1 Kô-rin-tô 2

1Nhan móón adhi anó, bhêêl tơk palơq adhi anó, aku kung ơi kah vôôiq palơq rau dhơuq yaal ưng paraaq bóóp môôiq ưng rau tabech galang, xók truuih karơ đóng adhi anó rau dhơuq lââp ưng Yaang Pleng. 2Taai tơơt m'pơng kalóóng adhi anó, aku ơi dhakơi kah n'nal rauriq chapiên Jê-su Chuôq Paq Manưih lơq Ađó ơi bâân tateeng đinh dhiq n'lóóng m'baang chatông. 3Aku kung ơi tơơt palơq adhi anó kalóóng rau dhur lóóm, kalóóng vaaih kakhin kapơn lơq hayer hatơq bhlơng. 4Paraaq praaq ưng aku lơq rau truuih pachóóm ưng aku kah đuôh mơ nôôq gluh paraaq palââng đơơp xâng ưng lóóm karnóq bhriêl tabech, bơơi nek palơq rau pakah lêi ưng Yaang Liêm lơq mataai raman, 5buôn lóóm huuiq adhi anó yươq tơơt dhiq rau tabech galang ưng akóón manưih, hơq nek dhiq mataai raman ưng Yaang pleng.

6Bơơi m'pơng nôôq manưih taha tabech, nôôq yi truuih rau tabech galang, hơq eh rau rau tabech galang ưng đơơi ađôk, kung eh rau ưng nôôq manưih kadhâng akoq đơơi ađôk, nek nôôq manưih bâân chêt bil aq. 7Klóóih dhiq ađek, nôôq yi truuih pachóóm rau tabech galang ưng Yaang Pleng, kalóóng rau lalââp, nek rau ơi bâân takadrêi lââp hơq Yaang Pleng ơi ravang lơơi tââq laloom nôôq klaang đơơi koom đóng rau cha-iil tabah ưng nôôq he, 8nek rau hơq kah mưi ngaai kalóóng nôôq kabhuh kadhâng akoq ưng đơơi ađôk bâân n'nal, ơi la piđó n'nal, nek hơq alua piđó ơi kah teeng đinh Chuôq cha-iil tabah dhiq m'baang chatông. 9Dhơ kơi ađek, kơi ve paraaq xaraq:

“Rau mat kah lêi,

katór kah xâng,

lơq kah yuur vaaih kalóóng lóóm manưih,

nek nôôq rau hơq Yaang Pleng ơi ravang lơơi đóng nôôq ngaai nh'nhơr Ađó.”

10Tââq Yaang Pleng ơi pakah đóng nôôq yi dhiq Yaang Liêm. Taai Yaang liêm chamet lêi dyóp rau, chênh tabhơt nôôq rau lââp dhơuq ưng Yaang Pleng. 11Ơi ngaai m'pơng kalóóng akóón manưih bâân n'nal nôôq rau kalóóng mưi chanak, la eh rau nek lóóm karnóq ưng manưih ađek hót kalóóng achak ađêi? Kung kơi achêk, kah ngaai đơơp n'nal nôôq rau mađó ưng Yaang Pleng, chapiên Yaang Liêm ưng Yaang Pleng. 12Bơơi nôôq yi kah ơi đơơp đươi yaang ưng manưih hóng katiêk ađôk, hơq nek Yaang Liêm bhral tââq Yaang Pleng, buôn nôôq yi ve chóóm n'nal nôôq rau bâân đóng kliim kagóh tââq Yaang Pleng đóng nôôq he. 13Kung nek nôôq rau hơq nôôq yi truuih pachóóm, eh rau palơq rau pató pachóóm tââq nôôq paraaq bóóp tabech galang ưng akóón manưih, bơơi nek palơq rau pató pachóóm ưng Yaang Liêm, xók kluôh pakah nôôq rau đuui Chuôq tââq nôôq paraaq đuui Chuôq. 14Nôôq manưih ting kơi ng'kar m'bech kaxu nek kah pei đơơp nôôq rau mađó leq Yaang Liêm ưng Yaang Pleng, taai piđó nek rau ngôôk ngaak nek palơq manưih achêk, lơq manưih achêk kah ve chóóm đuôh buôn n'nal tââq piđó phaai bâân chamet lêi, ting kơi đuui Chuôq. 15Hayơq manưih đuui Chuôq chamet lêi dyóp rau, bơơi chênh ađêi nek yươq bâân ngaai chamet lêi.

16“Ơi ngaai bâân n'nal lóóm karnóq ưng Chuôq — ngaai e chaleq pachóóm Chuôq?”

Bơơi nôôq he nek ve lóóm karnóq ưng Chuôq Paq Manưih.