Juray Soura Bible
ପର୍ତମ୍ମୁ 3
ମନ୍ରାନ୍ ଆନ୍ନାଲେ
ପ୍ରବୁ ଇସ୍ୱରନ୍ ଆଗ୍ରବ୍ଡେଲେନ୍ ଆ ଜନ୍ତୁଜିଲୋଙ୍ ସିଲଡ୍ ଜାଆଡନ୍ ଅଡ଼୍କୋନ୍ ସିଲଡ୍ ପାତ୍ୟା ଡକୋଏନ୍ । ଜାଆଡନ୍ ଆଇମରନ୍ଆଡଙ୍ ବରେନ୍, “କୋତ୍ତାଲୋଙନ୍ ସିଲଡ୍ ଅଃନିଙ୍ ଆନୁବ୍ ଆଜ ଏଜୋମ୍ଡଙ୍ ଗାମ୍ଲେ ଇସ୍ୱରନ୍ ଆମ୍ବେଞ୍ଜିଆଡଙ୍ ବର୍ରବେନ୍ କେନ୍ଆତେ ଇନି ଆଜାଡ଼ିନ୍ ପଙ୍ ?”
“ଆଇବଜନ୍ ଜାଆଡନ୍ଆଡଙ୍ ବରେନ୍, ଇନ୍ଲେଞ୍ଜି କୋତ୍ତାଲୋଙନ୍ ଆରାନୁବ୍ ଆ ଜଅ ଅଡ଼୍କୋନ୍ ଜୋମ୍ଲେ ଏରପ୍ତିତାୟ୍,” “ବନ୍ଡ କୋତ୍ତାଲୋଙନ୍ ଆ ମଡ୍ଡି ଡକୋନ୍ ଆରାନୁବ୍ ଆ ଜଅ ଆବର୍ନେ ଇସ୍ୱରନ୍ ବର୍ରନେ । ଆମ୍ୱେଞ୍ଜି ତି ଆରାନୁବ୍ ଆ ଜଅ ଏଜୋମ୍ଡଙ୍ ଆରି ଏସୁଙେଡଙ୍; ଏତ୍ତେଲେ ଏଲୁମେନ୍ ଡେନ୍ ରବୁତବେନ୍ ।”
ଜାଆଡନ୍ ଆଇବଜନ୍ଆଡଙ୍ ବରେନ୍, “ଆମ୍ୱେନ୍ ଇନ୍ନିଙ୍ଜା ଅଡେବେନ୍ କି ଅର୍ରବୁବେନ୍; ବନ୍ଡ ଇସ୍ୱରନ୍ ଜନାତେ ଆମ୍ୱେନ୍ ଅଙ୍ଗା ଆଡିଡ୍ ଏଜୋମ୍ତେ ତି ଆଡିଡ୍ ଅଙ୍ଗାତେ ମନଙ୍ ଅଡ଼େ ମନଙ୍ତଡ୍ ଆମ୍ୱେଞ୍ଜି ଇସ୍ୱରନ୍ ଅନ୍ତମ୍ ଜନାଲେ ଏରପ୍ତିତେ ଆରି ଜନନାନ୍ ଆସନ୍ ଗିଆନନ୍ ଏଞାଙ୍ତେ ।”
ତିଆସନ୍ ଆଇବଜନ୍ ଆଗ୍ରିଜେନ୍ ଅରାଲୋଙନ୍ ଆଜ ମନଙ୍ଡମ୍ ଆରି ମରାଲ୍ଜୋମ୍ଡାମ୍ ଆରି ଗିଆନନ୍ ଆଞନାଙ୍ ଆସନ୍ ଆନିନ୍ ଜୋମେନ୍, ଆରି ଆନିନ୍ ଆଅୟ୍ତବନ୍ଆଡଙ୍ ନିୟ୍ ତିୟେନ୍ ଆରି ଆନିନ୍ ନିୟ୍ ଜୋମେନ୍ । ତି ସିଲଡ୍ଲ୍ଲନ୍ ଆନିଞ୍ଜି ତି ଆନୁବ୍ ଆଜ ଅଜ୍ରୋମେଞ୍ଜି, ଆନିଞ୍ଜି ଡମ୍ ଆଉର୍ଡିୟ୍ ଗାମ୍ଲେ ଆନିଞ୍ଜି ଜନାଲେ ରପ୍ତିଏଞ୍ଜି, ତିଆସନ୍ ଲୁଆନୁବନ୍ ଆ ଅଲା ପଡ୍ପଡ୍ଲେ ଜରିଜିନେନ୍ ତୁବେଞ୍ଜି ।
