Juray Soura Bible
ତଙିୟ୍ନେ 25
ମଡ଼ିର୍ ଡରକୋନେନ୍ ଆସନ୍ ତନିୟ୍ତିୟନ୍
(ତଙିୟ୍ନେ ୩୫:୪-୯)
ପ୍ରବୁନ୍ ମୋସାନ୍ଆଡଙ୍ ବରେନ୍, ଆମନ୍ ଇସ୍ରାଏଲନ୍ ଆଅନ୍ଜିଆଡଙ୍ ବରାଜି ଞେନ୍ ତନିୟ୍ତିୟନ୍ ଆତନିୟ୍ ଆସନ୍ ବରାଜି । ଆନା ଆ ଉଗ୍ଗର୍ଲୋଙନ୍ ଇନିଜି ତନିୟନ୍ ଆସନ୍ ଇସ୍ସୁମ୍ତେ ତିଆତେ ଅଡ଼୍କୋ ମନ୍ରାନ୍ ସିଲଡ୍ ଆମନ୍ ଏତ୍ତେଲେମା ତନିୟ୍ତିୟନ୍ ଜାଆ । ମନନ୍; ସୁନ୍ନାନ୍, ରୁପାନ୍, ଡ ପିତ୍ତଡ଼ନ୍ କେନ୍ ଅଡ଼୍କୋନ୍ ଆନିଞ୍ଜି ପାଙ୍ତାଜି; ନିଡ଼ି, କରୋମାବ୍, ଡ ଲୁଲୁ ସିଲକୁ କାବନ୍; ମେଣ୍ଡାନ୍ ଆ ଉପ୍ପୁର୍ ବାତ୍ତେ ଆତୁବ୍ତୁବନ୍ ଆସିନ୍ରି; ମିଞାମ୍ଗନ୍ ମେଣ୍ତାନ୍ ଆଉସାଲ୍ ଡ ଲମନ୍ ଉସାଲ୍, ଡ ସିଟିମ୍ ଅରାନ୍; ପିଙ୍କତୋଡନ୍ ଆସନ୍ ମିଞଲନ୍ ଆରି ଅବିସେକ ଆସନ୍ ମିଞଲନ୍ ଡ ଲଙିଡ୍ ତରୋମୋଡନ୍ ଆସନ୍ ଲଙିଡ୍ ଜନବନ୍; ଆରି ଏପୋଦନ୍ ରାଓଡ଼ାକାବନ୍ ଡ ମାୟଙନ୍ ଆ ଡରଙ୍ନେକାବନ୍ ଆସନ୍ ଗୋମେଦ ମଣିନ୍ ଅଡ଼୍କୋନ୍ ଆସେୟ୍ସେଜନ୍ ଅରେଙନ୍, କେନ୍ ଅଡ଼୍କୋନ୍ ଆତନିୟ୍ତିୟ୍ଜି ଆମଙଞ୍ଜି ସିଲଡ୍ ଜାଆ । ଆନିଞ୍ଜି ଞେନ୍ ଆସନ୍ ଅବୟ୍ ମଡ଼ିର୍ ଡରକୋନେନ୍ ତୁବେତଜି, ତେତ୍ତେ ଞେନ୍ ଆନିଞ୍ଜି ସରିନ୍ ଡକୋତନାୟ୍ । ଆମ୍ବେଞ୍ଜି ତମ୍ବୁସିଙନ୍ ଡ ଇନିଜି ଆ ଜିନିସଜି ଏଙ୍ଗାଲେ ଡନକ୍କୋନ୍ ଡେତେ ଞେନ୍ ଆମ୍ବେଞ୍ଜିଆଡଙ୍ ଏଙ୍ଗାଲେ ଅବ୍ତୁୟ୍ତବେନ୍ ତିଅନ୍ତମ୍ ତୁବ୍ବା ।
ନିଅମ ପେଲାନ୍
(ତଙିୟ୍ନେ ୩୬:୧-୯)
