Juray Soura Bible
ତଙିୟ୍ନେ 24
ଅନଗଡ୍ ବଇନ୍ ଆ ସିଲୁ
ତି ସିଲଡ୍ ଇସ୍ସରନ୍ ମସାନ୍ଆଡଙ୍ ବରେନ୍, “ଆମ୍ୱେନ୍ ଆରୋଣ, ନାଦବ, ଅବିଉନ୍ ଡ ଇସ୍ରାଏଲ ଅମ୍ମୁଙ୍ଗଡ୍ମରଞ୍ଜି ସତୁରିଜଣ ବରୁନ୍ ଡାୟ୍ଲେ; ଅମଙ୍ଞେନ୍ ଜିରାୟ୍ବା ବନ୍ଡ ଅସୋୟ୍ ସଙାୟ୍ ସିଲଡ୍ ବରୁମ୍ଡାଲେ ଞେନ୍ଆଡଙ୍ ସେଙ୍କେରାଇଁୟ୍ବ୍ । ମସାନ୍ ପ୍ରବୁନ୍ ଆମଙ୍ ଇୟ୍ତାୟ୍, ବନ୍ଡ ଆନିଞ୍ଜି ଅମଙ୍ବାଞେନ୍ ଇନିଜାକିଁୟ୍, ଆରି ମନ୍ରାଞ୍ଜି ଆନିନ୍ ସରିନ୍ ଡାଯ୍ଡଙାଜିତଡ୍ ।”
ମସାନ୍ ଜିରେନ୍ ଆରି ଅଡ଼୍କୋନ୍ ମନ୍ରାନ୍ଆଡଙ୍ ଇସ୍ୱରନ୍ ଆବର୍ରନ୍ ଆବର୍ନେଜି ଇୟ୍ଲେ ବରେଜି, “ଅଡ଼୍କୋ ମନ୍ରାନ୍ ଆବସର୍ରଙନ୍ ଜାଲଙେଞ୍ଜି, ଇସ୍ୱରନ୍ ଇନିଜି ଆବର୍ନେ ଗାମେନ୍ ଇନ୍ଲେଞ୍ଜି ଅଡ଼୍କୋନ୍ ଏମାନ୍ନେତାୟ୍ ।” ମୋସାନ୍ ଇସ୍ୱରନ୍ ଆବର୍ନେ ଅଡ଼୍କୋନ୍ ଇଡେନ୍, ଆରି ଆବାର୍ତାନ୍ ଡୋତାନ୍ ବରୁଜଙ୍ବାନ୍ ମୋସାନ୍ ଅବୟ୍ ତନମ୍ପେଲନ୍ ତୁବେନ୍ ଆରି ଇସ୍ରାଏଲଞ୍ଜି ବାର କେଜ୍ଜାନ୍ ଆଞୁମ୍ଲୋଙ୍ ଅଡ଼୍କୋ କେଜ୍ଜାନ୍ ଆସନ୍ ତଙ୍ବୟ୍ ଅରେଙନ୍ ତମ୍ମିଜେନ୍ । ଇସ୍ରାଏଲନ୍ ଆ ଡାଙ୍ଗାଡ଼ାଜି ପତତ୍ତାୟେନ୍, ଆରି ଆନିଞ୍ଜି ପ୍ରବୁନ୍ ଆଞୁମ୍ଲୋଙ୍ ତନୁମୋଡ୍ ଅନମଙନ୍ ଡ ମନଙ୍ ଡକୋନେନ୍ ଆସନ୍ ଅନମଙନ୍ ଜେଲ୍ଜେଲ୍ ଜନ୍ତୁଜି ଅନମଙନ୍ ତିୟେଞ୍ଜି । ମସାନ୍ ମିଞାମନ୍ ପାଙ୍ଲେ ଲାଙ୍ଲେଡ୍ ସିମ୍ମାଲୋଙନ୍ ଡକ୍କୋଏନ୍ ଆରି ଲାଙ୍ଲେଡ୍ ଆମିଞାମ୍ ତନମ୍ପେଲ୍ଲୋଙନ୍ ସିନ୍ସିରାଏନ୍ । ନିୟମ ବଇନ୍ ପାଙ୍ଲେ ମନ୍ରାଞ୍ଜିଆଡଙ୍ ଅବ୍ନମ୍ଡଙେଞ୍ଜି, “ପ୍ରବୁନ୍ ଇନିଜି ବର୍ରନ୍, ତି ଅଡ଼୍କୋନ୍ ଇନ୍ଲେନ୍ ପାଡ଼େଲେ ଏମାନ୍ନେତାୟ୍ ଗାମ୍ଲେ ମନ୍ରାଞ୍ଜି ବର୍ରଞ୍ଜି ।” ମସାନ୍ ସିମ୍ମାଲୋଙନ୍ ଆମିଞାମ୍ ପାଙ୍ଲେ ମନ୍ରାଞ୍ଜିଆଡଙ୍ ସିନ୍ସିରାଏନ୍ । ଆନିନ୍ ଗାମେନ୍ ଇସ୍ୱରନ୍ ଆମ୍ବେଞ୍ଜିଆଡଙ୍ କେନ୍ ଅଡ଼୍କୋନ୍ ବନାଁୟ୍ବରନ୍ ଆତ୍ରିୟ୍ଲବେନ୍ ଆଡିଡ୍ ଆମ୍ବେନ୍ ସରିନ୍ ଅଙ୍ଗା ଆ ସନିବ୍ଡେୟ୍ ବରନ୍ ଲୁମେନ୍ କେନ୍ ଆମିଞାମ୍ ।
