Hê-bơ-rơ 6

1Kơi ađek hayơq, xók ơi m'peq lơơi hót hóng taruuih paraaq êêp leq Chuôq Paq Manưih, nôôq he phaai pave ruul tơk mơ yaal lơh, óóq patơơt lóóiq rau ơi ve leq rau klôôq lóóm lơt lơơi tââq nôôq tarnêêng chêt, leq lóóm huuiq dhiq Yaang Pleng, 2pachóóm leq pheep bap-teem, miq rau kadhâng têi palơq rau mamông lóóiq ưng manưih chêt, lơq rau xêi xanêi nh'chró. 3Nôôq he e têêng rau achêk la xók Yaang Pleng đóng têêng. 4Ơi ađek nek chiên kah đuôh têêng, ting kơi palơq nôôq manưih ơi glêh bâân pakah đóng n'nal, lơq bâân n'nal ơơn liêm Yaang Pleng, val xar manưih pâng ting đươi leq Chuôq Yaang Liêm 5lơq xâng n'nal paraaq liêm kre ưng Yaang Pleng palơq nôôq mataai raman ưng klaang đơơi ravang tơk 6hơq bil lóóm huuiq — buôn taval paliêm lóóiq nôôq manưih achêk malóóm tơk klôôq matu lơt, xók teeng đinh Akóón Yaang Pleng đóng ađêi mưi chu dyơq, lơq pakah rau paraaq kađiq Ađó. 7Taai mưi dham katiêk, xók ơi dyêp đơơk bó buôn taluôn n'toh dhiq ađó lơq yuur vaaih chanoh chabet malơơi đóng leq manưih, hơq nek đóng nôôq ngaai têêng katiêk achêk, nek ve phơn kalóóng ơơn phươk tââq Yaang Pleng, 8dyơq xók vaaih tââm axông lơq bhơơi nhơk, nek rau m'peq lơơi lơq ngóq kơi mưi rau ơi tóh đua, hơq tơk xariêq ưng ađó nek koom đóng óih óch róh.

9Bơơi leq adhi anó, nôôq manưih bâân tanhơr, dhalam xók praaq kơi ađek, nôôq yi ơi bâân tamưng lóóm leq nôôq rau liêm kre lơh lơq kiêng móón ơơn paq jóói. 10Taai Yaang Pleng yươq paq katơq hơq havơơi tarnêêng ưng adhi anó, palơq lóóm tanhơr hơq adhi anó ơi pakah đóng dhanóók Ađó, xók ơi têêng yaauq nôôq manưih huuiq lơq xók ađôk kung dyơq têêng yaauq piđó. 11Bơơi nôôq yi rahaal kiêng dyóp ngaai kalóóng adhi anó pakah lóóm jêi lalua kơi achêk, malóóm tơk rau tamưng kah lơơi leq rau đương rââm ưng ađêi đóng tơk xariêq, 12buôn đóng adhi anó yươq xar kơi nôôq manưih patui dyââng, bơơi nek nôôq manưih ting đuui nôôq têêng xamil đươi lóóm huuiq lơq lóóm jruôn hơq bâân đơơp paraaq hươq.

13Taai Yaang Pleng, xók hươq palơq Ap-ra-haam, taai Ađó kah ve ngaai gamak lơh đóng chaleq leq paraaq ng'kóh, nek ơi praaq ng'kóh chaleq leq chênh ađêi, 14kơi: “Ơi dhơ dhakơi nek la đóng ơơn, Aku e n'toh phươk chok leq dhiq akóón, lơq la paxóng tabơk, Aku e têêng akóón yuur bơk lơh.” 15Taai ađek, lơh xók ơi đơơp jruôn góón đương, ađó ơi bâân đơơp praaq hươq achêk. 16Taai palââng praaq ng'kóh palơq kơi chaleq leq mưi ngaai ađek gamak lơh ađêi, lơq ting kơi palơq piđó, tabhơt xariêq dyóp rau tarjeng tarvei kađââng tơk leq makơi chênh nek praaq ng'kóh, 17bơơi kơi ađek, xók kiêng pakah kơi drêh dróói lơh dyơq đóng nôôq manưih ting đơơp praaq hươq leq lóóm kanóq yươq chóóm tadhơ ưng kanóq Ađó, nek Yaang Pleng ơi ting tapâng leq palơq mưi paraaq ng'kóh 18buôn đóng đươi bơơr rau kah chóóm bil achêk, leq bơơr rau ađek kah mơ ve đóng Yaang Pleng praaq galơơk, nôôq he, nek nôôq manưih mut tơk dhiq kadrêi kađơu, ve chóóm bâân rau tabhơơl pahêêl karơ gamak đóng kadhâng tamưng pei lóóm rââm ađôk patơơt toom mat ađêi; 19hơq nek lóóm rââm hơq nôôq he pei đươi kơi mưi talêi bhriêq tamưng đóng ravaai, palơq yươq chóóm kakhin palơq mưng martek, lơq vôôiq mót hót kalóóng bhaai paryoong, 20dhiq hơq Chuôq Jê-su ơi vôôiq mót kơi mưi Yaang vôôiq laloom klóóih đóng nôôq he, lơh xók val xar takóh kadhâng bhanuôih bhơt liêm đóng patơk nh'chró ting dhong nooi Mêên-chi-xê-đeek.