ଆନିଞ୍ଜି ଡନେଙ୍ଗାନ୍ ବାଗ୍ସନ୍ତି ବସାଙ୍କଡ଼େ ଆରି ଲନାଆଙନ୍ ବସନ୍ତି ବସାଙ୍କଡ଼େ ଡ ତୋଣ୍ଡୋନ୍ ଆଡନେଙ୍ଗା ବସନ୍ତି ବସାଙ୍କଡ଼େ ସିଟିମ୍ ଅରାନ୍ ବାତ୍ତେ ଅବୟ୍ ପେଲାନ୍ ତୁବେତଜି । ଆମନ୍ ସତ୍ତର୍ ସୁନ୍ନାନ୍ ବାତ୍ତେ ଅମ୍ମଗଡ୍ ବାରେଗଡ୍ ବାର୍ମିଡ଼ିୟ୍ତାଲନ୍ ବଲା ଆରି ଉଞ୍ଜିକୁନେନ୍ ଆଡାରାନ୍ ତୁବ୍ବା । ପେଲାନ୍ ବୋୟ୍ଲେ ଆପନାଙ୍ ଆସନ୍ ସୁନ୍ନାନ୍ ବାତ୍ତେ ଉଞ୍ଜି କାଡ୍ଡୁନ୍ ତୁବ୍ଲେ ଉଞ୍ଜିନ୍ ଆକୁନେଗଡ୍ ଜୁଡ଼େବା, ବପାକିଗଡ୍ ବାଗୁ ଆରି ବପାକିଗଡ୍ ବାଗୁ କାଡ୍ଡୁନ୍ ଡକୋତନ୍ । ପେଲାନ୍ ଆବନୋୟ୍ ଆସନ୍ ସିଟିମ୍ ଅରାନ୍ ବାତ୍ତେ ବରୋୟ୍ଡାଙନ୍ ତୁବ୍ବା ଆରି ବରୋୟ୍ଡାଙ୍ଲୋଙନ୍ ସୁନ୍ନାନ୍ ବାତ୍ତେ ବଲ୍ବା ଆରି ବରୋୟ୍ଡାଙଞ୍ଜି ପେଲାନ୍ ଆ ବର୍ମଡ଼ିୟ୍ତାନ୍ ଆ କାଡ୍ଡୁଲୋଙ୍ ପସେର୍ବା । ବରୋୟ୍ଡାଙଞ୍ଜି ପେଲାନ୍ ଆ କାଡ୍ଡୁଲୋଙନ୍ ସିଲଡ୍ ଏତବ୍ଡଙ୍ । ଞେନ୍ ଆମନ୍ଆଡଙ୍ ଅଙ୍ଗା ବନାଁୟ୍ବର୍ ସାକି ଅଲାନ୍ ତିୟ୍ଲମ୍, ତିଆତେ ଅମ୍ମ ପେଲାନ୍ ଡକ୍କୋବା ।
ଆମନ୍ ସତ୍ତର୍ ସୁନ୍ନାନ୍ ବାତ୍ତେ ଡନେଙ୍ଗାନ୍ ବାଗୁ ସନ୍ତି ବସାଙ୍କଡ଼େ, ଲନାଙନ୍ ବସନ୍ତି ବସାଙ୍କଡ଼େ ଅବୟ୍ ଇର୍ସେ ରନୁବନ୍ ତୁବ୍ବା । ପମ୍ପମ୍ସିଲେ ଆମନ୍ ସୁନ୍ନାନ୍ ବାତ୍ତେ ବାଗୁ କିରୁବଞ୍ଜି ତୁବା, ତି ଆ ଇର୍ସେ ରନୁବ୍ ଆତୋଣ୍ତୋ ବାତବାନେନ୍ ଡକୋବା । ଅବୟ୍ ଆ କିରୁବ ବଅନେଗଡ୍ ଆରି ଅବୟ୍ ଆକିରୁବ ବଅନେଙ୍ଗଡ୍ ତମ୍ମିୟ୍ବା । ବାଗୁ ଆକିରୁବ ରନୁବନ୍ ମାୟ୍ଲନ୍ ଡକୋତନ୍ । କିରୁବଞ୍ଜି ଅଲ୍ମୁକାଲେ ଆଡେନ୍ନାଞ୍ଜି ଉର୍ରାଡ୍ଲେ ରନୁବନ୍ ଡଙ୍ତଜି । ରନୁବ୍ଗଡ୍ କିରୁବଞ୍ଜି ଆମୁକାନ୍ ଡକୋତନ୍ । ଆମନ୍ ରନୁବନ୍ ଆ ପେଲାଲୋଙନ୍ ଡକ୍କୋଆ ଆରି ଞେନ୍ ଅଙ୍ଗା