Juray Soura Bible
ମନଙ୍ ଞନଙ୍ଞଙ୍ବର୍ 17
ଅଲ୍ବାଡ୍ଡେନ୍ ବାତ୍ତେ ଆଜୋମ୍ଡାର୍ ଆସିଂଙ୍ ସିଲଡ୍ ସନୟୁନ୍ ବାତ୍ତେ ବକୁନ୍ଡୁବ୍ସି ଆସର୍ଡାରନ୍ ଆଜନୋମ୍ ମନଙ୍ । ଅଙ୍ଗା ଆ କମ୍ୱାରି ବୁଡ୍ଡିନ୍ ବାତ୍ତେ ଞଣ୍ତ୍ରମ୍ତନ୍, ଆନିନ୍ ଗନବ୍ରଜନ୍ ଆତ୍ରିୟ୍ଲଙତନ୍ ଆ ଡାଙ୍ଗଡ଼ାଅନ୍ ଆତୋଣ୍ତୋ ରାଜାତନ୍, ଆରି ବୋଞାଙଞ୍ଜି ସରିନ୍ ଡନେନ୍ ଆବନ୍ତା ଞାଙ୍ତେ । ରୁପ୍ପାନ୍ ଡ ସୁନ୍ନାନ୍ ଗରିୟ୍ ଆରଡ଼େତୋଡ୍ଲୋଙନ୍ ଅନଲ୍ଲନ୍ ଡେତେ; ବନ୍ଡ ମନ୍ରାନ୍ ଆ ଉଗ୍ଗର୍ ପ୍ରବୁନ୍ ଅଲ୍ଲତେ । ଏର୍ମନଙ୍ କାବ୍ବାଡ଼ାନ୍ ଆଲନୁମ୍ମର୍ ପେଲ୍ଲାନ୍ ଆ ଉସାଲ୍ତମ୍ ଆବର୍ନେ ଅମ୍ଡଙ୍ତେ,ଆରି ପାତ୍ୟାମରନ୍ ଇସ୍କତ୍ତା ଅଲାଙ୍ଲୋଙନ୍ ଡାଲୁଡ୍ତେ । ଅଙ୍ଗା ଆମନ୍ରା ଡୋଲୟ୍ମରନ୍ଆଡଙ୍ ସୟ୍ସୟ୍ମୁତେ, ଆନିନ୍ ଆ ଗନଡ଼େମରନ୍ଆଡଙ୍ ନିଣ୍ତୟ୍ତେ; ଆରି, ତନଙଡ୍ଲୋଙନ୍ ଆନା ସର୍ଡାତନ୍, ଆନିନ୍ ପନବ୍ରଡନ୍ ଏର୍ଞନାଙନ୍ ଅଡ୍କୋଏ । ଉଲେଙନଞ୍ଜି ବୁଡାକୋଜଞ୍ଜି ଆ ରନୁବ୍ବବ୍ଗୋ; ଆରି, ଆପେୟଞ୍ଜି ଅଅନଞ୍ଜି ଆ ପନେମେଙ୍ ଅନ୍ତମ୍ । ଉଲ୍ଲୁମରନ୍ ଆଡଅଙ୍ ମନଙ୍ ବରନ୍ ଆବନର୍ ସନାୟ୍ସାୟ୍ତଡ୍, ତିଅନ୍ତମ୍ ଅବୟ୍ ମନାନ୍ନେଡମନ୍ ଆମନ୍ରା ପାତ୍ୟାବରନ୍ ଆବର୍ନେ ମନଙ୍ତଡ୍, ଞିଞିନେମରନ୍ ଆଗନିୟ୍ଗିୟ୍ଲୋଙ୍ ତନିୟ୍ତିୟନ୍ ମଡ଼ଗାଡମନ୍ ଆ ମଣି ଅନ୍ତମ୍, ତିଆତେ ଅଙ୍ଗାଗଡ୍ ୟର୍ତନ୍, ତି ଗଡ୍ ଗଡେଲ୍ତେ । ଆନା ଏର୍ଡରମ୍ମନ୍ କେମାତେ, ଆନିନ୍ ଡନୁଙ୍ୟମନ୍ ସାୟ୍ତେ; ବନ୍ଡ ଆନା ଆବୟନ୍ ଆବର୍ନେ ଆବ୍ଡିଡ୍ଲତେ, ଆନିନ୍ ଆକାର୍ସିନ୍ ଡ ଜେଲୁନ୍ ଅନ୍ତମ୍ ମାୟ୍ଲନ୍ ଆଡ୍ରକୋତନ୍ ଆଗଡ଼ିନ୍ଆଡଙ୍ ପିରିଙ୍ପାଡାନ୍ ଅମେତେ । ଉଲ୍ଲୁନ୍ଆଡଙ୍ ବସଅ ତନୁଡନ୍ ଆପାଲ୍ତେଙ୍ ବୁଡ୍ଡିମରନ୍ଆଡଙ୍ ବପଦ ସାଞେଙ୍ବରନ୍ ଜବ୍ର ବତାତେ । ଏର୍ମନଙ୍ମରନ୍ ଗୋଡ଼େନ୍ ସାୟ୍ତେ, ତିଆସନ୍ ଆ ବିରୁଦଲୋଙ୍ ଅକାନ୍କାରମ୍ଡାଏନ୍ ଆ ପାଙ୍ଲଙ୍ବର୍ମର୍ ଅନାପ୍ପାୟ୍ ଡେତେ । ଆନିନ୍ଡମନ୍ ଏର୍ଗିଆନଲୋଙନ୍ ଆମଗାଡ୍ ଉଲ୍ଲୁମରନ୍ଆଡଙ୍ ଆର୍ନବାଙ୍ ଆପାଲ୍ତେଙ୍ ଆଅନ୍ଡମନ୍ ଆରବ୍ଆଡ଼ତେନ୍ ଆକନ୍ବୁଡ୍ଆଡଙ୍ ଆର୍ନବାଙ୍ ମନଙ୍ । ଅଙ୍ଗା ଆମନ୍ରା ମନଙନ୍ ଆପାଲ୍ତେଙ୍ ଏର୍ମନଙ୍ ଅମେତେ, ଆସିଙନ୍ ଆଙ୍ଗିୟ୍ ଏର୍ମନଙନ୍ ଅଃନୁମ୍ରେଙେ । ଗୋଡ଼େନ୍ ଆମୁଙ୍ନ୍ନେ ଆନ୍ନିଙ୍ ଡାଆନ୍ ଆପାଡ଼ି ଆପ୍ରାୟ୍ତେନ୍ ଅନ୍ତମ୍; ତିଆସନ୍ ଗୋଡ଼େନ୍ ଅନ୍ରଙ୍ ଡେଏନ୍ ଆମ୍ମୁଙ୍ ଅଲ୍ବାଡ୍ଡେନ୍ ଅମ୍ରେଙ୍ବା । ଆନା ପେଲ୍ଲାନ୍ଆଡଙ୍ ଡୋସାତଡ୍ ଅମେତେ ଆରି ଆନା ଡରମ୍ମମରନ୍ଆଡଙ୍ ଅବ୍ଡୋସାତେ, ତି ବାଗୁନ୍ଆଡଙ୍ ସଦାପ୍ରବୁନ୍ ଆବସରିନ୍ ଏଡ଼ୁର୍ମଡ୍ତେ । ଉଲ୍ଲୁମରନ୍ ଆମଙ୍ଲୋଙ୍ ବୁଡ୍ଡିନ୍ ଅବୟ୍ତଡ୍; ତିଡେନ୍ ଗିଆନନ୍ ଆଞନି ଆସନ୍ ଆସିଲୋଙନ୍ ତଙ୍କାନ୍ ଡକୋତେ ? ତିଆତେ ଇନି ଆଲାବମ୍ । କୁଲମନ୍ ଆଏଡ଼ର୍ ଡୁଙ୍ୟମ୍ତେ,ଆରି ବୋଞାଙନ୍ ପନବ୍ରଡନ୍ ଡିନ୍ନାନ୍ ଆସନାୟୁମ୍ ଆସନ୍ କନୋଡନ୍ ଡେଏନ୍ । ଏର୍ବୁଡ୍ଡିମରନ୍ ଆ ତୟ୍ଲିସିଙନ୍ ଆମନ୍ରା ଆତେମଡ୍ଲୋଙ୍ ଞମ୍ସିଲେ ଜାମନିନ୍ ତନଙ୍ତେ । ଆନା