Juray Soura Bible
ତଙିୟ୍ନେ 38
ସନୟ୍ ତନୁମ୍ମୋଡ୍ ତନମ୍ପିଲନ୍ ଆତନୁବ୍
(ତଙିୟ୍ନେ ୨୭:୧-୮)
ତିସିଲଡ୍ ସିଟିମ୍ ଅରାନ୍ ବାତ୍ତେ ଆନିନ୍ ମନ୍ଲୟ୍ ସନ୍ତି ଡନେଙ୍ଗାନ୍ ମଲୟ୍ ସନ୍ତି ଆରି ମନ୍ଲୟ୍ ସନ୍ତି ଲନାଆଙନ୍ ଆରି ୟାଗି ସନ୍ତି ଅରଣ୍ଡଲୋନ୍ ଆଡନେଙ୍ଗା ଅନମଙନ୍ ଆତନିୟ୍ ଆସନ୍ ଅବୟ୍ ତନମ୍ପିଲନ୍ ତୁବେଞ୍ଜି । ଆରି ତିସେଙ୍ ଉଞ୍ଜି କୁନେଗଡ୍ ତୁଣ୍ତୁନ୍ ଡେରିଙନ୍ ଅଡ଼୍କୋନ୍ ତୁବ୍ଲେ ଆବନ୍ତାନ୍ ଡେଲୋ । ଆନିନ୍ ତନମ୍ପିଲନ୍ ଅଡ଼୍କୋନ୍ ଆସିମ୍ମା, ଆଗ୍ରାମ୍ଗାମ୍, ତରବ୍କୋମାବନ୍, ଆରଡ଼େତୋଡନ୍, କେନ୍ ଅଡ଼୍କୋନ୍ ଆସିମ୍ମା ପିତ୍ତଳଲୋଙନ୍ ତୁବେଞ୍ଜି । କେନ୍ ତନମ୍ପିଲନ୍ ଆଜାୟ୍ତାନ୍ ନିୟ୍ ପିତ୍ତଳନ୍ ଆସିଙ୍କୁଡ଼ି ବାତ୍ତେ ତୁବେଞ୍ଜି । ଆରି ବରୋୟ୍ତେଙନ୍ ଆପତୁଡ୍ ଆସନ୍ ପିତ୍ତଳନ୍ ଜାଲିନ୍ ଆ ଉଞ୍ଜିକୁନେରେଙ୍ ଉଞ୍ଜି କାଡୁନ୍ ଲାଏଞ୍ଜି । ଆରି, ଆନିନ୍ ସିଟିମ୍ ଅରାନ୍ ବୟନ୍ ଆନ୍ନାଲନ୍ ତୁବେଞ୍ଜି କି ପିତ୍ତଳନ୍ ବାତ୍ତେ ବଲେଞ୍ଜି । ତନମ୍ପିଲନ୍ ଆବନୋୟ୍ ଆସନ୍ ଅନେଙ୍ରେଙନ୍ ଆନ୍ନାଲନ୍ ଆତୋଣ୍ତୋ କାଡୁନ୍ ଅମ୍ଗନେଞ୍ଜି, ଆରି ଆରିକ୍କା ଡକ୍କୋଲେ ପଟାଲୋଙନ୍ ତନମ୍ପିଲନ୍ ତୁବେଞ୍ଜି ।
ଗରିୟ୍ଡା ପିତ୍ତଡ଼ସିମନ୍ ଆତନୁବ୍
(ତଙିୟ୍ନେ ୩୦:୧୮)
ଅଙ୍ଗା ଆଇମର୍ଜି ସରେବା ତମ୍ବୁସିଙନ୍ ଆଡୁଆରା ସମାନ ସେବାଏଞ୍ଜି, ନିୟ୍ ସେବାଲୁମ୍ବଜଞ୍ଜି ପିତ୍ତଳନ୍ ବାତ୍ତେ ଡନପଡ଼ାନ୍ ବାତ୍ତେ ଆନିନ୍ ଗରିୟ୍ଡା ସିମନ୍ ଆରି ତରଙ୍କୁମନ୍ ଆସନ୍ ତୁବେଞ୍ଜି ।
ସରେବା ତମ୍ବୁସିଙନ୍ ଆଡୁଆରା ଆତନୁବ୍
(ତଙିୟ୍ନେ ୨୭:୯-୧୯)