ସାକିପେଲାନ୍ ଆମନ୍ଆଡଙ୍ ଏତିୟ୍ଲମ୍ ତିଆତେ ଅମ୍ମପେଲାନ୍ ଡକ୍କୋଆ । ଆରି ତି ଆଡ୍ରକୋନେଲୋଙ୍ ଞେନ୍ ଆମ୍ବେନ୍ ସରିନ୍ ଅଲ୍ରବାଙ୍ତବୋ, ଆରି ରନୁବନ୍ ଆତୋଣ୍ଡୋ ସିଲଡ୍ ଆଗରାମ୍ଗାମନ୍ ସାକି ପେଲନ୍ ଆତୋଣ୍ଡୋ ଡକୋନ୍ ବାଗୁନ୍ ଆକିରୁବ ଲୋଙ୍ସିଲଡ୍ ଆମନ୍ ସରିନ୍ କଡାଡ଼ିତନାୟ୍ ଆରି ଇସ୍ରାଏଲମରଞ୍ଜି ଆବର୍ନେ ଅଡ଼୍କୋନ୍ ଆବନାଁୟ୍ବର୍ ଆମନ୍ଆଡଙ୍ ଅବ୍ଜନାତମ୍ ।
ରୁଟିନ୍ ଆ ସନୋରୋପ୍ପାୟନ୍ ଆସନ୍ ମେଜନ୍
(ତଙିୟ୍ନେ ୩୭:୧୦-୧୬)
ଆମ୍ୱେନ୍ ସିଟିମ୍ ଅରାନ୍ ବାଗୁ ସନ୍ତି ଡନେଙ୍ଗାନ୍ ଡ ବସନ୍ତି ଲନାଙନ୍ ବସନ୍ତି ବସାଙ୍ଙ୍ଗଡ଼େ ଡନେଙ୍ଗାନ୍ ଅବୟ୍ ମେଜନ୍ ତୁବ୍ଲେ ମନଙ୍ ସୁନ୍ନାନ୍ ମାୟ୍ଲେ ଆରି ଅଡ଼୍କୋରେଙନ୍ ସୁନ୍ନାନ୍ କାନ୍ତିନ୍ ତୁବ୍ବା । ଆରି ଏର୍ରେ ଉଞ୍ଜି ଅଣ୍ତେର୍ସିନ୍ ଅନ୍ତମ୍ ବଲ୍ବା ଆରି ତି ଏର୍ରେ ସୁନ୍ନାନ୍ ବଲ୍ଲେ ବଡ୍ବା । ଆରି ସୁନାନ୍ଲୋଙନ୍ ଆତୁବ୍ତୁବ୍ ଆ କାଡ୍ଡୁନ୍ ନିୟ୍ ଉଞ୍ଜିକୁନେନ୍ ଡକୋବା । ମେଜନ୍ ବୋୟନ୍ ଆସଙ୍ଗି ଆସନ୍ ନିୟ୍ କାଡ୍ଡୁନ୍ ବେସ୍ଟନ୍ ଆନେଙ୍ ଡକୋତନ୍ । ନିୟ୍ ମେଜନ୍ ଆସନ୍ ସିଟିମ୍ ଅରାନ୍ ବାତ୍ତେ ସାଙ୍ଗିଲୋଙନ୍ ସୁନ୍ନାନ୍ ମାୟ୍ତଜି । ଆରି ସିମ୍ମାନ୍, ସାମୁସନ୍, ମଗନ୍ ଡ ଲନାନ୍ ଆସନ୍ ଡର୍ରକୋନ୍ ତୁବ୍ବା କେନ୍ ଅଡ଼୍କୋନ୍ ମନଙ୍ ସୁନ୍ନାନ୍ ତୁବ୍ବା । ଆମ୍ୱେନ୍ ତି ଆ ମେଜନ୍ ଆତୋଣ୍ତୋ ମୁକ୍କାଲୋଙ୍ଞେନ୍ ଅଡ଼୍କୋ ଡିନ୍ନା ମଡ଼ିର୍ ରୁଟିନ୍ ଡକୋବା ।
ସୁନା ପିଙ୍କତୋଡ୍ନୁବନ୍
(ତଙିୟ୍ନେ ୩୭:୧୭-୨୪)
