Tarnêêng Nôôq Sưưq-đô 19

1Xók achêk, chiên val vaaih xók bhêêl A-bô-lô tơơt dhiq Kô-rin-tô, nek Phaau-lô, xong xók vôôiq gan nôôq kanóón dhiq hót piing, ađó vôôiq dhuônh tơk Ê-phê-sô lơq lum masôôq môôn-đô tôôh. 2Mandrươh, ađó praaq palơq piđó: “Xók ơi huuiq, adhi anó ve pei đơơp Chuôq Yaang Liêm môôiq kah?” Bơơi piđó ââi lóóiq ađó: “Kah, patơk mơ la ve Chuôq Yaang Liêm, nek nôôq yi kung kah glêh xâng tơk.” 3Ađó kung praaq: “Kơi ađek nek, adhi anó ơi đơơp pheep bap-teem n'đó?” Hayơq piđó ââi: “Pheep bap-teem ưng Jang.” 4Kơi ađek nek, Phaau-lô praaq: “Jang têêng pheep bap-teem leq rau klôôq lóóm, xók pachóóm đóng manưih dhanuôr leq Yaang xók bhral tatun ađó, buôn đóng piđó ve chóóm huuiq, achêk nek huuiq dhiq Chuôq Jê-su.” 5Lơq hayơq, xong xók xâng kơi ađek, piđó đơơp pheep bap-teem kalóóng dhanóók Chuôq Jê-su. 6Xók Phaau-lô lơơi têi dhiq piđó, nek Chuôq Yaang Liêm tơk dhiq piđó, n'drươh ađek piđó praaq nôôq rau dhariêng lââng palơq praaq đââng taruuih. 7Xók achêk, piđó ve tabhơt mơ majêt bơơr chanak padruuih.

8Xók achêk, xong xók vôôiq mót kalóóng đong gươl, ađó bhiêk nhóól truuih pachóóm kalóóng pe kaxe, kluôh lók lơq pei lóóm chô leq katiêk ưng Yaang Pleng. 9Bơơi xók masôôq manưih bhiêk nhâng lóóm lơq kah kiêng huuiq, praaq tamôôp Taruuih toom ganơr manưih, nek ađó ơi pantua nôôq môôn-đô, viêr changaai tââq piđó, dyóp tangêi praaq tamóh xóng ađêi dhiq đong pahok Ti-ra-nu. 10N'drươh ađek, tarnêêng ađô ơi yuur vaaih kalóóng bơơr kamó, patơk mơ tabhơt nôôq ngaai mamông dhiq A-si maar bâân xâng paraaq Chuôq, miq manưih Jo Thaaiq palơq manưih Hi-laap. 11Yaang Pleng kung têêng nôôq mataai chrih lââng buôn tââq têi ưng Phaau-lô, 12tơk mơ pamơ bhaai dyuut mat môôiq bhaai chaguôk xuui leq ng'kar ađó bâân đââng tơk đóng nôôq ngaai mabinh nek ka-ai karuôq xooq tââq piđó, yaang môôp kung phaai gluh. 13Achêk xók, nôôq thêi viêng abhưi manưih Jo Thaaiq vôôiq leq đi leq tôôh kung raan gavơh nhan dhanóók Chuôq Jê-su dhiq nôôq manưih bâân yaang abhưi bóq, kơi ađô: “Aku yua đóng amei tââq dhanóók Jê-su hơq Phaau-lô truuih pachóóm.” 14(Bhêêl achêk, ve tapól akóón padruuih ưng abhươp Sê-va tôôh, mưi takóh kadhâng bhanuôih bhơt liêm manưih Jo Thaaiq, xók têêng tarnêêng ađô.) 15Bơơi ââi lóóiq, yaang môôp praaq palơq piđó, kơi ađô: “Aku n'nal Jê-su, aku kung n'nal Phaau-lô, bơơi nôôq pe nek ngaai?” 