Juray Soura Bible
ପର୍ତମ୍ମୁ 11
ବାବିଲ୍ ଗଡ଼ାନ୍ ଆ ମରେଲ୍ମେଙ୍ସିଙ୍
ଆପର୍ତମ୍ମୁନ୍ ସମ୍ପରା ପୁର୍ତିଲୋଙନ୍ ଆବୟନ୍ ଆସର୍ରଙ୍ ଡ ଆବୟନ୍ ଆ ଲଙ୍ଲଙ୍ ଡକୋଏନ୍ । ଆନିଞ୍ଜି ଡରୁଙ୍ୟୋଙ୍ଗଡ୍ ବୁଲ୍ଲେବୁଲ୍ଲେଲେ, ସିନୟର୍ ଡେସାନ୍ ଆ ପଡ଼ିଆଲୋଙ୍ ଡକୋଲଞ୍ଜି । ଆନିଞ୍ଜି ତର୍ଡମ୍ କଡାଡ଼ିଲଞ୍ଜି, “ୟବା ଇନ୍ଲେନ୍ ଇଟାନ୍ ତୁବ୍ଲେ ଏସୟ୍ବା ।” ତି ସିଲଡ୍ଲ୍ଲନ୍ ଆନିଞ୍ଜି ଅରେଙନ୍ ଆପାଲ୍ତେଙ୍ ଇଟାନ୍ ବାତ୍ତେ ଅସିଙନ୍ ତୁବେଞ୍ଜି ଆରି ସୁନ୍ନନ୍ ଆପାଲ୍ତେଙ୍ ଆନିଞ୍ଜି ମାଟିଆ ମିଞଲନ୍ ଜଡେଞ୍ଜି । ଆନିଞ୍ଜି ଗାମେଞ୍ଜି, “ୟବା ଇନ୍ଲେନ୍ ଆସନ୍ ଅବୟ୍ ଗଡ଼ାନ୍ ଡ ରୁଆଙନ୍ ଅବ୍ଜାବ୍ଜାବ୍ ଅବୟ୍ ତେଡ଼େଙ୍ସିଙନ୍ ଏତୁବ୍ବା1, ଏତ୍ତେଲ୍ଡେନ୍ ଅଡ଼୍କୋ ମନ୍ରାନ୍ ଇନ୍ଲେଞ୍ଜିଆଡଙ୍ ଜନାଲଙ୍ତଞ୍ଜି ଆରି ଇନ୍ଲେନ୍ ସମ୍ପରା ପୁର୍ତିନ୍ ତରଙ୍ଆନ୍ନା ଅଃଡ୍ଡେଆୟ୍ ।”
ମନ୍ରାଜି ଆତ୍ରୁବେଞ୍ଜି ଆଗଡ଼ା ଆରି ମରେଲ୍ମେଲ୍ସିଙନ୍ ଆଗନିୟ୍ ଆସନ୍ ଇସ୍ୱରନ୍ ପଃଲନାୟ୍, ଆରି ପ୍ରବୁନ୍ ଗାମେନ୍, “ନମି କେନ୍ ଆନିଞ୍ଜି ଆବଜାତିନ୍ ଡ ଆବୟନ୍ ଆ ଲଙ୍ଲଙ୍; ଆନିଞ୍ଜି ଇନି ଲୁମ୍ତଜି ତିଆତେ ନମି ଉଲଞ୍ଜି । ଆନିଞ୍ଜି ଇନି ଇଃୟମ୍ତଜି ତି ଆତେ ଲୁମ୍ତଜି । ଏଙ୍ଗାଲ୍ଡେନ୍ ଆନିଞ୍ଜି ତର୍ଡମ୍ ବର୍ନେନ୍ ଡ ଲଙ୍ଲଙନ୍ ଜନାଲେ ଅଃର୍ରପ୍ତିଏଜି ତିଆସନ୍ ଞେନ୍ ପଡ୍ଲନ୍ ତି ଆ ଡରକୋନେଲୋଙନ୍ ସିଲଡ୍ ଆ ଲଙ୍ଲଙଞ୍ଜି ତରଙାନ୍ନା ଏମ୍ମେତାୟ୍ ।” ପ୍ରବୁନ୍ ତି ଆଡ୍ରକୋନେଲୋଙ୍ ସିଲଡ୍ ଆନିଞ୍ଜିଆଡଙ୍ ସମ୍ପରା ପୁର୍ତିନ୍ ରମ୍ମଙ୍ ରମ୍ମଙ୍ ଏମ୍ମେଏଞ୍ଜି, ତିଆସନ୍ ଗଡ଼ାନ୍ ତୁବ୍ଲେ ଅଃରପ୍ତିଲଜି । ତିଆସନ୍ ତି ଆଡେସା ଆଞୁମ୍ ବାବିଲ୍ ଡେଏନ୍, ଆଗ୍ରାମ୍ଗାମ୍ ପୁର୍ତିନ୍ ଆଲଙ୍ଲଙ୍ ତରଙାନ୍ନା ଡେଏନ୍, ଇନିଆସନ୍ଗାମେଣ୍ଡେନ୍ ଇସ୍ୱରନ୍ ତେତ୍ତେ ସିଲଡ୍ ମନ୍ରାନ୍ ଆଲଙ୍ଲଙ୍ ତରଙାନ୍ନା ଏମ୍ମେଲେ ସମ୍ପରା ପୁର୍ତିନ୍ ଆନିଞ୍ଜି ତରଙାନ୍ନା ଡେଏଞ୍ଜି ।
ସେମନ୍ ଆକେଜ୍ଜା
(୧ କେଜ୍ଜାଞ୍ଜି ୧:୨୪-୨୭)
କେନ୍ଆତେ ସେମନ୍ ଆକେଜ୍ଜା । ପୁର୍ତିନ୍ ବୁବ୍ଡାଡାଲେ ବାଗୁ ବର୍ସେଙ୍ ଡେଏନ୍ କି ସେମନ୍ ବସଅ ବର୍ସେଙ୍ ଆଡିଡ୍, ଆନିନ୍ ଅର୍ପକସଦନ୍ଆଡଙ୍ କୋଡେନ୍ । ଅର୍ପକସଦନ୍ କୋଡ୍ଲେ ସେମନ୍ ମନ୍ଲୟ୍ ସଅ ବର୍ସେଙ୍ ଡକୋଡାଲନ୍ ଆରି ପସିଜଞ୍ଜି କୋଡେନ୍ ।
ଆରି ଅର୍ପକସଦନ୍ ବକୁଡ଼ି ପନ୍ଦର ବର୍ସେଙ୍ ଆଡ୍ରେନ୍ ଆଡିଡ୍, ସେଲଅନ୍ଆଡଙ୍ କୋଡେନ୍; ସେଲଅନ୍ଆଡଙ୍ କୋଡେନ୍ କି ଅର୍ପକସଦନ୍ ଉଞ୍ଜିସଅ ୟାଗି ବର୍ସେଙ୍ ଡକୋଲନ୍ କି ଆରି ପସିଜନ୍ କୋଡେନ୍ ।
ସେଲଅନ୍ ତିରିସ୍ ବର୍ସେଙ୍ ଆଡ୍ରେନ୍ ସିଲଡ୍ ଆରି ଏବରନ୍ଆଡଙ୍ କୋଡେନ୍; ଏବରନ୍ କୋଡେଞ୍ଜି କି ସେଲଅନ୍ ଉଞ୍ଜି ସଅ ୟାଗି ବର୍ସେଙ୍ ଡକୋଡାଲନ୍ ଆରି ପସିଜନ୍ କୋଡେନ୍ ।
ବକୁଡ଼ି ଚଉଦ ବର୍ସେଙ୍ଡେଏନ୍ କି ଏବରନ୍ ପେଲଗନ୍ଆଡଙ୍ କୋଡେନ୍; ଏବରନ୍ ଉଞ୍ଜିସଅ ତିରିସି ବର୍ସେଙ୍ ଡେଏନ୍ କି ଆରି ପସିଜନ୍ କୋଡେନ୍ ।
ପେଗଲନ୍ ତିରିସି ବର୍ସେଙ୍ ଡେଏନ୍ କି ରିୟୁନ୍ଆଡଙ୍ କୋଡେନ୍; ରିଅନ୍ଆଡଙ୍ କୋଡ୍ଲେ ପେଗଲନ୍ ବାଗୁସଅ ନ ବର୍ସେଙ୍ ଡେଏନ୍ କି ଆରି ପସିଜନ୍ କୋଡେନ୍ ।
ବକୁଡ଼ି ବାଗୁ ବର୍ସେଙ୍ ଡେଏନ୍ କି ରିୟୁନ୍ ସରୁଗନ୍ଆଡଙ୍ କୋଡେନ୍; ସରୁଗନ୍ କୋଡ୍ଲେ ରିୟୁନ୍ ବାଗୁସଅ ସାତ ବର୍ସେଙ୍ ଡେଏନ୍ କି ଆରି ପସିଜନ୍ କୋଡେନ୍ ।
