Kaike Standard Traslation
मत्ती 19:26
Verse 26 is marked below, with the whole chapter around it. Read from the start
येसुई मिसाः ख्योवानान्न भारेः लम्पा
(मर्क १०:१-१२)
अन ल्होईव र्वातामी येसु गालील प्रदेसलै लेनलेन यर्दन चाङ्पुन धिङा यहूदिया प्रदेसन छेत्रक्याँ होई। सिमिन मोङ किम नुन ङिह्ङिह् जाःबो रे नुई ख्युकाङ्मोः ताःफाम्बो। आलै कान फरिसीवजै नुन स्याह् स्वास्वा नू छोए सेन्चे र्वार्वा लोप्पो, “सुई कारन मीम कानुन अन्सार जेँन मिसा ख्योवाचे देन्नान कि मदेन्नान?” येसुई झब भिनैभिनै र्वाबो, “तै ङेनजै पबित्रसास्त्रग तोअपा मीपाऊ? सृस्तिग स्रिस्ती खेनानजै सिमी चोलोङ्चा रे चिमिचा खेखे दोङ्बो।1 ‘मन्नकारन चोलोङ्चाई जेँन पोमाः ख्योवाख्योवा जेँन मिसान ङ्याबोई छ्यूँ रे मन ङेह् दीदी ती ल्हो राह्नान।’2 अन्नकारन ता ख्यु ङेह् नङ्पा, जेङ्नै ल्होदी जेङ्पा आलै परमेस्वरजै थुप्पाकाङ्मोः सिमिजै फाचे नङ्पा।” फरिसीवजै नू लोप्पो, “आन तैङ मोसाई कानुनग मिसा ख्योवानान्न सिमी ख्योवाचेन हिगा सरसर ख्योवा र्वापा न?”3 येसुई झब बिम्बो, “मोसाई ङेनकोन सम ख्वान कारन कानुनग मिसा ख्योवाचे देन्नान र्वापा जेङ्पा। जेङ्नै सृस्तिग ता उजु मह्या। सेह्ना, ङा ङेनकाङ्मोः र्वाचे, ब्यभिचारन दोसन कारन नङ्म मिसाः ख्योवाख्योवा घङ चिमिचान ङ्याबो मिह्जि खेनान्न चोलोङ्चाई ब्यभिचारै खेनान।”4 चेलावजै नू र्वाबो, “मिसा-पसान घूँ झामै राह्नान जेङ्न ता मिह्जी मखेचे लः।” येसुई ख्युकाङ्मोः झब बिम्बो, “सिमि पुरूजै अन बचन स्वीकार खे मतैनान, केवल ख्युई मात्र तैनान सू परमेस्वरजै बिम्पा ङ्याह्। मिह्जि मखेनान राँसा राँसाई कारनव राह्नान तैङर्वाङिन हातिपा ता केह्पालै छक्का राह्नान, कानग घङ सिमिजै छक्का दोङ्पा राह्नान आलै हातिपा चन स्वर्गन राज्यन भिह्तु मिह्जि मखेनान यङ राह्नान। ता ङ्यान तैनानजै चन अन ल्होई ङ्यानाःयो।”
येसुई कत्याम वैचाकाङ्मोः असिका बिम्पा
(मर्क १०:१३-१६; लुक १८:१५-१७)
मन्न भेला येसुई जेँन लाह् नान्नान असिका भिनाःयो रे सोअताबाःयो र्वार्वा सिमिवजै जेँन कत्याम वैचाकाङ्मोः नुन स्याह् सप्पो। अन रङरङ चेलावजै मन सिमिकाङ्मोः ङार्बो। जेङ्नै येसुई र्वाबो, “वैचाकाङ्मोः ङन स्याह् स्वा फाना, ख्युकाङ्मोः नकाः तैङर्वाङिन स्वर्गन राज्य ता अन कत्याम वैचाव लैम सिमिवन भिह्तुई जेङ्पा।” आलै नुई ख्यु ती-तीन लाह्ः जेँन लाह् नाह्म्बो आलै असिका बिमबिम होई।
रेम्पा छबा
(मर्क १०:१७-३१; लुक १८:१८-३०)
