Juray Soura Bible
ତଙିୟ୍ନେ 37
ନିୟମ ପେଲାନ୍ ଆତନୁବ୍
(ତଙିୟ୍ନେ ୨୫:୧୦-୨୨)
କେନ୍ ସିଲଡ୍ ବତ୍ସଲେଲ ସିଟିମ୍ ଅରାନ୍ ବାଗୁସନ୍ତି ବସାଙ୍କଡ଼େ ଡନେଙ୍ଗାନ୍ ଡ ବସନ୍ତି ବସାଙ୍କଡ଼େ ଲନାଙନ୍ ଡ ବସନ୍ତି ବସାଙ୍କଡ଼େ ଡନେଙ୍ଗାନ୍, ଅବୟ୍ ପେଲାନ୍ ତୁବେଞ୍ଜି ତିଲୋଙ୍ ଆମନ୍ ଡ ଡାନ୍ଡନ୍ ମନଙ୍ ସୁନ୍ନାନ୍ ମାୟ୍ଲେ ତିଲୋଙ୍ ଅଡ଼୍କୋରେଙନ୍ ସୁନ୍ନାନ୍ତୁମ୍ ଅଡ଼୍କୋରେଙନ୍ ତୁବେନ୍ । ଆରି ତିଲୋଙ୍ ଉଞ୍ଜି ଅନେଙ୍ଗଡ୍ ଆସନ୍ ଉଞ୍ଜିକୁନେନ୍ ସୁନ୍ନାନ୍ ଜଡେଞ୍ଜି; ତିଲୋଙ୍ ବନେଙ୍ଗଡ୍ ବାଗୁକଡ଼ାନ୍ ଡ ଅନ୍ନାଗଡ୍ ବାଗୁ କାଡ୍ଡୁନ୍ ତିୟେଞ୍ଜି । ଆରି ଆନିନ୍ ସିଟିନ୍ ଅରାନ୍ ବାତ୍ତେ ସୁନ୍ନାନ୍ ମାୟେଞ୍ଜି ଡ ପେଲାନ୍ ଆବନୋୟ୍ ଆସନ୍ ଅନେଙ୍ରେଙନ୍ କାଡୁନ୍ ତୁବ୍ଲେ ବରୋୟ୍ତେଙନ୍ ଅମ୍ଗନେଞ୍ଜି । କେନ୍ ସିଲଡ୍ ଆନିନ୍ ମନଙ୍ ସୁନ୍ନାନ୍ ବସନ୍ତି ଡନେଙ୍ଗାନ୍ ଆରି ବସନ୍ତି ଅସୋୟ୍ ଲନାଙନ୍ ଅବୟ୍ ଇର୍ସେନ୍ ଆରନୁବ୍ ତୁବେଞ୍ଜି । ଆରି ପିଟାନ୍ ସୁନ୍ନାଲୋଙନ୍ ବାଗୁ କିରୁବନ୍ ତୁବ୍ଲେ ଇର୍ସେନ୍ ଆରନୁବ୍ ଆତୋଣ୍ତୋ ଆ ବାତବାନେନ୍ ଡକୋଏଞ୍ଜି । ତିଲୋଙ୍ ଅବୟ୍ ଆବବ୍ଲୋଙନ୍ ଅବୟ୍ କିରୁବନ୍ ଡ ଅନ୍ନା ଆବବ୍ଲୋଙନ୍ ଅନ୍ନା କିରୁବନ୍ ତୁବେଞ୍ଜି; ଇର୍ସେନ୍ ଆ ୟୋନୁମ୍ ଆସନ୍ ବାଗୁ କିରୁବନ୍ ଆବନ୍ତାନ୍ ମାୟ୍ଲେ ଡକୋଏଞ୍ଜି । ଆରି କିରୁବଞ୍ଜି ଆଡେନ୍ନା ତୋଣ୍ତୋନ୍ ଉର୍ରାଡ୍ଡାଲେ ଅସୁୟମ୍ ତରଙ୍କୁମନ୍ ଅବ୍ଲୁବ୍ଲୁବେଞ୍ଜି ଆରି ଆମୁକ୍କାଞ୍ଜି ତର୍ଡମ୍ ଅଲ୍ମୁକ୍କାଲେ ଡକୋତଞ୍ଜି ଆରି ଅସୁୟମନ୍ ଆତରଙ୍କୁମ୍ବାନ୍ ଗିୟ୍ଗିୟ୍ଲେ ଡକୋଲଞ୍ଜି ।
ମଡ଼ିର୍ ରୁଟିନ୍ ଆ ମେଜନ୍ ଆତନୁବ୍
(ତଙିୟ୍ନେ ୨୫:୨୩-୩୦)
