Juray Soura Bible
ପର୍ତମ୍ମୁ 9
ନୋଅନ୍ ବାତ୍ତେ ଇସ୍ୱରନ୍ ଆ ସନିବ୍ଡେୟ୍ବରନ୍
ନୋଅନ୍ ଡ ଆ ଡାଙ୍ଗାଡ଼ାଅନଞ୍ଜି ଇସ୍ୱରନ୍ ଆସିର୍ବାଦଲେ ବରେଞ୍ଜି, “ଅମ୍ବେଞ୍ଜି ଗୋଗୋୟ୍ବେନ୍ତୋ1 ଆରି କେଜ୍ଜାବେନ୍ ସମ୍ପରା ପୁର୍ତିନ୍ ବରିୟ୍ଡେଏତଜି । ପୁର୍ତିଲୋଙନ୍ ଡକୋନ୍ ଅଡ଼୍କୋ ଅନ୍ତିଡଞ୍ଜି, ଜନ୍ତୁଜି, କିମ୍ପୋଙନ୍ ବାତ୍ତେ ଆତ୍ରଙିୟ୍ତଞ୍ଜି ଆଜନ୍ତୁଜି, ଡ ଅୟଞ୍ଜି ଆମ୍ବେଞ୍ଜିଆଡଙ୍ ବତଙ୍ତଜି । ଇନିଆସନ୍ଗାମେଣ୍ଡେନ୍ କେନ୍ ଅଡ଼୍କୋନ୍ ଆଜନ୍ତୁଜି ଅସିଲୋଙ୍ବେନ୍ ସନୋରୋପ୍ପାୟନ୍ ଡେଏନ୍ । ଏଙ୍ଗାଲେ ଅଆବନ୍ ଜନୋମନ୍ ଆସନ୍ ତିୟ୍ଲବେନ୍ ଏତ୍ତେଲେ କେନ୍ ଆ ପରାନ୍ନାଞ୍ଜି ନିୟ୍ ଜନୋମ୍ବେନ୍ ଆସନ୍ ଞେନ୍ ଆମ୍ବେଞ୍ଜିଆଡଙ୍ ତିୟ୍ଲବେନ୍ । ବନ୍ଡ ଆମ୍ବେଞ୍ଜି ସମ୍ପରାମିଞାମ୍ ଜେଲୁନ୍ ଏଜୋମ୍ଡଙ୍; ଇନିଆସନ୍ଗାମେଣ୍ଡେନ୍ ମିଞାମ୍ଲୋଙନ୍ ପରାନ୍ନାନ୍2 ଆ ଅନମେଙନ୍ ଡକୋ । ଆରି ମନ୍ରାନ୍ଆଡଙ୍ ଏରବ୍ବୁଏଣ୍ଡେନ୍, ଆନିନ୍ ଡନଣ୍ଡାୟନ୍ ଞାଙ୍ତେ । ଜନ୍ତୁ ବାତ୍ତେ ଡେଏତୋ କି ମନ୍ରା ବାତ୍ତେ ଡେଏତୋ ଆନାଜାକିଁୟ୍ ଡେଏତୋ ଞେନ୍ ଡୁଲ୍ତନାୟ୍ । ଆନା ମନ୍ରାନ୍ ସମ୍ବୋବ୍ତେ ଆନିନ୍ ନିୟ୍ ମନ୍ରାନ୍ ବାତ୍ତେ ସନମ୍ବବନ୍ ଡେତେ, ଇନିଆସନ୍ଗାମେଣ୍ଡେନ୍ ଇସ୍ୱରନ୍ ଆଗୁନଡମନ୍3 ଅନ୍ତମ୍ ମନ୍ରାନ୍ ଗଡ଼େଏନ୍ ।
ପସିୟ୍ବେଞ୍ଜି ଗୋଗୋଜେତଜି, ଆରି ସମ୍ପରା ପୁର୍ତିନ୍ କେଜ୍ଜାବେଞ୍ଜି ବରିୟ୍ଡେଏତଜି ।”
ଇସ୍ୱରନ୍ ନୋଅନ୍ ଡ ଆ ଡାଙ୍ଗାଡ଼ାଅନଞ୍ଜିଆଡଙ୍ ବରେଞ୍ଜି, “ଆମ୍ବେଞ୍ଜି ସରିନ୍, ପୁର୍ବାଃତେ କେଜ୍ଜାବେଞ୍ଜି ସରିନ୍ ଆରି ଆମ୍ବେଞ୍ଜି ସରିନ୍ ଆଡ୍ରକୋଲଞ୍ଜି ଆ ଜନ୍ତୁଜି ଅଡ଼୍କୋନ୍ ସରିନ୍, ଆରି ଜାଜ୍ଜଲୋଙନ୍ ସିଲଡ୍ ଆମ୍ବେଞ୍ଜି ସରିନ୍ ଆଡ୍ରୁଙ୍ଲନାଞଞ୍ଜି ଅଡ଼୍କୋନ୍ ଆ ପରାନ୍ନାନ୍, ଅଡ଼୍କୋନ୍ ଆ ଅନ୍ତିଜି ଡ ଅଡ଼୍କୋନ୍ ଆ ଜନ୍ତୁଜି ସରିନ୍ ଞେନ୍ ସିବ୍ଡେୟ୍ ବର୍ରନ୍ ଗବ୍ରିତାୟ୍ । ଞେନ୍ ସିବ୍ଡେୟ୍ ବର୍ରନାୟ୍ ଡ ଅଡ଼୍କୋ ଆ ପରାନ୍ନା ବୁବ୍ଡାଡାଲେ ଅଃରବ୍ବୁଆଜି; ଆଙ୍ଗିୟ୍ ଆରି ପୁର୍ତିନ୍ ଅଃବୁବ୍ଡାଏ । ଇସ୍ୱରନ୍ ଗାମେନ୍ ଞେନ୍ ଆମ୍ବେଞ୍ଜି ଡ ଆମ୍ବେଞ୍ଜି ସରିନ୍ ଡକୋନ୍ ଆ ପରାନ୍ନା ଅଡ଼୍କୋନ୍ ପୁର୍ବାଃତେ ନିୟ୍ 4 ଅଡ଼୍କୋ ଡିନା ଆସନ୍ ଅଙ୍ଗା ଆ ସନିବ୍ଡେୟ୍ବର୍ ଗବ୍ରିଲାୟ୍ ତି ଅରମ୍ମଡନ୍ ଅକେନ୍, ଞେନ୍ ମେଗଲୋଙନ୍ ସୁସୁରୁଆଙନ୍ ଅବ୍ରାଙ୍ଡାତାୟ୍ । ତିଆତେ ଞେନ୍ ଡ ପୁର୍ତିନ୍ ଆସନ୍ ଅନଗଡ୍ ଅରମ୍ମଡନ୍ ଡେତେ । ଞେନ୍ ଅଙ୍ଗାଆଡିଡ୍ ମେଗଲୋଙନ୍ ସିଲଡ୍ ତରୁବନ୍ ପୁର୍ତିଲୋଙନ୍ ପତ୍ତାୟ୍ତାୟ୍ ତିଆଡିଡ୍ ରୁଆଙ୍ଲୋଙନ୍ ସୁସ୍ରୁଆଙ୍ ରାଙ୍ଡାତେ, ଆମ୍ବେଞ୍ଜି ସରିନ୍ ଞେନ୍ ସରିବ୍ଡେୟ୍ ବର୍ରନାଞନ୍ ଆତେ ଞେନ୍ ମନ୍ନେତାୟ୍ ତିଆସନ୍ ଆମ୍ବେନ୍ ସରିନ୍ ଡ ଅଡ଼୍କୋ ଜନ୍ତୁଜି ଆରି ଆଙ୍ଗିୟ୍ ବୁବ୍ଡାଡାଲେ ଅଃରବୁଆଜି । ସୁସୁରୁଆଙନ୍ ମେଗଲୋଙନ୍ ରାଙ୍ଡାଏଣ୍ଡେନ୍, ପୁର୍ତିଲୋଙନ୍ ଡକୋନ୍ ଅଡ଼୍କୋନ୍ ଆ ପରାନ୍ନା ସରିନ୍ ଅଡ଼୍କୋ ଡିନାନ୍ ଆସନ୍ ଅଙ୍ଗା ଆ ଅନଗଡ୍ ଆ ସନିବ୍ଡେୟ୍ବର୍ ଡକୋ ତିଆତେ ଞେନ୍ ଏମନ୍ନେତାୟ୍ । ଇସ୍ୱରନ୍ ନୋଅନ୍ଆଡଙ୍ ବରେନ୍ ପୁର୍ତିଲୋଙନ୍ ଅଡ଼୍କୋନ୍ ଆ ପରାନ୍ନାଜି ସରିନ୍ ଅଙ୍ଗା ଆ ସନିବ୍ଡେୟ୍ବର୍ ଆନଗଡ୍ ଞେନ୍ ଗବ୍ରିଲାୟ୍ କେନ୍ଆତେ ତି ଅରମ୍ମଡନ୍ ଡେତେ ।”
ନୋଅନ୍ ଡ ଆ ଡାଙ୍ଗାଡ଼ାଅନଞ୍ଜି
ନୋଅନ୍ ଆ ଡାଙ୍ଗାଡ଼ାଅନଞ୍ଜି ଆନାଜି ଜାଜ୍ଜଲୋଙନ୍ ସିଲଡ୍ ଡୁଙ୍ଲନାଜି ଆଞୁମଞ୍ଜି ସେମ, ଆମ ଡ ଜେପତ । କିଣାନନ୍ ଆପ୍ପେୟ୍ ଆମନନ୍ । କେନ୍ ୟାଗି ନୋଅନ୍ ଆ ଡାଙ୍ଗାଡ଼ଅନଞ୍ଜି କେନ୍ ଆ ପୁର୍ତିଲୋଙ୍ ଆକେଜ୍ଜାଞ୍ଜି ତୁମ୍ ଡେଏଞ୍ଜି ।