तीरेप छबा सिमिदीजै येसुन स्याह् स्वास्वा लोप्पो, “गुरुज्यू, मताह्नान्न झुनि देच्चेन भिह्तु ङै कनचन धोन लः खेत्वानान?” येसुई झब बिम्बो, “धोन लःन भारेः ना तैङ ङाः लोन्नान? लः ता तीबाःदि ङिह्पा। नाई मताह्नान्न झुनि देस्सुम खेङिन आग्याव ङ्याना।” नुई लोप्पो, “कन आग्याव?” येसुई र्वाबो, “अनै ता जेङ्पा: सिमी नसह्रा, ब्यभिचार नख्या, नखुवा, लबारन साँचि नभिना।5 पोमान सम्मान ख्या आलै जेँन खिम्जेःग र्वार्वा जेँगै लैम मया ख्या।”6 सिमि छबाई र्वाबो, “अन आग्या पुरूव ता ङै ङ्यानैङ्यानै स्वापा ङिह्पा। घङ तै खेत्वानान?” येसुई नू र्वाबो, “ना तेम्माई परमेस्वरन ङू सिमि लः राचे फाङ्ङिन वैवै जेँन ङ्याबो ङिह्पान क्यु पुरू र्युह्र्युह् स्वापान सोह्ङ बिखारिकाङ्मोः भिना रे नाई स्वर्गन क्यु देन्नान ङ्याह् आलै स्वास्वा ङन ङिक जाः।” झाःम ल्होई ताह्ताह् मन सिमि छबा ध्वाः नाःतुमा दोङदोङ होई तैङर्वाङिन नुन क्यु लैः ङ्याह्। मन्न छाम्म येसुई जेँन चेलाकाङ्मोः र्वाबो, तेम्माई ङा ङेनकाङ्मोः र्वाचे, “सिमि रेम्पाः स्वर्गन राज्यग जाःचे खराःम लैः ङ्याह्।” ह्याङ ङा ङेनकाङ्मोः र्वाचे, “सिमि रेम्पाः परमेस्वरन राज्यग जाःचेन खेरे ता बरु ऊँतग घबन तोत्यालै जाःचे छुम्म रह्दरा।” चेलावजै हालाईलाई र्वाबो, “आन सुई उद्धार देत तैनान?” येसुई ख्युकाङ्मोः सेनसेन र्वाबो, “अन सिमिलम राई मतैनान्न ल्होई जेङ्पा, जेङ्नै परमेस्वरलम चन ल्होई पुरू रा तैनान।” मन्न छाम्म पत्रुसजै र्वाबो, “सेह्ना, ङी ता ल्होई पुरू ख्योवाख्योवा नान ङिक जाःपा ङिह्पा। ङी तै देन्नान ङ्युँ?” येसुई ख्युकाङ्मोः र्वाबो, “तेम्माई ङा ङेनकाङ्मोः र्वाचे, सिमिन ङोह्जो तैस्याङ पुरू ह्याङ दोङ्तौन मन राज्य सार्बाः जेँन महिमामय झलीन सिङ्हासनग छ्युङ्नान ङ्याह्। मन्तौ ङन ङिक जाःनान ङेन रे जेँन सिङ्हासन च्योङे थामग छ्युङ्नान ङ्याह् रे इस्राएलन कुल च्योङेन न्याय खेनान ङ्याह्।7 ङन भिह्तु जेँन यिम, थिक्कोव, मितिकोव, पोमा, ङोह्जो-चमेः खेः ख्योवानानवजै अन्न खेरे गुना क्यामदी ह्याल्म रे मताह्नान्न झुनि यङ देन्नान ङ्याह्। जेङ्नै चोँ ङू राह्नानवन बर्ग लैः ङिक राह्नान ङ्याह् रे चोँ ङिक राह्नानव चन ङू राह्नान ङ्याह्।”8
Source notes (8)
- Cross-reference उत १:२७; ५:२
- Cross-reference उत २:२४
- Cross-reference कानुन २४:१-४; मत्ती ५:३१
- Cross-reference मत्ती ५:३२; १ कोर ७:१०-११
- Cross-reference प्रस २०:१३-१६; कानुन ५:१७-२०
- Cross-reference प्रस २०:१२; कानुन ५:१६; लेवी १९:१८
- Cross-reference मत्ती २५:३१; लुक २२:३०
- Cross-reference मत्ती २०:१६; लुक १३:३०
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.