ତି ସିଲଡ୍ ଆନିନ୍ ସିଟିମ୍ ଅରାନ୍ ବାଗ୍ସନ୍ତି ଡ ବସନ୍ତି ଲନାଙନ୍ ଡ ବସନ୍ତି ବଡୟ୍ଡୟ୍ ଡନେଙ୍ଗାନ୍ ଅବୟ୍ ମେଜନ୍ ତୁବେଞ୍ଜି । ଆରି ତିଆତେ ମନଙ୍ ସୁନ୍ନାନ୍ ମାୟ୍ଲେ ଡ ତି ଅଡ଼୍କୋନ୍ ଆନେଙ୍ରେଙ୍ ସୁନ୍ନାନ୍ ବାତ୍ତେ ତୁବେଞ୍ଜି । ଆନିନ୍ ତିଲୋଙ୍ ଏର୍ରେ ଉଞ୍ଜି ଅଣ୍ତେର୍ସି ଅନ୍ତମ୍ ଅବୟ୍ ଆଞରାଡୁବ୍ ଅନ୍ତମ୍ ତୁବେଞ୍ଜି ଆରି ତି ଆଞରାଡୁବ୍ ଏର୍ରେ ସୁନା କିନ୍ତାଲନ୍ ତୁବେଞ୍ଜି । ଆରି ବରୋୟ୍ବୋୟନ୍ ଆସନ୍ ସୁନ୍ନାନ୍ ବାତ୍ତେ ଉଞ୍ଜିକୁନେନ୍ ଉଞ୍ଜି କାଡୁନ୍ ତୁବେଞ୍ଜି । ତି କାଡୁନ୍ ଆନେଙ୍ ଅରାନ୍ ଅଡମ୍ ଡ ମେଜନ୍ ଆବନୋୟ୍ ଆସନ୍ ବରୋୟ୍ତେଙନ୍ ଆପତୁଡ୍ ଡକୋଏନ୍ । ଆନିନ୍ ମେଜନ୍ ଆବନୋୟ୍ ଆସନ୍ ସିଟିମ୍ ଅରାନ୍ ବାତ୍ତେ ବରୋୟ୍ଡାଙନ୍ ତୁବେଞ୍ଜି ଆରି ସୁନ୍ନାନ୍ ବାତ୍ତେ ବଲେଞ୍ଜି । ଆରି ଆନିଞ୍ଜି ମେଜନ୍ ଆତୋଣ୍ତୋ ଅଡ଼୍କୋନ୍ ଆସିମ୍ମା,ତି ଆସିମ୍ମା ଡ ସାମ୍ସାନ୍ ଡ ସିମ୍ମାନ୍, ଲନାନ୍ ଆସନ୍ ମେଜଜଙନ୍ ଅଡ଼୍କୋନ୍ ମନଙ୍ ସୁନାଲୋଙ୍ ତୁବେଞ୍ଜି ।
ସୁନ୍ନା ପିଙ୍କନ୍ ଆଡ୍ରକୋ ଆ ତନ୍ରୁବ୍
(ତଙିୟ୍ନେ ୨୫:୩୧-୪୦)
ଆରି ଆନିନ୍ ମନଙ୍ ସୁନ୍ନାନ୍ ବାତ୍ତେ ଅବୟ୍ ପିଙ୍କନ୍ ଆଡରକ୍କୋ ତୁବେନ୍, ଆନିନ୍ ପମ୍ଲେ କାବ୍ବାଡ଼ା ପିଙ୍କନ୍ ଆଡ୍ରକୋ ତୁବେଞ୍ଜି, ପିଙ୍ଗନ୍ ଆଡରକ୍କୋ ତି ଆଗଣ୍ତିଲୋଙ୍ ଡ ଆକେଣ୍ତାରନ୍ ତୁବେନ୍ ଆରି ତିଲୋଙ୍ ରୋଡୁବ୍ ସିମ୍ମାନ୍ ଡ ତିଆମାୟ୍ମାୟ୍ ଡେନ୍ । ନିୟ୍ ପିଙ୍ଗତୋଡନ୍ ବନେଙ୍ଗଡ୍ ୟାଗି କେଣ୍ତାରନ୍ ଡ ପିଙ୍ଗତୋଡନ୍ ବନେଙଗଡ୍ ୟାଗି କେଣ୍ତାରନ୍, କେନ୍ ତୁଡ୍ରୁ କେଣ୍ତାରନ୍ ଅନେଙ୍ରେଙନ୍ ଡୁଙ୍ଲନାୟ୍ । ଆରି ବନେଙ୍ ଆକେଣ୍ତାର୍ ବାଦାମ୍ତାରନ୍ ୟାଗି ରୋଡୁବ୍, ତାର୍ରବାନ୍ ଆଡ୍ରକ୍କୋ କେନ୍ ଅନ୍ତମ୍ ପିଙ୍ଗତୋଡନ୍ ତୁଡ୍ରୁ କେଣ୍ତାର୍ଲୋଙନ୍ ୟାଗି ଆକୋସୋତାରନ୍ ଡକୋଲନ୍ । ବନ୍ଡ ପିଙ୍ଗନ୍ ଆଡରକ୍କୋ ସନାତାରନ୍ ଅନ୍ତମ୍ ଉଞ୍ଜି ଆକୋସୋତାରନ୍ ଡ ତାର୍ବାନ୍ ଡକୋଲନ୍ । ଆରି ତେତେଲୋଙ୍ ଅବୟ୍ ତାର୍ବାନ୍ ଡକୋଏନ୍ ଅଡ଼୍କୋ ଆକୋସୋତାରନ୍ ୟାଗି ଲେକାୟ୍ କେଣ୍ତାରନ୍ ଡକୋଏନ୍ । କେନ୍ ଆତାର୍ବା ଡ ତିଲୋଙ୍ କେଣ୍ତାରନ୍ ବନେଙ୍ ଡେନ୍ ଡ ଅଡ଼୍କୋନ୍ ମନଙ୍ ସୁନ୍ନାନ୍ ତୁବ୍ଲେ ଅବୟ୍ ପନମ୍ କାବ୍ବାଡ଼ା ଡେନ୍ । ଆରି ତି ଆସନ୍ ସାତଟା ପିଙ୍କନ୍, ସିପ୍ପାନ୍ ଡ ଆରଡ଼େତୋଡ୍ ଗନରନ୍ ମନଙ୍ ସୁନ୍ନାନ୍ ତୁବେଞ୍ଜି । ତି ଆତେ ଅବୟ୍ ତେତିସି କେଜି ମନଙ୍ ସୁନ୍ନାନ୍ ଡ ଅଡ଼୍କୋ ସିମ୍ମାନ୍ ତୁବେଞ୍ଜି ।
ଲଙିଡ୍ ତରୋଡ୍ମୋଡନ୍ ଆ ତନମ୍ପିଲନ୍ ଆତନୁବ୍
(ତଙିୟ୍ନେ ୩୦:୧-୫)
କେନ୍ ଆତିକି ଆନିନ୍ ସିଟିମ୍ ଅରାନ୍ ବସନ୍ତି ଡନେଙ୍ଗାନ୍, ବସନ୍ତି ଲନାଙନ୍ ଡ ବାଗୁ ସନ୍ତି ଡନେଙ୍ଗାନ୍ ଉଞ୍ଜିକୁନେ ତନୋମୋଡ୍ ତନମ୍ପିଲନ୍ ତୁବେଞ୍ଜି, ସିଲତ୍ତେ ଡେରିଙଞ୍ଜି ଅଡ଼୍କୋନ୍ ଡେଆଜେନ୍ । ଆରି ତିଲୋଙ୍ ଉଞ୍ଜି ଅନେଙ୍ଗଡ୍ ଡ ତୁଣ୍ତୁନ୍ ମନଙ୍ ସୁନ୍ନାନ୍ ଲାୟେନ୍, ଆରି ଆନିନ୍ ତି ଅଡ଼କୋ ଅନେଙ୍ରେଙନ୍ ସୁନ୍ନାନ୍ ବାତ୍ତେ ତୁବେଞ୍ଜି । ଆରି ତେତ୍ତେ ବୋୟ୍ବୋୟନ୍ ଆସନ୍ ଆରାଗୋଡନ୍ ଆଡାରାନ୍ ଆଜାୟ୍ତା ବାର୍ମିୟ୍ତାଲନ୍ ଆ ବାକୁନେନ୍ ସୁନ୍ନାନ୍ ବାତ୍ତେ ତଙ୍ବାଗୁ ଆରାଗୋଡନ୍ ତୁବେଞ୍ଜି । ଆରି ସିଟିମ୍ ଅରାନ୍ ମାୟେଞ୍ଜି କି ତିଆତେ ସୁନ୍ନାନ୍ ମାୟେଞ୍ଜି ।
ଲଞିଡ୍ ତନମ୍ପିଲନ୍ ଆତନୁବ୍
(ତଙିୟ୍ନେ ୩୦:୧-୫)
ସିଲତ୍ତେ ଆନିଞ୍ଜି ଅବିସେକ ଅନମ୍ମେନ୍ ଆସନ୍ ମଡ଼ିର୍ ମିଞଲନ୍ ଡ ଲଙିଡ୍ ତନୁମୋଡନ୍ ପାଙ୍ଲେ ଲଙିଡ୍ ଜନବନ୍ ତୁବେଞ୍ଜି ।
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.