Skip to content
BibleKenya

Kaike Standard Traslation

मर्क 13

येसुई आराधनालयन मीपा दोङ्नान्न भबिस्यबानी

(मत्ती २४:१-५१; लुक २१:५-३६)

जब नु आराधनालयलै गैत्तौ ङ्याह्, तब नुन चेलाव बर्ग तीपाई नू र्‌वाबो, “सेह्‌ना, गुरुज्यू, हाति किम-किम लुङ रे हाति किम भबनव।” येसुई झब बिम्बो, ङेनजै अन किम भबनव रङ्पा? “स्यीह् ता लुङ ती यङ नुन ठाउँग छ्युङ्नान मह्‌या। ख्युन बर्ग पुरू पोँ पन्नान ङ्याह्।”

कातू रे तेपफाम्पाव

(मत्ती २४:३-१४; लुक २१:७-१९)

आलै येसु आराधनालयन1 ङू जैतून धुरी छ्युङ्पान भेला पत्रुस, याकूब, यूहन्ना रे अन्द्रियासजै नू गोप्पे लोप्पो, “ङ्योअग र्वाउता, अन घतनाव हातौ राह्‌नान ङ्याह्? रे अन पुरू ल्होई पुरा राह्‌नान्न भिह्तु तै ताह्ः राह्‌नान ङ्याह्‌यौ?”

येसुई ख्युकाङ्मोः र्‌वाबो, “सापसाप छ्योवा, सुई र्‌वार्‌वा ङेनकाङ्मोः भ्रमग थेप नफानाःयो। सिमि लै ङन मिह्‌नग ‘ङा अनै जेङ्पा’ र्‌वार्‌वा स्वानन ङ्याह्, रे ख्युई लैग भ्रमग थेप्नान ङ्याह्। जब ङेनजै याल रे यालन फाईरा ताह्‌नान ङ्याह्, तब नङिना। झाम घतनाव मराखाईमे ङ्याह्। जेङ्नै अन भेला अन्त्यन भेला नङ्पा। देस राह्ङराङ्साः याल खेनान ङ्याह्, रे राज्यवजै राह्ङराङ्साः आक्रमन खेनान ङ्याह्। खास्या पुरू साँगुल वैनान ङ्याह्, अनिकालव राह्‌नान ङ्याह्। अन चन चिमिचा झर सुरु रह्पालैम तूरिन सुरु जेङ्पा।”

“ङेनको जेँन बिसयग होस खेखे छ्योवा। ख्युई ङेनकाङ्मोः अदालतग थोन्नान ङ्याह्। ङेनको आराधनालयवग फ्याङ्ची देन्नान ङ्याह्। आलै हाकिमव रे झलीवन ङू ङन खातिर ख्युकाङ्मोः साँचि बिम्म ङेनको च्याङ्नान ङ्याह्।2 रे सिचेन भेला स्वाचेन ङू पुरू सिमिव ल्होन् लः ताह्फेत्त्वानान। जब सिमिवजै ङेनकाङ्मोः जुङजुङ वव्वै मुर्दा खेनान, तब तै र्‌वाचे र्‌वार्‌वा ङूलै छरा नख्या। जेङ्नै अन्तौ तै ङेनकाङ्मोः बिङ्ङ, अनै र्वा, तैङर्‌वाङिन र्‌वानान ङेनकाङ्मोः नङ्पा, जेङ्नै पबित्र आत्मा जेङ्पा।”

“आलै भाइ तीजै घङ भाइग सच्‌चेन भिह्तु बिन्नान ङ्याह्, रे च्योआलैम पाइ यङ ङोह्जो। वैचावजै पोमावन बिरोध च्याङ्नान ङ्याह्, रे ख्युकाङ्मोः सम्म जाःफान्नान ङ्याह्। आलै ङन मिह्‌न्न खातिर ङेनकाङ्मोः पुरूजै ङान्ज्यान खेनान ङ्याह्, जेङ्नै सु अन्त्यन बेर स्हे खेखे छ्युङनन नुनै उद्धार राह्‌नान ङ्याह्।”3

मिह्दा दुङालन भेला

(मत्ती २४:१५-२८; लुक २१:२०-२४)

“जब ङेनको मीपा दोङ्नान्न मस्याङ्मस्याङ लैम चिजग खाः रा मत्वानान स्याह्ई च्याङ्च्याङ छ्युङ्पा रङ्नान ङ्याह्।” (तोअनानजै हाकोवाःयो), तब यहूदिया प्रदेसग ङिह्पान लाक्याँ ज्याराःयो।4 यिमन ल्हुपग ङिह्पा पोँ नलिबायो, न ता जेँन यिमलै तयाः छ्युचे झिङ जायो।5 खेः ङिह्पा जेँन घोलाङ दर्म यिम नहोलाःयो। जेङ्नै ऊफ, मन दिनग ङोजोमा चिमिचाकाङ्मोः रे छ्युम वैचाव केह्‌नान्न मावन भिह्तु हाति ङिनङिन लैम र्‌हदरा! अन गुन्जे नराःयो र्‌वार्‌वा परमेस्वरग सोअताप्चे ख्या। तैङर्‌वाङिन मन दिनवग झाम दुङाल स्वानन ङ्याह् कि परमेस्वरजै सन्सार सृस्ति खेपान सुरुलै चोँनबेर स्यीह् न ता झाम रह्पा ङ्याह्, न हातौयै राह्‌नान।6 यदि परमेस्वरजै मन दिन घताई मखेङिन ता सिमि सुई सोन्नान मह्‌या, जेङ्नै नुई दम्पावन खातिर अन दिन घताई खेपा ङ्याह्।

