai nek manưih đââng taruuih bâân tajaap, hơq ađó ơi móón:

“Kakoh Chuôq, ngaai huuiq paraaq truuih lóóiq ưng nôôq akóón,

lơq tapaang têi ưng Chuôq ơi pakah đóng ngaai leq?”

39Taai kơi achêk, piđó kah chóóm huuiq, ơi taai Ê-saai vil praaq dyơq:

40“Ađó ơi têêng mat piđó kabaang, lơq Ađó ơi têêng đóng lóóm piđó kakơu nhâng;

đóng n'jau kơi piđó ve chóóm lêi palơq mat, lơq n'nal rau kalóóng lóóm,

hayơq palâh val lóóiq,

lơq aku e payươh đóng piđó.”

41Ê-saai ơi truuih nôôq paraaq achêk taai Ê-saai ơi rââm lêi cha-iil tabah ưng Ađó lơq praaq leq Ađó. 42Dhơ kơi chêk, dhakơi kung ve bơk manưih kalóóng kabhuh têêng gamak huuiq leq Ađó, bơơi ơi taai nôôq manưih Pha-ri-si, hayơq piđó kah khin praaq pakah hơq đóng piđó yươq bâân tađuôi lơh tââq gươl. 43Taai piđó kiêng đươi rau bhi haanh tââq palââng lơh nek rau bhi haanh tââq Yaang Pleng.

44Xók achêk, Chuôq Jê-su karơ dhariêng praaq kơi ađô: “Ngaai huuiq dhiq aku kah chapiên nek huuiq leq aku, bơơi dyơq nek huuiq tơk Yaang đu kayua aku, 45lơq ngaai lêi aku nek lêi Yaang đu kayua aku. 46Aku ơi tơk têêng rau brương kalóóng hóng katiêk, đóng ngaai huuiq leq aku yươq bhiêk tơơt kalóóng bóng kanam. 47Lơq la ngaai đu xâng paraaq Aku hơq kah katiêu jư, nek Aku kah xêi xanêi manưih achêk; taai Aku ơi bhral eh rau đóng Aku xêi xanêi manưih hóng katiêk, bơơi đóng Aku paq hóng katiêk. 48Ngaai đu kah đươi aku lơq kah đơơp pơh đươi paraaq aku nek ve Yaang xêi xanêi manưih achêk. Chênh paraaq đu aku ơi praaq ađô e xêi xanêi manưih achêk leq tangêi xariêq parlưch. 49Taai aku eh taai chênh ađêi đu praaq, bơơi Yaang kayua aku, chênh Ama ơi đóng paraaq kayua leq aku, n'đó paraaq aku kơng truuih lơq hau rau aku kơng praaq. 50Lơq aku n'nal kơi paraaq kayua ưng Ađó nek rau parmông taluôn luôn. Kơi ađek hơq, nôôq rau aku praaq, kơi Ama ơi truuih đóng aku n'đó kơi, nek aku truuih lóóiq kung kơi achêk.”