16Hayơq manưih hơq yaang môôp xók mót bóq, xong xók chruum leq piđó nek kóóp jư luch piđó, ađó karơ jơl lóóiq piđó, patơk mơ tanteek taheek lalôh lalut lơq bâân bhrê, phaai mut klôôn lơh tââq đong ađek. 17Achêk xók, tarnêêng ađô val kơi truuih chiên buôn xâng đóng tabhơt nôôq ngaai mamông dhiq Ê-phê-sô, miq manưih Jo Thaaiq palơq manưih Hi-laap. Rau kakhin kapơn n'toh dhiq tabhơt piđó, lơq dhanóók Chuôq Jê-su bâân bhi chap. 18Bơk ngaai kalóóng sôôq nôôq manưih ơi huuiq kung tơk, pakah matu lơt lơq truuih đuui nôôq tarnêêng ưng ađêi. 19N'drươh ađek, bơk manưih têêng tarnêêng abhô abhưi, xong xók gaboq bha-aar bhatơ ưng ađêi lóóiq, ơi óch toom mat dyóp ngaai. Palââng yaap janaaq kiiq ưng nôôq ađek, lơq piđó bâân lêi nek xââng bhaan đông baak. 20Kơi ađek hayơq, tââq mataai karơ, paraaq Chuôq tanđôôr bhươh lơh lơq karơ gamak.

21Xók achêk, dhalam xók nôôq tarnêêng ađô bâân paxong, Phaau-lô mưng karnóq kalóóng Yaang Liêm, chaang gan tơk Ma-xê-đoan lơq A-chaai, đóng vôôiq leq Jê-ru-sa-leem, xók praaq kơi ađô: “Xong xók aku ơi tơk dhiq ađek, nek aku kung kơng phaai vôôiq tham Rô-ma dyơq.” 22Kơi ađek hayơq, xong xók kayua vôôiq bơơr kalóóng sôôq nôôq manưih jóói poor ađêi, nek Ti-mô-thê lơq Ê-raat, tơk Ma-xê-đoan, nek chênh ađó ơi tơơt dhiq A-si dyơq mưi ganah.

23Bơơi tơk xók ganah ađek, mưi ganơt nhôôn nhaauq kah katưưiq ơi yuur vaaih pâng tơk Taruuih. 24Taai mưi nak manưih tôk baak achêk, achak Đê-mê-triiu, buôn têêng kabhêi yaang pađiil At-tê-miit palơq baak, ơi đââng lóóiq kah m'bưưiq jêên baak buôn baan đóng kabhuh manưih kóóch chan, 25hơq ađó ađek, xong xók krong nôôq manưih thơơq kalóóng tarnêêng ađô lóóiq, ơi móón: “Nhan móón nôôq pe, adhi anó n'nal kơi rau karvaan kabhôôq ưng nôôq he nek gluh tââq tarnêêng buôn baan ađô. 26Adhi anó kung lêi lơq xâng kơi kah mơ dhiq Ê-phê-sô, bơơi ngóq kơi plok dhiq A-si, ađó Phaau-lô ađô, xong xók pei lóóm, ơi têêng masôôq bơk manưih dhanuôr palâh lóóm, taai móón kơi nôôq rau ơi têêng tââq têi palââng eh rau nek yaang marau marâ. 27Bơơi ađek, chiên ađô eh meen nek rau pakhin đââng tơk dhariêng môôp ting kơi palơq tarnêêng ưng nôôq he, hơq patơk mơ ting kơi palơq đong bhanuôih yaang pađiil At-tê-miit karơ gamak xók kah bâân lêi rauriq. N'drươh ađek, rau cha-iil tabah ưng yaang pađiil hơq plok A-si, tơk luch pale katiêk bhuôih haanh, bơơi lalua ravang bil tich.” 28Bhêêl achêk, xong xók xâng kơi ađek nek vaaih kơi bablôh yuur pagrâ, piđó lalơu kơi ađô: “Karơ gamak alua yaang pađiil At-tê-miit