Skip to content
BibleKenya

Kaike Standard Traslation

मर्क 11

येसु यरूसलेमग स्वापा

(मत्ती २१:१-११; लुक १९:२९-३८; यूह १२:१२-२५)

जब येसु रे नुन चेलाव यरूसलेमन ङेमः जैतून धुर्न रह्‌म्म बेथफागे सहर रे बेथानिया र्‌वानान ठाउँग स्वातबो, तब येसुई जेँन चेलाव बर्ग ङेपा झाःम र्‌वार्‌वा फेप्पो, “ङेन ङूक्याँन नामग वया, रे जाःतौजाःतौ ङेनजै चोँन बेर सिमि सुई मचप्पान खीपा पूँह्‌न तह्जा दोःनान ङ्याह्। मनग फोलफोल स्यीह् सह्‌रा। कान सिमिजै ङेनकाङ्मोः ‘अन तैङ पोङ्नान?’ र्‌वाङिन, ‘प्रभु अन त्वापा ङ्याह्, रे नुई खम्म होल्नान ङ्याह्’ र्‌वा।”

तब ख्यु होई, रे अन तह्जा लम्न रह्‌म्म यिमदीन खोलोःक्याँ झलान रह्‌म्म खीपा धोबो, रे मनग फोल्मः जातौ। स्याह्‌ थाङ्थाङ् छ्युङ्पाकाङ्मोः बर्ग कान-कानजै ख्युकाङ्मोः लोप्पो, “तह्जा फोलफोल ङेनकाङ्मोः तै खेनान?”

येसुई ख्युकाङ्मोः कोपालैम ख्युई र्‌वाबो, रे ख्युई ख्युकाङ्मोः फोल फाम्बो। ख्युई तह्जा येसुन रह्‌म्म सप्पो, रे जेँन घोलाङव मन्न ल्हाः नाह्‌म्बो, रे नू मन्न ल्हाः चप्पो। येसू सम्मान खेचेन भिह्तु लैजे जेँन घोलाङव रे घङवजै बारीलै स्याउलाव थुमथुम लम्म तिह्प्पो। आलै नुन ङूह्ङूह् लेन्नान रे ङिह्‌ङिह्‌ स्वानानवजै झाःम र्‌वामः जाःबो, “झयजक्‌कार राःयो! धन्य नू, सु परमप्रभुन मिह्‌नग स्वाङ!1 धन्न रायो, ङिन खेपुल दाऊदन अन स्वानान राज्य, परमेस्वरन झयजक्‌कार राःयो!”

येसु यरूसलेम स्वास्वा आराधनालयन झिङ जाबो। आलै नुई धेँवछोँन तैस्याङ पुरू सेह्‌म्मी फिम रह्पान कारन चेला च्योङेपावनै ङ्याबो नु बेथानिया होई।

येसुई खोअन तङ्पु सराप खेपा

(मत्ती २१:१२-२२; लुक १९:४५-४७; यूह २:१३-१६)

नाप्चे येसु नुन चेलाव ङ्याबो बेथानियालै स्वातौ येसू गुसिबो। आलै ग्याङम ल्हाई नाङ्पा खोअन तङ्पुदी रङरङ कार्तौ मनग तयाः फल‌ देन्नन कि र्‌वार्‌वा नू होई, जेङ्नै स्याह्‌ ताप्मी नुई तङ्पु ल्हानङ्म तये मदेप्पो, तैङर्‌वाङिन मन्न भेला खोअन फल‌ छ्यानान भेला रह्पा मह्‌या। तब नुई मन तङ्पु र्‌वाबो, “तान धेरा हातौयै सुई र्‌वार्‌वा नानलम फल‌ नझाँयो।” आलै अन र्‌वापा नुन चेलावजै ताह्बो।

येसू आराधनालयग वैपा

(मत्ती २१:१२-१७; लुक १९:४५-४७; यूह २:१३-२२)

आलै यरूसलेम ताप्मी नू आराधनालयन झिङ जाःबो, आलै आराधनालयग र्‌युचे खेनानकाङ्मोः खोलोः छ्यूबो रे सोङ फिन्नन तेबलव रे पुरेन र्‌युन्नान्न सिमि छ्युङ्पान पिर्काव लाल्वा पप्पो। नुई आराधनालयलै सुई तयेः वप मफाम्बो। आलै नुई सिमिकाङ्मोः लह्‌नैलह्‌नै र्‌वाबो, “सास्त्रग सर्पा ङ्याह् कि परमेस्वरजै र्‌वाबो, ‘ङन यिम सन्सारन पुरू सिमिवन भिह्तु सोअताप्चेन यिम राह्‌नान ङ्याह्।’ जेङ्नै ङेनजै ता च्यापावन जोम्पु दोङ्पा ङ्याह्।”2