अन्तौ सुई ङेनकाङ्मोः “सेह्‌ना, मसिह सि ङिह्पा” आथबा “स्याह्‌ ङ्याह्” र्‌वाङिन, ङेनकाङ्मोः बिस्वास नख्या। तैङर्‌वाङिन लबारन मसिहको रे लबारन भबिस्यबक्ताव च्याङ्नान ङ्याह्, आलै राह्‌नान जेङ्न, परमेस्वरजै दम्पाकाङ्मोः भ्रमग थेपफाम्मः ख्युई ताईलुवान धोन रे हालाईचेन धोनव खेनान ङ्याह्।7 जेङ्नै ङेनकाङ्मोः सापसाप छ्योवा। सेह्‌ना, ङै ङेनकाङ्मोः ल्होई पुरू भेलान ङूलै र्‌वापा ङिह्पा।

सिमिन ङोह्जो स्वानान

(मत्ती २४:२९-३१; लुक २१:२५-२८)

“जेङ्नै मन दिनग दुङालन छाम्म ङिह्‌मा नातुमा राह्‌नान ङ्याह्, रे धाई जेँन साल्म बिन्नान मह्‌या,8 घर पान्नाङलै घ्यानन ङ्याह्, रे पान्नाङग रह्पा सक्तिव ख्योर्ननङ्या।9 आलै मन भेलाः सिमिवजै सिमिन ङोह्जो सक्ति रे महिमा ङ्याबो नमलुई स्वायङ खेपा रङनन ङ्याह्।10 तब परमेस्वरजै स्वर्गदुतकाङ्मोः फेन्नान ङ्याह्, रे पिर्थीबिन अन्त्यलै पान्नाङन अन्त्यथाल लिब्रुङक्याँलै जेँन दम्पाकाङ्मोः जमता खेनान ङ्याह्।”

खोअन तङ्पुन पाठ

(मत्ती २४:३२-३५; लुक २१:२९-३३)

“खोअन तङ्पुलै द्रिस्तान्त लह्‌ना: अन्न धा नोर्म राह्‌राह्‌ ल्हा पलाई खेलुङ्मीम रेन्जे ङेमः स्वादँ र्‌वार्‌वा ङेनकाङ्मोः क्युई राह्‌नान। उजुखेखे ङेनकोजै र्‌वार्‌वा जब अन घतनाव रह्पा रङनन, तब अन ङेमः ङ्याह्, झलागै ङ्याह् र्‌वार्‌वा हाकोवा। तेम्माई ङा ङेनकाङ्मोः र्‌वाचे, अन ल्होई पुरू पुरा राह्‌राह्‌ मतानन्नबेर अन पुस्तान सिमि ताह्ताह् वैनान मह्‌या। पान्नाङ रे पिर्थीबी ताह्ताह् वैनान ङ्याह्, जेङ्नै ङन बचन हातौयै ताह्‌नान मह्‌या।”

अन दिन रे अन भेला सुई क्युई मराह्‌नान

(मत्ती २४:३६-४४)

“जेङ्नै मन दिन रे मन भेलान भारेः पाइ नङ्म घङ सुई क्युई मह्‌या, न ता पान्नाङग राह्‌नान स्वर्गदुतवजै न ङोह्जोई।11 सेह्‌ना, सापसाप छ्योवा, रे सोअताप्चे ख्या, तैङर्‌वाङिन अन्न भेला हातौ स्वानन जेङ्पा, अन ङेनकाङ्मोः क्युई मराह्‌नान अन ता मालिकजै जेँन राङ्पाकाङ्मोः यिमन धोन पुरू रे दायित्वन जिम्मा बिमबिम रे पालेग सापसाप छ्योवाःयो र्‌वार्‌वा आग्या बिमबिम परदेस वैपान सिमिदीलैम जेङ्पा।”12

“अन्नकारन ङेनकाङ्मोः यङ सापसाप छ्योवा, तैङर्‌वाङिन यिमन ताःपो ङ्याजे, कि छानफेग, कि कापा तर्तौ, कि नाप, हातौ स्वाचे जेङ्पा, अन ङेनकाङ्मोः क्युई मराह्‌नान। तेमन्ता नू तैमेग स्वातौ नुई ङेनकाङ्मोः आःपा धोद्रा। तै ङा ङेनकाङ्मोः र्‌वानान अन ङा पुरूग र्‌वाचे, ‘सापसाप छ्योवा’।”

Source notes (12)
  1. Footnote यहूदी सोअताप्चे खेनान्न यिम
  2. Cross-reference मत्ती १०:१७-२०; लुक १२:११-१२
  3. Cross-reference मत्ती १०:२२
  4. Cross-reference दान ९:२७
  5. Cross-reference लुक १७:३१
  6. Cross-reference दान १२:१; प्रका ७:१४
  7. Cross-reference मत्ती २४:२४
  8. Cross-reference यसै १३:१०; इज ३२:७; योए २:१०,३१; ३:१५; प्रका ६:१२
  9. Cross-reference यसै ३४:४; योए २:१०; प्रका ६:१३
  10. Cross-reference दान ७:१३; प्रका १:७
  11. Cross-reference मत्ती २४:३६
  12. Cross-reference लुक १२:३६-३८

Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.