ưng manưih Ê-phê-sô!” 29Hayơq paluch kanóón bâân bing rau nhôôn nhaauq achêk, lơq manưih dhanuôr tapajươk xóng ađêi vôôiq tơk đong babóóch chachơp, kóóp miq Gaai-uut lơq A-ri-taak, manưih Ma-xê-đoan, nek nôôq parjơơk ting vôôiq ưng Phaau-lô. 30Bơơi xók Phaau-lô kiêng pakah mat dhiq m'pơng dhanuôr manưih, nek nôôq môôn-đô kah lơơi đóng ađó têêng kơi ađek. 31Dyơq masôôq nôôq kuôn A-si, nek nôôq parjơơk ưng ađó, palơq kơi praaq truuih tơk ađó, kung ơi pató pachóóm ađó óóq tư pajaau ađêi leq đong babóóch chachơp achêk. 32Kơi ađek hayơq, manưih ađô manưih tôôh bhiêk yuur lalơu dyóp kơi n'tua rau, taai paluch ganơr manưih nek xók nhôôn nhaauq, lơq bơk ngaai kah n'nal ađêi krong gaboq lóóiq taai hau rauriq. 33Xók achêk, m'bưưiq manưih tââq kabhuh ganơr manưih praaq kluôh rau vaaih đóng A-lek-xan-đơ, xong xók manưih Jo Thaaiq dhalươq ađó dyók hót laloom, hayơq A-lek-xan-đơ, kavah têi pahêq, xók kiêng praaq pakah palơq manưih dhanuôr. 34Bơơi xók bâân n'nal kơi ađó ađô nek manưih Jo Thaaiq, nek mưi dhariêng lalơu karơ tââq tabhơt kabhuh piđó ơi yuur vaaih tơk bhluuch bơơr jơ: “karơ gamak alua yaang pađiil At-tê-miit ưng manưih Ê-phê-sô.” 35Dhơ kơi ađek, xók kuôn xaraq bha-aar ơi têêng ganơr manưih parngau lóóiq, ađó pei praaq: “Nhan móón nôôq pe, nôôq manưih dhanuôr Ê-phê-sô, alua ve ngaai đu hơq kah n'nal kơi kanóón Ê-phê-sô nek manưih jư đong ưng yaang pađiil At-tê-miit karơ gamak lơq kabhêi tââq pleng n'tôq? 36Kơi ađek nek, taai nôôq chiên ađô nek kah chóóm kah đươi, hayơq rau kơng tââm đóng nôôq pe nek phaai jư gơt ađêi lơq óóq têêng rauriq tahươk tahơn. 37Tââq nôôq pe ơi đââng nôôq manưih ađô tơk, hơq piđó eh rau nek manưih tatông kalóóng đong bhanuôih, kung eh rau nek manưih praaq tamôôp yaang pađiil ưng nôôq he. 38Đóng hayơq, la Đê-mê-triiu lơq kabhuh thơơq kóóch chan palơq ađó achêk ve paraaq kaauq ngaai, nek nôôq dham xêi xanêi dyơq xók bâân lóng palóng, lơq kung ve nôôq kuôn kadhâng koq kanóón; phaai lơơi piđó takaauq xóng piđó. 39Dyơq la nôôq pe xók kiêng nhan hau rau leq nôôq tarnêêng lââng, nek ađó e bâân praaq xêi kalóóng parhoop ting kơi ơi xêi. 40Ơi lalua, nôôq he ve bhêêl bâân patu têêng nhôôn nhaauq tapâng tơk tarnêêng tangêi mađôk, xók kah ve hau taai rauriq, hơq tââq rau ađek, nôôq he e kah rau chóóm yuur pakah paraaq kluôh xêi đóng rau kaboq krong bil charnap liêm ađô.” 41Xong xók praaq kơi ađek, ađó đóng chô ganơr manưih krong gaboq achêk.