Juray Soura Bible
ପର୍ତମ୍ମୁ 33
ଜାକୁବନ୍ ଏସୋନ୍ ସରିନ୍ ଅଲ୍ରବାଞେଞ୍ଜି
ତି ସିଲଡ୍ଲ୍ଲନ୍ ଜାକୁବନ୍ ଆଙାଙ୍ଲେ ଗିଜେନ୍, ଆରି ଗିଜା, ଏସୋନ୍ ଡକୋଏନ୍, ଆରି, ଆନିନ୍ ସରିନ୍ ଉଞ୍ଜିସଅ ଓବ୍ବାମରନ୍ । ସିଲତ୍ତେ ଆନିନ୍ ଆ ପସିଜଞ୍ଜିଆଡଙ୍ ବାଗାଲେ ଲେୟାନ୍ ଡ ରାଏଲନ୍ ଆରି ବାଗୁ କମ୍ୱାରିବଜନ୍ ଆମଙ୍ଲୋଙ୍ ସୋରୋପ୍ପାୟେନ୍, ଇନିଆସନ୍ଗାମେଣ୍ଡେନ୍, ଆମ୍ମୁଙ୍ ବାଗୁ କମ୍ୱାରିବଜନ୍ ଡ ଆପସିଜଞ୍ଜିଆଡଙ୍, ତି ଆସନଣ୍ଡୋଙଞ୍ଜି ଲେୟାନ୍ ଡ ଆପସିଜଞ୍ଜିଆଡଙ୍, ଆତନିକ୍କି ରାଏଲନ୍ ଡ ଜୋସେପନ୍ ଡକୋଏନ୍ । ଆରି, ଆନିନ୍ଡମ୍ ଅଡ଼୍କୋଞ୍ଜି ଆମ୍ମୁଙ୍ ଜିର୍ରେ ସାତତର ଲୋମ୍ଲେ ଆବୋଞାଙନ୍ ଆମଙ୍ବା ଅଡ଼ୋଏନ୍ । ତିଆଡିଡ୍ ଏସୋନ୍ ଆନିନ୍ଆଡଙ୍ ରନବାଙନ୍ ଆସନ୍ ଲଜିର୍ରେ କୋଣ୍ତୋଏନ୍ ଡ ଜୋର୍ଜୋରେନ୍, ଆରି, ବାଗୁଞ୍ଜି ୟେଏଞ୍ଜି । ତି ସିଲଡ୍ଲ୍ଲନ୍ ଆନିନ୍ ଆଇମରଞ୍ଜିଆଡଙ୍ ଡ ପସିଜଞ୍ଜିଆଡଙ୍ ଗିୟ୍ଲେ ବରେନ୍, “ଆମନ୍ ସରିନ୍ କେନ୍ଆନିଞ୍ଜି ଆନାଜି ?” ସିଲତ୍ତେ ଆନିନ୍ ବର୍ନେ, “ଇସ୍ୱରନ୍ ଆ ସନାୟୁମ୍ ବାତ୍ତେ କମ୍ୱାରିନମ୍ଆଡଙ୍ କେନ୍ ଅଡ଼୍କୋନ୍ ତିୟ୍ଲିଂ ।” ସିଲତ୍ତେ କମ୍ୱାରିବଜଞ୍ଜି ଡ ଆପସିଜଞ୍ଜି ଆମଙ୍ବାନ୍ ଜିର୍ରେ ଲୋମେଞ୍ଜି । ତି ସିଲଡ୍ଲ୍ଲନ୍ ଲେୟାନ୍ ଡ ଆପସିଜଞ୍ଜି ଜିର୍ରେ ଲୋମେଞ୍ଜି; ଆତନିକ୍କି ଜୋସେପନ୍ ଡ ରାଏଲନ୍ ଆମଙ୍ବାନ୍ ଜିର୍ରେ ଲୋମେଞ୍ଜି । ସିଲତ୍ତେ ଏସୋନ୍ ବରେନ୍, “ଞେନ୍ ଆମ୍ମୁଙ୍ ଅଙ୍ଗା ଅଡ଼୍କୋନ୍ ଜନ୍ତୁଜି