କେନ୍ ସିଲଡ୍ ଆଡୁଆରାଞ୍ଜି ତୁବେଞ୍ଜି; ଅର୍ଜଡ଼ୋମ୍ଗଡ୍ ଆଡୁଆରାଗଡ୍ ଜେଏ ଲମନ୍କାବ୍ ବସଅ ସନ୍ତି ଡନଙ୍ଡଙ୍କାବ୍ବନ୍ । ତିଲୋଙ୍ ବକୋଡ଼ି ସୋଣ୍ତାଙନ୍ ଡ ବକୁଡ଼ି ଆନ୍ନାଲନ୍ ପିତ୍ତଳନ୍ ଆରି ନିୟ୍ ସୋଣ୍ତାଙନ୍ ଆନ୍ନାଲନ୍ ଡ ଡନଙ୍ଡଙନ୍ ପୁପାନ୍ ଡକୋଏନ୍ । ଅର୍କାବଡ଼ିଗଡ୍ ଆ ଡରଙ୍ନେକାବ୍ ବସଅ ସନ୍ତି ଆରି ତିଲୋଙ୍ ବଗୁଡି ସୋଣ୍ତାଙନ୍ ବକୁଡ଼ି ଅଙ୍ଗିନ୍ ଡ ସୋଣ୍ତାଙନ୍ ଆନ୍ନାଲନ୍ ରୁପାନ୍ ବାତ୍ତେ ଡଙ୍ଡଙେଞ୍ଜି । ବରୁବ୍ୟୋଙ୍ଗଡ୍ ଡନଙ୍ଡଙ୍କାବନ୍ ବାକୁଡିଦସ ସନ୍ତି ଡକୋଏନ୍ ତୋଲୋଙ୍ ଦସଟା ସୋଣ୍ତାଙନ୍ ଡ ଦସ ଅଙ୍ଗିନ୍ ଆରି ସୋଣ୍ତାଙନ୍ ଆନ୍ନାଲନ୍ ଡ ଡନଙ୍ଡଙନ୍ ରୁପାନ୍ ଆତେ ଡକୋଏନ୍ । ଡରୁଙ୍ୟୋଙ୍ଗଡ୍, ଡରୁଙ୍ୟୋଙ୍ଗଡ୍ ଆସନ୍ ବାକୁଡିଦସ ସନ୍ତି ଡକୋଏନ୍ । ଡୁଆରାଗଡ୍ ଆସନ୍ ପନ୍ଦର ସନ୍ତି ଡନଙ୍ଡଙକାବନ୍ ଡ ତିଲୋଙ୍ ୟାଗି ସୋଣ୍ତାଙନ୍ ଡ ଅଙ୍ଗିନ୍ ଡକୋଏନ୍; ତିଅନ୍ତମ୍ ଅନ୍ନାଗଡ୍ ଆସନ୍ ଡକୋଏନ୍ । ଡୁଆରାନ୍ ଆତୁୟାଗଡ୍ ବାର୍ମଡ଼ିୟ୍ତାଲନ୍ ପନ୍ଦର ସନ୍ତି ଡରଙ୍ନେକାବନ୍ ଡ ୟାଗି ସୋଣ୍ତାଙନ୍ ଡ ୟାଗି ପତୁଡନ୍ ଡକୋଏନ୍ । ଡୁଆରାଗଡ୍ ଏର୍ରେ ଅଡ଼୍କୋନ୍ ଡନଙ୍କାବନ୍ ଜେଏ ଲତୁମ୍କାବ୍ଲୋଙନ୍ ଆତୁବ୍ତୁବ୍ ଡକୋଏନ୍ । ଆରି ଅଙ୍ଗିନ୍ ଆସୋଣ୍ତାଙନ୍ ଅଡ଼୍କୋନ୍ ପିତ୍ତଳନ୍ ଡକୋଏନ୍; ସୋଣ୍ତାଙନ୍ ଆନ୍ନାଲନ୍ ଡ ଡନଙ୍ଡଙନ୍ ରୁପାନ୍; ତିଲୋଙ୍ ଆନ୍ନାଲନ୍ ରୁପାନ୍ ଆନ୍ନାଲନ୍ ଆରି ରୁପାନ୍ ଡନଙ୍ଡଙ୍ ଆଡୁଆରାଲୋଙ୍ ଅଡ଼୍କୋନ୍ ଆସୋଣ୍ତାଙନ୍ ଆମାୟ୍ନେ ଡକୋଲନ୍ । ଆରି ଡୁଆରାନ୍ ଆୟୁମ୍ୟୁମ୍ସିନ୍ରିନ୍ ନିଡ଼ି, କରୋମାବ୍, ଲୁଲୁ ଡ ଡନଙ୍କାବନ୍ ଜେଏ ଲତୁମ୍ ତନ୍ଡ୍ରୁବ୍ କାବ୍ବାଡ଼ାନ୍ ଡ ଡୁଆରାନ୍ ଆ ଡରଙ୍ନେକାବ୍ ଅନ୍ତମ୍ ଡନେଙ୍ଗାନ୍ ବକୁଡ଼ିସନ୍ତି ଡ ଲନାଙନ୍ ମଲୟ୍ ସନ୍ତି ତୁଣ୍ତୁନ୍ ଅଃନେଙାୟ୍ ଡକୋଏନ୍ । ଆରି ପିତ୍ତଡ଼ ସୋଣ୍ଡାଙନ୍ ଉଞ୍ଜି । ଉଞ୍ଜି ଅଙ୍ଗିଆନ୍, ରୁପା ଆରାଗୋଡନ୍ ଆରି ତେତ୍ତେ ଆତୁଡ଼ିଆ ରୁପାନ୍ ବାତ୍ତେ ଆବଲ୍ବଲ୍ ଆରି ରୁପାନ୍ ବାତ୍ତେ ଆଜିବାଡ୍ ଡକୋଲନ୍ । ଆରି ସରେବା ତମ୍ବୁସିଙନ୍ ଡ ଅଡ଼୍କୋନ୍ ଆଡୁଆରା ଅବ୍ବାନ୍ ଅଡ଼୍କୋନ୍ ପିତ୍ତଡ଼ ଡକୋଏନ୍ ।
ସରେବା ତମ୍ବୁସିଙନ୍ ଆସନ୍ ଞନ୍ଡ୍ରବ୍ନେନ୍ ଆଜନବ୍
ଡର୍ରକୋନେସିଂନ୍ ଲେବିୟ୍ମରଞ୍ଜି ଆକାବ୍ବାଡ଼ା ଆସନ୍ ଆରୋଣ ରାଓଡ଼ାନ୍ ଆଡାଙ୍ଗାଡ଼ାଅନ୍ ଇତାମରନ୍ ବାତ୍ତେ ମସାନ୍ ବନାଁୟ୍ବରନ୍ ସରେବା ତମ୍ବୁସିଙନ୍ ସାକିନ୍ ଅନ୍ତମ୍ ସରେବା ତମ୍ବୁସିଙନ୍ ଡନିଡିନ୍ ଆଜନବ୍ ଅଡ଼୍କୋନ୍ କେନ୍ ଡନିଡିନ୍ ଡେନ୍ । ପ୍ରବୁନ୍ ମସାନ୍ ବାତ୍ତେ ଅଙ୍ଗା ଆବନାଁୟ୍ ତିୟେନ୍ ତିଅନ୍ତମ୍ ଜିଉଦା ଆକେଜ୍ଜା ଉରନ୍ ଆଉଲେଙ୍ ଉରିନ୍ ଆଡାଙ୍ଗାଡ଼ାଅନ୍ ବତ୍ସଲେଲ ତି ଅଡ଼୍କୋନ୍ ତୁବେନ୍ । ଆରି ନିଡ଼ି, କରୋମାବ୍, ଲୁଲୁ, ଡନଙ୍କାବନ୍ ଜେଏ ଲତୁମ୍କାବ୍ଲୋଙନ୍ ତନ୍ରୁବ୍ମରଞ୍ଜି, ସଜର୍ମରନ୍ ଡ ମନଙ୍ ତନାଞ୍ମରନ୍ ଦାନ୍ ଆକେଜ୍ଜା ଅଇସାମକନ୍ ଆଡାଙ୍ଗାଡ଼ାଅନ୍ ଅଲିଆବ ଆସର୍ସିକାବ୍ବାଡ଼ାମର୍ ଡକୋଏନ୍ । ମଡ଼ିର୍ କାବ୍ବାଡ଼ାନ୍ ଲନୁମନ୍ ଆସନ୍ କେନ୍ ଅଡ଼୍କୋନ୍ ସୁନ୍ନାନ୍ ଆଜାବ୍ଜାବ୍ ଡକୋଲନ୍, ଅନମଙନ୍ ଅଡ଼୍କୋନ୍ ସୁନ୍ନାନ୍ ମଡ଼ିର୍ ଡରକୋନେଲୋଙନ୍ ସେକଲନ୍ ଅନ୍ତମ୍ ବକୁଡ଼ିନଅ ସାତସଅ ବଗୁଡ଼ିସାତ ସେକଲ ଡକୋଏନ୍ । ମଣ୍ତଡ଼ିନ୍ ଆଡିନିଡିମରଞ୍ଜି ରୁପ୍ପାନ୍ ମଡ଼ିର୍ ଡରକୋନେଲୋଙନ୍ ସେକଲନ୍ ଅନ୍ତମ୍ ବସଅ ସାତସଅ ପଞ୍ଚତିରିସି ସେକଲନ୍ ଡକୋଏନ୍ । ଅଡ଼୍କୋନ୍ ଡନିଡିମର୍ରନ୍ ଆସନ୍ ଆନାଜି ଗୋଗୋୟ୍ ବର୍ସେଙ୍ ତି ସିଲଡ୍ଲ୍ଲନ୍ ଗୋଗୋୟ୍ ବୟସମର୍ର ଡକୋଏନ୍, ନିୟ୍ ତୁଡ୍ରୁଲକ୍ୟ ୟାଗିସ ମଲୟ୍ସଅ ମନ୍ରାନ୍ ଲୋଙନ୍ ଅଡ଼କୋ ମନ୍ରାନ୍ ଆସନ୍ ଅବୟ୍ ଅବୟ୍ ବେକାନ୍, ମଡ଼ିର୍ ଡରକୋନେଲୋଙନ୍ ଆସନ୍ ସେକଲନ୍ ଅସୋୟ୍ ଅସୋୟ୍ ସେକଲନ୍ ତନିୟନ୍ ଆସନ୍ ଡେନ୍ । ତିଆସନ୍ ନିୟ୍ ବସଅ ତନର୍ର ରୁପାନ୍ ମଡ଼ିର୍ ଡରକୋନେଲୋଙ୍ ଡ ଆୟୋଡ୍ୟୋଡନ୍ ସିନ୍ରିନ୍ ଅଙ୍ଗିନ୍ ଲାଏଞ୍ଜି; ବସଅ ଅଙ୍ଗିନ୍ ଆସନ୍ ବସଅ ତାଳନ୍ତ, ଅବୟ୍ ଅବୟ୍ ଅଙ୍ଗିନ୍ ଆସନ୍ ଅବୟ୍ ଅବୟ୍ ତାଳନ୍ତ ଅଞିଡେନ୍ । ଆରି ନିୟ୍ ବଅଜାର୍ ସାତସଅ ୟାକୁଡ଼ି ପନ୍ଦ୍ର ସେକଲନ୍ ରୁପାନ୍ ବାତ୍ତେ ଆନିନ୍ ସୋଣ୍ତାଙନ୍ ଆସନ୍ ଆରାକଞନ୍ ତୁବେଞ୍ଜି ଆରି ତେତ୍ତେ ରୁପ୍ପାନ୍ ବାତ୍ତେ ବଲେଞ୍ଜି ଆରି ଡନଙ୍କାବ୍ଲୋଙନ୍ ମାୟେଞ୍ଜି । ଆରି ଅନସୟ୍ଲୋଙନ୍ ପିତ୍ତଳନ୍ ସତୁରି ତାଳନ୍ତ ବାଗୁଅଜାର୍ଇଞ୍ଜିସଅ ସେକଲନ୍ କଡୋଏନ୍ । ତିଆସନ୍ ଆନିନ୍ ତି ବାତ୍ତେ ସମାଗମ ତମ୍ୱୁନ୍ ଆଡୁଆରା ଅଙ୍ଗିନ୍ ପିତ୍ତଡ଼ନ୍ ତନମ୍ପିଲନ୍, ତିଲୋଙ୍ ପିତ୍ତଳନ୍ ସିଙ୍ଗୁଡ଼ିନ୍ ଡ ତନମ୍ପିଲନ୍ ଅଡ଼୍କୋନ୍ ଆସିମ୍ମା, ଆରି ଡୁଆରାନ୍ ଏର୍ରେ ଆପତୁଡ୍, ସରେବା ତମ୍ବୁସିଙନ୍ ଆମେକ ଡ ଡୁଆରାନ୍ ଏର୍ରେ ମେକନ୍ ଅଡ଼୍କୋନ୍ ତୁବେଞ୍ଜି ।
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.