Juray Soura Bible
ମନଙ୍ ଞନଙ୍ଞଙ୍ବର୍ 18
ଆନା ଆନିନ୍ଡମନ୍ଆଡଙ୍ ଆଙ୍ସାତେ, ଆନିନ୍ ଆମନନଙନ୍ ଆସନ୍ ଲୁମ୍ତେ,ଆରି ଏର୍ଜାଡ଼ିକାନ୍ ଆମନଙ୍ ଗିଆନ ବିରୁଦଲୋଙ୍ ଗୋଡ଼େତନ୍ । ଉଲ୍ଲୁମରନ୍ ବୁଡ୍ଡିଲୋଙନ୍ ଅସର୍ଡାଏ, ଆନିନ୍ଡମ୍ ଆ ମନନ୍ ଆବର୍ନେ ଆନପ୍ପୁଙ୍ ଲଡୟ୍ତେ । ପେଲ୍ଲାନ୍ ଜିର୍ରାୟ୍ଡେନ୍ ଅନାଲ୍ଲେନ୍ ଜିର୍ତାୟ୍, ଆରି ଗନ୍ଡ୍ରୟ୍ଜନ୍ ସରିନ୍ ନିଣ୍ତୟନ୍ ଜିର୍ତାୟ୍ । ମନ୍ରାନ୍ ଆତଅଡ୍ ଆବର୍ନେ ଜରୁ ଡାଆନ୍ ଅନ୍ତମ୍, ଆରି ଗିଆନନ୍ ଆ ପନଡାବ୍ ଡରକୋନେ ଆପନେଡାନ୍ ଅନ୍ତମ୍ । ପେଲ୍ଲାନ୍ ଆ ଡ୍ଡନୁଲ୍ମଡ୍ ଅଡ଼େ ପନ୍ସୁଆତିଲୋଙନ୍ ଡରମ୍ମନ୍ ଆଡଅଙ୍ ଅନିଆୟ୍ ଆନମେ ମନଙ୍ତଡ୍ । ଉଲ୍ଲୁନ୍ ଆ ଉସାଲ୍ତମ୍ ଅଲ୍ବାଡ୍ଡେଲୋଙନ୍ ସୁସ୍କାୟ୍ତେ,ଆରି ଆତଅଡନ୍ ତନୁଡନ୍ ଆଞନାଙ୍ ଆସନ୍ ଓଡ୍ଡେତେ । ଉଲ୍ଲୁନ୍ ଆତଅଡ୍ ଆନସେଡନ୍ମା,ଆରି ଆ ଉସାଲ୍ତମନ୍ ଆନିନ୍ଡମ୍ ଆପରାନ୍ନା ଅନୋଡ଼େଙନ୍ ଅନ୍ତମ୍ । ନମିନ୍ ନମିନ୍ ଆବର୍ତନ୍ ଆମନ୍ରା ଆବର୍ନେ ଜବୁଙ୍ ଜନୋମନ୍ ଅନ୍ତମ୍, ତିଆତେ ଉଗ୍ଗରନ୍ ଆଅମ ଜିର୍ତେ । ଆନିନ୍ଡମ୍ ଆକାବ୍ବାଡ଼ାଲୋଙ୍ ଆନା ଆଡ଼ସାତନ୍, ଆନିନ୍ ଅନସେଡନ୍ ଆବୋଞାଙ୍ । ସଦାପ୍ରବୁନ୍ ଆଞୁମ୍ ରଡୋ ମରେଲ୍ସିଙନ୍; ଡରମ୍ମମରନ୍ ତେତ୍ତେ ଜିର୍ରେ ଡନୋବନ୍ ଞାଙ୍ତେ । ଗମାଙ୍ମରନ୍ ଆନର୍ଜେ ଆ ରଡୋ ଗଡ଼ାନ୍, ଆରି ଆ ଜନନାଲୋଙନ୍ ଡେଙ୍ଗା କାନ୍ତିନ୍ ଅନ୍ତମ୍ । ଅନସେଡନ୍ ଆତେମଡ୍ଲୋଙ୍ ମନ୍ରାନ୍ ଆ ମନ କଙ୍କ୍ରିତନ୍, ଆରି ଲବଡ୍ଡିନ୍ ମନାନ୍ନେନ୍ ଆତେମଡ୍ଲୋଙ୍ ଡକୋ । ଆନା ଅନ୍ରଙ୍ ଅମ୍ଡଙେନ୍ ଆମ୍ମୁଙ୍ ଜାଲଙ୍ତେ, ତିଆତେ ଆନିନ୍ଡମନ୍ ଆସନ୍ ଏର୍ଗିଆନନ୍ ଡ ଗନ୍ଡ୍ରୟ୍ଜନ୍ ଅନ୍ତମ୍ । ମନ୍ରାନ୍ ଆପୁରାଡ଼ା ଆ ବତାନ୍ ସଏଲେ ରପ୍ତିତେ; ବନ୍ଡ ଆପଲାଙ୍ ପୁରାଡ଼ାନ୍ଆଡଙ୍ ଆନା ସଏଲେ ରପ୍ତିଏ ? ବୁଡ୍ଡିଡମନ୍ ଆ ମନ ଗିଆନନ୍ ଅର୍ଜେତେ; ଆରି, ଗିଆନମରନ୍ ଆଲୁଡ୍ ଗିଆନନ୍ ସାୟ୍ତେ । ମନ୍ରାନ୍ ଆ ତନିୟ୍ତିୟ୍ ଆନିନ୍ ଆସନ୍ ତଙରନ୍ ଅବ୍ଗାସାତେ,ଆରି ସୋଡ଼ାମରଞ୍ଜି ଆ ମୁକ୍କାବା ଆନିନ୍ଆଡଙ୍ ଓରୋଙ୍ତାୟ୍ । ଅଙ୍ଗା ଆମନ୍ରା ଆମ୍ମୁଙ୍ ଅଲ୍ବାଡ୍ଡେନ୍ ଅବ୍ଜନାତେ, ଆନିନ୍ ଡରମ୍ମଡମ୍ ଗିୟ୍ତାତେ, ବନ୍ଡ ଆ ତୟ୍ଲିସିଙନ୍ ଆମନ୍ରା ଜିର୍ରେ ଆନିନ୍ଆଡଙ୍ ଅଲ୍ଲତେ । ଅନବ୍କଡ଼ିନ୍ ଅଲ୍ଲବାଡ୍ଡେନ୍ ଆଙ୍ସାତେ ଆରି ବପ୍ପୁମରଞ୍ଜିଆଡଙ୍ ଆଙ୍ସାତେ । ଆର୍ପାୟ୍ ରଡ୍ଡୋ ଗଡ଼ାନ୍ ଆ ଉପରେଙ୍ ଅବ୍ଜିନୟ୍ନେନ୍ ସଜ, ବନ୍ଡ ଆବରାବନ୍ ଆବୋଞାଙ୍ ଆରି ବତର ସନବ୍ୟୁନ୍ ମାଡ୍ଡ ଡଣ୍ଡ, କେନ୍ ଏନ୍ନେଗନ୍ ଅଲ୍ବାଡ୍ଡେନ୍ ଗଡ଼ାନ୍ ଆ ଅଙ୍କିଆ ଅନ୍ତମ୍ । ମନ୍ରାନ୍ ଆ ତଅଡନ୍ ଆ ଜଅ ବାତ୍ତେ ଆ କିମ୍ପୋଙନ୍ ବରିୟ୍ତେ,ଆରି ଆ ଉସାଲ୍ତମ୍ଲୋଙନ୍ ଆନର୍ଜେ ବାତ୍ତେ ଆନିନ୍ ବୋଓତେ । ରନବ୍ବୁନ୍ ଡ ଅନମେଙନ୍ ଅଲାଙନ୍ ଆଅଡିନ; ଅଙ୍ଗା ଆମନ୍ରାଜି ଆନିନ୍ଆଡଙ୍ ମନଙ୍ ଜନାତଜି, ଆନିଞ୍ଜି ତି ଆ ଜଅ ଞାଙ୍ତଜି । ଅଙ୍ଗା ଆମନ୍ରା ଆଇବଜନ୍ ଞାଙ୍ତେ, ଆନିନ୍ ମନଙ୍ ଜନବନ୍ ଞାଙ୍ତେ ଆରି ପ୍ରବୁନ୍ ଆମଙ୍ସିଲଡ୍ ସନାୟୁମନ୍ ଞାଙ୍ତେ । ଡୋଲୟ୍ମରନ୍ କାକୁର୍ତିତନ୍; ବନ୍ଡ ଗମାଙ୍ମରନ୍ ଡନୁଙ୍ୟମ୍ବରନ୍ ବାତ୍ତେ ଅଃଜାଲଙେ । ଆନା ଗୋଗୋୟ୍ ମନ୍ରା ସାଙ୍ଗତେ, ଆନିନ୍ ଆନିନ୍ଡମ୍ ଆନବ୍ସେଡ୍ ଆସନ୍ ତିଆତେ ଲୁମ୍ତେ; ବନ୍ଡ ଅବୟ୍ ଡନୁଙ୍ୟମ୍ମରନ୍ ଡକୋ, ଆନା ବୋଞାଙନ୍ ସିଲଡ୍ ଗୋଗୋୟ୍ ଅବ୍ଡମ୍ଲନ୍ ଡକୋତଞ୍ଜି ।
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.