Hê-bơ-rơ 4:12

1Taai ađek, nôôq he phaai n'nal hayer kakhin, kakhin e dyơq xók paraaq hươq jađaang mót kalóóng rau dhêi drơq ưng Ađó bhiêk dyơq dhiq ađek, nek ngaai ađek kalóóng adhi anó đơơp ngóq kơi ơi klươch bil. 2Taai makơi palơq piđó, nôôq he kung ơi bâân truuih pachóóm Taruuih Liêm. Dhơ kơi ađek, tarnêêng tameng xâng taruuih achêk ơi kah ve malơơi đóng piđó, xók kah bâân panjoop palơq lóóm huuiq dhiq kalóóng nôôq manưih xâng. 3Ting kơi palơq nôôq he, nek nôôq manưih ơi huuiq, hơq bâân mót kalóóng rau dhêi drơq, ting kơi hayơq Ađó ơi praaq:

“Kơi Aku ơi praaq ng'kóh kalóóng ganơt pagrâ janah ưng Aku,

‘… piđó e kah mơ bâân mót kalóóng rau dhêi drơq ưng Aku!’”

dhơ kơi ađek nôôq tarnêêng Ađó ơi têêng paxong tââq bhêêl tavaaih pleng katiêk. 4Taai ve dhiq Ađó ơi praaq pakơi ađô leq tangêi đu tapól:

“Lơq Yaang Pleng dhêi drơq dyóp rau tarnêêng Ađó tơk tangêi đu tapól.” 5Lơq machu dyơq dhiq mưi dham lââng:

“… Piđó e kah mơ ve bâân mót kalóóng rau dhêi drơq ưng Aku.”

6Kơi achêk, xók paraaq hươq dyơq ve đóng leq mưi phơn manưih đóng mót kalóóng rau dhêi drơq achêk, hơq nôôq manưih laloom hei biêh bâân truuih Taruuih Liêm ơi kah bâân mót taai kah xâng bóóp, 7nek Yaang Pleng vil ng'ket đóng mưi tangêi kah tadhơ, ngi đóók nek “Tangêi ađôk,” xók praaq dhiq Đa-viit xong ganah kaxe kamó n'jang đươnh, kơi paraaq ơi bâân móón têêh ahei:

“Tangêi ađôk, la nôôq akóón xâng dhariêng Ađó,

nek óóq têêng nhâng lóóm nôôq akóón.”

8Ơi la Jô-suê ơi đââng tơk rau dhêi drơq đóng leq dhanuôr manưih, nek dhakơi Ađó ơi yươq praaq leq mưi tangêi lââng lơh tââq nôôq tarnêêng ađôk. 9Đóng hayơq, bhiêk dyơq ađek rau drơq dhêi Sa-baat koom đóng dhanuôr manưih ưng Yaang Pleng. 10Taai ngaai manưih ơi mót kalóóng rau dhêi drơq ưng Ađó, chênh manưih achêk kung dhêi drơq nôôq tarnêêng ađêi, thê kơi Yaang Pleng ting kơi palơq nôôq tarnêêng ưng Ađó. 11Kơi ađek, nôôq he phaai jêi tarang mót kalóóng rau dhêi drơq ađek, đóng óóq ngaai ting đuui kung pakơi tarnêêng kah xâng bóóp tôôh. 12Taai paraaq Yaang Pleng taluôn mamông, martek matiêng lơq xaan alơp lơh dyóp ađó bhươt bơơr pla. Tak kluôh kluông tơk mơ tablah ravaai palơq yaang, bhơt kagloon ng'haang palơq galua, lơq ve n'jau haliq lêi nôôq karnóq palơq rau kiêng ưng lóóm kanóq. 13Kah ve ađó n'dreh m'ma nek kadrêi lââp toom mat Ađó. Palâh lóóiq, dyóp rau maar lalươh bhơt lơq ơi bâân tapakah toom mat ưng Ađó, nek Yaang hơq paraaq truuih đuui ưng nôôq palâh malóóm tơk.

14Kơi ađek, dyơq xók ve mưi takóh kadhâng bhanuôih bhơt liêm bhơt yaal ơi jalơh bhơt nôôq klaang pleng, nek Chuôq Jê-su Akóón Yaang Pleng, nek nôôq he phaai jư tamưng paraaq yuur praaq ưng ađêi. 15Taai eh rau nôôq he ve mưi takóh kadhâng bhanuôih bhơt liêm kah ve chóóm ka-er ayô nôôq rau dhur lóóm ưng nôôq he, palâh lóóiq nek Yaang ơi đơơp dharơơl galơơk kalóóng dyóp rau ting kơi pakơi nôôq he, hơq yươq ve matu lơt rauriq. 16Kơi ađek nek, palơq lóóm nhóól, nôôq he ve chóóm tơk đan tanơơt ơơn phươk liêm, đóng pei đơơp rau kayô ka-er lơq bâân lêi ơơn phươk kalóóng rau paq jóói dhalam xók kiêng.