ତିସିଲଡ୍ ଆସ୍ରାଲୁମେନ୍ ଆଡିଡ୍ କୋତ୍ତାଲୋଙନ୍ ଆବ୍ରୁଲେତେନ୍ ପ୍ରବୁ ଇସ୍ୱରନ୍ ଆ ସର୍ରଙ୍ ଅମ୍ଡଙ୍ଲେ ଆଦମନ୍ ଡ ଆଡୁକ୍ରିନ୍ କୋତ୍ତାନ୍ ଆରାନୁବ୍ରେଙ୍ ସଲଞ୍ଜି । ତି ସିଲଡ୍ଲ୍ଲନ୍ ପ୍ରବୁ ଇସ୍ୱରନ୍ ଆଦମନ୍ଆଡଙ୍ ଓଡ୍ଡେଲେ ବରେନ୍, “ଆମନ୍ ଅଡ଼େଙ୍ଗା ଡକୋ ?” ଆନିନ୍ ଜାଲଙେନ୍, କୋତ୍ତାନ୍ ଞେନ୍ ଆଉର୍ଡିଜନ୍ ଆସନ୍ ସର୍ରଙ୍ନମ୍ ଅମ୍ଡଙ୍ଲେ ବନ୍ତଙନ୍ବାତ୍ତେ ସଲନାୟ୍ । ଇସ୍ୱରନ୍ ବର୍ରନେ, “ଆମ୍ୱେନ୍ ଆଉର୍ଡିୟ୍ ଗାମ୍ଲେ, ଆମ୍ବେନ୍ଆଡଙ୍ ଆନା ଅବ୍ଜନାଲବେନ୍ ? ଞେନ୍ ଅଙ୍ଗା ଆନୁବ୍ ଆଜ ଏଜୋମ୍ଡଙ୍ ଗାମ୍ଲେ ଏବର୍ରବେନ୍, ତିଆତେ ଆମ୍ୱେନ୍ ଏଜୋମେନ୍ ପଙ୍ ?” ଆଦମନ୍ ବର୍ରନେ, “ଆମନ୍ ଅଙ୍ଗା ଆଇବୟ୍ ଞେନ୍ସରିନ୍ ଡକୋନେନ୍ ଆସନ୍ ତିୟ୍ଲିଁୟ୍ ଆନିନ୍ ଞେନ୍ଆଡଙ୍ ତି ଆନୁବ୍ ଆଜ ତିୟ୍ଲିଁୟ୍ ତିଆସନ୍ ଞେନ୍ ଜୋମ୍ଲାୟ୍ ।”
ପ୍ରବୁ ଇସ୍ୱରନ୍ ଆଇବଜନ୍ଆଡଙ୍ ବରେନ୍, “ଆମନ୍ ଇନିବା ଏନ୍ନେଲେ ଲୁମେନ୍ ?” ଆଇବଜନ୍ ବର୍ରନେ, “ଜାଆଡନ୍ ଞେନ୍ଆଡଙ୍ କଣ୍ଡାୟ୍ଲିଁୟ୍ ତିଆସନ୍ ଞେନ୍ ଜୋମ୍ଲାୟ୍ ।”
ଇସ୍ୱରନ୍ ଆ ଡନଣ୍ତାୟ୍
