Juray Soura Bible
ତଙିୟ୍ନେ 28
ରାଓଡ଼ାନ୍ ଆସିନ୍ରି
ଆରି ଲତ୍ତେଙ୍ଲୋଙ୍ଞେନ୍ ଆସନ୍ ରାଓଡ଼ା କାବ୍ବାଡ଼ାନ୍ ଆ ଲନୁମନ୍ ଆସନ୍ ଆମ୍ୱେନ୍ ଇସ୍ରାଏଲନ୍ ଆଅଞ୍ଜି ସିଲଡ୍ ଆବୋଞାଙନ୍ ଆରୋଣନ୍ଆଡଙ୍ ଡ ଆଡାଙ୍ଗାଡ଼ାଅନ୍ଆଡଙ୍, ଆଗ୍ରାମ୍ଗାମ୍ ଆରୋଣନ୍, ନାଦବ୍ ଡ ଅବିଉ, ଇଲିୟାଜରନ୍ ଡ ଇତାମରନ୍ଆଡଙ୍ ଆମଙ୍ବାଞେନ୍ ଓରୋଙାୟ୍ବା । ବୋଙାବେନ୍ ଆରୋଣନ୍ ଗନୁଗୁନ୍ ଆଞନାଙ୍ ଡ ମନଙ୍ ଗନିୟ୍ତାନ୍ ଆସନ୍ ମଡ଼ିର୍ ସିନ୍ରିନ୍ ତୁବ୍ବା । ଆରି ଞେନ୍ ଆନାଜିଆଡଙ୍ ବନୁଡ୍ଡି ଆପୁରାଡ଼ାନ୍ ତିୟ୍ଲେ ବରିୟ୍ ଏମ୍ମେଲାଜି, ଏନ୍ନେଗନ୍ ଆମନ୍ରାଜିଆଡଙ୍ ବାଁୟ୍ଲେ ବର୍ବାଜି, ଞେନ୍ ଆସନ୍ ରାଓଡ଼ାନ୍ ଆକାବାଡ଼ା ଆକନୁମ୍ ଆସନ୍ ଆରୋଣନ୍ ମଡ଼ିର୍ ଅନେମ୍ମେନ୍ ଆସନ୍ ଆନିଞ୍ଜି ଆସିନ୍ରିନ୍ ତୁବ୍ତଜି । ଏତେଲ୍ଡେନ୍ ଡନଙ୍ଡଙ୍ କାବନ୍ ଏପୋଦନ୍ ଆସିନ୍ରିନ୍ ରୋର୍ଡଙ୍ ରନୋତୁବ୍ କାବନ୍, ରନେବ୍ବ୍ ଡ ଜରିଡୋବନ୍,କେନ୍ ଅଡ଼୍କୋନ୍ ଆଇନ୍ରିନ୍ ଆନିଞ୍ଜି ସିନ୍ରିନ୍ ତୁବ୍ତଜି,ଞେନ୍ ଆସନ୍ ରାଓଡ଼ାନ୍ ଲନୁମନ୍ ଆସନ୍ ବୋଞାଙ୍ ଆରୋଣନ୍ ଡ ଆଡାଙ୍ଗାଡା ଅନଞ୍ଜି ଆସନ୍ ଆନିଞ୍ଜି ମଡ଼ିର୍ ସିନ୍ରିନ୍ ତୁବ୍ବା । ଆନିଞ୍ଜି ସୁନ୍ନାନ୍, ନିଡ଼ି,ଦୂମ୍ର ଲୁଲୁ ଡ ଜେଏ ମନଙ୍ ସରୁତାଡ଼େରନ୍ ପାଙ୍ତଜି । ଆରି ତି ଆ ସୁନ୍ନାନ୍, ନିଡ଼ି କରୋମାବ୍, ଲୁଲୁ ଡ ଆନାଙ୍ଗୁଡ୍ ଜେଏ ଲତୁମ୍କାବ୍ଲୋଙନ୍ ମନଙ୍ ଆତରୁବ୍ତେନ୍ ଆମନ୍ରା ଆ କାବ୍ବାଡ଼ା ବାତ୍ତେ ଏପୋଦନ୍ ସିନ୍ରିନ୍ ତୁବ୍ତଜି । ସିଲତ୍ତେ ବାଗୁ ଆବବ୍ଲୋଙନ୍ ରମ୍ମଙ୍ ରମ୍ମଙ୍ ମାୟ୍ଲନ୍ ବାଗୁ ତାରଙ୍ଡୋଙନ୍ ଡକୋତନ୍; କେନ୍ ଅନ୍ତମ୍ ତିଆତେ ମାୟ୍ମାୟ୍ତନ୍ । ଆରି ଏପୋଦନ୍ ଆକୁଣ୍ତୁବଲୋଙନ୍ ଆତାଡ଼େର୍ କେନ୍ ସିଲଡ୍ ଆମ୍ୱେନ୍ ବାଗୁ ଗୋମେଦ ମଣିନ୍ ପାଙ୍ଲେ ତି ଆତୋଣ୍ତୁ ଇସ୍ରାଏଲନ୍ ଆଅଞ୍ଜି ଆଞୁମନ୍ ଇଡ୍ବା । ଆକେଜାଞ୍ଜି ଆନିଞ୍ଜି ତୁଡ୍ରୁ ଆଞୁମ ମର୍ର ଅବୟ୍ ମଣିନ୍ ଆତୋଣ୍ତୋ ଡ ଲାଙ୍ଲ୍ଲେ ତୁଡ୍ରୁ ଆଞୁମ୍ ଅନ୍ନା ମଣି ଆତୋଣ୍ତୋ ଇଡ୍ବା। ଆଞୁମ୍ ଆକାବ୍ବାଡ଼ା ଡାବ୍ବୋନ୍ ଆକନୁଣ୍ଟାୟ୍ ଅନ୍ତମ୍ ଆଜାଡ଼ିନ୍ ତି ବାଗୁ ମଣିନ୍ ଆତୋଣ୍ତୋ ଇସ୍ରାଏଲନ୍ ଆଅନଞ୍ଜି ଆଞୁମ୍ ଇଡ୍ବା ଆରି ତିଆତେ ବାଗୁ ସୁନ୍ନାନ୍ ବାତ୍ତେ ଡଙ୍ବା । ଆରି ଆମ୍ୱେନ୍ ଇସ୍ରାଏଲଞ୍ଜି ମନ୍ନନେନ୍ ଆସନ୍ ଆମ୍ୱେନ୍ ତି ବାଗୁ ମଣିନ୍ ଏପୋଦନ୍ ବାଗୁନ୍ ଆତାରଙ୍ଲୋଙନ୍ ତିୟ୍ବା ତିଲୋଙ୍ ଆରୋଣନ୍ ମନ୍ନନେନ୍ ପ୍ରବୁନ୍ ଆମୁକ୍କାବାନ୍ ରମ୍ମଙ୍ ବାଗୁ ଆତାରଙ୍ଲୋଙ୍ ଆନିଞ୍ଜି ଆଞୁମନ୍ ମନ୍ନେତେ । ଆରି ଆମ୍ୱେନ୍ ବାଗୁ ସୁନା ମାଡ଼ିନ୍ ତୁବା । ମନଙ୍ ସୁନ୍ନାନ୍ ବାତ୍ତେ ଲୁଆଡନ୍ ଅନ୍ତମ୍ ଗିଡ୍ଲୋଙ୍ ଗିଡ୍ଲେ ବାଗୁ ସିଙ୍କୁଡ଼ିନ୍ ତୁବ୍ଲେ ଅନବ୍ଜିଡନ୍ ଡେତେ ।
ଏପୋଦନ୍
(ତଙିୟ୍ନେ ୩୯:୮-୨୧)
ଆରି ତନ୍ରୁବ୍ ମର୍ରନ୍ ଆ କାବ୍ବାଡ଼ାଲୋଙ୍ ପନ୍ଚୁଆତି ଡରଙ୍ଡଙ୍କାବନ୍ ଡଙ୍ଡଙ୍ତେ,ଏପୋଦନ୍ ଆକାବ୍ବାଡ଼ା ସୁନ୍ନାନ୍ ଅନ୍ତମ୍ ନିଡ଼ି,ଦୁମ୍ର,ଲୁଲୁ ଡ କବୁଙ୍ ଜେଏ ତାଡ଼େରନ୍ ବୟନ୍ ତନ୍ରୁବ୍ ମର୍ରନ୍ ଆକାବ୍ବାଡ଼ା ବାତ୍ତେ ତିଆତେ ତୁବ୍ବା । ତିଆତେ ଉଞ୍ଜିକୁନେନ୍ ଡ ରବ୍ତନେ; ତି ଆ ଡନେଙ୍ଗାନ୍ ବସାଙ୍କଡ଼େ ଆରି ଲନାଆଙନ୍ ବସାଙ୍କଡ଼େ ଡେତେ । ଆରି ତିଆତେ ଉଞ୍ଜି ଦାଡ଼ି ମଣିନ୍ ବାତ୍ତେ ତାଙ୍ତଜି, ତିଲୋଙ୍ ଆପର୍ତମ୍ମୁ ଡାଡ଼ିଲୋଙ୍ ଚୁଣିନ୍, ପିତମଣିନ୍ ଡ ମରକତ; ଅନବ୍ବାଗୁ ଡାଡ଼ିଲୋଙ୍ ପଦ୍ମରାଗ, ନିଡ଼ିକାନ୍ତ ଡ ଇରାନ୍ ଅନବ୍ୟାଗି ଡାଡ଼ିଲୋଙ୍ ପେରୋଜନ୍ ଯିସ୍ମ ଡ ମଡ଼ଗା ଅରେଙ୍ ଆରି ଉଞ୍ଜି ଡାଡ଼ିଲୋଙ୍ ବଇଦୁର୍ଯ୍ୟ, ଗୋମେଦକ ଡ ସୁର୍ଯ୍ୟକାନ୍ତ; କେନ୍ ଅଡ଼୍କୋନ୍ ଆସୁନ୍ନା ରମ୍ମଙ୍ ରମଙ୍ ଡାଡ଼ିଲୋଙ୍ ଡକୋତଜି । କେନ୍ ମଡ଼ଗା ଅରେଙନ୍ ଇସ୍ରାଏଲନ୍ ଆ ଓବ୍ବାସିୟ୍ଜି ଆଞୁମ ଆସନ୍ ଆଞୁମଞ୍ଜି ଅନ୍ତମ୍ ବାର କେଜ୍ଜାଞ୍ଜି ଡେତଜି; ତଙ୍କାନ୍ ଅନ୍ତମ୍ ଆସେୟ୍ସେୟ୍ ତଙ୍ବୟ୍ ତଙ୍ବୟ୍ ମଡ଼ଗା ଅରେଙ୍ରେଙନ୍ ବାର କେଜ୍ଜାଞ୍ଜି ଆସନ୍ ତଙ୍ବୟ୍ ତଙ୍ବୟ୍ ଓବ୍ବାସିଜନ୍ ଆଞୁମ୍ ଡକୋତନ୍ । ଆମ୍ୱେନ୍ ମନଙ୍ ସୁନ୍ନାନ୍ ବାତ୍ତେ ମାୟଙନ୍ ଆଡର୍ଙ୍ନେକାବ୍ ଆସନ୍ ମାଡ଼ାନ୍ ଅନ୍ତମ୍ ଆନାଙ୍ଗିଡନ୍ ଆସିଙ୍କୁଡ଼ି ତୁବା । ଆରି ମାୟଙନ୍ ଆଡର୍ଙ୍ନେକାବ୍ ଆ ତୋଣ୍ତୁଲୋଙ୍ ସୁନ୍ନାନ୍ ବାତ୍ତେ ବାଗୁ କାଡ୍ଡୁନ୍ ତୁବ୍ବା ଡ ଡନଙ୍ଡଙ୍କାବନ୍ ବାଗୁ ଅନେଙ୍ଗଡ୍ ନିୟ୍ ବାଗୁ କାଡ୍ଡୁନ୍ ତୁବ୍ବା । ଆରି ଡନଙ୍ଡଙ୍କାବନ୍ ବାଗୁ ଅନେଙ୍ଗଡ୍ ବାଗୁ କାଡ୍ଡୁଲୋଙନ୍ ନିୟ୍ ବଗୁ ମୋଡ଼ାନ୍ ସୁନ୍ନାନ୍ ସିଙ୍ଗୁଡ଼ିନ୍ ବାତ୍ତେ ତୁବ୍ବା । ଆରି