Kaike Standard Traslation
मत्ती 7
घङवन छोए नसेह्ना
(लुक ६:३७-३८; ६:४१-४२)
येसुई हेँ र्वाईर्वाई होई, “घङग न्याय नख्या आलै परमेस्वरजै र्वार्वा ङेनकाङ्मोः न्याय खेनान मह्या। तैङर्वाङिन कुजुई ङेनकोजै घङ्काङ्मोः न्याय खेँ, उजुखेखेई परमेस्वरजै र्वार्वा ङेनकाङ्मोः न्याय खेनान ङ्याह्। कन नापजै ङेनकोजै घङग नापि खेँ, मनै नापजै ङेनकोजै र्वार्वा देन्नान ङ्याह्।” “तैङ ना जेँन भाइन मी ङिह्पान थल्जुपन च्याच्यार रँ, जेङ्नै नान जेँनै मी ङिह्पान थोसो चन क्युई मराँ? आथबा नान जेँनै मी थोसो ङिङिन कुजुई ना नान भाईग र्वा तैनान, ‘ङाः नान मीलै थल्जुपन च्याच्यार छ्यूफाना।’” ए ख्वाकिबाव हो, ङू जेँनै मीलै थोसो थोरा, तब नान भाईन मीलै थल्जुपन च्याच्यार छ्यूचेन भिह्तु ना लः खेखे रङ तैनान ङ्याह्। “तै पबित्र ङ्याह् अन ख्युकोग नभिना। जेँन मोतीव छ्योअन ङू नपह्रा, तेमन्ता नुई जेँन लेह्ई नू लेत्तरा रे होलहोल नाः फ्याङ्दारा।”
तोला, फारा रे झला कुला
(लुक ११:९-१३)
“तोला न ङेनकाङ्मोः बिन्नान ङ्याह्, फारा न ङेनजै दोःनान ङ्याह्, झला कुला न ङेनकोन भिह्तु पोङ्नान ङ्याह्। तैङर्वाङिन सुई तोल्ङ, नुई देन्नान, सुई फाङ्ङ, नुई दोःनान, सुई झला कुल्ङ, नुन भिह्तु झला पोङ्नान ङ्याह्।” “ङेनकोन बर्ग कन सिमि जेम्तौ, सुन ङोह्जोई रोता तोल्तौ नू लुङ बिङ्ङ? आथबा ङाह् तोल्तौ नू भुलेन बिङ्ङ? अन्नकारन ङेन अलः राह्राह् यङ जेँन ङोह्जो चमेः चिज लः बिन्चे क्युई राँ र्वाङिन, स्वर्गः ङिह्पान ङेनकोन पाई नुन ङ्याबो तोल्नानकाङ्मोः हातिन ह्याल्म खेखे चिज लः बिन्नान ङ्याह्।1 सिमिवजै ङेन ङ्याबो कताःमन बेऊरा ख्याःयो र्वानान ङेन चाहि खेँ, ङेनजै र्वार्वा ख्युन ङ्याबो उजुई बेऊरा ख्या, तैङर्वाङिन अनै मोसान कानुन रे भबिस्यबक्तावजै र्वापान ल्होईव जेङ्पा।
झला त्वाम
(लुक १३:२४)
“झला त्वामलै झिङ जाः, तैङर्वाङिन मीपा दोङ्नानग साःनान झला वाःम रे लम छुम्म राह्नान, रे अनलम झिङ जाःनान सिमिव लै राह्नान। तैङर्वाङिन झुनी साःनान्न लम त्वाम राह्नान रे लम खराःम राह्नान, सुई झुनी साःङ, रे मन दोःनान सिमिव ङाईदी राह्नान।
तङ्पु रे नुन फल
(लुक ६:४३-४४; १३:२५-२७)
“नक्कली अगमबक्तावलम होसखेखे छ्योवा, सु ङेन स्याह् लूपान रुपग स्वाङ, जेङ्नै झिङक्याँ चन ङिनङिनलैमन फाराव लैम राह्नान।2 ख्युन माह्लम ङेनजै ख्युकाङ्मोः स्योःनान ङ्याह्। तै चेरन तङ्पुलै अङ्गुर आथबा सिऊरिलै खोअ चाह्नान तै? उजुईखेखे तङ्पु लः पुरूजै फल लः छ्यानान। जेङ्नै तङ्पु अलःजै फल अलः छ्यानान। तङ्पु लजै फल अलः छ्याः मतैनान, न ता तङ्पु अलःजै फल लः छ्याः तैङ। फल लः मछ्यानान्न तङ्पु पुरूग थुमथुम मेह्ग पन्नान।3 झामखेखे मन नक्कली अगमबक्ताकाङ्मोः ख्युन धोनलमै स्योःनान ङ्याह्।4
ङै नाः हातौयै मस्योःपा
“ङाः ‘प्रभु, प्रभु’ र्वानान पुरू स्वर्गन राज्यग जाःनान मह्या। स्वर्गः ङिह्पान ङन पान इच्छ्या ङ्यान्नान्न सिमिव मात्र परमेस्वरन राज्यग जाःनान ङ्याह्। मन्न ल्हाः लैःजै ङाः र्वानान ङ्याह्, ‘प्रभु, प्रभु, तै ङी नान मिह्नग भबिस्यबानी मर्वापौ? नान मिह्नग मुव मधाम्पौ? रे नान मिह्नग राँसा राँसान ताईलुवान धोन मखेपा तै?’ मन्तौ ङा ख्युकाङ्मोः थारेः र्वानान ङ्युँ, ‘ए कानुन मङ्यान्नान्न सिमिव हो, ङै ङेनकाङ्मोः हातौयै स्योःपा मीपा। ङन स्यीह्लै ग्याङ्म रा।’5
यिम ङेह् दोङ्नानव
(लुक ६:४७-४९)
“अन्नकारन सुई ङन अन बचन ङ्याङ्ङ रे ङ्याङ्ङ, ङा बुद्धिमानी सिमिदीन ङ्याबो नुन तुलना खेचे, सुई जेँन यिम लुङ्न लाह्ः दोङ्बो। आलै नाङ्का झ्युबो, स्योला स्वाबो, आलै लन च्याङ्बो रे यिमन लाह्ः ठ्वाबो, जेङ्नै मन यिम मदिम्बो। तैङर्वाङिन मन लुङ्न लाह्ः झग कह्पा ङ्याह्। सुई ङन अन बचन ताह्ताह् यङ मङ्याङ्ङ, नुन तुलना मुर्ख सिमिदीन ङ्याबो खेनान, सुई जेँन यिम पेह्मान ल्हाः दोङ्बो। नाङ्का झ्युबो, रे स्योला स्वाबो, आलै लन च्याङ्बो रे मन यिमन लाह्ः ठ्वाबो, रे मन यिम दिमदिम मीपा रह्पा।”
येसुन आङ
येसुई अन ल्होई र्वातामी सिमिवन मोङ नुन छोए ताह्ताह् हालाईबो।6 तैङर्वाङिन नुई ख्युन कानुन लन्नान्न सिमिवजै लैम नङ्पा, जेङ्नै आङ ङिह्पान सिमिजै लैम खेखे लह्ङ्ङ।
Source notes (6)
- Cross-reference लुक ११:१३
- Cross-reference यर २२:२७
- Cross-reference मत्ती ३:१०; लुक ३:९
- Cross-reference मत्ती १२:३३
- Cross-reference भजन ६:८
- Cross-reference मर्क १:२२; लुक ४:३२
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.