ଡଡ଼ନ୍ ସରିନ୍ ରବାଙ୍ଲାୟ୍; ତିଆତେ ଇନି ଆସନ୍ ?” ଜାକୁବନ୍ ବର୍ନେ, “ପ୍ରବୁଞେନ୍ ଆଗନିୟ୍ଗିୟ୍ଲୋଙ୍ ସନାୟୁମନ୍ ଆଞନାଙ୍ ଆସନ୍ ।” ସିଲତ୍ତେ ଏସୋନ୍ ବର୍ନେ, “ଅମଙ୍ଞେନ୍ ଜବ୍ର ଡକୋ; ବୋଞାଙ୍, ଅମଙ୍ନମ୍ ଇନି ଡକୋ, ତିଆତେ ଅମଙ୍ନମ୍ ଡକୋଏତୋ ।” ଜାକୁବନ୍ ବର୍ରନେ, “ଇଜା, କାକୁର୍ତିତନାୟ୍, ଞେନ୍ ଗନିୟ୍ଗିୟ୍ଲୋଙ୍ନମ୍ ସନାୟୁମନ୍ ଞାଙ୍ଲାୟ୍, ଏତ୍ତେଲ୍ଡେନ୍ ଅସିଲୋଙ୍ଞେନ୍ ସିଲଡ୍ ଆତନିୟ୍ତିୟ୍ଜି ଜାଆ; ଇନିଆସନ୍ଗାମେଣ୍ଡେନ୍ ଇସ୍ୱରନ୍ ଆମୁକ୍କାଲୋଙ୍ ଆଗରିୟ୍ଲାଞନ୍ ଅନ୍ତମ୍ ଞେନ୍ ମୁକାନମ୍ ଗିୟ୍ଲାୟ୍; ଆମନ୍ ନିୟ୍ ଞେନ୍ ସରିନ୍ ଅବ୍ଗିୟ୍ଲନେ । ତିଆସନ୍ କାକୁର୍ତିତନାୟ୍, ଅମଙ୍ବାନମ୍ ଆପନାଙ୍ କେନ୍ ଆସିର୍ବାଦ ଜାଆ; ଇନିଆସନ୍ଗାମେଣ୍ଡେନ୍ ଇସ୍ୱରନ୍ ଡଅଙ୍ଞେନ୍ ସାୟୁମ୍ଲିଁୟ୍, ଆରି, ଅମଙ୍ଞେନ୍ ଅଡ଼୍କୋନ୍ ଡକୋ । କେନ୍ଅନ୍ତମ୍ ଅବାଲ୍ଲେନ୍ ଅବ୍ଜଗ୍ଗେଲେ ଆ ପାର୍ତନାଲନ୍ ଆସନ୍, ଏସୋନ୍ ତିଆତେ ଜାଏନ୍ ।” ତି ସିଲଡ୍ଲ୍ଲନ୍ ଏସୋନ୍ ବର୍ନେ, “ଜିରାୟ୍, ଞେନ୍ ଏଜିର୍ବା, ଞେନ୍ ଆମ୍ୱେଞ୍ଜି ଆମ୍ମୁଙ୍ ଜିର୍ତେ ।” ସିଲତ୍ତେ ଜାକୁବନ୍ ବର୍ନେ, “ପ୍ରବୁଞେନ୍ ଜନା, କେନ୍ ଆପସିୟ୍ଜି ସନ୍ନାରା, ଆରି ଆକୋଡନ୍ ମେଣ୍ତାଞ୍ଜି ଡ ଓଟ ଞେନ୍ ସରିନ୍ ଡକୋଜି; ବଡିନା ଗୋଗୋୟ୍ ତଙିୟ୍ଲଞ୍ଜିଡେନ୍ ଅଡ଼୍କୋନ୍ ଆମେଣ୍ତା ରବୁତଜି । ତିଆସନ୍ କାକୁର୍ତିତନାୟ୍, ପ୍ରବୁ କମ୍ୱାରିନମ୍ ଆମ୍ମୁଙ୍ ଜିରା; ସେଇର ଡେସାନ୍ ପ୍ରବୁଞେନ୍ ଆମଙ୍ବା