Skip to content
BibleKenya

Katu Bible Literal Text

1 Jang 3:1

Verse 1 is marked below, with the whole chapter around it. Read from the start

Phaai lêi Ama ơi đóng lóóm tanhơr n'đó mơ dyơq đóng nôôq he, patơk mơ nôôq he bâân đóók nek akóón Yaang Pleng, lơq nôôq he alua kơi achêk. Ơi taai kơi ađôk, manưih hóng katiêk kah n'nal nôôq he, Taai manưih hóng katiêk kah n'nal Ađó. Adhi anó nh'nhơr bơk, xók ađôk nôôq he nek akóón anaaq Yaang Pleng, dyơq nôôq he e nek ng'kơi hơq kung kah ơi bâân tapakah. Nôôq he n'nal kơi xók Ađó bhral, nôôq he e xar vaaih thê kơi Ađó, taai nôôq he e lêi Ađó kơi Ađó biêh ve. Lơq dhơ dha ngaai ve parââm ađô dhiq Ađó, nek tư têêng đóng ađêi tabah sek, kơi Ađó nek tabah sek. Dhơ dha ngaai têêng lơt kung nek têêng rau kah n'nal gani. Alua kơi achêk, matu lơt nek rau kah n'nal gani. Adhi anó n'nal kơi chênh Ađó ơi bhral đóng pei lơơi matu lơt vaq, lơq matu lơt kah tơơt kalóóng Ađó. La ngaai bhiêk tơơt kalóóng Ađó nek yươq taluôn têêng lơt. La ngaai bhiêk têêng lơt nek kah glêh lêi Ađó, kung kah glêh n'nal Ađó. Nôôq akóón ơơi, óóq đóng ngaai dharơơl galơơk nôôq akóón vôôiq xraang lơt. Ngaai têêng rau bhơt liêm nek bhơt liêm, kơi chênh Ađó nek bhơt liêm. Ngaai bhiêk têêng lơt nek mađó lơq abhưi, taai abhưi ơi têêng lơt tââq tarnââp. Taai kơi ađek, Akóón Yaang Pleng ơi bhral đóng pahư tabil tarnêêng ưng abhưi. La ngaai ơi bâân gluh n'niên tââq Yaang Pleng nek kah bhiêk têêng lơt taai kachuur mamông ưng Ađó taluôn tơơt kalóóng manưih ađek. Lơq manưih ađek kah chóóm taluôn têêng lơt taai ơi bâân gluh n'niên tââq Yaang Pleng. Ve rau ađô akóón anaaq Yaang Pleng lơq akóón anaaq abhưi abhóch ve rau pantua drêh dróói: La ngaai kah têêng rau bhơt liêm nek kah mađó leq Yaang Pleng, lơq đu kah nh'nhơr adhi anó ađêi kung kơi achêk. Taai ađôk nek taruuih liêm đu nôôq akóón ơi xâng tââq bhêêl tarnââp, ađek nek nôôq he phaai tanhơr xóng ađêi, óóq kơi Ka-iin, đu mađó leq abhưi lơq ơi leng adhi ađêi. Hau rau kơi hơq ađó ơi leng adhi ađêi? Achêk nek taai nôôq tarnêêng têêng ưng ađó nek aak, bơơi nôôq tarnêêng ưng adhi ađó nek bhơt liêm.

Adhi anó ơơi, óóq chrih lêi la manưih hóng katiêk gaam geet adhi anó. Nôôq he n'nal kơi ađêi ơi lơh gluh tââq akan chêt hơq mót kalóóng parmông, ơi taai nôôq he tanhơr adhi anó ađêi. Ngaai kah nh'nhơr nek biêh tơơt kalóóng akan chêt. La ngaai geet adhi anó ađêi nek đu leng manưih, lơq adhi anó n'nal kơi dyóp ngaai đu leng manưih maar kah ve parmông nh'chró tơơt kalóóng ađêi. Taai rau ađô nôôq he bâân n'nal lóóm tanhơr achêk nek chênh Ađó ơi đơơp chêt parhââm mamông ưng Ađó taai nôôq he. Nôôq he kung kơng đơơp chêt parhââm mamông ađêi taai nôôq adhi anó. Bơơi ngaai ve drươp karvaan hóng katiêk lơq lêi mưi chanak adhi anó ađêi xók kiêng chana tarmông bơơi vil kađơp tamưng lóóm ađêi palơq manưih adhi anó achêk, nek ng'kơi têêng lóóm nh'nhơr ưng Yaang Pleng taluôn tơơt kalóóng manưih ađek chóóm? Nôôq akóón ơơi, óóq nh'nhơr palơq paraaq môôiq dhiq tu bưưr tu n'taak, bơơi palơq tarnêêng têêng lơq paraaq dhalam. Ve ađek, nôôq he e n'nal kơi nôôq he mađó leq paraaq dhalam lơq nôôq he e têêng tamưng lóóm ađêi toom mat Ađó, ơi la lóóm nôôq he xêi lơt chênh ađêi, nek ng'kơi Yaang Pleng nek gamak lơh lóóm nôôq he lơq Ađó n'nal drêh dyóp tarnêêng. Adhi anó nh'nhơr bơk, la lóóm ađêi kah xêi lơt, nek nôôq he ve rau grâ nhóól malóóm leq Yaang Pleng. Lơq dhơ dharau nôôq he gavơh nhan nek nôôq he bâân đơơp tââq Ađó, taai nôôq he huuiq jư nôôq gani pachóóm ưng Ađó lơq yuur têêng nôôq rau Ađó iêm lóóm toom mat Ađó. Lơq ađôk nek gani pachóóm ưng Ađó, achêk nek: Nôôq he phaai huuiq achak Akóón Ađó, nek Jê-su Chuôq Paq Manưih, lơq lóóm tanhơr xóng ađêi dhiêp kơi Ađó ơi truuih gani pachóóm đóng nôôq he. Ngaai huuiq jư nôôq gani pachóóm ưng Ađó nek bhiêk tơơt kalóóng Yaang Pleng, lơq Ađó kalóóng manưih ađek. Lơq ve rau ađô, nôôq he n'nal kơi Ađó bhiêk tơơt kalóóng nôôq he nek tââq Yaang Liêm đu Ađó ơi đóng leq nôôq he.

Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.