Jang 11

1Xók achêk, ve mưi nak achêk vaaih ka-ai, achak La-xa-rơ tââq Bê-tha-ni, dhiq kanóón ưng Ma-ri lơq anó ưng ađó nek Ma-thê. 2Dyơq Ma-ri nek manưih xut dhơu thum đóng Chuôq hayơq dyuut dyung Ađó palơq xok ưng ađêi, hơq adhi padruuih ưng ađó nek La-xa-rơ biêh dyơq dhuôr ka-ai. 3Kơi ađek hơq, bơơr miing móóq muôt manưih pagơơi bóóp tơk Ađó kơi ađô: “Chuôq ơơi, lêi tôôh manưih đu Amei nh'nhơr dyơq dhuôr ka-ai.” 4Bơơi xong xók xâng kơi ađek, Chuôq Jê-su praaq: “Ka-ai ađô yươq chóóm tơk mơ chêt, dhơ kơi ađek, taai cha-iil tabah ưng Yaang Pleng, đóng Akóón Yaang Pleng bâân bhi haanh đươi tarnêêng achêk.” 5(Chuôq Jê-su nh'nhơr Ma-thê, adhi pađiil ưng ađó, lơq La-xa-rơ.) 6Taai ađek, xók Ađó xâng kơi La-xa-rơ dyơq dhuôr ka-ai, dhơ kơi ađek bhêêl achêk, Ađó raan tơơt lóóiq bơơr tangêi dhiq dham đu Ađó dyơq tơơt. 7Xong kơơq, lơh tarnêêng, takajơq achêk, Ađó praaq palơq nôôq môôn-đô: “Nôôq he kơng vôôiq tơk xưưq Ju-đê machu dyơq.” 8Nôôq môôn-đô móón palơq Ađó: “Thêi ơơi, xók đôk manưih Jo Thaaiq dyơq tabâân kơi glơm dhơl thêi, hơq thêi dyơq val chô leq ađek machu dyơq?” 9Chuôq Jê-su ââi: “Kah alua ve majêt bơơr jơ mót mưi tangêi kơi? La ngaai manưih vôôiq kalóóng tangêi, nek manưih achêk yươq n'đóih kalơm, taai ađó ve lêi taklaaq brương ưng hóng katiêk ađô. 10Dyơq la ngaai manưih vôôiq kalóóng hayum kanam, nek manưih achêk n'đóih kalơm, taai tarlaaq brương kah tơơt dhiq ađó.” 11Ađó ơi praaq kơi ađek, hayơq xong ađek, Ađó móón piđó: “La-xa-rơ, parjơơk ưng nôôq he, ơi ngan bêch, bơơi Thêi vôôiq nek đóng Thêi ve chóóm payuur ađó achêk.” 12Kơi achêk hơq, nôôq môôn-đô móón palơq Ađó: “Chuôq ơơi, la ađó achêk ơi ngan bêch, nek anó achêk e chóóm yuur.” 13(Xók achêk, Chuôq Jê-su biêh praaq leq rau chêt ưng La-xa-rơ, bơơi nôôq manưih ađek ngóq kơi Ađó dyơq praaq leq rau dhêi drơq ưng bhanêch bêch.) 14Kơi ađek hơq, bhêêl ađek Chuôq Jê-su praaq padrêh đóng piđó: “La-xa-rơ ơi chêt. 15Thêi bhuui marhaal ơi taai malơơi malaai ưng adhi anó taai Thêi ơi kah ve mat dhiq ađek, đóng adhi anó ve chóóm huuiq. Dhơ kơi ađek, nôôq he kơng vôôiq leq ađó achêk.” 16Kơi achêk hayơq, Thô-ma, bâân đóók nek Đi-điim, móón palơq nôôq môôn-đô ting vôôiq palơq Ađó: “Nôôq he kung chóóm vôôiq đóng nôôq he ve chóóm chêt madhiq palơq Ađó.”