ଅନ୍ରଙ୍ ଅଡ଼ୋଏନ୍ ଜାୟ୍ ଞେନ୍ ଜନ୍ତୁଜି ଆତଙିୟ୍ନେ ଆ ବୋର୍ସା ଅନ୍ତମ୍ ଡ ପସିଜଞ୍ଜି ତଙିୟ୍ଲନ୍ ଆର୍ରପ୍ତିତେଞ୍ଜି ତି ଅନ୍ତମ୍ ଅଲିସା ତୁରିୟ୍ତାୟ୍ଜି ।” ଏସୋନ୍ ବର୍ନେ, “ତିଡେନ୍ ଗଡ଼ି ମର୍ଞେଞ୍ଜି ଲାଙ୍ଲେଡ୍ ଅମଙ୍ବାନମ୍ ଉମ୍ରେଙ୍ଲେ ଜିର୍ତେ ।” ଜାକୁବନ୍ ଜାଲଙେନ୍, “ଇନ୍ନିଙ୍ ସନାୟ୍ସାୟ୍ତଡ୍ ପ୍ରବୁଞେନ୍ ଆସନାୟୁମ୍ ଅମଙ୍ଞେନ୍ ଡକୋଏତୋ ।” ସିଲତ୍ତେ ଏସୋନ୍ ତି ଆଡିଡ୍ ସେୟିରନ୍ ଆତଙର୍ଗଡ୍ ୟର୍ରନେ । ବନ୍ଡ ଜାକୁବନ୍ ସୁକକୋତନ୍ ଜିର୍ରେ ଆନିନ୍ଡମ୍ ଆସନ୍ ଅସିଙନ୍ ଡ ଜନ୍ତୁଜି ଆସନ୍ ଅନ୍ସିଙନ୍ ତୁବେନ୍; ତିଆସନ୍ କେନ୍ ଆଡ୍ରକୋନେ ଆଞୁମ୍ ସୁକୋତ୍1 ଗାମ୍ଲେ ଓଡ୍ଡେତଜି । କେନ୍ ଅନ୍ତମ୍ ଜାକୁବନ୍ ପଦ୍ଦନ୍ ଅରାମନ୍ ସିଲଡ୍ ଡୁଙ୍ଲନ୍ ଉଗୁରିୟ୍ କିଣାନ୍ ଆଡେସା ସିକିମନ୍ ଅବୟ୍ ଆଗଡ଼ାଲୋଙ୍ ଅଡ଼ୋଡାଲେ ଗଡ଼ାନ୍ ଆ ଡୁଆରାବା ତମ୍ୱୁସିଙନ୍ ତୁବେନ୍ । ତି ସିଲଡ୍ଲ୍ଲନ୍ ସିକିମନ୍ ଆପେୟ୍ ଅମୋରନ୍ ଆଅଞ୍ଜିଆଡଙ୍ ବସଅ ରୁପାଡାବନ୍ ତିୟ୍ଲେ ତି ଆତମ୍ୱୁସିଙ୍ ଆଡ୍ରକୋନେନ୍ ଆସନ୍ ଲବନ୍ ଞିଏନ୍ । ଆରି, ତେତ୍ତେ ଅବୟ୍ ତନମ୍ପିଲନ୍ ତୁବ୍ଲେ ଆଞୁମନ୍ ଏଲ-ଇଲୋଏ-ଇସ୍ରାଏଲ୍2 ଆଞୁମ୍ ଡକୋଏନ୍ ।
Source notes (2)
- Footnote ଆଗ୍ରାମ୍ଗାମ୍ ଅନ୍ସିଙ୍
- Footnote ଆଗ୍ରାମ୍ଗାମ୍ ଇସ୍ୱର, ଇସ୍ରାଏଲନ୍ ଆ ଇସ୍ୱର, ଆରି ଆନ୍ନା ଅଡ଼୍କୋନ୍ ସିଲଡ୍ ବୋର୍ସାଡମ୍
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.