2 Kô-rin-tô 7

1Taai ađek, nhan móón adhi anó bơk nh'nhơr, taai bâân pakala nôôq paraaq hươq achêk, nôôq he phaai têêng pasek chênh ađêi lơh dyóp rau dham anhuq ưng dyaang achak lơq lóóm yaang, xók têêng rau sek tabah hayơq bhơt liêm dhiq rau bhi kakhin Yaang pleng.

2Phaai pơơh lóóm đóng nôôq yi! Nôôq yi ơi yươq glêh tabhrê karchêt mưi ngaai; nôôq yi ơi yươq glêh têêng bil lóóm mưi ngaai; nôôq yi ơi yươq kapươk malua mưi ngaai. 3Aku kah praaq buôn malóóm tơk tarnêêng patu adhi anó; taai aku ơi glêh praaq loom kơi adhi anó tơơt kalóóng lóóm nôôq yi, buôn chêt palơq xóng ađêi, lơq mamông palơq xóng ađêi. 4Rau huuiq ganơơm ưng aku dhiq adhi anó nek bơk; rau đu tarhơơnh ưng aku leq adhi anó nek gamak. Aku ơi bâân xưa raai rau bhơơl pahêêl. Aku bâân xưa bơk bhuui marhaal ađô kalóóng dyóp rau bhrê hư ưng nôôq yi.

5Ơi kah xêi xong xók aku vôôiq tơk Ma-xê-đoan, achak araang nôôq yi ơi kah ve bâân dhêi drơq m'bưưiq m'bâ, bơơi bâân kadhaap nhok kalóóng dyóp hót, bơk tarjeng tarjơl hót nguôi, kakhin kapơn hót kalóóng. 6Dhơ kơi ađek. Yaang Pleng, Yaang bhơơl pahêêl nôôq ngaai bhayuih lóóm, ơi bhơơl pahêêl nôôq yi palơh tarnêêng Tiit vôôiq tơk ađô, 7hơq kah mưi tââq tarnêêng tơk ađô ưng ađó achêk, bơơi hayơq tââq rau pahêêl lóóm hơq ađó achêk ơi bâân bhơơl pahêêl tơơt dhiq adhi anó, xók truuih đóng nôôq yi leq lóóm rââm lêi ưng adhi anó, rau nhiim gavơh ưng adhi anó, lóóm jêi tarang ưng adhi anó ơi taai aku, đóng patơk mơ aku dhaang bâân bhuui marhaal lơh dyơq.

8Taai patơk mơ la aku têêng đóng adhi anó ranguôq kalóóng thơ, nek aku kah châq mơ. Patơk mơ la aku biêh châq (aku lêi kơi tala thơ ađek ơi têêng adhi anó ranguôq, dhơ chapiên kalóóng maxưưiq giêl), 9nek xók ađôk, aku bhuui marhaal, eh rau taai adhi anó ơi bâân ranguôq lóóm, bơơi tââq adhi anó ơi bâân ranguôq lóóm hơq malóóm tơk rau klôôq lóóm. Taai adhi anó ơi bâân ranguôq lóóm ting Yaang Pleng, hơq đóng adhi anó ve nh'jau kah đơơp hư mahaai kalóóng bhơt dhơ dharau tââq dhiq nôôq yi. 10Tââq rau ka-ai ranguôq ting Yaang Pleng têêng vaaih rau klôôq lóóm hơq malóóm tơk rau paq jóói hơq yươq rau châq; bơơi yuur ka-ai ranguôq ưng manưih hóng katiêk nek đââng lóóiq akan chêt. 11Ơi lêi tôôh, palơq rau tarnêêng ađek, xók bâân têêng đóng ka-ai ranguôq ting Yaang Pleng, nek ơi đââng lóóiq kalóóng adhi anó lóóm jêi tarang bơk kah mơ móón: dyơq ve rau paq ađêi ng'kơi, rau yuur pagrâ ng'kơi, rau bhi kakhin ng'kơi, lóóm đương rââm n'đó kơi, lóóm puih kadrók n'đó kơi, tarnêêng praaq teng n'đó kơi! Kalóóng dyóp rau, adhi anó ơi pakah lêi ađêi nek tabah sek leq bhiêk tarnêêng ađô. 12Kơi achêk hayơq, patơk mơ dhơ aku ơi xaraq đóng adhi anó, nek eh rau ơi taai manưih ơi têêng praaq môôp lơt, môôiq ơi taai manưih ơi bâân têêng mahaai, bơơi nek ơi taai lóóm jêi tarang ưng adhi anó, hơq nek rau xal mat nôôq yi, ơi bâân tapakah đóng adhi anó toom mat Yaang Pleng. 13Đươi rau ađô, nôôq yi bâân pahêêl lóóm.

Mat lââng, nek palơq rau pahêêl lóóm ưng chênh ađêi, nôôq yi ơi dhaang bâân bhuui yayar bơk lơh dhiq rau bhuui ưng Tiit, taai lóóm karnóq ưng ađó achêk ơi bâân têêng đóng khe rathaai tââq pabhơt adhi anó. 14Ơi la aku glêh pajơơr ve rau palơq ađó achêk leq adhi anó, nek aku ơi yươq kachiit mat, bơơi kơi dyóp rau nôôq yi ơi praaq palơq adhi anó kalóóng rau dhalam lalua, nek paraaq yuur pajơơr ưng nôôq yi kung ơi bâân pakah rau dhalam lalua kơi achêk nek palơq Tiit. 15Lơq lóóm nh'nhơr ưng ađó achêk đóng leq adhi anó nek xưa raai lơh dyơq, xók hei lóóiq rau xâng bóóp ưng pabhơt adhi anó, n'đó kơi hơq adhi anó ơi pơh yaauq ađó achêk palơq rau kakhin kapơn lơq hayer hatơq. 16Aku bhuui marhaal taai aku huuiq ganơơm dhiq adhi anó kalóóng dyóp rau tarnêêng.