Juray Soura Bible
ପର୍ତମ୍ମୁ 45
ଆବୋଞାଙଞ୍ଜିଆଡଙ୍ ଜୋସେପନ୍ ଆସନେକୁଲ୍
ତି ସିଲଡ୍ଲ୍ଲନ୍ ଜୋସେପନ୍ ଆମଙ୍ବା ଆତନଙ୍ ଆଡ୍ରକୋଏନ୍ ଆମନ୍ରାଞ୍ଜି ଆତେମଡ୍ଲୋଙ୍ ଆନିନ୍ଡମ୍ ଲଡ୍ଲଡ୍ଜିଲନ୍ ଅଃରପ୍ତିଲନ୍ ସୋଡ଼ା ସର୍ରଙନ୍ ବାତ୍ତେ ବର୍ନେ, “ମୁକାବାଞେନ୍ ସିଲଡ୍ ଅଡ଼୍କୋ ମନ୍ରାନ୍ଆଡଙ୍ ଅମ୍ଡୁଙ୍ବା ।” ସିଲତ୍ତେ ଆମଙ୍ବା ଆନ୍ନିଙ୍ ଅଃଡକୋଲଞ୍ଜି, ଜୋସେପନ୍ ଆବୋଞାଙଞ୍ଜି ଆତେମଡ୍ ଆନିନ୍ଡମ୍ ଆବର୍ନେ ବର୍ନେ । ଆନିନ୍ ସୋଡ଼ା ସର୍ରଙନ୍ ବାତ୍ତେ ଏନେଲେ ୟେନ୍ ଡ, ମିସ୍ରିୟଞ୍ଜି ଡ ପାରୋନ୍ ଆସିଙ୍ ଆଡ୍ରକୋଏନ୍ ଆ ମନ୍ରାଜି ଜାୟ୍ ଅମ୍ଡଙେଞ୍ଜି । ଜୋସେପନ୍ ଆ ବୋଞାଙଞ୍ଜିଆଡଙ୍ ବରେନ୍, “ଞେନ୍ ଜୋସେପନ୍; ଆପେୟ୍ଞେନ୍ ପଙ୍ ନମିଆନ୍ତାନ୍ ଆମେଙ୍ଡକୋ ?” ତି ସିଲଡ୍ଲ୍ଲନ୍ ଆବୋଞାଙଞ୍ଜି ଆନିନ୍ଆଡଙ୍ ଆତେମଡ୍ ବତଙ୍ଲେ ଇନ୍ନିଙ୍ ଜାଲଙ୍ଲେ ଅରପ୍ତିଲୋଜି । ତି ସିଲଡ୍ଲ୍ଲନ୍ ଜୋସେପନ୍ ଆବୋଞାଙଞ୍ଜିଆଡଙ୍ ବରେନ୍, “କାକୁର୍ତିତନାୟ୍, ଅମଙ୍ଞେନ୍ ଜିରାୟ୍ବା,” ସିଲତ୍ତେ ଆନିଞ୍ଜି ଆମଙ୍ବାନ୍ ଆଜିର୍ରେଞ୍ଜି, ଆନିନ୍ ବର୍ନେ, “ଞେନ୍ ବୋଞାଙ୍ବେନ୍ ଜୋସେପନ୍, ଆନାଆଡଙ୍ ଆମ୍ୱେଞ୍ଜି ମିସର୍ ଆରିୟେଞ୍ଜି ଆ ମନ୍ରାଜି ଆମଙ୍ ଏତମେନ୍ । ବନ୍ଡ, ଆମ୍ୱେଞ୍ଜି ଞେନ୍ଆଡଙ୍ କେନ୍ତ୍ତେନେ ଆଜନିର୍ ଆସନ୍ ଏତମ୍ଲିଁୟ୍ ଗାମ୍ଲେ ନମି ଡୁକ୍କ ଡ ରମ୍ମଙ୍ ରମ୍ମଙ୍ ଏବରାବ୍ଡଙ୍ନେ; ଇନିଆସନ୍ଗାମେଣ୍ଡେନ୍ ଇସ୍ୱରନ୍ ପରାନ୍ନା ଆନମେଙ୍ ଆସନ୍ ଆମ୍ୱେଞ୍ଜି ଆମ୍ମୁଙ୍ ଞେନ୍ଆଡଙ୍ ଆପ୍ପାୟ୍ଲିଁୟ୍ । ଗିୟ୍ବା, ବଗୁ ବର୍ସେଙ୍ ଡେଏନ୍ ଡେସାଲୋଙନ୍ କାନ୍ତାରାଏନ୍; ଆରି ମନ୍ଲୟ୍ ବର୍ସେଙ୍ ଡକୋ କାନ୍ତାରାତେ, ତେତ୍ତେ ଅର୍ରନ୍ ଅଡ଼େ ଜନ୍ରୋମନ୍ ଆ ଗଃଗନେନ୍ ଅଃଡ୍ଡେଏ । ତିଆସନ୍ ଇସ୍ୱରନ୍ ପୁର୍ତିଲୋଙନ୍ କେଜ୍ଜାବେନ୍ ଆଡନୋବ୍ ଆସନ୍ ଆରି ବରନ୍ତଙନ୍ ଆକାନ୍ତାରା ସିଲଡ୍ ଆମ୍ବେଞ୍ଜିଆଡଙ୍ ଆନବ୍ମେଙ୍ ଆସନ୍ ଇସ୍ୱରନ୍ ଆମ୍ମୁଙ୍ମା ଞେନ୍ଆଡଙ୍ ତେନ୍ନେ ଆପ୍ପାୟ୍ଲିଁୟ୍ । ତିଆସନ୍ ଆମ୍ୱେଞ୍ଜି ଞେନ୍ଆଡଙ୍ କେନ୍ ତେନ୍ନେ ଏଆପ୍ପାଲିଁୟ୍, ତି ତଡ୍, ଇସ୍ୱରନ୍ ଆପ୍ପାୟ୍ଲିଁୟ୍; ଆରି, ଆନିନ୍ ଞେନ୍ଆଡଙ୍ ପାରୋନ୍ ଆ ଆପେୟ୍ ଡ ଆସିଙନ୍ ଆ ପ୍ରବୁ ଡ ସମ୍ପରା ମିସର୍ ଡେସାନ୍ ଆସାଉକାର ଏମ୍ମେଲିଁୟ୍ । ତିଆସନ୍ ଆମ୍ୱେଞ୍ଜି ଲଜିର୍ ଆପେୟ୍ଞେନ୍ ଆମଙ୍ ଇୟ୍ଲେ ଆନିନ୍ଆଡଙ୍ ଇୟ୍ବର୍ବା, ଇସ୍ୱରନ୍ ଞେନ୍ଆଡଙ୍ ସମ୍ପରା ମିସର୍ ଡେସାନ୍ ଆସୋଡ଼ାମର୍ ଏମ୍ମେଲିଁୟ୍; ଆମ୍ୱେନ୍ ଅମଙ୍ଞେନ୍ ଜିରାୟ୍ବା, ଏଅବ୍ଡିଙ୍ଡଙ୍ନେ । ଆମନ୍ ଡାଙ୍ଗଡ଼ାଅନନ୍, ଉଲ୍ଲେଙନ୍ ଡ ଅସିଙନ୍ ଆବନନ୍ ଜନ୍ତୁଜି ଅଡ଼୍କୋନ୍ ସରିନ୍ ଗୋସେନ୍ ଡେସାଲୋଙନ୍ ଡକୋଲନ୍ ମଙ୍ବାଞେନ୍ ଏଅବ୍ଡମ୍ତନେ । ତି ଆଡ୍ରକୋନେଲୋଙ୍, ଞେନ୍ ଆମ୍ୱେଞ୍ଜିଆଡଙ୍ ତୁର୍ଡାତବେନ୍; ଇନିଆସନ୍ଗାମେଣ୍ଡେନ୍ ଆରି ମନ୍ଲୟ୍ ବର୍ସେଙ୍ କାନ୍ତାରାନ୍ ଡକୋତନ୍; ଇଜ୍ଜାଡେନ୍ ଆମ୍ୱେନ୍ ଡ ଅସିଙ୍ମର୍ବେଞ୍ଜି ଅଡ଼୍କୋନ୍ ଡୋଲେୟ୍ମରନ୍ ଡେତବେନ୍ ।
ଗିୟ୍ବା, ମୁକାଞେନ୍ ଆମ୍ୱେଞ୍ଜିଆଡଙ୍ କେନ୍ ଆବର୍ନେ ବର୍ତବେନ୍, କେନ୍ଆତେ ଅମଡ୍ବେନ୍ ଡ ବୋଞାଙ୍ଡମ୍ଞେନ୍ ବିନ୍ୟାମିନନ୍ ଆମଡ୍ ଗିୟ୍ତେ । ତିଆସନ୍ ଆମ୍ୱେଞ୍ଜି କେନ୍ ଆ ମିସର୍ ଡେସାଲୋଙ୍ ବୋର୍ସାଞେନ୍ ଆକାବାଡ଼ା ଇନିଜି ଏଗିୟ୍ତେ, ତି ଅଡ଼୍କୋନ୍ ଆପେୟ୍ଞେନ୍ଆଡଙ୍ ଅବ୍ଜନାଲେ ଆନିନ୍ଆଡଙ୍ ଲଜିର୍ କେନ୍ତେନ୍ନେ ଓରୋଙାୟ୍ବା ।” ତି ସିଲଡ୍ଲ୍ଲନ୍ ଆନିନ୍ ଆବୋଞାଙ୍ଡମନ୍ ବିନ୍ୟାମିନନ୍ ଆସଙ୍କା ଞମ୍ଲେ ୟେଏନ୍ ବେଞ୍ଜାମିନନ୍ ଜାୟ୍ ଆନିନ୍ କୋଣ୍ତୋଡାଲେ ୟେୟେଡାଲନ୍ । ଆରି, ଜୋସେପନ୍ ଆନ୍ନା ଆବୋଞାଙଞ୍ଜିଆଡଙ୍ ଜୋର୍ଜୋରେନ୍ ଡ ଆନିଞ୍ଜିଆଡଙ୍ ଞମ୍ଲେ ୟେଏନ୍ । ତି ସିଲଡ୍ଲ୍ଲନ୍ ଆବୋଞାଙଞ୍ଜି ଆନିନ୍ ସରିନ୍ ଅଲ୍ବରେଞ୍ଜି ।
ଆରି ଜୋସେପନ୍ ଆବୋଞାଙ୍ଜି ଜିର୍ରାଜି, କେନ୍ ଆବର୍ନେ ପାରୋନ୍ ଆସିଙ୍ ଜାୟ୍ ଅଡ଼ୋଏନ୍, ପରୋନ୍ ଡ ଆକମ୍ୱାରିଞ୍ଜି ଅଡ଼୍କୋନ୍ ସର୍ଡାଏଞ୍ଜି । ଆରି, ପାରୋନ୍ ଜୋସେପନ୍ଆଡଙ୍ ବରେନ୍, “ଆମନ୍ ବୋଞାଙ୍ନମ୍ଞ୍ଜିଆଡଙ୍ ବରା, ଆମ୍ୱେଞ୍ଜି କେନ୍ ଆକାବ୍ବାଡ଼ା ଲୁମ୍ବା; ରମ୍ମଙ୍ ରମ୍ମଙ୍ ଆ ଜନ୍ତୁଜି ଜନ୍ରୋମନ୍ ଅଃବୋୟ୍ଲେ କିଣାନ୍ ଡେସାନ୍ ଜିର୍ବା, ଆରି, ଆପେୟନ୍ଆଡଙ୍ ଡ ତର୍ଡମ୍ ତର୍ଡମ୍ ଅଡ଼୍କୋନ୍ ଆସିଂମର୍ଜିଆଡଙ୍ ଓରୋଙ୍ଲେ ଅମଙ୍ଞେନ୍ ଜିରାୟ୍ବା; ଞେନ୍ ଆମ୍ୱେଞ୍ଜିଆଡଙ୍ ମିସର୍ ଡେସାନ୍ ଆ ମନଙ୍ ଜନବ୍ ଏତିୟ୍ତବେନ୍, ଆରି, ଆମ୍ୱେଞ୍ଜି ଡେସାନ୍ ଅଡ଼୍କୋନ୍ ସିଲଡ୍ ମନଙନ୍ ଆଜନୋମ୍ ଏଜୋମ୍ତେ । ନମି ବନାଁୟ୍ବର୍ଞେନ୍ ଅନ୍ତମ୍ କେନ୍ ଆକାବ୍ବାଡ଼ା ଲୁମ୍ବା, ଆମ୍ୱେଞ୍ଜି ତର୍ଡମ୍ ତର୍ଡମ୍ ଆପସିୟ୍ଜି ଡ ଡୁକ୍ରିବେଞ୍ଜି ଆସନ୍ ମିସର୍ ଡେସାନ୍ ସିଲଡ୍ ଗାଡ଼ିନ୍ ପାଙ୍ବା, ଆରି, ଆପ୍ପେୟ୍ବେନ୍ଆଡଙ୍ ଓରୋଙାୟ୍ବା । ଆରି ଜନବ୍ବେଞ୍ଜି ଆବର୍ନେ ଏଇୟମ୍ଡଙେ; ସମ୍ପରା ମିସର୍ ଡେସାନ୍ ଆ ମନଙ୍ ଜନବ୍ ଆମ୍ୱେନ୍ଆତେ ଡେତେ ।” ସିଲତ୍ତେ ଜାକୁବନ୍ ଆ ଡାଙ୍ଗାଡ଼ାଅଞ୍ଜି ତିଅନ୍ତମ୍ ଲୁମେଞ୍ଜି; ଆରି ଜୋସେପନ୍ ପାରୋନ୍ ଆ ବନାଁୟ୍ବର୍ ଅନ୍ତମ୍ ଆନିଞ୍ଜିଆଡଙ୍ ସଗଡ଼ାନ୍ ଡ ଜନୋମ୍ ଜନବନ୍ ତିୟେଞ୍ଜି । ଆରି, ଡିଲେ ମନ୍ରାନ୍ଆଡଙ୍ ତଙ୍ବାଗୁ ସିନ୍ରିନ୍ ତିୟେନ୍, ବନ୍ଡ ବିନ୍ୟାମିନ୍ଆଡଙ୍ ୟାଗିସ ସେକଲ୍1 ରୁପାଡାବନ୍ ଡ ଦସଟା ସିନ୍ରିନ୍ ତିୟେନ୍ । ଆରି, ଆପେୟନ୍ ଆସନ୍ ମିସର୍ ଡେସାନ୍ ଆ ମନଙ୍ ମନଙ୍ ଜିନିସଞ୍ଜି ଆ ଆବ୍ବୋୟ୍ ଦସଟା ଗୋଡୋଁୟନ୍ ଡ ଆପ୍ପେୟନ୍ ଆଜନୋମ୍ ଆସନ୍ ଜନ୍ରୋମନ୍ ଡ ରୁଟିନ୍ ଏର୍ଜାଡ଼ିକାନ୍ ଜନୋମ୍ ଜିନିସଞ୍ଜି ଦସ୍ଟା ଗୋଡୋଁୟ୍ଲୋଙନ୍ ଅଃବୋୟ୍ଡାଲେ ଆପ୍ପାୟେନ୍ । କେନ୍ ଅନ୍ତମ୍ ଜୋସେପନ୍ ଆବୋଞାଙଞ୍ଜିଆଡଙ୍ ଆରାପ୍ପାୟେଞ୍ଜି, ଆନିଞ୍ଜି ଜିରେଞ୍ଜି; ଆରି, ଆନିନ୍ ଆନିଞ୍ଜିଆଡଙ୍ ବରେନ୍, “ମନଙ୍ ଜିର୍ବା, ତଙରନ୍ ଏୟ୍ଗୋଡ଼େଡଙ୍ନେ ।”
ତି ସିଲଡ୍ଲ୍ଲନ୍ ଆନିଞ୍ଜି ମିସର୍ ଡେସାନ୍ ସିଲଡ୍ ଜିର୍ରେ କିଣାନ୍ ଡେସାନ୍ ଆପେୟନ୍ ଜାକୁବନ୍ ଆମଙ୍ବା ଅଡ଼ୋଏଞ୍ଜି । ଆରି, ଆନିଞ୍ଜି ଆନିନ୍ଆଡଙ୍ ବରେଞ୍ଜି, “ଜୋସେପନ୍ ନମିଆନ୍ତାନ୍ ଆମେଙ୍ ଡକୋ, ଆରି ଆନିନ୍ ସମ୍ପରା ମିସର୍ ଡେସାନ୍ ଆ ସାଉକାରଡେନ୍ ।” ସିଲତ୍ତେ ଜାକୁବନ୍ ଆଉଗର୍ ରାଉଡେନ୍, ବନ୍ଡ ଆନିନ୍ ଆନିଞ୍ଜିଆଡଙ୍ ଅଃଡର୍ରନେ ।
ଆରି, ଜୋସେପନ୍ ଡିଅଙ୍ଗା ଆବର୍ନେ ଆନିଞ୍ଜିଆଡଙ୍ ବରେନ୍, ତି ଅଡ଼୍କୋନ୍ ଆବର୍ନେ ଆନିନ୍ଆଡଙ୍ ବରେଞ୍ଜି । ବନ୍ଡ ଆନିନ୍ ଆନିନ୍ଆଡଙ୍ ଆନୋରୋଙ୍ ଆସନ୍ ଜୋସେପନ୍ ଆନାପ୍ପାୟ୍ ଗାଡ଼ିନ୍ ଅଡ଼୍କୋନ୍ ଗିଜେନ୍, ତିଆଡିଡ୍ ଆପେୟଞ୍ଜି ଜାକୁବନ୍ ଆପୁରାଡ଼ା ୟର୍ମେଙେନ୍ । ସିଲତ୍ତେ ଜାକୁବନ୍ ବର୍ନେ, “ସରି; ଞେନ୍ ଜିର୍ତେ, ଅନ୍ରଙ୍ ରବୁଇଞନ୍ ଆମ୍ମୁଙ୍ ଆନିନ୍ଆଡଙ୍ ଗିୟ୍ତାୟ୍ ।”
Source notes (1)
- Footnote ୩.୫କେଜି
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.