ଆରି ମନଙ୍ ସୁନ୍ନାନ୍ ବାତ୍ତେ ଅବୟ୍ ପିଙ୍କନ୍ ଆଡ୍ରକୋ ତୁବା । ସୁନ୍ନାନ୍ ପମ୍ପମ୍ଡାଲେ ପିଙ୍କନ୍ ଆଡ୍ରକୋ କେଣ୍ଡାରନ୍, ଆଗଣ୍ଡିନ୍ ଡେତେ, ଆରି ଆକୋସୋନ୍ ଡ ଆତାର୍ବାଞ୍ଜି ତେତ୍ତେ ମାୟ୍ତନେ । ବମିୟ୍ତାଲ୍ଗଡ୍ ୟାଗି ପିଙ୍କନ୍ ଆଡ୍ରକୋ ଆକେଣ୍ତାର୍ ଆରି ବମିୟ୍ତାଲ୍ଗଡ୍ ୟାଗି ପିଙ୍କନ୍ ଆଡ୍ରକୋ ଆକେଣ୍ତାର୍ କେନ୍ଅନ୍ତମ୍ ବାର୍ମଡ଼ିୟ୍ତାଲନ୍ ଆତେ ତୁଡ୍ରୁ କେଣ୍ଡାରନ୍ ଡେତେ । ଅଡ଼୍କୋନ୍ ଆକେଣ୍ଡାର୍ଲୋଙ୍ କଡ଼ିକାନ୍ ଡ ଆକୋପାନ୍ ବାତ୍ତେ ଆପୁତ୍ତେନ୍ ବାଦାମନ୍ ଆତାର୍ବା ଅନ୍ତମ୍ ୟାଗି ତାର୍ବାନ୍ ଡକୋତନ୍ । ବନ୍ଡ ପିଙ୍କତୋଡ୍ନୁବ୍ଲୋଙନ୍ ସନାତାରନ୍ ଅନ୍ତମ୍ ଉଞ୍ଜି ତୋଡ଼ୋର୍ରା ଡ ଡେପନ୍ ଡ ତାର୍ବାନ୍ ଡକୋତନେ । ଅଙ୍ଗା ପିଙ୍କନ୍ ଆଡରକ୍କୋଲୋଙ୍ ସିଲଡ୍ ତୁଡ୍ରୁ କେଣ୍ତାରନ୍ ଡୁଙ୍ତନାୟ୍ ଆରି ଅଡ଼୍କୋନ୍ ବାଗୁ କେଣ୍ଡାରନ୍ ଆଜାୟ୍ତା ତଙ୍ବୟ୍ ଆକୋସୋନ୍ ଡକୋତନ୍ । ଆରି ଆକୋସୋନ୍, କେଣ୍ତାରନ୍, ଡ ପିଙ୍କନ୍ ଆଡ୍ରକୋ ଅଡ଼୍କୋନ୍ ଆପମ୍ପମ୍ ଆସୁନ୍ନା ବାତ୍ତେ ଆତୁବ୍ତୁବ୍ ଡେତେ । ଆମନ୍ ତିଆସନ୍ ସାତଟା ପିଙ୍କନ୍ ତୁବା ଆରି ପିଙ୍କଞ୍ଜି ଏନ୍ନେଲେ ତମ୍ମିୟ୍ଲେ ଡକ୍କୋଆ ଡ ପିଙ୍କଞ୍ଜି ଆମୁକ୍କାବାନ୍ ସାଆର୍ତେ । ସତ୍ତର୍ ସୁନ୍ନାନ୍ ବାତ୍ତେ ସିପ୍ପାନ୍ ଡ ଅସାଜନ୍ ଆଡ୍ରକୋ ତୁବା । କେନ୍ ପିଙ୍କନ୍ ଆଡ୍ରକୋ ଡ ଅଡ଼୍କୋନ୍ଆତେ ମାୟ୍ଲେ ୩୫ ସେରେ ଆସୁନ୍ନା ବାତ୍ତେ ତନୁବନ୍ ଡେତେ । ଜାଗର୍ତ, ବରୁଲୋଙନ୍ ଆଡିଡ୍ ଞେନ୍ ଆମନ୍ଆଡଙ୍ ଅବ୍ତୁୟ୍ଲମ୍ ତିଅନ୍ତମ୍ ଅଡ଼୍କୋନ୍ ଲୁମ୍ଆ ।
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.