ପ୍ରବୁ ଇସ୍ୱରନ୍ ଜାଆଡନ୍ଆଡଙ୍ ବରେନ୍, “କେନ୍ ଆକାବ୍ବାଡ଼ା ଲରୁମେନ୍ ଆସନ୍ ଆମନ୍ ଅଡ଼୍କୋ ସାଇନ୍ ଡ କିନ୍ରେଙ୍ ଜନ୍ତୁନ୍ ସିଲଡ୍ ଗୋଗୋୟ୍ ସନୟ୍ପନ୍ ଡେଲମ୍, କେନ୍ ଆସନ୍ ଆମନ୍ କିମ୍ପୋଙ୍ନମ୍ ବାତ୍ତେ ତଙିୟ୍ତନ୍ ଆରି ଆମେଙ୍ମତ୍ତାନମ୍ ଜାୟ୍ ଆରଡ଼ିଲନ୍ ଜୋମ୍ତେ । ଆରି ଆମନ୍ ଡ ଆଇମରନ୍ ସରିନ୍ ଅଲ୍ସଙ୍ଗାତାତେ, ଆରି କେଜ୍ଜାନମ୍ ଡ ଆଇମରନ୍ ଆ କେଜ୍ଜା ସରିନ୍ ଏଲ୍ବିରୁଦତେ । ଆନିଞ୍ଜି ଅବବ୍ନମ୍ ଅଃପାରା ତିଡ୍ତଜି ଆରି ଆମନ୍ ଆ ଡନୁଙ୍କୁଡ଼ିଜଙନ୍ ଡୋଲ୍ତଜି ।”
ଇସ୍ୱରନ୍ ଆଇମରନ୍ଆଡଙ୍ ବରେନ୍, “କୋକ୍କୋନେ ବେଡ଼ାନ୍ ଆବତ୍ତା ବବ୍ୟାତାୟ୍ ଆରି ଆମନ୍ ପରାନ୍ଡଣ୍ଡନ୍ ଡେତମ୍ କି ପସିଜନ୍ କୋତ୍ତେ । ଆମନ୍ ଅୟ୍ତବ୍ନମ୍ଆଡଙ୍ ଆମଙ୍ ଆସାତନେ, ଆମନ୍ ଆବର୍ନେନ୍ ମାନ୍ନେଲେ ଏଡକୋତନ୍ ।”
ଆରି ଆନିନ୍ ଆଦମନ୍ଆଡଙ୍ ବରେନ୍, “ଅଙ୍ଗା ଆନୁବ୍ ଆ ଜଅ ଏଜୋମ୍ଡଙ୍ ଗାମ୍ଲେ ବର୍ରବେନ୍, ତିଆତେ ଡୁକ୍ରିନମ୍ ଆବର୍ନେ ଅମ୍ଡଙ୍ଲେ ଜୋମେନ୍; ତିଆସନ୍ ଲତ୍ତେଙ୍ଲୋଙ୍ନମ୍ ଲବନ୍ ସନୟ୍ପନ୍ ଡେଏନ୍ । ଆମନ୍ ଆମେଙ୍ମତ୍ତାନମ୍ ଜାୟ୍ ଡାଗାନ୍ ଉଙ୍ରୁଡନ୍ ବାତ୍ତେ କାବ୍ବାଡ଼ାଲନ୍ଡେନ୍ ଜନୋମନ୍1 ଞାଙ୍ତେ । ତି ସିଲଡ୍ଲ୍ଲନ୍ ଅଃବାଙ୍ ଜିଙନ୍ ଡ ଅଃବାଙ୍ନୁବନ୍ ପଡାବ୍ତାୟ୍, ଆରି ଆମ୍ୱେନ୍ ବସେଙନ୍ ଆ ଅଆବ୍ ଏଜୋମ୍ତେ । ଆମନ୍ ଅଙ୍ଗା ଆଲବ ବାତ୍ତେ ଗବ୍ଡେଲ୍ଲମ୍2, ତି ଆଲବଲୋଙ୍ ଅଣ୍ଡ୍ରଙ୍ ମାୟ୍ନେନ୍ ଜାୟ୍ ମୁକାଲୋଙ୍ନମ୍ ଆ ଓଞୋଲ୍ ଆତୟ୍ଲେ କାବ୍ବାଡ଼ାଲଣ୍ଡେନ୍ ଜନ୍ରୋମନ୍ ଞାଙ୍ତେ; ଇନିଆସନ୍ଗାମେଣ୍ତେନ୍ ଆମନ୍ ଆରଡ଼ିଲନ୍ ଆରି ଆରଡ଼ିଲଲୋଙନ୍ ଆରି ବତର ମାୟ୍ତନେ ।”
