Juray Soura Bible
ପର୍ତମ୍ମୁ 2
କେନ୍ ଅନ୍ତମ୍ ରୁଆଙ୍ଲୋଙନ୍ ଡ ପୁର୍ତିଲୋଙନ୍ ଡକୋନ୍ ଆତେ ଅଡ଼୍କୋନ୍ ଗନବ୍ଡେଲନ୍ଡେନ୍ । ତିସିଲଡ୍ ଇସ୍ୱରନ୍ ଆକାବ୍ବାଡ଼ାନ୍ ସାଲ୍ଲେ ସାତ ଡିନାଲୋଙ୍ କାବ୍ବାଡ଼ାନ୍ ସିଲଡ୍ ଲୋଲୋଲନେ । ଆରି ଇସ୍ୱରନ୍ ସାତ ଡିନାଇଙନ୍ ଆସିର୍ବାଦଏନ୍ ଆରି ମବ୍ଡ଼ିରେନ୍, ଇନିଆସନ୍ଗାମେଣ୍ଡେନ୍ ଆନିନ୍ ତି ଆ ଡିନା ଅଡ଼୍କୋନ୍ ଆକାବ୍ବାଡ଼ା ସାଡେନ୍ ଆରି ଆନିନ୍ ତି ଆଡିନା ଅଃକାବାଡ଼ାଲନ୍ ।
ଏଦନ କୋତ୍ତାନ୍
କେନ୍ଆତେ ରୁଆଙନ୍ ଡ ପୁର୍ତିନ୍ ଆ ଗନବ୍ଡେଲ୍ ବରନ୍ । ଅଙ୍ଗା ଆଡିଡ୍ ପ୍ରବୁ ଇସ୍ୱରନ୍ ରୁଆଙନ୍ ଡ ପୁର୍ତିନ୍ ଗବ୍ଡେଲେନ୍, ତିଆଡିଡ୍ ପୁର୍ତିଲୋଙନ୍ ଇନ୍ନିଙ୍ ଆରାନୁବ୍ କି ଆବାୟ୍ ଆପଡାବ୍ ତଡ୍, ଇନିଆସନ୍ଗାମେଣ୍ତେନ୍ ପ୍ରବୁ ଇସ୍ୱରନ୍ ପୁର୍ତିଲୋଙନ୍ ତରୁବନ୍ ଅଃନବ୍ ଅବ୍ଡ଼ୋଲାୟ୍, ଆରି ଅର୍ରନ୍ ଆସନ୍ ମନ୍ରାଜି ଅଡକୋଲୋ; ବନ୍ଡ ତି ଆବନେଡ଼ା ପୁର୍ତିଲୋଙନ୍ ସିଲଡ୍ ପୋୟ୍ଡାନ୍ ଡୋଲନ୍ ଆରି ଅଡ଼୍କୋନ୍ ଆଲବଲୋଙ୍ ଡାଆନ୍ ସିନ୍ସିରାଡାଏନ୍ ।
ତିସିଲଡ୍ ପ୍ରବୁ ଇସ୍ୱରନ୍ ଆରଡ଼ି ଲନ୍ ବାତ୍ତେ ମନ୍ରାନ୍ଆଡଙ୍ ଗବ୍ଡେଲେନ୍1; ଆରି ଆ ପତୁମ୍ମୁଲୋଙନ୍ ଉମ୍ପେଡ୍ଡାଲେ ତନଙ୍ୟମ୍ରିଙନ୍ ଅମ୍ଗନେନ୍, ତିସିଲଡ୍ ମନ୍ରାନ୍ ଆମେଙ୍ ପୁରାଡ଼ା ଡେଏନ୍ ।
ଆରି ପ୍ରବୁ ଇସ୍ୱରନ୍ ଏଦନ ଆଞୁମ୍ ଆଡ୍ରୁଙ୍ୟୋଙ୍ଗଡ୍, ଅବୟ୍ କୋତ୍ତାନ୍ ଗବ୍ଡେଲ୍ଲେ, ଆରି ଆନିନ୍ଡମ୍ ଆତ୍ରୁବେନ୍ ଆମନ୍ରା ତେତ୍ତେ ଡକ୍କୋଏନ୍ । ପ୍ରବୁ ଇସ୍ୱରନ୍ ତି ଆଲବଲୋଙ୍ ସିଲଡ୍ ଏର୍ଜାଡ଼ିକାନ୍ ଅରମଁୟ୍ଡାନ୍ ଆରାନୁବ୍ଜି ଆରି ମନଙ୍ ଆରଜତେନ୍ ଆରାନୁବ୍ଜି ପବ୍ଡାବେନ୍ । ଆରି ତି ଆକୋତ୍ତା ଆ ମଡ୍ଡିଲୋଙ୍ ଅଙ୍ଗାତେ ମନଙ୍ ଆରି ମନଙ୍ତଡ୍ ଜନନାନ୍ ଡ ଅନମେଙନ୍ ଆତ୍ରିୟ୍ତେନ୍ ଆରାନୁବ୍ ପବ୍ଡାବେନ୍ । କୋତ୍ତାଲୋଙନ୍ ଡାଆନ୍ ଆନବ୍ରୁଡାନ୍ ଆସନ୍ ଏଦନନ୍ ସିଲଡ୍ ଅବୟ୍ ଅଲନ୍ ଡୁଙ୍ଲନାୟ୍; କେନ୍ଆଲ ଉଞ୍ଜି ପାଲ୍ଲାଙ୍ ଡେଏନ୍ । ଆପର୍ତମ୍ମୁନ୍ ଆଲ ଆଞୁମ୍ ପିସୋନ୍; ତିଆତେ ଅଙ୍ଗାଲୋଙ୍ ସୁନ୍ନାନ୍ ଡୁଙ୍ତନାୟ୍ ତି ଆ ଅବିଲା ଡେସାରେଙନ୍ ପେଏନ୍ । ତି ଆଡେସା ଆ ସୁନ୍ନା ମନଙ୍, ଆରି ତେତ୍ତେ ମୁକ୍ତାନ୍ ଡ ଗୋମେଦ ଅରେଙନ୍2 ଡୁଙ୍ତନାୟ୍ । ଆରି ଅବୟ୍ ଅଲନ୍ ଆଞୁମ୍ ଗିଓନ୍; କେନ୍ଆତେ ଅଡ଼୍କୋ କୁସ3 ଡେସାରେଙ୍ ପେତେ । ଆରି ଅବୟ୍ ଅଲନ୍ ଆଞୁମ୍ ଇଦେକଲ୍4, କେନ୍ଆତେ ଆସିରିଆ ଡେସାନ୍ ଆଡ୍ରୁଙ୍ୟୋଙ୍ଗଡ୍ ପେତେ ଆରି ଆର୍ବୟ୍ ଆଲ ଆଞୁମ୍ ପରାତ୍5 । ଆରି ପ୍ରବୁ ଇସ୍ୱରନ୍ ତି ଆ ମନ୍ରାଆଡଙ୍ ଓରୋଙ୍ଡାଲେ ଏଦନ୍ କୋତ୍ତାନ୍ ଅର୍ରେ ସାଗୁଲେ ଜନଗ୍ଗେନ୍ ଆସନ୍ ଡକ୍କୋଏଞ୍ଜି । ପ୍ରବୁ ଇସ୍ୱରନ୍ ତି ଆ ମନ୍ରାଆଡଙ୍ ବରେନ୍, “ଆମ୍ୱେନ୍ କୋତ୍ତାଲୋଙନ୍ ଡକୋନ୍ ଅଡ଼୍କୋନ୍ ଆନୁବ୍ ଆଜ ଅଙ୍ଗାତେ ଏଇସ୍ସୁମ୍ତେ ଜୋମ୍ଲେ ଏରପ୍ତିତେ, ବନ୍ଡ ଅଙ୍ଗାତେ ମନଙ୍ ଆରି ମନଙ୍ତଡ୍ ଜନନାନ୍ ଆସନ୍ ବୁଡ୍ଡିନ୍ ଆତ୍ରିୟ୍ତେ ଆନୁବ୍ ଆଜ ଏଜୋମ୍ଡଙେ । ଇନିଆସନ୍ଗାମେଣ୍ତେନ୍ ଅଙ୍ଗା ଆଡିଡ୍ ତି ଆତେ ଏଜୋମ୍ତେ, ତି ମା ଆଡିଡ୍ ଆମନ୍ ରବୁତବେନ୍ ।”
ପ୍ରବୁ ଇସ୍ୱରନ୍ ବର୍ରନେ, “ମନ୍ରାନ୍ ଆତିନ୍ସଜନ୍ ଆ ଡକୋନେ ମନଙ୍ତଡ୍ । ଞେନ୍ ଆନିନ୍ ଆସନ୍ ଆନିନ୍ଅନ୍ତମ୍ ସାୟ୍ସିକାବ୍ବାଡ଼ାବଜନ୍ ଗବ୍ଡେଲ୍ତାୟ୍ ।” ଆରି ପ୍ରବୁ ଇସ୍ୱରନ୍ ଲବନ୍ ବାତ୍ତେ ବସେଙ୍ରେଙନ୍ ଆ ଜନ୍ତୁଜି, ଡ ରୁଆଙ୍ଲୋଙନ୍ ଆ ଅନ୍ତିଜି ଗବ୍ଡେଲ୍ଲେ ଆଦମନ୍ ଆନିଞ୍ଜିଆଡଙ୍ ଇନି