2 Kô-rin-tô 4

1Ơi taai rau achêk, xók jư tarnêêng ađô, ting kơi n'đơq mơ hơq nôôq yi ơi bâân ka-er kayô, nôôq yi yươq druôi nhưh bhayuih lóóm. 2Klóóih leq ađek, nôôq yi ơi kah đươi nôôq rau chóóm kachiit mat kadrêi lââp, xók yươq cha tơơt kalóóng rau kacheel-kachool, kung kah praaq palơt paraaq Yaang Pleng, bơơi nek dhiq tarnêêng truuih đuui paraaq dhalam, tư paliêm paraaq chênh ađêi đóng lóóm karnóq dyóp ngaai toom mat Yaang Pleng. 3Bơơi patơk mơ la Taruuih Liêm ưng nôôq yi ve bâân pađơp pađơl, hơq achêk nek ơi bâân pađơp pađơl dhiq m'pơng nôôq manưih hư bil, 4hơq m'pơng kalóóng kabhuh piđó, yaang đơơi ađôk ơi têêng bhơơm lóóm karnóq ưng nôôq manưih kah huuiq ađek, tơk mơ taklaaq brương taruuih liêm cha-iil tabah ưng Chuôq Paq Manưih, Yaang nek a-ô ưng Yaang Pleng, kah klaaq dyóól dhiq piđó. 5Ơi nôôq yi kah truuih đuui chênh ađêi, bơơi nek Jê-su Chuôq Paq Manưih, hơq nek Chuôq, hayơq kala achak nôôq yi kơi nôôq dhơn ratơơq ưng adhi anó ơi taai Chuôq Jê-su. 6Tââq Yaang Pleng, Yaang ơi praaq: “Taklaaq brương e klaaq dyóól tââq kalóóng bóng kanam,” nek Yaang ơi klaaq dyóól kalóóng lóóm nôôq yi malóóm tơk tarnêêng têêng tabrương rau lêi n'nal leq cha-iil tabah ưng Yaang Pleng dhiq mat Jê-su Chuôq Paq Manưih.

7Bơơi nôôq yi kađôôq karvaan akiiq ađô kalóóng nôôq beq ajraai katiêk aliêng, buôn kataai gamak jalơh lơh ưng mataai karơ achêk nek tââq Yaang Pleng, eh rau tââq nôôq yi. 8Nek nôôq manưih đơơp gariêq kaxiêq kalóóng dyóp tââq, bơơi yươq bâân dhur lóóm; bâân karaang kakhin, bơơi yươq bil lóóm rââm; 9bâân chanaaq janah, bơơi yươq bâân m'peq lơơi; bâân kóóp m'poh, bơơi yươq chêt bil; 10taluôn đââng kalóóng achak araang ađêi akan chêt ưng Chuôq Jê-su vôôiq plok dyóp dhiq, buôn parmông ưng Chuôq Jê-su kung ve chóóm bâân tapakah kalóóng achak araang nôôq yi; 11ơi dhơ xók mamông, nôôq yi taluôn bâân pajaau đóng rau akan chêt ơi taai Chuôq Jê-su, buôn parmông ưng Chuôq Jê-su kung bâân tapakah kalóóng dyaang achak ting xâng akan chêt ưng nôôq yi. 12Kơi achêk, akan chêt veq matêêng kalóóng nôôq yi, hayơq rau parmông nek tơơt kalóóng adhi anó. 13Bơơi xók ve mađó mưi lóóm kanóq ưng lóóm huuiq ting paraaq ơi xaraq: “Aku huuiq, hayơq aku praaq”. Nôôq yi kung huuiq, hayơq nôôq yi kung praaq, 14taai n'nal kơi Yaang ơi têêng Chuôq Jê-su mamông lóóiq kung e têêng nôôq yi mamông lóóiq palơq Chuôq Jê-su, lơq e pakah mat nôôq yi nek palơq adhi anó. 15Alua, dyóp tarnêêng ađek nek ơi taai adhi anó, buôn ơơn phươk liêm, xong xók vaaih bơk dhiq bơk manưih lơh, ve chóóm têêng rau ma-ơơn tơk mơ xưa raai đóng leq cha-iil tabah ưng Yaang Pleng.

16Kơi achêk, nôôq yi yươq nhưh nhok bil lóóm. Dhơ kơi ađek, patơk mơ la manưih hót nguôi ưng nôôq yi xók bâân óóch xaraam, kơi achêk bơơi manưih hót kalóóng ưng nôôq yi dyơq bâân têêng tame ting dyóp tangêi. 17Ơi bhrê hư m'bưưiq hangiil xók bhêêl ađek ưng nôôq yi ơi đââng lóóiq đóng nôôq yi parbơk cha-iil tabah tơk nh'chró, kah magađơq, kah lơq marchơng đuôh. 18Xók nôôq yi kah chamet lóóm lêi nôôq rau chóóm lêi, bơơi nek nôôq rau kah chóóm lêi. Taai nôôq rau chóóm lêi nek maxưưiq giêl, hayơq nôôq rau kah chóóm lêi nek taluôn luôn.