ତିରିସି ବର୍ସେଙ୍ଲୋଙ୍ ସଗୁରନ୍ ନାଓରନ୍ଆଡଙ୍ କୋଡେନ୍; ନାଓରନ୍ କୋଡ୍ଲେ ସଗୁରନ୍ ବାଗୁସଅ ବର୍ସେଙ୍ଲୋଙ୍ ଆରି ପସିଜନ୍ କୋଡେନ୍ ।
ବକୁଡ଼ି ନ ବର୍ସେଙ୍ଲୋଙ୍ ନାଓରନ୍ ତେରଅନ୍ଆଡଙ୍ କୋଡେନ୍; ତେରଅନ୍ କୋଡ୍ଲେ ନାଓରନ୍ ବସଅ ଅଣିସେ ବର୍ସେଙ୍ ଡକୋଡାଲନ୍ ଆରି ପସିଜନ୍ କୋଡେନ୍ ।
ତେରଅନ୍ ସତୁରି ବର୍ସେଙ୍ଲୋଙ୍ ଆନିନ୍ ଅବ୍ରାମନ୍, ନାଓରନ୍, ଡ ଆରୋଣଞ୍ଜିଆଡଙ୍ କୋଡେନ୍ ।
ତେରଅଞ୍ଜି ଆକେଜ୍ଜା
କେନ୍ ତେରଅଞ୍ଜି ଆକେଜ୍ଜା, ତେରଅନ୍, ଅବ୍ରାମନ୍, ନାଓରନ୍, ଡ ଆରୋଣନ୍ଆଡଙ୍ କୋଡେଞ୍ଜି । ଆରୋଣନ୍ ଆପ୍ପେୟ୍ ଲୋଟନ୍, କଲଦିଅଞ୍ଜି ଉର୍ ଆଞୁମ୍ ଡେସାନ୍ ଆକ୍ରୋକୋଡ୍ ଡରକୋନେଲୋଙନ୍ ତେରଅନ୍ ଆପ୍ପେୟ୍ ରବୁଏନ୍ । ଅବ୍ରାମନ୍ ସାରିନ୍ଆଡଙ୍ ବିବାଲନେ, ଆରି ନାଓରନ୍ ମିଲକାନ୍ଆଡଙ୍ ବିବାଲନେ, ଆନିନ୍ ଆରୋଣନ୍ ଆଡାଙ୍ଗଡ଼ିଅନ୍, ତି ଆରୋଣନ୍ ମିଲକାନ୍ ଡ ଜିସ୍କାନ୍ ଆପ୍ପେୟ୍ । ସାରି ଆଞ୍ଜେବୟ୍ ଡକୋଏନ୍ ତିଆସନ୍ ଆନିନ୍ ଆ ଅନଞ୍ଜିତଡ୍ ।
ତେରନ୍ ଆ ଡାଙ୍ଗାଡ଼ାଅନ୍ ଅବ୍ରାମନ୍, ଆଉଡ୍ଲେଙନ୍ ଲୋଟନ୍ ଡ ଆ କଉନଞ୍ଜି ସରିନ୍ କଲଦିଅଞ୍ଜି ଉର୍ ଆଞୁମ୍ ଡେସାନ୍ ଅମ୍ରେଙ୍ଡାଲେ କିଣାନ ଡେସାଗଡ୍ ଜିରେଞ୍ଜି । ଆରି ଆନିଞ୍ଜି ଆରୋଣ ଡେସାନ୍ ଜିର୍ରେ ତେତ୍ତେ ଇୟ୍ଲେ ଡକୋନେଜି । ଆରି ବାଗୁସଅ ମନ୍ଲୟ୍ ବର୍ସେଙ୍ଲୋଙ୍ ତେରଅନ୍ ଆରଣ ଗଡ଼ାଲୋଙନ୍ ରବୁଏନ୍ ।
Source notes (1)
- Footnote ଏଗୁବା
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.