ମସାନ୍, ଆରୋଣନ୍, ନାଦବନ୍, ଅବିଉନ୍ ଡ ଇସ୍ରାଏଲ ଆମ୍ମୁଙ୍ଗଡ୍ମରଞ୍ଜି ସତୁରି ଜଣ ବରୁନ୍ ଡାଜେଞ୍ଜି, ଆରି ଆନିଞ୍ଜି ଇସ୍ରାଏଲନ୍ ଆ ଇସ୍ୱରଆଡଙ୍ ଗିଜେଞ୍ଜି । ଆନିଞ୍ଜି ଇସ୍ରାଏଲନ୍ ଆ ଇସ୍ୱରନ୍ଆଡଙ୍ ଗିଜେଞ୍ଜି । ଆତାଲ୍ଜଙନ୍ ରୁଆଙନ୍ ଅନ୍ତମ୍ ନିଡ଼ି ଡମନ୍ ଆ ନିଡ଼କାନ୍ତ ମଣିନ୍ ଅନ୍ତମ୍ ଆରି ସନାଆରନ୍ ରୁଆଙନ୍ ଅନ୍ତମ୍ ମଡ଼ିର୍ ଡକୋଏନ୍ । ଇସ୍ୱରନ୍ ଇସ୍ରାଏଲନ୍ ଆସୋଡ଼ାମର୍ଜିଆଡଙ୍ ଇନ୍ନିଙ୍ ଅନ୍ନେଙ୍ଗାଲୋ; ଆନିଞ୍ଜି ଇସ୍ୱରନ୍ଆଡଙ୍ ଗିଜେଞ୍ଜି, ଆରି ଆବ ରୁକ୍କୁନ୍ ଜୋମେଞ୍ଜି ଡ ଗାଏଞ୍ଜି ।
ମସାନ୍ ସିନୟ୍ ବରୁଲୋଙନ୍
ପ୍ରବୁନ୍ ମୋସାନ୍ଆଡଙ୍ ବରେନ୍, “ଆମନ୍ ବରୁନ୍ ଡାୟ୍ଲେ ଅମଙ୍ଞେନ୍ ଜିରାୟ୍, କେନ୍ ତେନେ ଡକୋନା, ମନ୍ରାଞ୍ଜି ଆଞନଙ୍ ଆସନ୍ ବନାୟ୍ବର୍ଞେନ୍ ଅଡ଼୍କୋନ୍ ଇଡ୍ଲାୟ୍ ।” ମସାନ୍ ଡ ଆ ସର୍ସିମରନ୍ ଜିଉସୟନ୍ ଅବ୍ଜାଡାଲନ୍, ଆରି ମସାନ୍ ସିନୟ୍ ବରୁନ୍ ଜିର୍ରେନ୍ । ଆନିନ୍ ଆମ୍ମୁଙ୍ଗଡ୍ମରଞ୍ଜିଆଡଙ୍ ବରେଞ୍ଜି, “ଇନ୍ଲେଞ୍ଜି ଅମଙ୍ବାନମ୍ ଅନ୍ରଙ୍ ଏୟର୍ନାଞନ୍ ଜାୟ୍ ଆମ୍ୱେନ୍ ଇନ୍ଲେଞ୍ଜିଆଡଙ୍ ଜଗ୍ଗେଲେ ଡକୋନାବା । ଆରୋଣନ୍ ଡ ଓରନ୍ ଅମଙ୍ବାବେନ୍ ଡକୋଜି; ଆରି ଆନ୍ନିଙ୍ ଆଗୋଡ଼େ ଡୁଙ୍ଲନାୟ୍ଡେନ୍ ଆନିନ୍ ଆନିଞ୍ଜିଆଡଙ୍ ବୁଜାୟ୍ତଜି ।”
ମସାନ୍ ବରୁନ୍ ସିନୟ୍ ବରୁନ୍ ଡାଜେନ୍, ଆରି ମେଗନ୍ ବାତ୍ତେ ଲୁବେନ୍ । ପ୍ରବୁନ୍ ଆପ୍ରଡ୍ଲନାଞନ୍ ସିନୟ୍ ବରୁଲୋଙନ୍ ସାଆର୍ ଡକୋଏନ୍ । ଆରି ତୁଡ୍ରୁ ଡିନ୍ନା ମେଗନ୍ ଲୁବ୍ଲେ ସେଡେନ୍, ସାତ ଡିନ୍ନାଲୋଙନ୍ ମେଗନ୍ ସିଲଡ୍ ମୋସାନ୍ଆଡଙ୍ ଓଡ୍ଡେଏନ୍ । ଇସ୍ରାଏଲ୍ମରଞ୍ଜି ଆଗିନିୟ୍ଗିୟ୍ଲୋଙ୍ ଆଗନେଡ଼େଙ୍ ବରୁଲୋଙନ୍ ଆଜୋମ୍ତୋଡନ୍ ଅନ୍ତମ୍ ପ୍ରବୁନ୍ ଆସନାଆର୍ ରାଙ୍ଡାଏନ୍ । ମସାନ୍ ମେଗଲୋଙନ୍ ଗନ୍ଲେ ବରୁନ୍ଆତୋଣ୍ଡୋ ଜିରେନ୍ । ଆନିନ୍ ତେତ୍ତେ ତମ୍ବା ତଗଲ୍ ବାକୁଡ଼ି ଡିନ୍ନା ଡକୋଲନେ ।
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.