Kaike Standard Traslation
मत्ती 22:37
Verse 37 is marked below, with the whole chapter around it. Read from the start
भ्यान भत्यारन द्रिस्तान्त
(लुक १४:१५-२४)
आलै येसुई ख्युकाङ्मोः ह्याङ द्रिस्तान्तग ल्होई र्वाबो, “स्वर्गन राज्यग झलीदीन ङ्याबो तुलना खेतैनान, सुई जेँन ङोह्जोन भ्यान भत्यार तयार खेबो। मन झलीजै घ्वापाकाङ्मोः स्वा र्वामः जेँन राङ्पाव फेप्पो। जेङ्नै ख्यु मस्वाबो।” आलै नु ह्याङ घङ राङ्पाकाङ्मोः झाःम र्वार्वा फेप्पो, “वैवै मन घ्वानानकाङ्मोः र्वा, ‘झाचेन भेला रह्बो, ङन मिबा रे चोःम-चोःम भस्तव थुम्पा ङ्याह्। ता भत्यार झाचेन भिह्तु स्वा’।” जेङ्नै मन घ्वापावजै वास्ताई मखेरे जेँ-जेँन धोनग होई। कान जेँन खेःराः होई आलै कान चन जेँन ब्यापार्राः जाःबो। घङ लाःमा सिमिवजै चन झलीन राङ्पाकाङ्मोः जुङजुङ फ्याङ्बो रे सह्प्पो। मन झली सुतूबो आलै जेँन सेनाव फेप्पे मन सिमि सन्नानकाङ्मोः मीपा दोङ्बो रे ख्युन सहरग कोह्बो। मन्न छाम्म नुई राङ्पाकाङ्मोः ह्याङ र्वाबो, “भ्यान भत्यार ता तयार ङ्याह्, जेङ्नै ङै घ्वापाव चन अन भत्यार झाचेन सम स्योरस्योरलैम मीह्मन।” “अन्नकारन ङेनको चोकवग वया रे सुवा-सुवाः धोँ, ख्युकाङ्मोः भत्यारग घ्वाघ्वा सह्रा।” आलै राङ्पाव सदकग होई रे दोःपाभरी लः अलः पुरूग रूबो। झामखेखे भत्यारन स्याह् सिमिव खाप्च्योवा रह्पा। “झलीजै दम्फुकाङ्मोः सेह्म्म स्वातौ तीपाः भ्याःग गोनत्वानान्न घोलाङ मगोनगोन स्वापा रङ्बो। झलीजै नू लोप्पो, ‘ए ग्याप्पा! ना भ्याःन घोलाङै मगोनगोन कुजुई झिङ जाःपा?’ जेङ्नै मन सिमिजै तये यङ झब बिन मतैबो। आलै झलीजै जेँन राङ्पाकाङ्मोः कोह्बो, ‘दे, अन्न लाह्-लेह् खीखी खोलोः नाःतुमाः पह्रा। स्याह् नुई सो चमैचमै दाःपाई छ्योवाःयो’!”1 अन्त्यग येसुई र्वाबो, “घ्वापा ता लैः ङ्याह्, जेङ्नै दम्पा चन ङाईदि ङ्याह्।”
कर फाःनान्न भारेः लोप्पा
(मर्क १२:१३-१७; लुक २०:२०-२६)
तब फरिसीव वैवै येसू नुनै ल्होईग कुजुई फसाई खेचे र्वार्वा योजना दोङ्बो। ख्युई जेँन कान चेलाकाङ्मोः हेरोद झलीन सिमिवन ङ्याबोई येसुन स्याह् फेप्पो। ख्युई वैवै नू र्वाबो, “हे गुरु, नाई तेम्मा ल्होई र्वाङ र्वार्वा ङी क्युई ङिह्पा। सिमिकाङ्मोः लह्न्तौ नाई तेम्मा खेखे परमेस्वरन लम् लह्ङ्ङ। सिमिवजै तै र्वादरा र्वार्वा नाई वास्ता यङ खेचे नङ्पा। नाई ता सुई ध्वा सेनसेन ल्होई मखेँ! ता ङी र्वा, कानुन अन्सार कैसर आथबा रोमी सरकारग2 कर फाःम नान छोएग लः ङ्याह् कि मह्या?” ख्युन झाम नावा अलः हाकोको येसुई र्वाबो, “ए ख्वाकिबाव हो, ङाः तैङ फसाई खेचे फान्नान? खाले कर फाःनान्न सिक्कादी थना न।” ख्युई नू सिक्का सस्सै थम्बो। आलै नुई ख्युकाङ्मोः लोप्पो, “अन ध्वाःन छाप रे मिह्न सुन जेङ्पा?” ख्युई झब बिम्बो, “अन ता कैसर आथबा रोमी सरकारन जेङ्पा।” तब येसुई र्वाबो, “आन सरकारन चन सरकारग भिना रे परमेस्वरन चन परमेस्वरग भिना।” येसुन झब ताह्ताह् ख्युई हालाईबो आलै नू ख्योवाख्योवा होई।
सिह्पालै सम्पु ग्युर्नान्न भारेः लोप्पा
(मर्क १२:१८-२७; लुक २०:२७-४०)