ଅବ୍ଞୁମ୍ତେ, କେନ୍ ଆ ଜନନା ଆସନ୍ ଅଡ଼୍କୋଞ୍ଜିଆଡଙ୍ ଆମଙ୍ବାନ୍ ଓରୋଙ୍ଲାଜି । ଆଦମନ୍ ତି ଆପୁରାଡ଼ାଜି6 ଲୋଙ୍ସିଲଡ୍ ଆନା ଇନି ଅବ୍ଞୁମେନ୍; ଆଞୁମନ୍ ତିଆତେ ଡେଏନ୍ । ଆଦମନ୍ ଜନ୍ତୁନ୍ ଡ ରୁଆଙନ୍ ଆ ଅନ୍ତିଜି ଡ ଲବଲୋଙନ୍ ଅଡ଼୍କୋନ୍ ଆ ଜନ୍ତୁଜିଆଡଙ୍ ଅବ୍ଞୁମେନ୍ । ବନ୍ଡ ମନ୍ରାନ୍ ଆସନ୍ ଆନିନ୍ ଅନ୍ତମ୍ ସାୟ୍ସିକାବ୍ବାଡ଼ାବଜନ୍ ଅଃଗିୟ୍ତାଲୋ ।
ତିସିଲଡ୍ ପ୍ରବୁ ଇସ୍ୱରନ୍ ଆଦମନ୍ଆଡଙ୍ ବରା ଅବ୍ଡିମଡେନ୍, ଆରି ଆଡିମଡିଙନ୍ ଅବୟ୍ ଆ ପଞ୍ଜରାଜାଙନ୍ ପାଙ୍ଲେ ତେତ୍ତେ ଜେଲୁନ୍ ବାତ୍ତେ ବବ୍ରିଜେନ୍ । ଆରି ପ୍ରବୁ ଇସ୍ୱରନ୍ ଆଦମନ୍ଆମଙ୍ ସିଲଡ୍ ଅଙ୍ଗା ଆ ପଞ୍ଜରାଜାଙ୍ ପାଙେନ୍, ତିବାତ୍ତେ ଅବୟ୍ ଆଇବଜନ୍ ଗବ୍ଡେଲେନ୍ ଆରି ଆଦମନ୍ ଆମଙ୍ବା ଓରୋଙ୍ଲାୟ୍ । ତିସିଲଡ୍ ଆନିନ୍ଆଡଙ୍ ଗିୟ୍ଲେ ଆଦମନ୍ ବର୍ରନେ,
“କେନ୍ ସିଲଡ୍ ଡେଲୋ,
କେନ୍ ଆନିନ୍ ଅଜାଙ୍ଞେନ୍ ଆଜାଙ୍ ଆରି ଜେଲୁଞେନ୍ ଆଜେଲୁ ।
କେନ୍ ଆଞୁମନ୍ ଆଇମର୍, ଇନିଆସନ୍ଗାମେଣ୍ତେନ୍ ଆନିନ୍ ଓବ୍ବାମରନ୍ ଆଡଅଙ୍ଲୋଙ୍ ସିଲଡ୍ ଗନଡ଼େନ୍ ଡେଲୋ ।”
କେନ୍ଆସନ୍ ମନ୍ରାନ୍ ଆପ୍ପେୟନ୍ ଆୟୋଙନ୍ ଉମ୍ରେଙ୍ଡାଲେ ଆନିନ୍ ଆଡୁକ୍ରିନ୍ ବାତ୍ତେ ଏକ୍କାନ୍ ଡେତଜି ଆରି ଆନିଞ୍ଜି ବାଗୁଞ୍ଜି ଆବୟନ୍ ଆମନ୍ରା ଅନ୍ତମ୍ ଡେତଜି । ଆଦମନ୍ ଡ ଆଡୁକ୍ରିନ୍ ବାଗୁଞ୍ଜି ଆଉର୍ଡିୟ୍ ଡକୋଏଞ୍ଜି, ବନ୍ଡ ଆନିଞ୍ଜି ଅଃଗରୟ୍ଲଜି ।
Source notes (6)
- Footnote ଗବ୍ଡେଲେନ୍
- Footnote ଅରନ୍
- Footnote ମେସୋପଟାମିଆନ୍
- Footnote ଟାଇଗ୍ରିସ୍
- Footnote ଇଉପ୍ରେଟିସ୍
- Footnote ଜନ୍ତୁଜି
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.