ନୋଅନ୍ ଅବୟ୍ ଅର୍ରମର୍ ଡକୋଏନ୍, ଆରି ଆନିନ୍ ଆପର୍ତମ୍ମୁନ୍ ଦ୍ରାକ୍ୟାକୋତାନ୍ ତୁବେନ୍ । ବଡିନା ଆନିନ୍ ଦ୍ରାକ୍ୟାଡାନ୍ ଗାଲେ ଆନିନ୍ ବନ୍ନୁଲେନ୍, ଆରି ତମ୍ବୁସିଂଲୋଙନ୍ ଆଉର୍ଡିଜନ୍ ଆଲୁଡ୍ଲୁଡ୍ ଡକୋଲନ୍ । ତି ଆଡିଡ୍ କିଣାନନ୍ ଆପ୍ପେୟ୍ ଆମନନ୍, ଆପ୍ପେୟନ୍ଆଡଙ୍ ଆଉର୍ଡିଜନ୍ ଗିୟ୍ଲେ କେନ୍ ଆବର୍ନେ ବାଗୁବ୍ ଆବୋଞାଙଞ୍ଜିଆଡଙ୍ ଇୟ୍ଲେ ବରେଜି । ତିଆଡିଡ୍ ସେମନ୍ ଡ ଜେପତନ୍ ଆତାରଙ୍ଲୋଙଞ୍ଜି ସିନ୍ରିନ୍ ରାଙ୍କୁଡେଞ୍ଜି ଆରି ମଡ଼୍କୁଣ୍ଡୋଙ୍ ତଙିୟ୍ଲନ୍ ଆପ୍ପେୟଞ୍ଜି ଆଉର୍ଡିଜୟ୍ ଏର୍ଗନିୟ୍ ସିନ୍ରିନ୍ ୟୁମେଞ୍ଜି, ଆନିଞ୍ଜି ମଡ଼କୁଣ୍ଡୋଙ୍ ଆଜିର୍ରେଞ୍ଜି ଆସନ୍ ଆ ଆପ୍ପେୟଞ୍ଜି ଆଉର୍ଡିଜୟ୍ ଅଃଗିୟ୍ଲଜି । ନୋଅନ୍ ଆତ୍ରବ୍ବୁଲେନ୍ ସିଲଡ୍ ଡୋଲନେ ଆ ସନ୍ନା ଡାଙ୍ଗଡ଼ାଅନନ୍ ଆଞନର୍ରମ୍ ଆପ୍ପେୟନ୍ ଜନାଏନ୍, ତିଆସନ୍ ନଅନ୍ ଗାମେନ୍,
“କିଣାନନ୍ ସନୟ୍ପନ୍ ଞାଙେତୋ ।
ଆନିନ୍ ଆ ବୋଞାଙଞ୍ଜି ଆକମ୍ବାରିମର୍ ଡେଏତୋ ।
ଆରି ଆନିନ୍ ଗାମେନ୍ ସେମନ୍ ଆ ଇସ୍ୱରନ୍ ସନେନ୍ସେନ୍ ଡେଏତୋ !
କିଣାନନ୍ ସେମନ୍ ଆ କମ୍ବାରିମର୍ ଡେଏତୋ ।
ଇସ୍ୱରନ୍ ଜେପତନ୍ଆଡଙ୍ ଗଃମାଙେନ୍ !
ଆରି ଆନିନ୍ ସେମନ୍ ଆତମ୍ବୁସିଂଲୋଙନ୍ ଡକୋନେତୋ !
କିଣାନନ୍ ଜେପତନ୍ ଆକମ୍ବାରିମରନ୍ ଡେଏତୋ ।”
ପୁର୍ତିନ୍ ଆବ୍ରୁବ୍ଡାଏନ୍ ସିଲଡ୍ ନୋଅନ୍ ଆରି ୟାଗିସଅ ପଚାସ ବର୍ସେଙ୍ ଜାୟ୍ ଡକୋଲନ୍ ଆରି ନସଅ ପଚାସ ବର୍ସେଙ୍ ଡକୋଡାଲନ୍ ରବୁଏନ୍ ।
Source notes (4)
- Footnote ଗୋଗୋୟ୍ପସିଜନ୍ କୋଡ୍ବା
- Footnote ଜନ୍ତୁନ୍
- Footnote ଆନିନ୍ଡମ୍ ଅନ୍ତମ୍
- Footnote ଆ ଅନଞ୍ଜି ସିଲଡ୍ ଆ ଅନଞ୍ଜି ନିୟ୍
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.