ଆଦମନ୍ ଆ ଡୁକ୍ରିନ୍ ଆଞୁମ୍ ଅବା3 ଅବ୍ଞୁମେନ୍, ଇନିଆସନ୍ଗାମେଣ୍ତେନ୍ ଆନିନ୍ ଆମେଙ୍ ମନ୍ରାଞ୍ଜି ଆୟୋଙ୍ ଡେଏନ୍ । ଆରି ପ୍ରବୁ ଇସ୍ୱରନ୍ ଜନ୍ତୁନ୍ ଆ ଉସାଲ୍ ବାତ୍ତେ ସିନ୍ରିନ୍ ତୁବ୍ଲେ, ଆଦମନ୍ ଡ ଆ ଡୁକ୍ରିନ୍ଆଡଙ୍ ଅବ୍ଜିଜିଏଞ୍ଜି4 ।
ଆଦମନ୍ ଡ ଅବାନ୍ କୋତ୍ତାନ୍ ସିଲଡ୍ ଆନମ୍ଡୁଙ୍
ଆରି ପ୍ରବୁ ଇସ୍ୱରନ୍ ବର୍ରନେ, “ନମି ଅଙ୍ଗାତେ ମନଙ୍ ଅଡ଼େ ମନଙ୍ ତଡ୍ ଜନନାନ୍ ଆସନ୍ ଞେନ୍ ଅନ୍ତମ୍ ଗିଆନନ୍ ଞାଙେଞ୍ଜି । ଆରି ଆନିନ୍ ଏଙ୍ଗାଲ୍ଡେନ୍ ଅନମେଙନ୍ ଆତ୍ରିୟ୍ତେନ୍ ଆନୁବ୍ ଆ ଜଅ ରୋଡ୍ଲେ ଜୋମ୍ଲେ ଅଃନଞିଡେନ୍ ଆନମେଙ୍ ଞାଙ୍ଡଙ୍ତଡ୍ ।” ତିଆସନ୍ ପ୍ରବୁ ଇସ୍ୱରନ୍ ଏଦନନ୍ ଆକୋତ୍ତା ସିଲଡ୍ ଆନିଞ୍ଜିଆଡଙ୍ ଅମ୍ଡୁଙେଞ୍ଜି ଆରି ଆନିନ୍ ଅଙ୍ଗା ଆଲବଲୋଙ୍ ସିଲଡ୍ ଗନଡ଼େନ୍ ତେତ୍ତେ ଅର୍ର କାବ୍ବାଡ଼ାନ୍ ଆଲନୁମ୍ ଆସନ୍ ଆନିନ୍ଆଡଙ୍ ବରେନ୍ । ଏନ୍ନେଲେ ଆନିନ୍ ଆଦମନ୍ଆଡଙ୍ ଅମ୍ଡୁଙେନ୍ ଆରି ଅନମେଙନ୍ ଆତ୍ରିୟ୍ତେନ୍ ଆନୁବ୍ ଜନଗ୍ଗେନ୍ ଆସନ୍ ଏଦନ କୋତ୍ତାନ୍ ଆ ଡରୁଙ୍ୟୋଙ୍ଗଡ୍ କିରୁବ ପାଙ୍ଲଙ୍ବର୍ମରଞ୍ଜି ଆରି ଅବ୍ୟର୍ୟର୍ ଗାବ୍ୟାର୍ କିଲାୟ୍ କଡ଼ିବନ୍ ଅବ୍ଜ୍ଜଗେଏନ୍ ।
Source notes (4)
- Footnote ଜନ୍ରୋମନ୍
- Footnote ଗଡ଼େଲମ୍
- Footnote ଅନମେଙ୍
- Footnote ଅବ୍ରଏଞ୍ଜି
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.