Kaike Standard Traslation
मत्ती 18
पुरून खेरे किम सु जेङ्पा
(मर्क ९:३३-३७; लुक ९:४६-४८)
मन्न भेला चेलाव स्वास्वा येसू लोप्पो, “स्वर्गन राज्यग पुरून खेरे किम सु जेङ्पा?”1 तब येसुई वैचादीग रह्म्म स्वा र्वार्वा ख्युन घूँ सोल्बो रे र्वाबो, “तेम्माई ङा ङेनकाङ्मोः र्वाचे, जेँन समग परिबर्तन झाम वैचा लैम मराङिन ङेन हातौयै स्वर्गन राज्यग जाःचे देन्नान मह्या। अनै कत्याःम वैचा लैम नम्र राह्नान्न सिमि यङ स्वर्गन राज्यग पुरून खेरे किम राह्नान ङ्याह्। आलै ङन मिह्नग झामै वैचाः स्वीकार खेनानजै ङाः र्वार्वा स्वीकार खेँ।”
तीपान परिनाम
(मर्क ९:४२-४८; लुक १७:१-२)
“यदि सुई ङाः बिस्वास खेनान्न झाःम कत्याःम वैचावग बिस्वास ख्योवाख्योवा तीपा खेफाङ्ङिन नू ता बरु होलाः ल्हाकोर चुनचुन समुन्द्र तिङ्ग नुप फान्चेई लः राह्नान ङ्याह्।” धिक्कार अन सन्सारग! तैङर्वाङिन अन सन्सारग ता सिमिकाङ्मोः ङिनङिन लैमन तीपाः फसाई खेनान्न ल्होईव ङ्याह्। झाम ल्होईव स्वानान, जेङ्नै धिक्कार, मन सिमी सुई घङग तीपाः फसाई खेँ! “यदि नान ल्हा या ल्हेजै नाः तीपा खेफाङ्ङिन नू थुमथुम पह्रा। ङ्योरुम लाह्-लेह् वव्वै हातौयै मसिह्नान्न मेह्ग थेप्चेन खेरे ता बरु दुर्या रे खोर्या राह्राह् मताह्नान्न झुनि देच्चेई लः जेङ्पा।2 आलै उजुई खेखे नान मीजै नाः तीपा खेफाङ्ङिन मनगै छ्यूछ्यू पह्रा। मी ङेह् वव्वै ङ्यालान मेह्ग थेप्चेन खेरे ता बरु काना राह्राह् मताह्नान्न झुनि देच्चेई लः जेङ्पा।”3
मोल्पा लूपान द्रिस्तान्त
(लुक १५:३-७)
“होस ख्या, अन कत्याम वैचाव सुई ङेनजै ङान्ज्यान नख्या। ङा ङेनकाङ्मोः र्वाचे, ङेनकोन सेन्चे खेनान्न स्वर्गदुतव स्वर्गः ङिह्पान ङन परमेस्वर पानै ङू ङ्याह्। तैङर्वाङिन ङा सिमिन ङोह्जो ता मोल्पावगै सोमफान्चेन भिह्तु स्वापा जेङ्पा।”4 “ङेन तै नावा खेनान? लूपा क्यामदी राह्नान्न सिमिजै लूपादी मोल्ङिन नुई तै खेदरा? नुई घङ लिथल रै च्युर्गु थामः स्याह्ई पाखाः ख्योवाख्योवा मोल्पान लूपादी फाम्म मवैनान तै? यदि नुई मनग धोङिन, तेम्माई ङा ङेनकाङ्मोः र्वाचे, मन मख्याम्नान्न लूपावन भिह्तुन खेरै मन दोःपान तिबाःदि लूपान भिह्तु मिह्दा स्याङ्नान ङ्याह्। हो उजु खेखेई स्वर्गः ङिह्पान ङेनकोन परमेस्वर पाई र्वार्वा अन कत्याम वैचावन बर्ग सुई यङ मोल्पा चाहि मखेनान।”
अपराध खेनान्न जिङ्कोव
(लुक १७:३)
“यदि नान भाइजै नान बिरोधग तीपा खेपा ङिङिन नू तितिमाई वैवै समजाई ख्या। नुई नान ल्होई ङ्याङ्ङिन नाई नू जेँनक्याँ होल फाम्पा राह्नान ङ्याह्।5 जेङ्नै नुई नान ल्होई मङ्याङ्ङिन घङ तीपा ङेह्पान ङ्याबोई वैवै नू सम्झाई ख्या तैङर्वाङिन पबित्रसास्त्रजै र्वापालैम याल पुरूवन फैसला खेचेन भिह्तु ङेह् या सुमपा साँचि घ्वा त्वानान। अकेः रातौरातौ यङ नुई ल्होई मङ्याङ्ङिन मन्दली वैवै नाई ल्होई पुरू स्यारा आलै ख्युन ल्होई यङ नुई मङ्याङ्ङिन यहूदीन खोलोःन सिमि रे कर तुईनान लैम राःयो।” तेम्माई ङा ङेनकाङ्मोः र्वाचे, “तै ङेनजै अन पिर्थीबी खीङ, मन स्वर्गः र्वार्वा खीनान ङ्याह्। आलै तै ङेनजै अन पिर्थीबी फोल्दरा, मन स्वर्गः र्वार्वा फोल्नान ङ्याह्।