17Taai kơi ađek, xók tơk dham, Chuôq Jê-su đơơp lêi ađó ađek ơi tơơt kalóóng ping puôn tangêi aq. 18Xók achêk, Bê-tha-ni tơơt đan Jê-ru-sa-leem, tââq ađek mơ majêt xââng êch-ta-đơ. 19Bơk manưih kalóóng sôôq nôôq manưih Jo Thaaiq ơi tơk palơq Ma-thê lơq Ma-ri đóng piđó ve chóóm bhơơl lóóm nhiđó leq manưih adhi padruuih. 20Kơi achêk hayơq, xók Ma-thê xâng kơi Chuôq Jê-su bhral, ađó vôôiq kêch Chuôq, dyơq Ma-ri tơơt kalóóng đong. 21Xók achêk, Ma-thê móón palơq Chuôq Jê-su: “Chuôq ơơi, la Amei ve tơơt dhiq đôk, hơq alua nek adhi padruuih aku yươq ơi chêt. 22Dhơ kơi ađek, patơk mơ bhêêl đôk, aku n'nal kơi tabhơt dhơ dharau hơq Amei nhan Yaang Pleng, Yaang Pleng e đóng leq Amei.” 23Chuôq Jê-su praaq palơq ađó: “Adhi padruuih ưng amei e mamông lóóiq.” 24Ma-thê móón palơq Ađó: “Aku n'nal kơi adhi achêk e mamông lóóiq kalóóng rau mamông lóóiq leq tangêi xariêq parlưch.” 25Chuôq Jê-su praaq palơq ađó: “Thêi nek parmông lóóiq lơq parmông; ngaai manưih huuiq dhiq thêi e mamông, dhơ nek ơi chêt aq; 26dyơq ngaai mamông hơq huuiq dhiq thêi nek alua dhakơi kah mơ chêt tơk nh'chró chró. Amei ve huuiq rau ađô kah?” 27Ma-thê ââi lóóiq Ađó: “Ơơq, Chuôq ơơi, aku huuiq kơi Amei nek Chuôq Paq Manưih, Akóón Yaang pleng, nek Yaang phaai dhaluônh kalóóng hóng katiêk.” 28Praaq kơi ađek xong, ađó val chô lơq dhaloong pantua Ma-ri, adhi ađêi, móón: “Thêi tơơt dhiq ađô lơq dyơq dhaloong adhi.” 29Xók Ma-ri xâng kơi chêk, ađó đâh parmat yuur dyương lơq tơk palơq Chuôq. 30Xók achêk, Chuôq Jê-su kah mót kalóóng bhươl bơơi bhiêk dyơq tơơt dhiq dham đu Ma-thê ơi lum Ađó. 31Xók achêk, nôôq manưih Jo Thaaiq, nek nôôq manưih dyơq tơơt palơq Ma-ri kalóóng đong lơq pahêêl bhơơl ađó, xók lêi kơi Ma-ri tarhươk tahơn yuur dyương lơq vôôiq gluh leq nguôi, nek ting tapun ađó, ngóq nek ađó vôôiq tơk ping đóng ađó dhiq ađek nhiim. 32Kơi achêk hayơq, dhalam xók Ma-ri tơk dhiq Chuôq Jê-su dyương dhêi, bhêêl bâân lêi Ađó, Ma-ri chakoh takól dhiq dyung Ađó móón palơq Ađó: “Kakoh Chuôq, la Amei biêh tơơt dhiq đôk, hơq alua nek adhi padruuih aku ơi yươq chêt.” 33Kơi ađek, xók Chuôq Jê-su lêi Ma-ri nhiim, lơq nôôq manưih Jo Thaaiq vôôiq chadrươh palơq ađó kung nhiim, Ađó lêi karuôq luônh lóóm kalóóng lóóm ravaai lơq chênh Ađó kala bhrêq nhiim. 34Ađó tamóh: “Adhi anó tơp anó achêk n'đó dhiq?” Piđó móón palơq Ađó: “Chuôq ơơi, vêq vôôiq lơq lêi.” 35Chuôq Jê-su nhiim. 36Taai kơi ađek, nôôq manưih Jo Thaaiq móón: “Lêi tôôh, Ađó achêk nh'nhơr La-xa-rơ n'nal mơ!” 37Bơơi bơơr pe chanak kalóóng sôôq piđó móón: “Ađó ađô, nek manưih ơi pơơh mat ưng manưih kabaang, biêh kah rau chóóm têêng đuôh lơơi đóng manưih ađô yươq chêt?” 38Taai kơi ađek, xók bhêêl vil karuôq luônh lóóm kalóóng achak, Chuôq Jê-su vôôiq tơk xaal ping. Xók achêk, ađek nek mưi bóng dhơl, lơq mưi bhangôh dhơl bâân patơơt kađơp dhalam palóng. 39Chuôq Jê-su yua: “Phaai tââi bhangôh dhơl aq.” Ma-thê, mamóóq ưng manưih ơi chêt, móón palơq Ađó: “Chuôq ơơi, adhi achêk huôl n'naq aq, taai mađôk nek tangêi đu puôn.” 40Chuôq Jê-su praaq palơq ađó: “Eh alua Aku ơi praaq palơq amei kơi la amei huuiq, nek amei e lêi cha-iil tabah ưng Yaang Pleng kơi?” 41Kơi ađek hơq, piđó patââi bhangôh dhơl aq. Hayơq Chuôq Jê-su angơơq mat leq Pleng lơq praaq: “Ama ơơi, Akóón ma-ơơn Ama taai Ama ơi tameng xâng Akóón. 42Hơq Akóón biêh ơi n'nal kơi Ama taluôn luôn tameng xâng, bơơi Akóón yuur praaq ơi taai kabhuh ganơr dyơq dyương xirvir dhiq ađôk, đóng piđó ve chóóm huuiq kơi Ama kayua Akóón bhral.” 43Lơq xong xók praaq kơi ađek, Ađó yuur dhaloong karơ dhariêng: “La-xa-rơ, phaai vôôiq gluh leq nguôi!” 44Manưih ơi chêt vôôiq gluh, dyung lơq têi biêh dyơq tapươr bhaai raleng, dyơq mat ađó dyơq tapươr khan. Chuôq Jê-su praaq palơq piđó: “Phaai yuur lương poor ađó ađek lơq đóng ađó ađek vôôiq.”