ମୋଡ଼ାନ୍ ସିଙ୍ଗୁଡ଼ିନ୍ ବାଗୁଅବ୍ବ୍ ବାଗୁ ମଡିଲୋଙନ୍ ଡଙଲେ ଏପୋଦନ୍ ଆସିନ୍ରି ଆମୁକ୍କାବାନ୍ ବାଗୁନ୍ ଆତାରାଙ୍ବାନ୍ ଆ ତୋଣ୍ତୁଲୋଙ୍ ଡକୋବା । ଆମ୍ୱେନ୍ ସୁନ୍ନାନ୍ ବାଗୁ କାଡ୍ଡୁନ୍ ତୁବ୍ଲେ ଡନଙ୍ଡଙ୍କାବନ୍ ବାଗୁ ଅନେଙ୍ଗଡ୍ ଏପୋଦନ୍-ଏପୋଦନ୍ ଆସିନ୍ରି ମୁକ୍କାଗଡ୍ ଆ ଅମ୍ମଗଡ୍ ଡକ୍କୋବା । ଆରି ବାଗୁ ସୁନାକଡ଼ାନ୍ ତୁବ୍ଲେ ଏପୋଦନ୍ ଆଇନ୍ରିନ୍ ବାଗୁ ଆତାରଙ୍ଲୋଙନ୍ ଜାୟ୍ତାନ୍ ତିଲୋଙ୍ ମୁକାବାନ୍ ଆମାୟ୍ମାୟ୍ଲୋଙନ୍ ଏପୋଦନ୍ ଆତ୍ରୁବେନ୍ ଆ ସିଟି ଆ ତୋଣ୍ତୁଲୋଙ୍ ତିଆତେ ଡକୋବା । ତିଲୋଙ୍ ଡରଙ୍ଡଙ୍କାବନ୍ ଏଙ୍ଗାଲେ ଏପୋଦନ୍ ସିତ୍ରନ୍ ଆ ତୋଣ୍ତୁଲୋଙ୍ ଡକୋଲନ୍ ଏପୋଦନ୍ ଅଃନସେଡ୍ଲୋ,ତି ଆସନ୍ ଆନିଞ୍ଜି ଡନଙ୍ଡଙ୍କାବ୍ ଆନିନ୍ଡମ୍ କାଡ୍ଡୁନ୍ ନିଡ଼ି ତାଡ଼େରନ୍ ବାତ୍ତେ ଏପୋଦନ୍ କାଡ୍ଡୁନ୍ ବାତ୍ତେ ଜିଲେ ଡକୋତଜି । ଅଙ୍ଗା ଆଡିଡ୍ ଆରୋଣନ୍ ମଡ଼ିର୍ ଡରକୋନେବାନ୍ ଗନ୍ତେ, ତ ଆଡିଡ୍ ପ୍ରବୁନ୍ ଆମୁକ୍କାବାନ୍ ଅଡ଼କୋଡିନାନ୍ ମନନ୍ନେନ୍ ଆସନ୍ ପନ୍ଚୁଆତିମର୍ର ଡନଙ୍ଡଙକାବନ୍ ଇସ୍ରାଏଲ୍ମରଞ୍ଜି ଆଞୁମ୍ ରମ୍ମଙ୍ ଆଉଗ୍ଗର୍ ଆତୋଣ୍ତୋ ପାଙ୍ତଜି । ନିୟ୍ ପନ୍ଚୁଆତି ଡନଙ୍ଡଙ୍କାବନ୍ ଆମ୍ୱେନ୍ ଉରିମନ୍ ଡ ତୁମିମନ୍ ସତଙ୍ ସାନାଆରନ୍ଲୋଙନ୍ ଡକୋବା; ତିଲୋଙ୍ ଆରୋଣନ୍ ଅଙ୍ଗାଆଡିଡ୍ ପ୍ରବୁନ୍ ଆମୁକାବାନ୍ ଗନ୍ନାବା, ନିୟ୍ ଆଡ଼ିଡ୍ ଆରୋଣନ୍ ପ୍ରବୁନ୍ ଆ ଉଗ୍ଗର୍ଲୋଙନ୍ ଆତୋଣ୍ତୋ ତିଆତେ ଡକୋତନ୍, ଆରୋଣନ୍ ପ୍ରବୁନ୍ ଆମୁକାବାନ୍ ଅଡ଼କୋଡିନାନ୍ ଇସ୍ରାଏଲ୍ମରଞ୍ଜି ଆ ପନ୍ସୁଆତି ଉଗର୍ଲୋଙ୍ବେନ୍ ଆତୋଣ୍ତୋ ଡକୋତନ୍ ।
ଆନ୍ନା ରାଓଡ଼ାନ୍ ଆସିନ୍ରି
(ତଙିୟ୍ନେ ୩୯:୨୨-୩୧)
ଆମ୍ୱେନ୍ ଏପୋଦନ୍ ଚଗାନ୍ ମେରନ୍ ନିଡ଼ି ଅମ୍ମେବା । ତି ଆ ମଡ୍ଡିଲୋଙ୍ ପବ୍ଲୋଡ୍ବବ୍ନେନ୍ ଆସନ୍ ଅବୟ୍ ଆପତୁଡନ୍ ଡକୋତନ୍, ସାଞ୍ଜୁଆର ଗଡ଼ଡେସାନ୍ ଅନ୍ତମ୍ ଆଜାଡ଼ିନ୍ ଞନାଙନ୍ ନିୟ୍ ଆଗରନ୍ନେନ୍ ଅଡ଼୍କୋରେଙନ୍ ବନୁଡନ୍ ଡେତେ, ସିଲତ୍ତେ ତିଆତେ ଅଃନତଡେ । ଆରି ଆମ୍ୱେନ୍ ତିଆନେଙ୍ବାନ୍ ଅଡ଼୍କୋରେଙନ୍ ନିଡ଼ି, କରୋମାବ୍ ଡ ସିଣ୍ଡରନ୍ ଅନ୍ତମ୍ ଡାଡ଼ିମ୍ୱନ୍ ତୁବ୍ବା, ଆରି ତେତ୍ତେ ସାରିଆଡେନ୍ ମଡ୍ଡିମଡ୍ଡିରେଙ୍ ସୁନ୍ନା ତଡ଼େଙନ୍ ଡକୋତନ୍ । ନିୟ୍ ଅଡ଼୍କୋରେଙନ୍ ଡାଡ଼ିଲେ ଅବୟ୍ ସୁନ୍ନା ତଡ଼େଙନ୍ ଡ ଅବୟ୍ ଡାଡ଼ିମ୍ୱନ୍ ଆରି ଅବୟ୍ ସୁନ୍ନା ତଡ଼େଙନ୍ ଡ ଡାଡ଼ିମ୍ୱନ୍ ଡକୋତନ୍ । ଆରି ଆରୋଣନ୍ ଆସରେବାତେନ୍ ଆଡିଡ୍ ତିଆତେ ରତନେ; ତିଲୋଙ୍ ଆନିନ୍ ତି ଆ ବନେଡ଼ା ପ୍ରବୁନ୍ ଆମୁକ୍କାବାନ୍ ମଡ଼ିର୍ ଡରକୋନେଲୋଙ୍ ଅମ୍ଗନ୍ମ୍ୱା ଡ ତିଆଡିଡ୍ ଆନିନ୍ ତେତେଲୋଙ୍ ଡୁଙ୍ତନାୟ୍, ତିଆଡିଡ୍ ତିଲୋଙ୍ ସନଡନ୍ ଅମ୍ଡଙ୍ତେ,ତିଡେନ୍ ଆନିନ୍ ଅଃରବୁଏ । ଆରି ଆମ୍ୱେନ୍ ମଡ଼ିର୍ ସୁନ୍ନାନ୍ ଅବୟ୍ ଅଲାନ୍ ତୁବ୍ଲେ ସିଲୁନ୍ ଅନ୍ତମ୍ ତି ଆ ତୋଣ୍ତୁଲୋଙ୍ “ପ୍ରବୁନ୍ ଆସନ୍ ମଡ଼ିର୍” ସୟ୍ବା । ଆରି ରନ୍ନେବ୍ବନ୍ ଆତୋଣ୍ତୁଲୋଙ୍ ଡକୋନେନ୍ ଆସନ୍ ତିଆତେ ନିଡ଼ି ତାଡେରନ୍ବାତ୍ତେ ରନ୍ନରବ୍ବନ୍ ଜିଲେ ମୁକାବାନ୍ ଡକୋବା । ତିଆତେ ଆରୋଣ ଆଇଡାଡ଼ାଲୋଙ୍ ଡକୋତନ୍, ତେତ୍ତେ ମଡ଼ିର୍ ଜନବନ୍ ଆ ଡୋସା, ଆଗ୍ରାମ୍ଗାମ୍, ଏସ୍ରାଏଲନ୍ ଆଅନଞ୍ଜି ଆ ମଡ଼ିର୍ ଆମ୍ୱେନ୍ ସିନ୍ରିନ୍ ମନଙ୍ ଜେଏ ସରୁନ୍ଆସିଂରିୟ୍ ଡ ରନ୍ନେବ୍ବନ୍ ମନଙ୍ ଜେଏସରୁ ତାଳେରନ୍ ବାତ୍ତେ ତୁବ୍ବା ଆରି ରନେଡୁବନ୍ ମନଙ୍କାବ୍ବାଳାନ୍ ବାତ୍ତେ ସିତ୍ରନ୍ ବରଙ୍ତଙନ୍ ତୁବ୍ବା । ଆରି ଆରୋଣନ୍ ଆ ଅନଞ୍ଜି ଆସନ୍ ସିନ୍ରିନ୍ ଡ ରନେଡୁବନ୍ ତୁବ୍ବା ଆରି ଆନିଞ୍ଜି ଆଗନୁଗୁନ୍ ଡ ଆ ମନନଙନ୍ ଆନେମ୍ମେ ଆସନ୍ ତୁବ୍ବା । ଆରି ବୋଞାଙ୍ନମ୍ ଆରୋଣନ୍ ଡ ଆଅନଞ୍ଜିଆଡଙ୍ ତିଆତେ ଅଡ଼୍କୋନ୍ ଅବ୍ରବା, ଆରି ଆନିଞ୍ଜି ଅବିସେକ ଅମ୍ମେଲେ ତବ୍ନଙ୍ଡାଲେ ମଡ଼ିର୍ ଅମ୍ମେବା, ତିଲୋଙ୍ ଆନିଞ୍ଜି ରାଓଡ଼ାଲେଞ୍ଜି ଆକାବ୍ବାଡ଼ା ଲୁମ୍ତଜି । ଆମ୍ୱେନ୍ ଆଡଅଙ୍ଞ୍ଜି ଆଉର୍ଡିୟ୍ ୟନୁମନ୍ ଆସନ୍ କୁଣ୍ତୁବ୍ଲୋଙନ୍ ସିଲଡ୍ ବୁଲୁଲୋଙନ୍ ଆସିନ୍ରି ଅବ୍ରଆ । ଆରି ତିଆଡିଡ୍ ଆରୋଣନ୍ ଡ ଆଡାଙ୍ଗାଡ଼ାଅନଞ୍ଜି ସରେବା ତମ୍ୱୁସିଙ୍ଲୋଙନ୍ ଗନ୍ତଞ୍ଜି, ଅଡ଼େ ମଡ଼ିର୍ ଡରକୋନେଲୋଙ୍ ସେବାନ୍ ଆସନ୍ ତନମ୍ପିଲନ୍ ଆମଙ୍ବାନ୍ ଡେତେ, ତିଆଡିଡ୍ ଆନିଞ୍ଜି ଏଙ୍ଗାଲେ ଇର୍ସେନ୍ ଲୁମ୍ଲେ ଅଃରବୁଏଜି, କେନ୍ ଆସନ୍ ଆନିଞ୍ଜି ସିନ୍ରିନ୍ ରତନ୍ଞ୍ଜି; କେନ୍ ଆରୋଣନ୍ ଡ ଆନିନ୍ ପୁର୍ରବାତେ ଆବିରିଣ୍ତାନ୍ ମନ୍ନାନେନ୍ ଆସନ୍ ଅଃନ୍ନଞିଡେନ୍ ବନାଁୟ୍ବରନ୍ ଡେତେ ।
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.