6 आलै तेम्माई ङा ङेनकाङ्मोः र्वाचे, अन पिर्थीबी ङेःमै तै तोल्नान जेम, अन दीदी तोल्ङिन, मन स्वर्गः ङिह्पान ङेनकोन परमेस्वर पाई ङेनकाङ्मोः मन बिन्नान ङ्याह् तैङर्वाङिन खाः ङेह् या सुमपा ङन मिह्नग जोम्ङ, ङा ख्युन घूँ राह्नान ङ्युँ।”
माफ मबिन्नान राङ्पान द्रिस्तान्त
(लुक १७:४)
पत्रुसजै येसू लोप्पो, “प्रभु, ङन भाइजै ङन बिरोधग तीपा खेपाई छ्युङ्ङिन ङै नू हातिरेप माफ बिनत्वानान? नेरेप?”7 येसुई झब बिम्बो, “नेरेप मात्र नङ्पा, जेङ्नै गुना फेराङ लिथल नेरेप!” तैङर्वाङिन स्वर्गन राज्य ता तीपा झलीजै जेँन राङ्पान हिसाब-किताब वप्पा लैम राह्नान। मन झलीजै जेँन हिसाब-किताब वप्मः जाःतौ हजार च्यु मरन सिक्का छेर वन्नान राङ्पादी नुन स्याह् सप्पो। जेङ्नै मन सिमी छेर फाःमः तये यङ मह्या। अन्नकारन मन मालिकजै नू ङिह्पान पुरू, कानस्योवा, मिसा, ङोह्जो-चमेः रे जेँगै र्वार्वा र्युह्र्युह् छेर फाः र्वानान्न आदेस बिम्बो।
मन राङ्पाई झलीन लेह् ध्वाध्वा छ्याःफुल्बो, “मालिक, खजिर्याथाल कुह्वा, ङा नान छेर पुरू फाःनान ङ्युँ।” मालिकग दिसाबो रे नुई राङ्पान छेर पुरूव माफ खेबो। “तब मन राङ्पा खोलोः होई रे नुई जेँनै ङ्याबो धोन खेनान्न राङ्पा घङ फुरीग धोबो। मन फुरीजै नुन स्याह्लै मुलन सिक्का क्यामदी छेर वप्पा ङ्याह्। नुई जुङजुङ होला च्योरैच्योरै र्वाबो, ‘खाले, नाई झपान छेर चोँह् फाः’!”
मन ङ्याबो धोन खेनान्न राङ्पा फुरीजै लेह् ध्वाध्वा छ्याःफुलैफुलै र्वाबो, “खजिर्याथाल कुह्वा, ङा छेर पुरूव फाःनान ङ्युँ।”
जेङ्नै नुई मङ्याम्बो। छेर मफाःन बेर नुई नू झ्यालखानाः कह्बो। “मन ङेह्पान ङ्याबोई धोन खेनान्न राङ्पा घङ फुरीवजै र्वार्वा अन ल्होई पुरूव रङ्पाई ङ्याह्। ख्युकाङ्मोः मिह्दा सम तूह्बो। ख्युई वैवै मालिकग तैस्याङ पुरून ल्होई पुरूव स्याप्पो। आलै मालिकजै मन राङ्पाः स्वा र्वार्वा र्वाबो, ‘ए अलः राङ्पा! नान छ्याःफुल ङ्यान्ङ्यान ङै नाः छेर पुरू माफ खेपा ङ्याह्। ङै नाः दया खेपालैम नाई र्वार्वा जेँन ङ्याबोई धोन खेनान्न राङ्पा फुरीग दया खेत्वानान मह्या तै?’ आलै मालिकजै सुतूतू मन राङ्पाई छेर पुरू मफाःन बेर तेह्पफाम्मः नू झ्यालखालान सिमिवन लाह् थोप्पो।” मन्न छाम्म येसुई नतिजा छ्यूबो, “ङेनजै जेँन समलै जेँन थिक्कोव माफ मबिङ्ङिन स्वर्गः ङिह्पान नान परमेस्वर पाई र्वार्वा ङेनकाङ्मोः उजुई खेनान ङ्याह्।”
Source notes (7)
- Cross-reference लुक २२:२४
- Cross-reference मत्ती ५:३०
- Cross-reference मत्ती ५:२९
- Cross-reference लुक १९:१०
- Cross-reference लुक १७:३
- Cross-reference मत्ती १६:१९; यूह २०:२३
- Cross-reference लुक १७:३-४
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.