1 Kô-rin-tô 1

1Phaau-lô, bâân dhaloong têêng sưưq-đô ưng Jê-su Chuôq Paq Manưih tââq karnóq kiêng ưng Yaang Pleng, lơq manưih adhi anó Sôôt-theen, 2pagơơi đóng akóón dhơn Chuôq ưng Yaang Pleng tơơt dhiq Kô-rin-tô, nek nôôq manưih ơi bâân sek liêm kalóóng Jê-su Chuôq Paq Manưih, hơq nek nôôq manưih huuiq bâân dhaloong, nek palơq dyóp manưih tơơt plok dyóp dhiq gavơh dhaloong dhanóók Chuôq nôôq he, nek Jê-su Chuôq Paq Manưih, nek Chuôq ưng piđó lơq ưng nôôq he. 3Rââm nhan ơơn phươk liêm lơq rau yươq rauha tââq Yaang Pleng, nek Ama nôôq he, lơq tââq Chuôq, nek Jê-su Chuôq Paq Manưih, tơơt palơq adhi anó.

4Aku taluôn ma-ơơn Yaang Pleng ưng aku leq adhi anó ơi taai ơơn phươk liêm ưng Chuôq, nek rau ơi bâân đóng leq adhi anó kalóóng Jê-su Chuôq Paq Manưih. 5Ơi kalóóng dyóp rau adhi anó ơi bâân têêng đóng karvaan ve kalóóng Ađó, kalóóng dyóp rau paraaq praaq lơq dyóp rau bhriêl n'nal, 6dhiêp kơi paraaq truuih đuui leq Chuôq Paq Manưih ơi bâân lêi alua dhakơi m'pơng kalóóng adhi anó. 7Tơk mơ, adhi anó yươq tabhuch hat dhiq dhơ dharau ơơn Chuôq đóng, xók jêi tarang rââm đương rau tapakah ưng Chuôq nôôq he, nek Jê-su Chuôq Paq Manưih, 8nek Yaang kung e têêng adhi anó tamưng đóng tơk tatun xariêq, đóng óóq dhiq trêh teng kalóóng tangêi ưng Chuôq nôôq he, nek Jê-su Chuôq Paq Manưih. 9Yaang Pleng nek yươq tadhơ; tââq Ađó hơq adhi anó ơi bâân dhaloong mót kalóóng dhiq tơơt cha palơq Akóón ưng Ađó, nek Jê-su Chuôq Paq Manưih, Chuôq nôôq he.

10Bơơi nhan móón adhi anó, aku mââl bhơơl adhi anó tââq dhanóók ưng Chuôq nôôq he, nek Jê-su Chuôq Paq Manưih, kơi tabhơt adhi anó phaai ve mađó dhariêng praaq, lơq óóq dyơq vaaih nôôq rau tablah n'tua dhiq m'pơng adhi anó; hơq adhi anó phaai bâân panjoop palơq xóng ađêi kalóóng mađó lóóm karnóq lơq kalóóng mađó karnóq tarnêêng. 11Ơi, nhan móón adhi anó ưng aku, đươi manưih đong ưng Kơ-lô-ê, tarlum leq adhi anó ơi bâân pakah giit đóng aku, kơi ve nôôq tarvei tablah tachia m'pơng kalóóng adhi anó. 12Aku ve kanóq nek nô kơi, ađek nek ting chanak manưih kalóóng adhi anó praaq kơi ađô: “Aku mađó leq Phaau-lô,” môôiq “Aku mađó leq A-bô-lô,” môôiq “Aku mađó leq Sê-pha” môôiq “Aku mađó leq Chuôq Paq Manưih.” 13Chuôq Paq Manưih ơi bâân takut tablah alua? Ve kơq Phaau-lô ơi bâân teeng đinh dhiq m'baang chatông klóóih đóng adhi anó? Môôiq adhi anó ơi đơơp bap-teem vơn dhanóók Phaau-lô? 14Aku ma-ơơn Yaang Pleng taai aku ơi kah têêng bap-teem đóng ngaai kalóóng adhi anó, lơh tââq Kơ-riit-bu lơq Gaai-uut, 15buôn óóq ngaai manưih ve chóóm praaq kơi adhi anó ơi vơn dhanóók aku đơơp bap-teem. 16(Aku kung ơi têêng bap-teem đóng đong Sê-pha-na. Lơh ađek, aku kah n'nal ađêi ve alua ơi têêng bap-teem đóng ngaai lââng.) 17Tââq Chuôq Paq Manưih ơi kah kayua aku vôôiq têêng bap-teem, hơq nek truuih pachóóm Taruuih Liêm, eh rau palơq paraaq praaq tabech galang, hơq đóng m'baang chatông ưng Chuôq Paq Manưih yươq bâân lêi nek kah machak.