मन्नै लाह्ः हातिपा सदुकीव येसुन स्याह् होई। रे सिमि सिह्पालै सम्पु ग्युर्नान ङ्याह् र्वार्वा दाबि खेबो आलै ख्युई येसू लोप्पो, “हे गुरु, मोसाई ता झाम र्वापा ङ्याह्, सुई धाज्यु सन्तान मर्हारे सिङिन धाज्युन भिह्तु सन्तान राःयो र्वार्वा भाइजै मन लम्मान ङ्याबो मिह्जि खेत्वानान।3 ता ङिन घूँ नेह् थिक्कोव ङ्याह्। धाज्यु कान्स्योवाजै मिह्जि खेबो, जेङ्नै ङोह्जो-चमेः मराह्रेई सिह्बो। उजु राह्राह् भाइजै च्योङ्न ङ्याबो मिह्जी खेबो। जेङ्नै नु रे सन्तान मर्हारे सिह्बो। बर्म भाइजै र्वार्वा झाःमै खेबो रे उजु खेखेई भाई नेह्जै मिह्जी खेबो, जेङ्नै वैचा मह्रारे सिह्बो। मन्न छाम्म ङिक मन चिमिचा यङ सिह्बो। ता सिह्पा पुरूवलम सम्पु ग्युर्ङिन मन नेह्न बर्ग नु सुन मिसा राह्नान? नू ता थिक्कोव नेह्पाई मिह्जी खेपा ङ्याह्!” येसुई ख्युकाङ्मोः र्वाबो, “ङेन भ्रमग परि रह्पा ङ्याह्। ङेनजै पबित्रसास्त्र रे परमेस्वरन सक्तिन भारेः हामकोँ। सिह्पान सिमिव सम्पु ग्युर्मी ता ख्युन मिह्जि राचे रे खे फान्चेन ल्होई राह्नान मह्या। ख्यु ता स्वर्गः छ्युङ्नान्न स्वर्गदुतवलैम राह्नान ङ्याह् जेङ्नै सिह्पावन बर्ग सम्पु ग्युर्नान्न भारेः परमेस्वरजै ङेनकाङ्मोः तै र्वापा ङ्याह्, अन ङेनजै तोअपा मीपाऊ? ‘ङा अब्राहाम, इसहाक रे याकूबन परमेस्वर जेङ्पा’ परमेस्वर सिह्पावन नङ्पा, जेङ्नै सम्पुवन परमेस्वर जेङ्पा।” झाःमन नुन छोए ताह्ताह् सिमिन मोह्ङव हालाईबो।
पुरून खेरे किम आग्या
(मर्क १२:२८-३४; लुक १०:२५-२८)
येसुई सदुकीकाङ्मोः तै मर्वारे छ्युङ्फाम्बो र्वानान्न ल्होई ताह्ताह् फरिसीव जोमजोम नुन स्याह् स्वाबो। ख्युन बर्ग कानुन लन्नान्न सिमिदीजै येसू छोए सेन्चेन भिह्तु नू लोप्पो,4 “हे गुरु, मोसान कानुनग पुरून खेरे किम आग्या कन जेङ्पा?” येसुई झब बिम्बो, “नाई परमप्रभु जेँन परमेस्वरग जेँन सम पुरू, परान पुरू रे नावा पुरूजै मया ख्या।5 पुरून खेरे ङूस्योवा रे किम आग्या अनै जेङ्पा। आलै झाःमै घङ ङेह् रे किम आग्या अनै जेङ्पा, ‘जेँन खिम्जेःग जेँगै लैम मया ख्या।’6 मोसान कानुन पुरू भबिस्यबक्तान छोएवन आधार अनै आग्या ङेह् जेङ्पा।”7
मसिहन भारेः लोप्पा
(मर्क १२:३५-३७; लुक २०:४१-४४)
मन्न भेला येसुई मोङ दोङदोङ स्वापान फरिसीकाङ्मोः लोप्पो, “मसिहन भारेः ङेन तै छुनान? नु सुन सन्तान जेङ्पा?” ख्युई झब बिम्बो, “नु ता दाऊदन सन्तान जेङ्पा।” येसुई ख्युकाङ्मो र्वाबो, “आन तैङ दाऊदग परमेस्वरन आत्माई नू ‘प्रभु’ र्वा फाम्बो?” तैङर्वाङिन दाऊद जेँजै ता झामखेखे र्वापा ङ्याह्:
परमप्रभुई ङन प्रभू र्वाबो, “ङै नान बैरिकाङ्मोः नान तिङ्पान पोँ मनान्न बेर ना ङन याईपाक्याँई छ्योवा।”8 “झामखेखे दाऊद जेँजै मसिहग प्रभु र्वाङिन कुजुई मसिहग दाऊदन सन्तान र्वाचे?”
“जेङ्नै सुई र्वार्वा झब तये बिन मतैबो। आलै मन्न लाह्ःलै सुई र्वार्वा येसू ल्होई तये लोच्चेन हिम्मत यङ मखेबो।”
Source notes (8)
- Cross-reference मत्ती ८:१२; २५:३०; लुक १३:२८
- Footnote कैसर रोमन झली
- Cross-reference कानुन २५:५
- Cross-reference लुक १०:२५-२८
- Cross-reference कानुन ६:५
- Cross-reference लेवी १९:१८
- Cross-reference लुक १०:२५-२८
- Cross-reference भजन ११०:१
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.