ଗୋଡ଼େନ୍ ଲଡୟ୍ତେ, ଆନିନ୍ ଡୋସାନ୍ ନିୟ୍ ଲଡୟ୍ତେ; ଆରି, ଆନ୍ନିଙ୍ ଆ ଡୁଆରାନ୍ ଅବ୍ଡେଙ୍ଗାତେ, ଆନିନ୍ ଅନସେଡନ୍ ସାୟ୍ତେ । ଆନା ଆ ଉଗ୍ଗର୍ ସଙ୍ଗତା, ଆନିନ୍ ସୁକ୍କାନ୍ ଅଞାଙେ; ଆରି, ଆନା ଆଲାଙ୍ ପାତ୍ୟାନ୍ ବର୍ତନ୍, ଆନିନ୍ ତନଙଡ୍ଲୋଙନ୍ ଗଲୋତେ । ଉଲ୍ଲୁନ୍ ଆକନୋଡ୍ମର୍ ପନବ୍ରଡନ୍ ତର୍ତୁମ୍ତେ; ଆରି, ପେଲ୍ଲାନ୍ ଆପେୟ୍ ସର୍ଡାନ୍ ଅଞାଙେ । ସର୍ଡାଡମନ୍ ଆ ଉଗ୍ଗର୍ ମନଙ୍ ରେଗମ୍; ବନ୍ଡ ଆପଲାଙ୍ ପୁରାଡ଼ାନ୍ ଅଜାଙନ୍ ଅଡ଼୍କୋନ୍ ଅବ୍ସର୍ତେ । ପେଲ୍ଲାମରନ୍ ପନ୍ସୁଆତିନ୍ ଆତଙର୍ ଅନବ୍ବାଙ୍କଡ଼ୋନ୍ ଆସନ୍ ଆ କୁଣ୍ତୁବନ୍ ସିଲଡ୍ ତଙ୍କାନ୍ ପାଙ୍ତେ । ବୁଡ୍ଡିଡମନ୍ ଆମନ୍ରା ଆତେମଡ୍ଲୋଙ୍ ଗିଆନନ୍ ଡକୋତେ, ବନ୍ଡ ଉଲ୍ଲୁନ୍ ଆଗନିୟ୍ଗିୟ୍ ପୁର୍ତିନ୍ ଆତନୁଙିୟ୍ ଜାୟ୍ ଡକୋତେ । ପେଲ୍ଲା ଡାଙ୍ଗଡ଼ାଅନନ୍ ଆପେୟନ୍ ପବ୍ରଡ୍ତେ ଆରି ଆୟୋଙନ୍ ଅବ୍ଡୁକ୍କତେ । ଡରମ୍ମମରନ୍ଆଡଙ୍ ଆ ପନବ୍ରଡ୍ ଅଡ଼େ ମନାନ୍ନେଡମନ୍ ଆମନ୍ରାଜିଆଡଙ୍ ଆ ଲବଡ୍ଡି ଆସନ୍ ତନୁଡନ୍ ସନାୟ୍ସାୟ୍ତଡ୍ । ଆନା ଅସୋୟ୍ ବର୍ନେନ୍ ବର୍ତନ୍, ଆନିନ୍ ଗିଆନମରନ୍, ଆରି, ଆନା ଆ ପୁରାଡ଼ା ସୟୁ, ଆନିନ୍ ବୁଡ୍ଡିଡମ୍ । ଗିଆନତଡନ୍ ଆମନ୍ରା କଡ଼ିଙ୍ଲେ ଡକୋଲନ୍ଡେନ୍, ଗିଆନମରନ୍ ଗାମ୍ଲେ ଡନିଡିନ୍ ଡେତେ; ଆରି, ଆନିନ୍ ଆ ଉସାଲ୍ତମନ୍ ଡୁବ୍ଲେ ଡକୋଏନ୍ଡେନ୍, ବୁଡ୍ଡିମର୍ ଗାମ୍ଲେ ଡନିଡିନ୍ ଡେତେ ।
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.