45Taai ađek, bơk manưih kalóóng kabhuh manưih Jo Thaaiq, nek nôôq manưih ơi tơk tham Ma-ri lơq xong xók xâng lêi tarnêêng Ađó têêng, piđó ơi tabóq lóóm huuiq dhiq Ađó. 46Bơơi bơơr pe chanak kalóóng kabhuh piđó vôôiq tơk palơq kabhuh manưih Pha-ri-si lơq truuih lóóiq đóng nôôq manưih ađô nôôq tarnêêng đu Chuôq Jê-su ơi têêng.

47Nek hayơq, nôôq takóh kadhâng pabhuôih bhơt liêm palơq manưih Pha-ri-si dhaloong karong kabhuh takóh Jo Thaaiq lơq tapraaq tamóh: “Nôôq he phaai têêng harau ađôk, taai manưih ađô têêng bơk kanal chrih bhlơng. 48La nôôq he lơơi mak kơi Ađó achêk kơi ađek, nek dyóp ngaai e huuiq leq Ađó achêk, hayơq manưih La-ma e tơk lơq pei jeng bhơt dhiq ađô palơq katiêk karuung ưng nôôq he.” 49Dhơ kơi ađek, Kaai-phe, mưi chanak kalóóng sôôq piđó, nek takóh kadhâng bhanuôih bhơt liêm kalóóng kamó ađek, móón palơq piđó: “Nôôq pe kah n'nal rauriq. 50Nôôq pe kah kanóq chamet kơi ađek nek rau liêm lơh đóng nôôq pe xók lơơi mưi chanak chêt klóóih đóng dhanuôr manưih hơq tabhơt dhanuôr manưih yươq bâân chêt bil.” 51Xók achêk, ađó ơi praaq rau ađek eh tơk tââq chak araang ađó, bơơi taai nek takóh kadhâng bhanuôih bhơt liêm kamó ađek, hayơq ađó loom praaq taruuih kơi Chuôq Jê-su ravang phaai chêt taai dhanuôr manưih, 52lơq eh chapiên nek taai dhanuôr manưih ađô, hơq dyơq nek đóng akóón anaaq ưng Yaang Pleng pâng xraang xruk ve chóóm karong kaboq xar mưi. 53Kơi achêk hơq, tââq tangêi ađek, piđó tabâân mangê đóng piđó ve chóóm đââng Ađó mót dham chêt.

54Taai kơi ađek, Chuôq Jê-su kah dyơq vôôiq val pakah dhiq m'pơng manưih Jo Thaaiq dyơq, bơơi Ađó tââi lơh tââq ađek vôôiq tơk parah đan kruung vơng, kalóóng mưi kanóón bâân đóók nek Ep-ra-iim. Ađó tơơt dhiq ađek palơq nôôq môôn-đô. 55Xók achêk, Bhiêk Jalơh ưng dhanuôr Jo Thaaiq đan tơk, bơk manưih tââq bhươl kanóón vôôiq đơk tơk Jê-ru-sa-leem xók kah ơi ganah Bhiêk Jalơh đóng piđó ve chóóm pasek chênh ađêi. 56Kơi achêk nek, piđó chik chêk Chuôq Jê-su, lơq praaq palơq xóng piđó xók dyương kalóóng đong bhuôih: “Palơq nôôq pe, tarnêêng achêk parư ngóq n'đó kơi? Kơi ađó achêk dhakơi e kah tơk tơơt bhiêk?” 57Xók achêk, nôôq takóh kadhâng bhanuôih bhơt liêm lơq manưih Pha-ri-si ơi pagluh praaq kayua, buôn đóng la ngaai đu n'nal Ađó tơơt n'dhiq, manưih achêk phaai móón lóóiq đóng palââng ve chóóm kóóp Ađó.