आलै ङोत्वा पुजारीव रे कानुन लन्नान्न सिमिवजै अन ताह्ताह् येसू कुजुई मीपा दोङ्चे र्‌वार्‌वा मेसो फाम्म जाःबो। जेङ्नै ख्यु नुन ङ्याबो ङिह्ङ्‌ङ, तैङर्‌वाङिन मोह्ङ पुरूजै नुन छोए हालाईपा ङ्याह्।

नम्जे रुप्तौ येसु रे नुन चेलाव सहरन खोलोः गेग्गे होई।

खार्पा खोअन तङ्पुलै छोए

(मत्ती २१:१८-२२)

नाप्चे नाप स्याह्‌लै ङूनै लम वैता नुई मन खोअन तङ्पू पादालै खार्पा रङ्बो। आलै पत्रुसग अन ङूक्याँन ल्होई ह्‌याका रह्बो, रे नुई येसू र्‌वाबो, “रब्बी, सेह्‌ना, नाई सराप बिम्पा खोअन तङ्पु ता खार्दँ।”

येसुई चेलाकाङ्मोः झब बिमबिम र्‌वाबो, “परमेस्वरग बिस्वास नाह्‌ना। तेम्माई ङा ङेनकाङ्मोः र्‌वाचे, यदि सुई जेँन समग सङ्‌का मखेँ जेङ्नै जेँजै र्‌वापान ल्होई पुरा राह्‌नान र्‌वार्‌वा बिस्वास खेखे अन लाः ‘पिङ्पिङ् ना समुद्रग घ्या’ र्‌वाङिन, मन्न भिह्तु झामै राह्‌नान ङ्याह्।3 अन्नकारन ङा ङेनकाङ्मोः र्‌वाचे, ङेनजै सोअताप्चे तैस्याङ तोलनन अन देप्पा ङिह्पा र्‌वानान्न बिस्वास नाह्‌ना, रे अन ङेन देन्नान ङ्याह्। जब ङेन सोअताप्मः च्याङ्नान, तब सुन बिरोधग ङेन तयाः ङिह्पा राङिन माफ ख्या, ताकि पान्नाङग ङिह्पा ङेन पाई ङेन अपराधव माफ ख्याःयो।4 [जेङ्नै माफ मखेङिन, पान्नाङग रह्पा ङेन पाइ ङेन अपराधव माफ खेनान मह्‌या।]”

येसू आङन भिह्तु प्रस्‌न

(मत्ती २१:२३-२७; लुक २०:१-८)

येसु रे नुन चेलाव ह्‌याङ यरूसलेमग स्वाबो। आलै येसु आराधनालयग धेँवछोँ लेन्तौ ङोत्वा पुजारीव, कानुन लन्नान्न सिमिव, ताङ्बोन अगुवाकाङ्मोः नुन ङ्याबो स्वाबो। ख्युई नू प्रस्‌न खेबो, “कन आङजै ना अन धोनव खेनान? अन धोनव खेनान आङ ना सुई बिम्बो?” येसुई ख्युकाङ्मोः र्‌वाबो, “ङा ङेनकाङ्मोः ती प्रस्‌न लोच्‌चे, रे ङेनजै अन्न झब भिना, रे कन आङजै ङा अन धोन खेनान, अन ङेनकाङ्मोः र्‌वानान ङ्याह्। यूहन्नाई बिम्पा बप्‌तिस्मा स्वर्गन परमेस्वरलम जेङ्पा कि सिमिलम, ङा झब भिना।”

ख्यु राह्ङराङ्साः र्‌वाचे खेमः जाःबो, “ङ्योअजै तै र्‌वाचे? यदि ङ्योअजै ‘स्वर्गन परमेस्वरलम’ झब बिङ्‌ङिन, नुई र्‌वानान ङ्याह्, झाम राङिन नुई यूहन्ना तैङ बिस्वास मखेपा? ‘सिमिवलम’ र्‌वाचे कि” जेङ्नै झाम र्‌वामः ख्यु जनतालम ङिह्‌म्बो। तैङर्‌वाङिन पुरूजै यूहन्ना: तेम्मा भबिस्यबक्ता र्‌वार्‌वा छुपा ङ्याह्। तब ख्युई येसु झब बिमबिम र्‌वाबो, “ङ्योअग क्युई मीपा।” येसुई ख्युकाङ्मोः र्‌वाबो, “ङा यङ कन आङलम अन धोन खेनान, अन ङेनकाङ्मोः मर्‌वा।”

Source notes (4)
  1. Cross-reference भजन ११८:२५-२६
  2. Cross-reference लुक १९:४६; यसै ५६:७; यर ७:११
  3. Cross-reference मत्ती १७:२०; १ कोर १३:२
  4. Cross-reference मत्ती ६:१४-१५

Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.