Katu Bible Literal Text
Hê-bơ-rơ 3
Taai kơi ađek, nhan móón adhi anó sek tabah, nek nôôq manưih ve phơn kalóóng rau dhaloong tââq pleng, phaai chamet lêi leq Chanak Đââng Taruuih Yaang Pleng lơq Takóh Kadhâng Bhanuôih Bhơt Liêm ưng praaq móón nôôq he, hơq nek Chuôq Jê-su, xók lalua bhơt lóóm palơq Yaang ơi patơơt Ađó, kung thê kơi Môôi-se kalóóng đong Yaang Pleng. Taai Yaang ađô bâân đươi móón nek đaang đơơp palơq cha-iil tabah gamak lơh Môôi-se, kung kơi manưih têêng đong bâân bhi chap bơk lơh bhlơng marchơng palơq dhanong đong. Tââq ting dhanong đong nek bâân yuur kadhơng tââq mưi ngaai ađek, bơơi Yaang Pleng nek Yaang tavaaih ve dyóp rau n'dreh m'ma. Môôi-se nek bhơt lóóm kơi mưi dhơn ratơơq kalóóng bhơt đong ưng Yaang Pleng, đóng kơi mưi paraaq truuih đuui ưng nôôq rau e bâân praaq tơk leq tabhêêl nh'chró; bơơi Chuôq Paq Manưih, kơi mưi Chanak Akóón ting kơi palơq đong ưng Yaang Pleng (nôôq he nek đong ưng Ađó la nôôq he jư tamưng lóóm huuiq karơ lơq tarhơơnh leq rau lóóm rââm ưng ađêi). Taai ađek, pâng kơi Chuôq Yaang Liêm praaq:
“Tangêi ađôk, la nôôq akóón xâng dhariêng Ađó,
nek óóq têêng nhâng lóóm nôôq akóón
kơi kalóóng ganhuh panhôôn nhaauq,
vôôiq bhluuch ganah klêêu lêi dhiq kruung vơng
nek dhiq ama abhươp nôôq akóón ơi klêêu Aku tââq tarnêêng pajool,
hayơq piđó ơi lêi nôôq tarnêêng ưng Aku
bhluuch puôn jêt kamó. Taai achêk, Aku lóng kabhróónh bhlơng palơq dhong nooi ađek,
lơq Aku praaq: ‘Piđó bhiêk taluôn bâân tamôôiq têêng lơt xraang kalóóng lóóm ađêi,
hơq piđó ơi kah đơơp n'nal nôôq kalơng vôôiq ưng Aku.’
Kơi Aku ơi praaq ng'kóh kalóóng ganhuh pagrâ janah ưng ađêi:
‘… Piđó e kah mót kalóóng rau dhêi drơq ưng Aku!’”
Nhan móón adhi anó, phaai chagơn, e vaaih luônh lóóm kah huuiq lơt môôp e yuur vaaih dhiq mưi ngaai ađek kalóóng m'pơng adhi anó, hơq nek dhiq ngaai xooq changaai lơh tââq Yaang Pleng taluôn mamông. Dhơ kơi ađek, phaai tabhơơl lóóm xóng ađêi ting dyóp tangêi, đóng tơk bhêêl xók bhiêk dyơq bâân ngi-đóók nek “tangêi ađôk,” đóng yươq ngaai tââq m'pơng kalóóng adhi anó bâân têêng đóng nhâng lóóm tââq rau galơơk chachââr ưng matu lơt. Taai nôôq he ơi val xar nôôq manưih pâng phơn ưng Chuôq Paq Manưih, hơq alua nôôq he jư tamưng tââp tarnââp lóóm huuiq đóng n'nal ưng ađêi đóng patơk xariêq, kơi rau bâân truuih:
“Tangêi ađôk, la nôôq akóón xâng dhariêng Ađó,
óóq têêng nhâng lóóm nôôq akóón,
kơi kalóóng ganơt panhôôn nhaauq.”
Taai ngaai nôôq ađek ơơr kabhróónh Ađó xók ơi xâng? Kah ngaai lơh tââq tabhơt nôôq manưih ơi gluh lơh tââq Ai Kơp đươi Môôi-se alua? Dyơq Ađó ơi lóng pagrâ palơq ngaai nôôq bhluuch puôn jêt kamó? Alua eh rau nek palơq nôôq manưih têêng matu, hơq xaak chêt ưng piđó ơi kalơm plok kalóóng kruung vơng alua? Hayơq Ađó ơi praaq ng'kóh palơq nôôq ngaai ađek e kah bâân mót kalóóng dhêi drơq ưng Ađó, la eh rau palơq nôôq manưih kah xâng? Nôôq he lêi kơi piđó ơi kah ve đuôh đóng jađaang mót ơi taai lóóm kah huuiq.
Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.