Katu Bible Literal Text
1 Jang 5
La ngaai huuiq kơi Chuôq Jê-su nek Chuôq Paq Manưih hơq bâân gluh n'niên tââq Yaang Pleng, lơq la ngaai nh'nhơr Yaang ơi gluh n'niên ađêi hơq kung nh'nhơr manưih ơi bâân gluh n'niên taai Ađó. Ve rau ađô, nôôq he n'nal kơi ađêi nh'nhơr akóón anaaq Yaang Pleng nek xók nôôq he nh'nhơr Yaang Pleng lơq huuiq jư nôôq gani pachóóm ưng Ađó. Taai ađôk, nek rau bhi nh'nhơr Yaang Pleng, achêk nek nôôq he huuiq jư nôôq gani pachóóm ưng Ađó. Nôôq gani pachóóm ưng Ađó eh rau nek ganưi haleng. Ơi la ngaai bâân gluh n'niên tââq Yaang Pleng hơq đươk lơh manưih hóng katiêk. Lơq ađôk nek rau đu jeng đươk, nek lóóm huuiq ưng nôôq he, nek rau ơi đươk lơh manưih hóng katiêk. Hơq ngaai nek manưih đươk lơh manưih hóng katiêk, La eh rau manưih huuiq kơi Chuôq Jê-su nek Akóón Yaang Pleng? Achêk nek Yaang ơi bhral tââq đơơk lơq ahaam: Chuôq Paq Manưih Jê-su — eh chapiên tââq đơơk, bơơi nek tââq đơơk lơq tââq ahaam. Lơq Yaang Liêm nek Yaang truuih đuui taai Yaang Liêm nek paraaq dhalam. Taai kơi achêk ve pe ngaai truuih đuui: Yaang Liêm palơq đơơk lơq ahaam; bơơi bhơt pe maar nek kiêng praaq mưi rau. La nôôq he đơơp paraaq taruuih ưng akóón manưih, hơq paraaq taruuih ưng Yaang Pleng nek liêm gamak lơh. Taai ađôk nek paraaq truuih ưng Yaang Pleng, ađek nek Ađó ơi truuih đuui leq Akóón Ađó. Ngaai huuiq tơk Akóón Yaang Pleng nek ve paraaq truuih ađek kalóóng manưih achêk. Ngaai kah huuiq Yaang Pleng hơq đóng Ađó nek đu praaq chachââr, taai manưih achêk kah huuiq leq paraaq truuih đu Yaang Pleng ơi pakah leq Akóón Ađó. Lơq ađôk nek paraaq truuih, achêk nek Yaang Pleng ơi đóng leq nôôq he parmông nh'chró, lơq parmông achêk tơơt kalóóng Akóón Ađó. Ngaai ve Akóón nek ve parmông. Ngaai kah ve Akóón Yaang Pleng nek kah ve parmông.
Aku ơi xaraq bơơr pe paraaq ađô đóng adhi anó, nek đóng nôôq manưih huuiq dhiq dhanóók Akóón Yaang Pleng, đóng adhi anó n'nal kơi ađêi ve parmông nh'chró. Dyơq ađôk nek rau huuiq mưng đu nôôq he ve tââq Ađó, ađek nek la nôôq he gavơh nhan mak rauriq ađek ting karnóq kiêng Ađó, hơq Ađó xâng nôôq he. Lơq la nôôq he n'nal kơi Ađó xâng nôôq he, dhơ nôôq he gavơh nhan mak rau, nek nôôq he n'nal kơi ađêi bâân đơơp nôôq rau gavơh nhan đu ađêi ơi nhan panhel tââq Ađó. La ngaai lêi ngaai adhi anó ađêi têêng mưi matu yươq tơk mơ chêt, hơq manưih ađek e gavơh nhan, lơq Yaang Pleng e đóng parmông leq manưih adhi anó tôôh, nek manưih têêng lơt yươq tơk mơ chêt. Ve mưi matu tơk mơ chêt aku kah móón kơi: manưih ađek kơng gavơh nhan leq matu achêk. Dyóp rau kah liêm nek matu lơt, lơq ve lơt yươq tơk mơ chêt.
Nôôq he n'nal kơi la ngaai ơi bâân n'niên gluh tââq Yaang Pleng nek kah tagêi têêng lơt, Bơơi Yaang biêh n'niên gluh tââq Yaang Pleng jư lêi manưih achêk, lơq abhưi kah chóóm kaxuui tơk ađó. Nôôq he n'nal kơi ađêi mađó leq Yaang Pleng, dyơq bhơt hóng katiêk chakoh raraal abhưi. Bơơi nôôq he n'nal kơi Akóón Yaang Pleng ơi bhral lơq ơi đóng leq nôôq he tabech n'nal, đóng nôôq he ve chóóm đơơp n'nal Yaang Lalua dhalam. Lơq nôôq he tơơt kalóóng Yaang Lalua Dhalam, nek kalóóng Akóón Ađó, nek Jê-su Chuôq Paq Manưih. Akóón achêk nek Yaang Pleng Lalua Dhalam, lơq nek parmông nh'chró. Nôôq akóón ơơi, phaai jư ađêi tââq kabhêi.
Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.