18Ơi taruuih liêm ưng m'baang chatông dhơ nek rau ngôôk ngaak nek palơq nôôq manưih chêt bil, bơơi nek palơq nôôq he, nôôq manưih bâân paq, ađek nek mataai raman ưng Yaang Pleng. 19Tââq ve paraaq xaraq:

“Aku e pahư tabil rau tabech galang ưng nôôq manưih tabech galang;

lơq Aku e têêng pahư rau tabech brương ưng nôôq manưih tabech brương.”

20Manưih tabech galang tơơt n'dhiq? Manưih ve hok tơơt n'dhiq? Manưih tar-ââi ưng klaang ađôk tơơt n'dhiq? Kah alua Yaang Pleng ơi paxar rau tabech galang ưng manưih hóng katiêk xar ngôôk ngaak ơi alua? 21Ơi đơơp lêi kơi, kalóóng rau tabech galang ưng Yaang Pleng, manưih hóng katiêk ơi kah đơơp n'nal Yaang Pleng palơq rau tabech galang achêk, hayơq Yaang Pleng ơi bhuui lóóm tapâng rau truuih pachóóm ngôôk khơl, buôn paq ngaai nôôq huuiq. 22Ơi taai, manưih Jo Thaaiq nek mââl tamóh nôôq kanal chrih, hayơq manưih Hi-laap nek chêk-tabâân rau tabech galang. 23Hayơq nôôq yi nek truuih pachóóm Chuôq Paq Manưih bâân tateeng đinh dhiq m'baang chatông, dhơ nek m'beq dhơl n'đóih dyung nek palơq manưih Jo Thaaiq, bơơi nek rau ngôôk khơl nek palơq nôôq dhanuôr katiêk palââng. 24Mat lââng, nek palơq piđó, nek nôôq manưih bâân dhaloong tađaang, tabhơt Jo Thaaiq palơq Hi-laap, Chuôq Paq Manưih nek mataai raman ưng Yaang Pleng lơq rau tabech galang ưng Yaang Pleng. 25Ơi rau ngôôk ngaak ưng Yaang Pleng nek tabech galang lơh akóón manưih, lơq rau đu dhur ưng Yaang Pleng nek karơ lơh akóón manưih.

26Nhan móón adhi anó, bơơi alua nek adhi anó phaai chamet rau dhaloong tađaang ưng ađêi, lêi kơi kah bơk manưih tabech galang ting ng'kar m'bech, kah bơk manưih karơ kataai, kung kah bơk manưih gluh tââq kabhôôq karvaan. 27Dhơ kơi ađek, Yaang Pleng ơi chââih nôôq rau ngôôk ngaak ưng manưih hóng katiêk buôn Ađó ve chóóm têêng đóng nôôq manưih tabech galang kachiit, Yaang Pleng ơi chââih nôôq rau dhur lóóm ưng manưih hóng katiêk buôn Ađó ve chóóm têêng đóng nôôq manưih karơ praan kachiit, 28lơq Yaang Pleng ơi chââih nôôq rau parneq bhlơng, palơq nôôq dhơơm bâân takađiq kalươm kalóóng manưih hóng katiêk, nôôq rau kah ve, buôn Ađó ve chóóm têêng nôôq rau ve yuur xar kah ve, 29hơq đóng dyóp ng'kar m'bech yươq chóóm rau laach jơơr toom mat Yaang Pleng. 30Bơơi đươi Ađó, adhi anó tơơt kalóóng Jê-su Chuôq Paq Manưih, nek Yaang bâân val kơi rau tabech galang bhral tââq Yaang Pleng, chadrươh nek rau bhơt liêm, lơq rau sek liêm, palơq rau paq klóóih koom đóng nôôq he. 31Hơq đóng, kơi ve paraaq xaraq: “Ngaai pajơơr ađêi, phaai pajơơr ađêi kalóóng Chuôq.”