2 Kô-rin-tô 6

1Mat lââng, dyơq xók têêng tarnêêng palơq Ađó, nôôq yi kung mââl nhan adhi anó óóq đơơp ơơn phươk liêm ưng Yaang Pleng kơi kah malơơi — 2Ơi Ađó praaq:

“Xók bhêêl bâân ââi, Aku ơi tameng xâng buôn ââi lóóiq akóón,

lơq kalóóng tangêi paq jóói, Aku ơi poor jóói akóón.”

“Tôôh, xók ađôk nek bhêêl bhuui ââi. Tôôh, xók ađôk nek tangêi paq jóói.” —

3palơq nek kah têêng tavaaih kơi lơt môôp kalóóng bhơt dhơ dharau, buôn tarnêêng têêng ưng nôôq yi yươq bâân xuôq trêh. 4Klóóih dhiq ađek, kalóóng dyóp rau, nôôq yi pakah ađêi kala kơi nôôq dhơn ratơơq ưng Yaang Pleng: kalóóng rau đơơp juôn lóng gamak, kalóóng bơk bhrê hư, kalóóng bơk paraaq kalơng kariing, kalóóng vaaih kadhaap jarnah, 5kalóóng nôôq gamuôn tanaach, kalóóng dhiq đong kanam, kalóóng dhiq nhôôn nhaauq, kalóóng tarlum kadhaap nhok, kalóóng nôôq hayum bil bêch, kalóóng nôôq ganhuh tabhuch ha-ul, 6kalóóng rau tabah sek, kalóóng rau tarbech n'nal, kalóóng rau jruôn parngau, kalóóng rau moor dha-iiq, kalóóng Chuôq Yaang Liêm, kalóóng lóóm tanhơr drêh lóóm; 7klóóng paraaq pâng dhalam, kalóóng mataai karơ ưng Yaang Pleng; đươi nôôq dhaau bhươt mamông liêm dhiq têi atươm lơq têi ađaai, 8tââq tarhơơnh lơq kađiq kachiit, tââq tanđôôr môôp palơq tanđôôr liêm; kơi manưih galơơk chachââr, hơq vil ađaang huuiq ganơơm; 9kơi kah bâân tơk n'nal, hơq vil bâân bơk ngaai đơơp n'nal; kơi đan chêt, hơq — tôôh! — dyơq mamông; kơi đơơp kóóp jarnah, hơq vil yươq bâân leng chêt; 10kơi đơơp ranguôq jarnah, bơơi taluôn bhuui marhaal; kơi ngeeo ha-ul, bơơi têêng đóng bơk ngaai val kơi karvaan; kơi kah ve rau, hơq vil bâân đươi dyóp rau.

11Adhi anó manưih Kô-rin-tô ơơi, bóóp nôôq yi ơi yuur pơơh nek palơq adhi anó; lóóm nôôq yi ơi bâân lương tabhươh. 12Eh rau adhi anó bâân hiin châq tââq nôôq yi, bơơi adhi anó bâân hiin châq tââq lóóm ađêi. 13Kơi achêk hayơq, kalóóng rau chróót ơơn đóng ađaang, aku praaq kơi ngóq palơq akóón paniên, adhi anó kung phaai lơơi chênh ađêi bâân talương tabhươh.

14Óóq đơơp bak et kah glap palơq manưih kah huuiq. Ơi rau bhơt liêm lơq kah magani ve rau chóóm mưi mađó? Môôiq kalaaq brương palơq bóng kanam ve n'đó rau pajoop madhiq? 15Chuôq Paq Manưih lơq Bê-li-aan ve rau chóóm mađó madhiq? Môôiq manưih huuiq ve rau phơn madhiq palơq manưih kah huuiq? 16Đong bhanuôih ưng Yaang Pleng nek palơq yaang kabhêi ve rau chóóm mađó? Ơi nôôq he nek đong bhanuôih ưng Yaang Pleng taluôn mamông, dhiêp kơi Yaang Pleng ve praaq kơi ađô:

“Aku e tơơt jaq lơq vôôiq val dhiq m'pơng piđó;

Aku e nek Yaang Pleng ưng piđó,

lơq chênh piđó e nek dhanuôr Aku.”

17Kơi achêk hayơq,

“Phaai vôôiq gluh tââq m'pơng kabhuh piđó

lơq đơơp tablah palơq piđó,” Chuôq praaq,

“lơq óóq drơơn tơk rau đu anhuq,

hayơq Aku e pơh đơơp nôôq akóón.”

18Lơq

“‘Aku e nek Ama nek palơq nôôq akóón,

lơq nôôq akóón e nek akóón padruuih, akóón pađiil nek palơq Aku,’

Chuôq Bhơt Mataai praaq.”